“Jehovah sal sy volk nie versaak nie”
“Menigvuldig is die teëspoede van die regverdige, maar uit dié almal red die HERE hom.”—PSALM 34:20.
1, 2. (a) Hoe seën Jehovah vandag sy volk? (b) Wat verduur baie Christene, en watter vrae ontstaan?
TER vervulling van Bybelprofesieë woon Jehovah se aanbidders in ’n geestelike paradys (2 Korintiërs 12:1-4). Jehovah se Getuies behoort aan ’n internasionale broederskap wat deur liefde en eenheid gekenmerk word (Johannes 13:35). Hulle het ’n grondige en breedvoerige kennis van Bybelwaarhede (Jesaja 54:13). Hoe dankbaar is hulle tog teenoor Jehovah dat hy hulle die voorreg gun om in sy geestelike tent te vertoef!—Psalm 15:1.
2 Hoewel almal in Jehovah se organisasie geestelike voorspoed geniet, lyk dit of party in relatiewe vrede en kalmte lewe terwyl ander die een of ander soort beproewing verduur. Baie Christene bevind hulle oor lang tydperke in ’n bejammerenswaardige toestand en sonder enige vooruitsig op verligting. Dit is natuurlik om onder sulke omstandighede ontmoedig te raak (Spreuke 13:12). Is teëspoede ’n blyk van God se misnoeë? Bied Jehovah spesiale beskerming aan party Christene terwyl hy ander versaak?
3. (a) Is Jehovah verantwoordelik vir die teëspoede wat sy volk ondervind? (b) Waarom ondervind selfs getroue aanbidders van Jehovah menselyding?
3 Die Bybel antwoord: “Laat niemand, wanneer hy beproef word, sê: ‘Ek word deur God beproef’ nie. Want met bose dinge kan God nie beproef word nie en beproef hy self ook niemand nie” (Jakobus 1:13). Jehovah is die Beskermer en Onderhouer van sy volk (Psalm 91:2-6). “Jehovah sal sy volk nie versaak nie” (Psalm 94:14, NW). Dit beteken nie dat getroue aanbidders nie lyding sal ondervind nie. Die huidige wêreldstelsel van dinge word regeer deur mense wat inherent onvolmaak is. Baie is korrup, en ’n paar is geheel en al boos. Geeneen van hulle wend hulle tot Jehovah om wysheid nie. Dit het groot menselyding tot gevolg. Die Bybel sê duidelik dat Jehovah se volk nie altyd die droewige gevolge van menslike onvolmaaktheid en goddeloosheid kan vermy nie.—Handelinge 14:22.
Lojale Christene verwag om te ly
4. Wat kan alle Christene verwag so lank hulle in hierdie goddelose stelsel van dinge lewe, en waarom?
4 Hoewel Jesus se volgelinge geen deel van die wêreld is nie, lewe hulle te midde van hierdie stelsel van dinge (Johannes 17:15, 16). Satan word in die Bybel aan die kaak gestel as die mag wat hierdie wêreld beheer (1 Johannes 5:19). Gevolglik kan alle Christene vroeër of later verwag om voor ernstige probleme te staan te kom. Met dit in gedagte sê die apostel Petrus: “Bly nugter van verstand, wees waaksaam. Julle teenstander, die Duiwel, loop rond soos ’n brullende leeu en is daarop uit om iemand te verslind. Maar weerstaan hom, vas in die geloof, in die wete dat dieselfde dinge in die vorm van lyding in die hele gemeenskap van julle broers in die wêreld veroorsaak word” (1 Petrus 5:8, 9). Ja, die hele gemeenskap van Christene kan lyding verwag.
5. Hoe het Jesus dit duidelik gemaak dat getroue Christene droewige dinge in die lewe sou ondervind?
5 Al het ons Jehovah innig lief en is ons lojaal aan sy beginsels, sal ons droewige dinge in die lewe ondervind. Jesus het dit duidelik gemaak in sy illustrasie wat in Matteus 7:24-27 opgeteken is, waar hy ’n teenstelling gevorm het tussen diegene wat sy woorde gehoorsaam en diegene wat dit nie doen nie. Hy het gehoorsame dissipels met ’n verstandige man vergelyk wat ’n huis op ’n stewige rots bou. Diegene wat ongehoorsaam aan sy woorde is, het hy met ’n dwase man vergelyk wat sy huis op die sand bou. Ná ’n hewige storm het net die huis wat op die rots gebou is nog gestaan. In die geval van die verstandige man se huis is dit opmerkenswaardig dat ‘die reën neergestort het en die vloedwaters gekom het en die winde gewaai en aan daardie huis geruk het, maar dit het nie ingestort nie’. Jesus het nie belowe dat die verstandige man altyd vrede en kalmte sal hê nie. Daardie man se verstandige optrede het hom egter voorberei om veilig deur die storm te kom. ’n Soortgelyke gedagte word in die illustrasie van die saaier oorgedra. Daarin verduidelik Jesus dat selfs gehoorsame aanbidders wat “’n edel en goeie hart” het “met volharding vrug [sou] dra”.—Lukas 8:4-15.
6. Wie deurstaan die vuurproef in Paulus se illustrasie van die vuurvaste stowwe?
6 Toe die apostel Paulus aan die Korintiërs geskryf het, het hy beeldspraak gebruik om te toon hoe belangrik dit is om duursame eienskappe te hê wat ons kan help om beproewinge te deurstaan. Sulke vuurvaste stowwe soos goud, silwer en kosbare stene kom ooreen met godvrugtige eienskappe. (Vergelyk Spreuke 3:13-15; 1 Petrus 1:6, 7.) Daarenteen word vleeslike eienskappe met brandbare stowwe vergelyk. Paulus sê voorts: “Elkeen se werk sal aan die lig kom, want die dag sal dit uitwys, omdat dit deur middel van vuur geopenbaar sal word; en die vuur self sal aantoon hoedanig elkeen se werk is. As iemand se werk wat hy daarop gebou het, bly staan, sal hy ’n beloning ontvang” (1 Korintiërs 3:10-14). Hier verduidelik die Bybel weer eens dat dit onvermydelik is dat ons almal voor die een of ander vuurproef te staan sal kom.
7. Hoe kan die Skrif ons volgens Romeine 15:4 help om beproewinge te verduur?
7 Daar is talle verslae in die Bybel van lojale knegte van God wat teëspoede moes verduur, soms oor lang tydperke. Tog het Jehovah hulle nie versaak nie. Die apostel Paulus het waarskynlik sulke voorbeelde in gedagte gehad toe hy gesê het: “Alles wat tevore geskryf is, is tot ons onderrigting geskryf, sodat ons deur ons volharding en deur die vertroosting van die Skrif hoop kan hê” (Romeine 15:4). Kom ons beskou die voorbeelde van drie manne wat, hoewel hulle ’n hegte verhouding met God gehad het, baie teëspoede ondervind het.
Wat ons uit Bybelverslae leer
8. Wat het Jehovah in Josef se geval toegelaat, en hoe lank?
8 Jakob se seun Josef het van jongs af Jehovah se guns geniet. Sonder sy eie toedoen, het hy nietemin verskeie teëspoede ondervind. Hy is ontvoer en wreed behandel deur sy eie broers. Hy is as ’n slaaf verkoop in ’n vreemde land waar hy op grond van ’n leuen aangekla en in die “gevangenis” gesit is (Genesis 40:15). Daar “het [hulle] sy voete in boeie geknel, hy self het in die ysters gekom” (Psalm 105:17, 18). Gedurende die tyd toe Josef in slawerny en in die gevangenis was, het hy Jehovah ongetwyfeld herhaaldelik gesmeek dat hy vrygelaat kan word. Hoewel hy op verskillende maniere deur Jehovah versterk is, het hy nietemin sowat 13 jaar lank elke oggend nog as ’n slaaf of ’n gevangene wakker geword.—Genesis 37:2; 41:46.
9. Wat moes Dawid etlike jare verduur?
9 ’n Soortgelyke geval is dié van Dawid. Toe Jehovah ’n bekwame man uitgekies het om oor Israel te heers, het hy gesê: “Ek het Dawid, die seun van Isai, gevind, ’n man na my hart” (Handelinge 13:22). Hoewel Dawid Jehovah se guns gehad het, het hy baie verduur. Hy het etlike jare in die woestyn, in grotte, in skeure en in ’n vreemde land weggekruip omdat sy lewe in gevaar was. Hy is soos ’n wilde dier gejag en het gevolglik ontmoedig geraak en in vrees gelewe. Hy het nietemin in Jehovah se krag volhard. Dawid kon tereg uit eie ondervinding sê: “Menigvuldig is die teëspoede van die regverdige, maar uit dié almal red die HERE hom.”—Psalm 34:20.
10. Watter verskriklike teëspoed het Nabot en sy gesin getref?
10 In die profeet Elia se dag was daar net 7000 in Israel wat nie die knie voor die valse god Baäl gebuig het nie (1 Konings 19:18; Romeine 11:4). Nabot, wat waarskynlik een van hulle was, het die slagoffer van ’n vreeslike onreg geword. Hy het die vernedering verduur om van godslastering aangekla te word. Nadat hy skuldig bevind is, is hy veroordeel en het die koning beveel dat hy gestenig word, en sy bloed is deur honde opgelek. Selfs sy seuns is doodgemaak! Tog was hy onskuldig aan die klag. Die getuies teen hom was leuenaars. Die hele aangeleentheid was ’n sameswering wat deur koningin Isebel gesmee is sodat die koning Nabot se wingerd in die hande kon kry.—1 Konings 21:1-19; 2 Konings 9:26.
11. Wat vertel die apostel Paulus ons omtrent getroue manne en vroue in die Bybelgeskiedenis?
11 Josef, Dawid en Nabot is maar drie van die talle getroue manne en vroue wat in die Bybel genoem word wat teëspoede verduur het. Die apostel Paulus het ’n geskiedkundige oorsig van Jehovah se knegte deur die eeue geskryf. Daarin het hy gepraat van diegene wat “hulle beproewing deur bespottinge en geselinge gekry [het], trouens, meer as dit, deur boeie en gevangenisse. Hulle is gestenig, hulle is beproef, hulle is in stukke gesaag, hulle het gesterf deur slagting met die swaard, hulle het rondgeloop in skaapvelle, in bokvelle, terwyl hulle gebrek gely het, in verdrukking verkeer het, sleg behandel is; en die wêreld was hulle nie werd nie. Hulle het rondgeswerf in woestyne en berge en grotte en gate van die aarde” (Hebreërs 11:36-38). Maar Jehovah het hulle nie versaak nie.
Jehovah is besorg oor diegene wat ly
12. Wat is van die beproewinge wat Jehovah se Getuies vandag ondervind?
12 Wat van Jehovah se volk vandag? As ’n organisasie kan ons reken op Goddelike beskerming en veilige bewaring deur die laaste dae en die groot verdrukking (Jesaja 54:17; Openbaring 7:9-17). Maar as individue besef ons dat “tyd en onvoorsiene gebeurtenis” alle mense oorval (Prediker 9:11, NW). Vandag is daar talle getroue Christene wat teëspoede ondervind. Party is brandarm. Die Bybel praat van Christene wat “wese en weduwees” is en verdrukking ly (Jakobus 1:27). Ander ly as gevolg van natuurrampe, oorloë, misdaad, magsmisbruik, siekte en die dood.
13. Watter moeilike ondervindinge het onlangs bekend geword?
13 In die Wagtoringtakkantore se verslae vir 1996 aan die Bestuursliggaam van Jehovah se Getuies het hulle byvoorbeeld vertel dat party van ons broers en susters in haglike toestande gevange gehou word weens hulle gehoorsaamheid aan Bybelbeginsels. Drie gemeentes in ’n Suid-Amerikaanse land is ontbind toe guerrillagroepe honderde Getuies gedwing het om die gebied te verlaat. In ’n Wes-Afrikaland is ’n aantal Getuies doodgeskiet toe hulle in ’n skermutseling gedurende die burgeroorlog vasgekeer is. In ’n Sentraal-Amerikaanse land is die reeds kritieke finansiële situasie van party broers deur ’n orkaan vererger. In ander plekke waar armoede en voedseltekorte dalk nie ernstige probleme is nie, demp negatiewe invloede moontlik die vreugde van party. Ander word swaar belas deur die druk wat met die moderne lewenswyse gepaardgaan. As gevolg van die publiek se onverskilligheid, voel nog ander moontlik ontmoedig wanneer hulle die goeie nuus van die Koninkryk verkondig.
14. (a) Wat leer ons uit Job se voorbeeld? (b) Pleks van negatiewe denke te hê, wat moet ons doen wanneer ons benoudheid ondervind?
14 Hierdie situasies moet nie as bewys van God se misnoeë vertolk word nie. Dink aan die geval van Job en die talle teëspoede wat hy ondervind het. Hy was “’n man vroom en opreg” (Job 1:8). Hoe ontmoedig moes Job tog gevoel het toe Elifas hom van sonde beskuldig het! (Job, hoofstukke 4, 5, 22). Ons wil nie gou tot die slotsom kom dat ons teëspoede ondervind omdat ons Jehovah op een of ander manier teleurgestel het of omdat Jehovah sy seën onttrek het nie. Negatiewe denke wanneer ons voor verdrukking te staan kom, kan ons geloof laat verswak (1 Tessalonisense 3:1-3, 5). Wanneer ons benoudheid ondervind, is dit die beste om te peins oor die feit dat Jehovah en Jesus naby aan die regverdige is ongeag wat gebeur.
15. Hoe weet ons dat Jehovah diep besorg is oor die teëspoede wat sy volk ondervind?
15 Die apostel Paulus stel ons gerus wanneer hy sê: “Wie sal ons van die liefde van die Christus skei? Sal verdrukking of benoudheid of vervolging of honger of naaktheid of gevaar of swaard? . . . Ek is daarvan oortuig dat nie die dood of die lewe of engele of regerings of teenswoordige dinge of toekomstige dinge of magte of hoogte of diepte of enige ander skepping ons sal kan skei van God se liefde wat in Christus Jesus, ons Here, is nie” (Romeine 8:35, 38, 39). Jehovah is diep besorg oor ons en is bewus van ons lyding. Terwyl Dawid nog ’n voortvlugtige was, het hy geskryf: “Die oë van die HERE is op die regverdiges, en sy ore tot hulle hulpgeroep. Die HERE is naby die wat gebroke is van hart” (Psalm 34:16, 19; Matteus 18:6, 14). Ons hemelse Vader is besorg oor ons en het medelye met diegene wat ly (1 Petrus 5:6, 7). Hy voorsien wat ons nodig het om te volhard, ongeag watter lyding ons moontlik ondervind.
Jehovah se gawes onderskraag ons
16. Watter voorsiening van Jehovah help ons om te volhard, en hoe?
16 Hoewel ons nie ’n probleemvrye lewe in hierdie ou stelsel van dinge kan verwag nie, word ons “nie in die steek gelaat nie” (2 Korintiërs 4:8, 9). Jesus het beloof om ’n helper vir sy volgelinge te gee. Hy het gesê: “Ek sal die Vader versoek, en hy sal julle ’n ander helper gee om vir ewig by julle te wees, die gees van die waarheid” (Johannes 14:16, 17). Op Pinkster 33 G.J. het die apostel Petrus vir sy toehoorders gesê dat hulle “die heilige gees as vrye gawe” kon ontvang (Handelinge 2:38). Help die heilige gees ons vandag? Ja! Jehovah se werkende krag laat ons wonderlike vrugte voortbring: “Liefde, vreugde, vrede, lankmoedigheid, goedhartigheid, goedheid, geloof, sagmoedigheid, selfbeheersing” (Galasiërs 5:22, 23). Dit is alles eienskappe wat van onskatbare waarde is en wat ons help om te volhard.
17. Wat is party Bybelwaarhede wat ons geloof asook ons vasbeslotenheid om geduldig op Jehovah te hoop, versterk?
17 Die heilige gees help ons ook om te verstaan dat ons huidige verdrukkinge “kortstondig en lig” is in vergelyking met die beloning van ewige lewe (2 Korintiërs 4:16-18). Ons is daarvan oortuig dat God nie ons werke sal vergeet en die liefde wat ons vir hom getoon het nie (Hebreërs 6:9-12). Wanneer ons die geïnspireerde woorde van die Bybel lees, word ons bemoedig deur die voorbeelde van getroue knegte van die ou tyd wat baie teëspoede verduur het, maar wat gelukkig genoem is. Jakobus skryf: “Broers, neem die profete, wat in die naam van Jehovah gespreek het, as ’n voorbeeld van die lyding van kwaad en die beoefening van geduld. Kyk! Ons noem dié wat volhard het gelukkig” (Jakobus 5:10, 11). Die Bybel belowe “krag wat bo die normale is” wat ons help om beproewinge te verduur. Jehovah seën ons ook met die opstandingshoop (2 Korintiërs 1:8-10; 4:7). As ons die Bybel daagliks lees en oor hierdie beloftes peins, sal ons ons geloof versterk, asook ons vasbeslotenheid om geduldig op God te hoop.—Psalm 42:6.
18. (a) Wat word ons in 2 Korintiërs 1:3, 4 aangemoedig om te doen? (b) Hoe kan Christenopsieners ’n bron van vertroosting en verkwikking wees?
18 Daarbenewens het Jehovah ons die geestelike paradys gegee waarin ons die ware liefde van ons Christenbroers en -susters kan geniet. Ons almal het die verantwoordelikheid om mekaar te vertroos (2 Korintiërs 1:3, 4). Veral Christenopsieners kan ’n vername bron van vertroosting en verkwikking wees (Jesaja 32:2). As “gawes in die vorm van mense” het hulle die opdrag om diegene wat ly op te bou, om ‘vertroostend met die terneergedrukte siele te praat’ en om ‘die swakkes te ondersteun’ (Efesiërs 4:8, 11, 12; 1 Tessalonisense 5:14). Ouer manne word aangemoedig om goed gebruik te maak van Die Wagtoring en Ontwaak!, asook ander publikasies wat deur “die getroue en verstandige slaaf” voorsien word (Matteus 24:45-47). Dit bevat ’n oorvloed van Bybelse raad wat ons kan help om party van die probleme wat ons met angs vervul op te los—en selfs te voorkom. Mag ons Jehovah navolg deur mekaar gedurende moeilike tye te vertroos en aan te moedig!
19. (a) Wat help ons om sommige teëspoede te vermy? (b) Op wie moet ons derhalwe vertrou, en wat sal ons in staat stel om beproewinge te verduur?
19 Namate ons dieper in die laaste dae ingaan en toestande in die huidige stelsel van dinge versleg, doen Christene wat hulle kan om teëspoed te vermy (Spreuke 22:3). Goeie oordeel, gesonde verstand en kennis van Bybelbeginsels kan ons help om wyse besluite te neem (Spreuke 3:21, 22). Ons luister na Jehovah se Woord en gehoorsaam dit sodat ons nie onnodig foute maak nie (Psalm 38:5). Ons besef nietemin dat al span ons ons ook hoe in, dit nie lyding heeltemal uit ons lewe kan verwyder nie. In hierdie stelsel van dinge kom talle regverdiges voor ernstige teëspoede te staan. Ons kan egter ons beproewinge verduur met volle vertroue dat ‘Jehovah sy volk nie sal versaak nie’ (Psalm 94:14, NW). En ons weet dat hierdie stelsel van dinge en sy beproewinge binnekort iets van die verlede sal wees. Mag ons derhalwe vasbeslote wees om nie “[op te hou] om te doen wat voortreflik is nie, want op die regte tyd sal ons maai indien ons nie moeg word nie”.—Galasiërs 6:9.
Wat het ons geleer?
◻ Watter beproewinge ondervind die hele gemeenskap van Christene?
◻ Watter voorbeelde in die Bybel help ons verstaan dat teëspoede nie bewys van Jehovah se misnoeë is nie?
◻ Hoe voel Jehovah oor die teëspoede wat sy volk ondervind?
◻ Wat is van die gawes van Jehovah wat ons help om beproewinge te verduur?
[Prente op bladsy 10]
Dawid, Nabot en Josef is drie wat teëspoede ondervind het