Waardeer jy werklik die seëninge van Jehovah?

KENITSJI, ’n middeljarige man, het ’n apteek besoek om medisyne vir ’n ligte verkoue te kry. Toe hy die medisyne neem, het dit ’n allergiese reaksie veroorsaak wat hom ’n jeukerige uitslag en waterblase oor sy hele liggaam laat kry het. Dit is geen wonder nie dat Kenitsji begin twyfel het of die apteker genoeg aandag aan sy behoeftes geskenk het.

Sommige beskou Jehovah God miskien op dieselfde manier as wat Kenitsji die apteker beskou het. Hulle twyfel of die almagtige God, Jehovah, werklik ’n persoonlike belangstelling in ons het. Hoewel hulle erken dat God goed is, is hulle nie oortuig daarvan dat hy vir ons as individue omgee nie. Dit is veral die geval wanneer dinge vir hulle verkeerd loop of wanneer hulle moeilike probleme ervaar omdat hulle by Bybelbeginsels bly. Weens ’n gebrek aan onderskeidingsvermoë beskou hulle hulle probleme soos die jeukerige uitslag en waterblase wat Kenitsji onverwags ontwikkel het, asof God op die een of ander wyse daarvoor verantwoordelik is.—Spreuke 19:3.

Jehovah moenie met onvolmaakte mense vergelyk word nie. Mense se kennis en vermoë is beperk. Hulle kan nie die ware behoeftes van ander ten volle onderskei nie, net soos Kenitsji se apteker dit nie kon doen nie. Maar niks ontgaan Jehovah se oë nie. Jehovah help ons dikwels sonder dat ons daarvan bewus is en dit waardeer, omdat ons geneig is om te let op wat ons nie het nie en om die talle seëninge wat ons wel het oor die hoof te sien. Voordat ons Jehovah sommer die skuld gee vir enige probleme waarvoor ons te staan kom, moet ons eerder probeer onderskei watter seëninge van Jehovah ons geniet.

Volgens Webster’s Ninth New Collegiate Dictionary kan ’n “seën” omskryf word as “iets wat tot geluk of welstand bydra”. Besef jy dat dit veral met seëninge van Jehovah die geval is?

Weergaloos as ’n Voorsiener

Wanneer ’n vrou sê dat haar man ’n goeie voorsiener is, bedoel sy gewoonlik dat hy voldoende voorsien in die behoeftes van die gesin deur voedsel, blyplek en klere vir die gesin se geluk en welstand te voorsien. Hoe goed is Jehovah as ons Voorsiener? Beskou ons planeet Aarde, die mens se tuiste, van naderby. Dit is 150 000 000 kilometer van die son af, net die regte afstand vir die gematigde temperature wat lewe op aarde moontlik maak. Ons aardbol se helling van 23,5 grade is volmaak ontwerp, sodat seisoensveranderinge plaasvind wat tot ryk oeste bydra. As gevolg hiervan voed die aarde meer as vyfmiljard mense. Jehovah is inderdaad ’n wonderlike Voorsiener!

Daarbenewens verseker die Bybel ons dat Jehovah ’n intense belangstelling in ons as individue en in ons welstand het. Dink net daaraan dat Jehovah elkeen van die miljarde sterre by name ken en dat selfs nie een mossie op die grond val sonder dat hy daarvan weet nie (Jesaja 40:26; Matteus 10:29-31). Hoeveel te meer gee hy nie om vir mense wat hom liefhet en met die kosbare bloed van sy geliefde Seun, Jesus Christus, gekoop is nie! (Handelinge 20:28). Die wyse man het dit goed gestel: “Die seën van Jehovah—dít maak ryk, en hy voeg daar geen pyn by nie.”—Spreuke 10:22, NW.

Seëninge wat ons ryk maak

Ons besit iets van groot waarde waarvoor ons innig dankbaar moet wees. Wat is dit? Die Bybel identifiseer dit wanneer dit sê: “Die wet van u mond is vir my beter as duisende stukke goud en silwer” (Psalm 119:72; Spreuke 8:10). Hoe waardevol uitgesoekte goud ook al mag wees, die wet van Jehovah is baie begeerliker. Juiste kennis van sy wet tesame met die insig en onderskeidingsvermoë wat Jehovah aan opregte waarheidsoekers voorsien, moet as ’n skat bewaar word. Dit rus ons toe om ons te beskerm, om moeilike situasies die hoof te bied, om probleme suksesvol te hanteer en sodoende tevrede en gelukkig te wees.

Dit geld selfs vir dié wat baie jonk is. Let op hoe ’n klein dogtertjie haar probleme opgelos het deur die wet van Jehovah te volg. Die dogtertjie, Akemi, woon naby Tokio. Haar vader en moeder het haar volgens Bybelbeginsels opgelei en het hulle dogter deur woord en voorbeeld ’n liefde vir Jehovah en haar naaste help ontwikkel. Omdat hulle voorsien het watter probleme sy op skool sou ondervind, het hulle haar so goed moontlik daarop probeer voorberei. Maar toe Akemi laerskool toe is, het party van haar klasmaats haar as “anders” beskou omdat sy voor ete gebid het en haar gewetensgetrou van sekere onskriftuurlike bedrywighede onthou het. Kort voor lank was sy die teiken van ’n groep afknouers wat haar ná skool voorgekeer het en haar in die gesig geklap, haar arms gedraai en haar bespot het.

Klein Akemi het nie kwaad vir kwaad vergeld nie, maar sy het ook nie voor die afknouers gekruip nie. Sy het eerder probeer toepas wat sy geleer het. Weens haar goeie gedrag en moed het sy die respek van baie van haar medeskoliere gewen. Hulle het die saak onder die onderwyser se aandag gebring, en sedertdien is Akemi nie weer by die skool afgeknou nie.

Wat het Akemi gehelp om ’n moeilike situasie suksesvol die hoof te bied? Die juiste kennis, insig en wysheid van Jehovah wat haar ouers by haar ingeskerp het. Sy was goed bekend met Jesus se volharding, en dit het haar beweeg om sy voorbeeld na te volg. Die Bybel het haar gehelp om te onderskei dat sommige mense uit onkunde verkeerde dinge doen, en dit het haar beweeg om die verkeerde dinge wat daardie afknouers gedoen het te haat, hoewel die mense self nie gehaat moet word nie.—Lukas 23:34; Romeine 12:9, 17-21.

Geen ouer sal natuurlik wil hê dat sy of haar kind bespot of afgeknou moet word nie. Maar jy kan jou voorstel hoe trots Akemi se ouers was toe hulle al die besonderhede hoor van wat gebeur het. Sulke kinders is waarlik ’n seën van Jehovah.—Psalm 127:3; 1 Petrus 1:6, 7.

Wag geduldig op Jehovah

Maar soms moet jy op Jehovah se tyd wag voordat jy sy seëninge ontvang. Jehovah ken jou situasie en voorsien in elke behoefte wanneer dit jou die meeste tot voordeel sal strek (Psalm 145:16; Prediker 3:1; Jakobus 1:17). Jy hou moontlik baie van vrugte, maar wat sal jy van ’n gasheer dink wat vir jou vrugte bedien voordat dit geskik is om te eet? Of dit nou ’n appel, ’n lemoen of iets anders is, jy sal verkies dat jou vrug ryp, sappig en soet moet wees. Net so voorsien Jehovah wat jy nodig het op die regte tyd—nie te vroeg en nie te laat nie.

Dink aan die ondervinding van Josef. Sonder sy eie toedoen het hy in ’n Egiptiese gevangenis beland. ’n Medegevangene, die skinker van Farao, het verwag om vrygelaat te word en het belowe om Josef se situasie onder Farao se aandag te bring. Ná sy vrylating het hy egter heeltemal van Josef vergeet. Dit het gelyk asof Josef aan sy lot oorgelaat is. Maar ’n volle twee jaar later is hy oplaas uit die gevangenis vrygelaat en is hy uiteindelik die tweede heerser in Egipte gemaak. Josef was nie ongeduldig nie, maar het eerder op Jehovah gewag. Hiervoor is hy op ’n wyse geseën wat tot die behoud van Israeliete sowel as Egiptenaars gelei het.—Genesis 39:1–41:57.

Masasji was ’n ouer man in ’n gemeente in die noorde van Japan. Hy was nie in ’n gevangenis nie, maar hy moes op Jehovah wag. Waarom? Sedert die Bedieningsopleidingskool, ’n skool om bekwame Christenbedienaars op te lei, in Japan begin is, wou hy dit baie graag bywoon. Hy het vurig gebid oor die voorreg. Sy pioniermaat is genooi, maar ten spyte van Masasji se groot begeerte is hy nie genooi nie. Hy was baie teleurgesteld.

Hy het nietemin stappe gedoen om sy gevoelens te verwerk. Hy het die Bybel en publikasies wat deur die Wagtoringgenootskap uitgegee word, bestudeer en hom toegespits op onderwerpe soos om nederig te wees en ’n mens se emosies te beheers. Hy het sy denke reggestel en sodoende meer voldoening in sy toewysing gesmaak. Toe het hy, op ’n tydstip dat hy dit die minste verwag het, ’n uitnodiging ontvang om die skool by te woon.

Aangesien hy eienskappe soos geduld en nederigheid aangekweek het, het hy veel meer by die skool baat gevind. Later is Masasji die voorreg gegun om sy broers as ’n reisende opsiener te dien. Ja, Jehovah het geweet wat Masasji nodig gehad het en het dit voorsien juis toe dit die beste resultate sou oplewer.

Probeer sy seëninge verkry

Jehovah is derhalwe nie soos die apteker nie. Hoewel ons miskien nie Jehovah se sorg en belangstelling raaksien nie, kom sy seëninge in verskeie vorme—op tye en maniere wat ons die meeste tot voordeel strek. Hou dus aan om sy seëninge te probeer verkry. Onthou dat jy reeds baie redes het om dankbaar te wees. Jy is met die basiese voorsienings geseën om op die aarde aan die lewe te bly. Jy is van kennis oor Jehovah en sy volmaakte weë voorsien. Jy is insig gegee. En jy het onderskeidingsvermoë verkry. Dit alles dra tot jou welstand en geluk by.

Om die seën van Jehovah in selfs groter mate te ervaar, moet jy voortgaan om die Bybel gereeld te bestudeer. Vra Jehovah om jou te help om die leringe in sy geïnspireerde Woord, wat soos juwele is, te verstaan en toe te pas. Dit sal jou waarlik ryk maak, sodat jy niks sal kortkom nie. Ja, dit sal nou vir jou geluk en tevredenheid verskaf en tot die ewige lewe in die komende nuwe wêreld lei.—Johannes 10:10; 1 Timoteus 4:8, 9.

[Prent op bladsy 23]

Jehovah se seën is waardevoller as goud