Ware geluk—Wat is die sleutel?

DIE mens is geskep om gelukkig te wees. Waarom kan ons daarvan seker wees? Wel, dink aan die mens se begin.

Jehovah God het die eerste mensepaar geskep met die vermoë om gelukkig te wees. Adam en Eva is in ’n paradys, ’n tuin van genot wat Eden genoem is, geplaas. Die Skepper het hulle al die noodsaaklike fisiese dinge vir die lewe gegee. Die tuin het “allerhande bome [gehad], . . . begeerlik om te sien en goed om van te eet” (Genesis 2:9). Adam en Eva was gesond, sterk en mooi—hulle was volmaak en waarlik gelukkig.

Maar wat was die sleutel tot hulle geluk? Was dit hulle paradysagtige tuiste of miskien hulle fisiese volmaaktheid? Hierdie gawes van God het wel tot hulle genot in die lewe bygedra. Maar hulle geluk het nie van sulke tasbare dinge afgehang nie. Die tuin van Eden was meer as ’n pragtige park. Dit was ’n heiligdom, ’n plek om God te aanbid. Die sleutel tot hulle ewige geluk was hulle vermoë om ’n liefdevolle verhouding met die Skepper op te bou en te behou. Om gelukkig te wees, moes hulle eers geestelik wees.—Vergelyk Matteus 5:3.

Geestelikheid lei tot geluk

Adam het aanvanklik ’n geestelike verhouding met God gehad. Dit was ’n liefdevolle, tere verhouding soos dié van ’n seun met sy vader (Lukas 3:38). In die tuin van Eden het Adam en Eva ideale omstandighede gehad wat hulle toegelaat het om hulle begeerte om te aanbid te bevredig. Deur hulle gewillige, liefdevolle gehoorsaamheid aan Jehovah sou hulle veel groter eer en heerlikheid tot God kon bring as die diereskepping. Hulle kon God met hulle verstandelike vermoëns loof vir sy wonderlike eienskappe en kon sy soewereiniteit ondersteun. Hulle kon ook voortgaan om Jehovah se liefdevolle en tere sorg te ontvang.

Hierdie noue omgang met die Skepper en hulle gehoorsaamheid aan sy wette het ons eerste ouers ware geluk laat smaak (Lukas 11:28). Daar is nie van Adam en Eva verwag om baie jare van leer en probeer deur te gaan voordat hulle die sleutel tot geluk ontdek het nie. Hulle was gelukkig van die oomblik toe hulle geskep is. Om in vrede met God en onderdanig aan sy gesag te lewe, het hulle gelukkig gemaak.

Daardie geluk het egter geëindig die oomblik toe hulle ongehoorsaam aan God was. Deur in opstand te kom, het Adam en Eva hulle geestelike verhouding met Jehovah verbreek. Hulle was nie meer God se vriende nie (Genesis 3:17-19). Dit lyk of Jehovah die dag toe hulle uit die tuin gesit is alle kommunikasie met hulle beëindig het. Hulle het hulle volmaaktheid, die vooruitsig op ewige lewe en hulle tuintuiste verloor (Genesis 3:23). Maar nog belangriker, omdat hulle hulle verhouding met God verloor het, het hulle die sleutel tot geluk verloor.

Ons vermoë om te kies

Voor Adam en Eva gesterf het, het hulle aan hulle nageslag hulle menslike karaktertrekke en hulle ingeskape gewete oorgedra, asook hulle vermoë om geestelikheid te kan ontwikkel. Die mensdom is nie tot die vlak van die diere verlaag nie. Ons kan met die Skepper versoen raak (2 Korintiërs 5:18). As intelligente skepsele het mense nog steeds die vermoë om te kies of hulle aan God gehoorsaam wil wees of nie. Dit is baie eeue later toegelig toe Jehovah die nuutgevormde nasie Israel die geleentheid gegee het om die lewe of die dood te kies. Deur sy woordvoerder Moses het God gesê: “Ek het jou vandag voorgehou die lewe en die geluk, en die dood en die ongeluk.”—Deuteronomium 30:15-18.

Selfs nou, duisende jare ná die oorspronklike Paradys verloor is, kan ons as mense nog steeds die regte keuse maak. Ons het ’n werkende gewete en ’n basiese vermoë om God se wette te gehoorsaam. Die Bybel praat van “die mens wat ons innerlik is” (2 Korintiërs 4:16; Romeine 7:22). Hierdie uitdrukkings hou verband met die ingebore vermoë wat ons almal het om God se persoonlikheid te weerspieël, om sy gedagtes te dink, om geestelik te wees.

Die apostel Paulus het aangaande ons sedelike natuur en gewete geskryf: “Telkens as mense van die nasies wat geen wet het nie van nature die dinge van die wet doen, is hierdie mense, al het hulle geen wet nie, ’n wet vir hulleself. Dit is húlle wat toon dat die wese van die wet in hulle harte geskrywe staan, terwyl hulle gewete saam met hulle getuig en hulle, tussen hulle eie gedagtes, beskuldig of selfs verontskuldig word.”—Romeine 2:14, 15.

Goddelike wysheid en gehoorsaamheid—die sleutel

’n Mens kan egter vra: ‘Waarom is ongelukkigheid so algemeen as almal ’n natuurlike geneigdheid daartoe het om God te aanbid en om gevolglik ware geluk te geniet?’ Dit is omdat elkeen van ons geestelik moet ontwikkel om gelukkig te wees. Hoewel die mens oorspronklik na die beeld van God geskep is, het hy van sy Skepper vervreemd geraak (Efesiërs 4:17, 18). Gevolglik moet elkeen van ons daadwerklike stappe doen om ’n geestelike verhouding met God op te bou en te behou. So ’n verhouding sal nie vanself ontwikkel nie.

Jesus het twee belangrike beginsels uiteengesit met betrekking tot die ontwikkeling van geestelikheid. Een is om juiste kennis van God op te doen, en die ander is om ons gehoorsaam aan sy wil te onderwerp (Johannes 17:3). Jesus het die Woord van God aangehaal en gesê: “Daar staan geskrywe: ‘Die mens moet nie van brood alleen lewe nie, maar van elke uiting wat deur Jehovah se mond uitgaan’” (Matteus 4:4). By ’n ander geleentheid het Jesus gesê: “My voedsel is om die wil te doen van hom wat my gestuur het en om sy werk te volbring” (Johannes 4:34). Ons het nie nodig om geluk te soek deur baie dekades van leer en probeer nie. Ondervinding is nie die sleutel tot geluk nie. Nee, dit is alleenlik Goddelike wysheid en gehoorsaamheid aan ons Skepper wat tot ware vreugde in die lewe kan lei.—Psalm 19:8, 9; Prediker 12:13.

Dit is dus duidelik dat die geluk wat die gevolg is wanneer Goddelike wysheid aan die dag gelê word en ’n goeie naam by God gehandhaaf word, nie iets is wat buite ons bereik is nie (Handelinge 17:26, 27). Die kennis van Jehovah en sy voornemens is vir almal beskikbaar. Met miljarde eksemplare in baie tale is die Bybel steeds die boek met die grootste verspreiding ter wêreld. Die Bybel kan jou help om God se vriend te word en om ware geluk te geniet, want die Skrif sê vir ons: “Gelukkig is die volk wie se God Jehovah is!”—Psalm 144:15, NW.

[Venster op bladsy 6]

Stappe tot geluk

1. Waardeer geestelikheid en kweek dit aan. Jesus het gesê: “Gelukkig Is . . . dié wat die woord van god hoor en dit nakom!”—Lukas 11:28.

2. Erken dat God se goedkeuring belangriker as rykdom of luukshedee2 is. Paulus het geskryf: “Dit is ongetwyfeld ’n middel tot groot gewin, hierdie godvrugtige toegewydheid tesame met vergenoegdheid. . . . as ons dus voedsel, klere en onderdak het, sal ons met hierdie dinge tevrede wees.”—1 Timoteus 6:6-8.

3. Streef daarna om ’n Bybelopgeleide gewete aan te kweek en daarop te reageer.—Romeine 2:14, 15.

4. Wees vasbeslote om Jehovah God te gehoorsaam en sodoende te kwalifiseer om ’n lid van sy volk te wees. Dawid van die ou tyd het geskryf: “Gelukkig is die volk wie se God Jehovah is!”​—⁠psalm 144:​15, NW.

[Prent op bladsy 7]

“Gelukkig is dié wat bewus is van hulle geestelike behoefte.”—Matteus 5:3