Hoe om hoop te midde van wanhoop te vind

STEL jou voor jy ervaar die volgende: Al jou materiële besittings word vernietig, wat jou brandarm laat. Jou kinders—die vreugde in jou lewe—is dood. Jou huweliksmaat gee jou nie morele ondersteuning nie. Jou gesondheid het heeltemal ingegee. Elke dag is ’n pynlike ontbering.

Sou jy ’n rede kon vind om aan te hou lewe as dit jou lot in die lewe was? Of sou jy voor wanhoop swig?

Die droewige situasie wat so pas beskryf is, was die werklike ondervinding van Job, ’n man wat in Bybeltye geleef het (Job, hoofstukke 1, 2). Toe Job uiters bedruk gevoel het, het hy gekla: “Ek walg van my lewe.” Hy sou die dood as ’n verligting verwelkom het (Job 10:1; 14:13). Ondanks sy uiters groot lyding het Job egter sy onkreukbaarheid teenoor God gehandhaaf. Jehovah het derhalwe “die einde van Job meer geseën as sy begin”. Hy het dus in vrede gesterf, “oud en versadig van dae”.—Job 42:12, 17, vgl. NW.

Job het ’n voorbeeld van volharding gestel wat tot vandag toe geprys word. Sy beproewinge het sy persoonlikheid verbeter en ander beweeg om goeie werke te doen (Jakobus 5:10, 11). Bowenal het Job se onberispelike onkreukbaarheid Jehovah se hart verbly (Spreuke 27:11). Só het ’n nagmerrie van foltering uiteindelik dan ’n baie groot oorwinning van godsvrug, geloof en onkreukbaarheid geword wat seëninge meegebring het vir Job en vir almal wat deur sy voorbeeld gemotiveer is.

Hoop ondanks verskeie beproewinge

Jy verduur moontlik beproewinge soos dié wat Job ondervind het. Die dood van ’n geliefde het jou dalk emosioneel verpletter. Ernstige siekte het miskien jou bestaan in ’n pynlike ontbering verander. Dit kan lyk of ’n hartseer egskeiding jou hele lewe laat verbrokkel het. Ekonomiese teenspoed het jou miskien brandarm gelaat. Jy is moontlik die teiken van hewige vervolging deur hatige teenstanders van ware aanbidding. Die stryd om jou beproewinge te deurstaan, het jou dalk laat voel dat jou toekoms sonder enige hoop is.—1 Petrus 1:6.

In plaas van aan wanhoop toe te gee, kan jy jou eerder afvra: ‘Waarom ly ek?’ Jy ly omdat jy lewe in ’n wêreld wat “lê in die mag van die bose”, Satan die Duiwel (1 Johannes 5:19). Gevolglik ly almal. Op die een of ander manier word ons almal geraak deur die Duiwelgeïnspireerde haat vir die Koninkryksboodskap, die onvriendelike woorde van ander of die verskriklike dade van goddeloosheid wat so algemeen in hierdie “kritieke tye” is.—2 Timoteus 3:1-5.

As iets tragies in jou lewe gebeur het, was jy dalk ’n slagoffer van “tyd en lotgeval” (Prediker 9:11). Daarenteen loop dinge soms verkeerd in die lewe weens ons eie oorgeërfde sondigheid (Romeine 5:12). Selfs as jy ’n ernstige sonde begaan het, maar berou getoon en geestelike hulp gevra het, moet jy nie voel dat God jou verlaat het nie (Psalm 103:10-14; Jakobus 5:13-15). Hy is besorg oor ons, meer as enigiemand anders (1 Petrus 5:6, 7). Jy kan volle vertroue hê dat Jehovah ‘naby die is wat gebroke is van hart, en dat Hy die verlos wat verslae is van gees’ (Psalm 34:19). Ongeag hoe tragies of hewig jou beproewing mag wees, Jehovah kan jou die wysheid gee om dit die hoof te bied (Jakobus 1:5-8). Onthou altyd dat Jehovah alle wonde kan heel. As jy sy guns geniet, kan niks keer dat jy die prys van die lewe verkry nie.—Romeine 8:38, 39.

Kan beproewinge enige voordele inhou?

Daar is ’n ou gesegde wat lui: “Agter die wolke skyn tog die son.” Dit is ’n eenvoudige manier om te sê dat ’n mens altyd ’n rede tot hoop kan vind, ongeag hoe sleg dit gaan. Die doel agter alles wat in God se Woord geskrywe staan, is dat ‘ons hoop kan hê’ (Romeine 15:4). Ongeag hoe erg jou situasie is, die beloftes en beginsels in die Bybel kan vir jou hernieude vreugde en hoop verskaf.

Die Skrif toon dat “verdrukking kortstondig en lig” is wanneer dit vergelyk word met die ewige seëninge wat gebied word aan diegene wat God liefhet (2 Korintiërs 4:16-18). Die Bybel toon ook dat godvrugtige eienskappe wat te midde van beproewinge ontwikkel word van veel groter waarde is as roem of materiële rykdom (1 Johannes 2:15-17). Selfs lyding kan dus van groot nut wees (Hebreërs 5:8). Trouens, as jy toepas wat jy gedurende beproewinge leer, kan dit onverwagte seëninge vir jou meebring.

’n Moeilike beproewing kan jou minsamer maak. Jy erken moontlik dat jy in die verlede ’n karaktertrek gehad het wat ander geïrriteer en selfs jou geestelike vooruitgang belemmer het. Miskien was dit te veel selfvertroue. Nadat die een of ander rampspoed jou getref het, besef jy dalk skielik hoe broos jy is en hoeveel jy ander nodig het. As jou beproewing jou daardie les geleer het en jy die nodige veranderinge aangebring het, het dit jou tot voordeel gestrek.

Sê nou ander het dit in die verlede moeilik gevind om met jou oor die weg te kom omdat jy gesukkel het om jou humeur te beteuel? Dit kon jou selfs ’n mate van bekommernis veroorsaak het wat jou gesondheid betref (Spreuke 14:29, 30). Maar nou is die situasie miskien baie beter omdat jy op God se gees vertrou om jou te help om selfbeheersing te beoefen.—Galasiërs 5:22, 23.

Soos ander, het jy moontlik nie voorheen meegevoel gehad om barmhartig te wees teenoor diegene wat gesondig het nie. Maar as jy self in ’n situasie beland het waar jy barmhartigheid dringend nodig gehad het, is jy waarskynlik nou meer geneig om barmhartig teenoor ander te wees. Die opregte simpatie, besorgdheid en barmhartigheid wat aan jou betoon is, het jou laat besef dat jy soortgelyke eienskappe aan berouvolle oortreders moet toon. As jou pyn jou beweeg het om hierdie swakhede in jou persoonlikheid reg te stel, is dit een voordeel wat jy uit jou ondervinding getrek het. Jy het geleer dat ‘barmhartigheid hom triomfantlik verbly oor die oordeel’.—Jakobus 2:13; Matteus 5:7.

Sê nou dissipline deur die Christengemeente het daartoe gelei dat jy kosbare voorregte en die respek van ander verloor het? Moenie voor wanhoop swig nie. Tugmaatreëls help om die gemeente rein te hou, maar die doel daarvan is ook die geestelike herstel van die oortreder. “Geen dissipline lyk weliswaar op die oomblik vreugdevol nie, maar bedroewend; tog lewer dit later vir dié wat daardeur geoefen is vreedsame vrug op, naamlik regverdigheid” (Hebreërs 12:11). Hoewel dissipline ’n verpletterende slag kan wees, laat dit nie die persoon wat nederig berou toon sonder hoop nie. Koning Dawid van eertydse Israel is streng gedissiplineer vir sy oortredinge, maar hy was berouvol en het uiteindelik spesiale lof ontvang as ’n man wat besondere geloof gehad het.—2 Samuel 12:7-12; Psalm 32:5; Hebreërs 11:32-34.

’n Beproewing kan ’n diepgaande uitwerking op jou lewensbeskouing hê. In die verlede was jou aandag dalk toegespits op materialistiese doelwitte en prestasies wat vir jou erkenning en sosiale status in hierdie wêreld meegebring het. Miskien het ’n beproewing wat met ’n finansiële terugslag of geldelike verliese te doen het jou denke op belangriker dinge gerig. (Vergelyk Filippense 1:10.) Nou besef jy dat geestelike waardes en doelwitte in heilige diens die enigste dinge is wat ware geluk en blywende bevrediging meebring.

Vertrou op Jehovah

Die verrigting van heilige diens aan Jehovah kan lei tot vervolging en lyding deur die toedoen van mense wat jou Christelike oortuiging teëstaan. Jy voel miskien verdruk weens hierdie beproewing, maar dit kan voordelig wees. Hierdie toets kan jou geloof versterk. Wat meer is, ander wat vervolg word, kan bemoedig en versterk word deur na jou volharding te kyk. Ooggetuies van jou voortreflike gedrag kan beweeg word om God te verheerlik. Selfs jou teenstanders kan beskaamd word en jou voortreflike werke erken!—1 Petrus 2:12; 3:16.

Om wanhoop te vermy wanneer jy vervolg word, moet jy op Jehovah vertrou. Sy Woord toon dat verligting van ’n beproewing beslis sal kom, maar dit kom dalk nie so gou as wat jy wil hê nie. Intussen moet jy “nie ophou om te doen wat reg is nie” (2 Tessalonisense 3:13). Hou aan soek na maniere om beproewinge die hoof te bied en te volhard. Selfs wanneer dinge hopeloos lyk, moet jy “jou sorg op die HERE [werp], en Hý sal jou onderhou; Hy sal nooit die regverdige laat wankel nie” (Psalm 55:23). Moenie jou aan selfbejammering oorgee nie, maar dink eerder aan hoe geseënd jy is om Jehovah te ken, om ’n plek onder sy volk te hê en om die hoop op eindelose lewe te hê.—Johannes 3:16, 36.

Hou jou verstand gerig op die noodsaaklike dinge. Wend jou daagliks tot Jehovah in gebed en vra hom vir krag om te volhard (Filippense 4:6, 7, 13). Verwerp enige gedagte om weerwraak te neem op diegene wat jou laat ly. Laat sake in Jehovah se hande (Romeine 12:19). Soek voortdurend na maniere waarop jy jou persoonlikheid kan verbeter deur Christelike eienskappe aan te kweek (2 Petrus 1:5-8). Waardeer alles wat ander vir jou doen, met inbegrip van die ouer manne wat op liefdevolle wyse na jou geestelike behoeftes omsien (Hebreërs 13:7, 17). Wees getrou aan God en hou jou oë op die prys van die lewe, vol vertroue dat nie eens die dood jou daarvan kan beroof nie.—Johannes 5:28, 29; 17:3.

As jy tans groot droefheid of hewige beproewinge ervaar, moet jy ‘met jou hele hart op Jehovah vertrou’, en jou smart en ontberinge sal uiteindelik deur oorvloedige vreugde vervang word (Spreuke 3:5, 6, NW; Johannes 16:20). Ellende sal plek maak vir geluk wanneer God jou seën soos hy met Job gedoen het. Vandag se lyding is niks in vergelyking met jou beloning nie. (Vergelyk Romeine 8:18.) Jou getroue volharding kan ander bemoedig en jou help om die pragtige Christelike eienskappe aan te kweek wat met “die nuwe persoonlikheid” gepaardgaan (Efesiërs 4:23, 24; Kolossense 3:10, 12-14). Skep dus moed uit die apostel Petrus se wyse raad: “Laat . . . dié wat in ooreenstemming met die wil van God ly, aanhou om hulle siele aan ’n getroue Skepper toe te vertrou terwyl hulle goed doen.”—1 Petrus 4:19.

[Prent op bladsy 23]

Wees soos Job. Moet nooit hoop opgee nie

[Prent op bladsy 24]

Vertrou op Jehovah met jou hele hart