’n Geheim wat Christene nie durf bewaar nie!
“Ek het in die openbaar tot die wêreld gespreek. . . . Ek het niks in die geheim gespreek nie.”—JOHANNES 18:20.
1, 2. Wat beteken die Griekse woord mu·steʹri·on soos dit in die Skrif gebruik word?
DIE Griekse woord mu·steʹri·on is in die Nuwe Wêreld-vertaling van die Christelike Griekse Geskrifte 25 keer as “heilige geheim” en 3 keer as “verborgenheid” vertaal. ’n Geheim wat heilig genoem word, moet waarlik belangrik wees! Enigiemand wat bevoorreg is om kennis van so ’n geheim te kry, moet baie geëerd voel, aangesien hy waardig geag is om ’n geheim met die allerhoogste God van die heelal te deel.
2 Vine se Expository Dictionary of Old and New Testament Words bevestig dat “heilige geheim” in die meeste gevalle ’n meer gepaste vertaling as “verborgenheid” is. Dit sê van mu·steʹri·on: “In die [Christelike Griekse Geskrifte] dui dit nie op iets geheimsinnigs (soos met die Engelse woord mysterious) nie, maar dit verwys na wat bo die mens se natuurlike begripsvermoë is, en derhalwe slegs deur Goddelike openbaring bekend gemaak kan word, wat op ’n manier en tyd bekend gemaak word wat God bepaal het en dan slegs aan diegene wat deur Sy Gees verlig is. In die gewone sin impliseer ’n verborgenheid kennis wat nie onthul word nie; in die Skrif beteken dit waarheid wat geopenbaar is. Gevolglik is die woorde wat veral met die onderwerp in verband gebring word: ‘bekend gemaak’, ‘duidelik gemaak’, ‘onthul’, ‘verkondig’, ‘verstaan’, ‘verspreiding’.”
3. Hoe het die Christengemeente van die eerste eeu verskil van sekere geheimsinnige godsdiensgroepe?
3 Hierdie verduideliking vestig die aandag op ’n groot verskil tussen die geheimsinnige godsdiensgroepe wat in die eerste eeu gefloreer het en die pasgestigde Christengemeente. Terwyl diegene wat in geheime kultusse ingewy is dikwels deur ’n gelofte van stilswye ingeperk is om godsdiensleringe te bewaar, is Christene nooit so beperk nie. Dit is waar dat die apostel Paulus van “God se wysheid in ’n heilige geheim” gepraat het en dit “verborge wysheid” genoem het, dit wil sê, verborge van “die heersers van hierdie stelsel van dinge”. Dit is nie verborge van Christene aan wie God se gees dit geopenbaar het nie sodat hulle dit in die openbaar bekend kan maak.—1 Korintiërs 2:7-12; vergelyk Spreuke 1:20.
Die “heilige geheim” word geïdentifiseer
4. Wie is die middelpunt van die “heilige geheim”, en op watter manier?
4 Jesus Christus is die middelpunt van Jehovah se “heilige geheim”. Paulus het geskryf: “[Jehovah het] die heilige geheim van sy wil aan ons bekend gemaak. . . . Dit is volgens sy welbehae wat hy in homself voorgeneem het om aan die voleinding van die vasgestelde tye ’n administrasie te hê, naamlik om alle dinge weer byeen te bring in die Christus, die dinge in die hemele en die dinge op die aarde. Ja, in hom” (Efesiërs 1:9, 10). Paulus was selfs meer spesifiek wat die aard van die “heilige geheim” betref toe hy gewys het op die behoefte aan “’n juiste kennis van die heilige geheim van God, naamlik Christus”.—Kolossense 2:2.
5. Wat is by die “heilige geheim” betrokke?
5 Meer is egter daarby betrokke, want die “heilige geheim” is ’n geheim met baie fasette. Dit is nie bloot die identifisering van Jesus as die beloofde Saad of Messias nie; dit sluit die rol in wat hy toegewys is om in God se voorneme te vervul. Dit behels ’n hemelse regering, God se Messiaanse Koninkryk, soos Jesus duidelik gemaak het toe hy vir sy dissipels gesê het: “Aan julle word dit gegee om die heilige geheime van die koninkryk van die hemele te verstaan, maar aan daardie mense word dit nie gegee nie.”—Matteus 13:11.
6. (a) Waarom is dit reg om te sê dat die “heilige geheim” “langdurige tye verswyg is”? (b) Hoe is dit progressief geopenbaar?
6 ’n Lang tydperk sou verloop tussen die eerste keer wat God se voorneme gemeld is om ’n grondslag vir die Messiaanse Koninkryk te voorsien en die tyd wanneer “die heilige geheim . . . tot ’n einde” gebring sou word (Openbaring 10:7; Genesis 3:15). Dit sou met die oprigting van die Koninkryk tot ’n einde gebring word, soos ’n mens kan sien as jy Openbaring 10:7 en 11:15 met mekaar vergelyk. Trouens, sowat 4000 jaar het verloop van die tyd toe die eerste Koninkryksbelofte in Eden gegee is totdat die aangewese Koning in 29 G.J. verskyn het. Nog 1885 jaar het verbygegaan voordat die Koninkryk in 1914 in die hemele opgerig is. Die “heilige geheim” is dus progressief oor ’n tydperk van byna 6000 jaar geopenbaar. (Sien bladsy 16.) Paulus was inderdaad reg toe hy gepraat het van “die openbaring van die heilige geheim wat langdurige tye verswyg is maar nou openbaar gemaak is en . . . bekend gemaak is”.—Romeine 16:25-27; Efesiërs 3:4-11.
7. Waarom kan ons volle vertroue in die “getroue en verstandige slaaf”-klas hê?
7 In teenstelling met mense, wat ’n beperkte lewensduur het, voel Jehovah nooit dat die tyd hom dwing om sy geheime te openbaar voor dit gepas is nie. Hierdie feit moet verhinder dat ons ongeduldig word wanneer sekere Bybelvrae nie nou bevredigend verduidelik kan word nie. Beskeidenheid aan die kant van die “getroue en verstandige slaaf”-klas, wat die opdrag ontvang het om die Christenhuishouding van voedsel op die regte tyd te voorsien, voorkom dat hulle op aanmatigende wyse dinge vooruitloop en losse gissings maak oor dinge wat nog onduidelik is. Die slaafklas probeer dit vermy om dogmaties te wees. Hulle is nie te trots om te erken dat hulle tans nie elke vraag kan beantwoord nie en hou Spreuke 4:18 goed in gedagte. Maar hoe opwindend is dit tog om te weet dat Jehovah, op sy bestemde tyd en op sy manier, sal voortgaan om sy geheime te openbaar wat met sy voornemens verband hou! Ons moet nooit ongeduldig raak met Jehovah se reëling en weens ’n gebrek aan beskeidenheid die Een wat geheime openbaar probeer vooruitloop nie. Hoe gerusstellend is dit tog om te weet dat die kanaal wat Jehovah vandag gebruik dit nie doen nie! Hulle is getrou sowel as verstandig.—Matteus 24:45; 1 Korintiërs 4:6.
Die geheim wat geopenbaar is, moet verkondig word!
8. Hoe weet ons dat die “heilige geheim” bekend gemaak moet word?
8 Jehovah het nie sy “heilige geheim” aan Christene geopenbaar sodat hulle dit verborge kan hou nie. Dit moet bekend gemaak word, in ooreenstemming met die beginsel wat Jesus vir al sy volgelinge laat opteken het—nie net vir ’n paar geestelikes nie: “Julle is die lig van die wêreld. ’n Stad kan nie weggesteek word wanneer dit op ’n berg geleë is nie. Mense steek ’n lamp op en sit dit nie onder die maatemmer nie, maar op die lampstander, en dit skyn op almal in die huis. Laat julle lig insgelyks voor die mense skyn, sodat hulle julle voortreflike werke kan sien en heerlikheid kan gee aan julle Vader wat in die hemele is.”—Matteus 5:14-16; 28:19, 20.
9. Wat bewys dat Jesus nie ’n revolusionis was soos party beweer nie?
9 Jesus het geen revolusionistiese oogmerke gehad om ’n ondergrondse organisasie te stig met volgelinge wat geheime doelwitte nastreef nie. In die boek Early Christianity and Society het Robert M. Grant oor die verdediging van die vroeë Christene deur die tweede-eeuse apologeet Justinus die Martelaar geskryf: “As Christene revolusioniste was, sou hulle weggekruip het om hulle doel te bereik.” Maar hoe kon Christene ‘wegkruip’ en tegelykertyd soos ‘’n stad wees wat op ’n berg geleë is’? Hulle het nie hulle lig onder ’n maatemmer durf wegsteek nie! Die regering het derhalwe nie nodig gehad om hulle te vrees nie. Die skrywer het hulle verder beskryf as “die keiser se beste bondgenote wat vrede en goeie orde betref”.
10. Waarom moet Christene nie hulle identiteit geheim hou nie?
10 Jesus wou nie hê dat sy dissipels hulle identiteit as lede van ’n sogenaamde godsdienssekte geheim hou nie (Handelinge 24:14; 28:22). As ons vandag versuim om ons lig te laat skyn, sal dit Christus sowel as sy Vader, die Een wat geheime openbaar, mishaag, en dit sal ons nie gelukkig maak nie.
11, 12. (a) Waarom wil Jehovah hê dat die Christelike godsdiens bekend gemaak moet word? (b) Hoe het Jesus die regte voorbeeld gestel?
11 Jehovah “wil [nie] hê dat enigeen vernietig moet word nie, maar wil hê dat almal tot berou moet kom” (2 Petrus 3:9; Esegiël 18:23; 33:11; Handelinge 17:30). Die grondslag vir die vergifnis van die sondes van berouvolle mense is geloof in die losprysofferande van Jesus Christus, wat hom as ’n losprys vir almal gegee het—nie net vir ’n paar nie—sodat “elkeen wat geloof in hom beoefen, nie vernietig sal word nie maar die ewige lewe kan hê” (Johannes 3:16). Dit is noodsaaklik dat mense gehelp word om die nodige stappe te doen sodat hulle aan die vereistes sal voldoen om gedurende die komende oordeel as skape, en nie bokke nie, geoordeel te word.—Matteus 25:31-46.
12 Die ware Christelike godsdiens is nie iets wat weggesteek moet word nie; dit moet op elke gepaste manier moontlik bekend gemaak word. Jesus self het die regte voorbeeld gestel. Toe die hoofpriester hom oor sy dissipels en sy leer ondervra het, het hy gesê: “Ek het in die openbaar tot die wêreld gespreek. Ek het altyd in ’n sinagoge en in die tempel geleer, waar al die Jode bymekaarkom; en ek het niks in die geheim gespreek nie” (Johannes 18:19, 20). Watter godvresende persoon sal dit in die lig van hierdie voorbeeld waag om geheim te hou wat God gesê het openbaar gemaak moet word? Wie sal “die sleutel van die kennis” wat tot die ewige lewe lei, durf wegsteek? As hy dit doen, sal hy soos die godsdienshuigelaars van die eerste eeu wees.—Lukas 11:52; Johannes 17:3.
13. Waarom moet ons by elke moontlike geleentheid getuig?
13 Mag niemand ooit van ons as Jehovah se Getuies kan sê dat ons die boodskap van God se Koninkryk geheim gehou het nie! Hetsy die boodskap aanvaar of verwerp word, mense moet weet dat dit verkondig is. (Vergelyk Esegiël 2:5; 33:33.) Laat ons derhalwe elke moontlike geleentheid benut om met almal oor die boodskap van waarheid te praat, ongeag waar ons hulle teëkom.
Hake in Satan se kakebene
14. Waarom moet ons nie aarsel om ons aanbidding openlik te beoefen nie?
14 Op baie plekke word Jehovah se Getuies in toenemende mate die onderwerp van mediabelangstelling. Soortgelyk aan wat met die vroeë Christene gebeur het, word hulle dikwels verkeerd voorgestel en saam met verdagte godsdienskultusse en geheime organisasies in dieselfde kategorie geplaas (Handelinge 28:22). Kan dit wees dat die openlikheid waarmee ons die predikingswerk doen ons in groter mate aan aanvalle blootstel? Dit sal beslis onverstandig, en in stryd met Jesus se raad, wees om onnodig by geskille betrokke te raak (Spreuke 26:17; Matteus 10:16). Die voordelige werk om die Koninkryk te verkondig en mense te help om hulle lewe te verbeter, is egter nie iets wat weggesteek moet word nie. Dit verheerlik Jehovah, verhef hom en vestig die aandag op hom en op sy opgerigte Koninkryk. Die bemoedigende reaksie op Bybelwaarheid wat daar in onlangse tye in Oos-Europa en dele van Afrika was, is gedeeltelik as gevolg van die groter mate van openlikheid waarmee die waarheid nou daar verkondig kan word.
15, 16. (a) Wat bereik ons openlikheid en geestelike voorspoed, maar is dit ’n rede tot kommer? (b) Waarom sit Jehovah hake in Satan se kakebene?
15 Dit is waar dat die openlikheid waarmee Jehovah se Getuies die predikingswerk doen, die geestelike paradys wat hulle geniet en hulle voorspoed—wat menslike hulpbronne sowel as materiële bates betref—nie ongemerk bly nie. Hoewel dit opregtes van hart aantrek, kan hierdie faktore die afkeer van teenstanders opwek (2 Korintiërs 2:14-17). Trouens, dit kan uiteindelik Satan se magte uitlok om God se volk aan te val.
16 Moet dit ’n rede tot kommer wees? Nie volgens Jehovah se profesie wat in Esegiël hoofstuk 38 opgeteken staan nie. Dit voorspel dat Gog van Magog, ’n naam wat Satan die Duiwel beskryf sedert hy na die omgewing van die aarde neergewerp is ná die oprigting van die Koninkryk in 1914, ’n aanval op God se volk sal aanvoer (Openbaring 12:7-9). Jehovah sê vir Gog: “Sê: Ek sal optrek teen die land wat ooplê, ek sal kom by rustige mense wat in veiligheid woon; wat almal woon sonder muur en geen grendel of poorte het nie; om buit te maak en roof te rowe, om jou hand uit te steek teen die puinhope wat weer bewoon is, en teen ’n volk wat uit die nasies versamel is, wat vee en goed verwerf het, wat op die middelpunt van die aarde woon” (Esegiël 38:11, 12). Vers 4 toon egter dat God se volk nie sy aanval hoef te vrees nie, want dit is Jehovah wat dit laat gebeur. Maar waarom sal God ’n algehele aanval op sy volk toelaat—ja, selfs uitlok? In vers 23 lees ons Jehovah se antwoord: “So sal Ek My dan as groot en as heilig laat ken en Myself bekend maak voor die oë van baie nasies; en hulle sal weet dat Ek [Jehovah, NW] is.”
17. Hoe moet ons Gog se dreigende aanval beskou?
17 Pleks van Gog se aanval te vrees, sien Jehovah se volk dus met afwagting uit na hierdie verdere vervulling van Bybelprofesie. Hoe opwindend is dit om te weet dat Jehovah deur sy sigbare organisasie voorspoed te gee en te seën, hake in Satan se kakebene slaan en hom en sy leër na ’n nederlaag lei!
Nou meer as ooit!
18. (a) Tot watter besef kom baie mense nou, en waarom? (b) Hoe dien mense se reaksie op die Koninkrykspredikingswerk as ’n kragtige motivering?
18 In hedendaagse tye het Jehovah se Getuies hulle Bybelse standpunte met groot openlikheid bekend gemaak, al was dit nie gewild nie. Dekades lank al waarsku hulle teen die gevare van rook en dwelmgebruik, die kortsigtigheid van permissiewe kinderopvoeding, die nadele van vermaak wat deurtrek is van ongeoorloofde geslagsomgang en geweld asook die gevare van bloedoortappings. Hulle het mense ook bewus gemaak van die teenstrydighede van die evolusieteorie. Al hoe meer mense sê nou: “Jehovah se Getuies is toe nie verkeerd nie.” As ons nie ons opvattings so openlik bekend gemaak het nie, sou hulle nie so kon reageer nie. En moenie vergeet nie dat hulle, deur so iets te sê, nader daaraan kom om te sê: “Satan, jy is ’n leuenaar; Jehovah was toe al die tyd reg.” Wat ’n kragtige motivering is dit tog vir ons om aan te hou om Jesus se voorbeeld na te volg deur die woord van waarheid in die openbaar bekend te maak!—Spreuke 27:11.
19, 20. (a) Watter vasbeslotenheid het Jehovah se volk in 1922 uitgespreek, en is hierdie woorde nog van toepassing? (b) Hoe moet ons Jehovah se “heilige geheim” beskou?
19 Jehovah se volk besef al lank wat hulle verpligting in hierdie verband is. By ’n geskiedkundige byeenkoms in 1922 het J. F. Rutherford, die destydse president van die Wagtoringgenootskap, sy gehoor aangevuur deur te sê: “Wees nugter, wees waaksaam, wees bedrywig, wees dapper. Wees getroue en ware getuies vir die Here. Gaan voort met die stryd totdat elke oorblyfsel van Babilon verlate lê. Verkondig die boodskap wyd en syd. Die wêreld moet weet dat Jehovah God is en dat Jesus Christus die Koning van die konings en die Here van die here is. Dit is die dag der dae. Kyk, die Koning heers! Julle is sy reklame-agente. Adverteer, adverteer, adverteer dus die Koning en sy koninkryk.”
20 Hoewel hierdie woorde in 1922 belangrik was, is dit vandag, 75 jaar later, baie belangriker, want die tyd vir die openbaring van Christus as Regter en Wreker is baie nader! Die boodskap van Jehovah se opgerigte Koninkryk en van die geestelike paradys wat deur God se volk geniet word, is ’n “heilige geheim” wat eenvoudig te wonderlik is om te bewaar. Soos Jesus self so duidelik gesê het, moet sy volgelinge, met die hulp van die heilige gees, getuies van sy sleutelrol in Jehovah se ewige voorneme wees “tot in die mees afgeleë deel van die aarde” (Handelinge 1:8; Efesiërs 3:8-12). Trouens, as knegte van Jehovah, die God wat geheime openbaar, durf ons nie hierdie geheim vir onsself hou nie!
Hoe sal jy antwoord?
◻ Wat is die “heilige geheim”?
◻ Hoe weet ons dat dit verkondig moet word?
◻ Wat lei tot Gog se aanval op Jehovah se volk, en hoe moet ons dit beskou?
◻ Wat moet elkeen van ons vasbeslote wees om te doen?
[Venster op bladsy 16]
’n “Heilige geheim” wat progressief geopenbaar is
◻ Ná 4026 v.G.J.: God beloof om ’n Saad te verwek om Satan te vernietig.—Genesis 3:15
◻ 1943 v.G.J.: Die Abrahamitiese verbond word bekragtig, wat belowe dat die Saad deur Abraham sal kom.—Genesis 12:1-7
◻ 1918 v.G.J.: Geboorte van Isak as erfgenaam van die verbond.—Genesis 17:19; 21:1-5
◻ ca. 1761 v.G.J.: Jehovah bevestig dat die Saad deur Isak se seun Jakob sal kom.—Genesis 28:10-15
◻ 1711 v.G.J.: Jakob dui aan dat die Saad deur sy seun Juda sal kom.—Genesis 49:10
◻ 1070-1038 v.G.J.: Koning Dawid vind uit dat die Saad ’n nakomeling van hom sal wees en vir ewig as Koning sal heers.—2 Samuel 7:13-16; Psalm 89:36, 37
◻ 29-33 G.J.: Jesus word geïdentifiseer as die Saad, die Messias, die toekomstige regter en die aangewese Koning.—Johannes 1:17; 4:25, 26; Handelinge 10:42, 43; 2 Korintiërs 1:20; 1 Timoteus 3:16
◻ Jesus openbaar dat hy medeheersers en -regters gaan hê, dat die hemelse Koninkryk aardse onderdane gaan hê en dat al sy volgelinge Koninkryksverkondigers moet wees.—Matteus 5:3-5; 6:10; 28:19, 20; Lukas 10:1-9; 12:32; 22:29, 30; Johannes 10:16; 14:2, 3
◻ Jesus openbaar dat die Koninkryk op ’n spesifieke tydstip opgerig sal word, wat deur wêreldgebeure bevestig sou word.—Matteus 24:3-22; Lukas 21:24
◻ 36 G.J.: Petrus vind uit dat nie-Jode ook mede-erfgename van die Koninkryk sal wees.—Handelinge 10:30-48
◻ 55 G.J.: Paulus verduidelik dat die mede-erfgename van die Koninkryk tot onsterflikheid en onverderflikheid opgewek sal word gedurende Christus se teenwoordigheid.—1 Korintiërs 15:51-54
◻ 96 G.J.: Jesus, wat reeds oor sy gesalfde volgelinge heers, maak bekend dat daar uiteindelik 144 000 van hulle sal wees.—Efesiërs 5:32; Kolossense 1:13-20; Openbaring 1:1; 14:1-3
◻ 1879 G.J.: Zion’s Watch Tower wys op 1914 as ’n baie belangrike jaar in die uitvoering van God se “heilige geheim”
◻ 1925 G.J.: The Watch Tower verduidelik dat die Koninkryk in 1914 gebore is; die “heilige geheim” omtrent die Koninkryk moet verkondig word.—Openbaring 12:1-5, 10, 17
[Prente op bladsy 15]
Soos hulle Leier, Jesus, maak Jehovah se Getuies die Koninkryk van Jehovah in die openbaar bekend