Ons geloof in God se Woord is versterk
MEER mense het die Bybel al gelees as enige ander boek. Maar hoeveel glo die boodskap wat daarin voorkom? Die Bybel self verduidelik: “Geloof is nie iets wat alle mense besit nie” (2 Tessalonisense 3:2). Ons word beslis nie met geloof gebore nie. Dit moet ontwikkel word. Selfs dié wat ’n mate van geloof het, moet dit nie as vanselfsprekend aanneem nie. Geloof kan verswak en doodgaan. Inspanning is derhalwe nodig om “gesond in geloof” te bly.—Titus 2:2.
Dit is dus met goeie rede dat die Bestuursliggaam van Jehovah se Getuies die tema “Geloof in God se Woord” vir hulle reeks streekbyeenkomste vir 1997/98 gekies het. Miljoene Getuies en ander het dus die voorreg gehad om saam te vergader om hulle geloof in God se Woord te versterk.
God se Woord is waarheid—die grondslag van ons geloof
Dit was die tema van die byeenkoms se eerste dag. Dit het begin deur almal wat teenwoordig was te prys. Mense se teenwoordigheid by die byeenkoms het bewys gelewer van hulle respek vir die Bybel. Maar gedagteprikkelende vrae is gestel oor die gehalte van ons geloof: ‘Kan ons ons godsdiensoortuigings verdedig deur God se Woord as die gesag te gebruik? Toon ons waardering vir geestelike voedsel deur nooit die Bybel, gemeentelike vergaderinge en Bybelpublikasies as vanselfsprekend aan te neem nie? Groei ons in liefde, juiste kennis en onderskeidingsvermoë?’ Die spreker het almal aangemoedig om aandagtig te luister en gesê: “Hierdie ‘Geloof in God se Woord’-streekbyeenkoms is voorberei om ons te help om onsself te ondersoek en te bepaal hoeveel geloof ons elkeen het en wat die gehalte daarvan is.”
Die programrede se titel was “Wandel deur geloof, nie deur aanskouing nie” (2 Korintiërs 5:7). “Die geloof van diegene wat Jehovah se Getuies word, is nie net goedgelowigheid nie”, het die spreker gesê. Hoe waar is dit tog nie! Ware geloof is nie blind nie. Dit is op werklikhede gegrond. Hebreërs 11:1 sê: “Geloof is die gewaarborgde verwagting van dinge waarop gehoop word, die duidelike demonstrasie van werklikhede hoewel hulle nie gesien word nie.” Die spreker het bygevoeg: “As ons werklik deur geloof wil wandel, het ons geloof nodig wat ’n goeie fondament het.” Omdat ons deur geloof wandel, en nie deur aanskouing nie, het ons nie besonderhede nodig oor hoe en wanneer Jehovah elke aspek van sy voorneme gaan volbring nie. Wat ons reeds van hom weet, gee ons volkome vertroue dat hy die krag het om sy beloftes op ’n liefdevolle en regverdige wyse te vervul.
Die toespraak “Jong Christene—’n belangrike deel van die gemeente” het jongmense daaraan herinner hoe kosbaar hulle vir Jehovah is. Hulle is aangespoor om geestelik te groei deur doelwitte na te streef soos om die hele Bybel deur te lees en aan die vereistes vir toewyding en doop te voldoen. Die nastrewing van aanvullende opvoeding is ’n persoonlike saak waaroor ’n jongmens saam met sy of haar ouers moet besluit, maar as daarop besluit word, moet dit altyd met die doel wees om ons toe te rus om God op bekwamer wyse te dien. Sekulêre opvoeding kan ’n nuttige doel dien as ons “seker . . . maak van wat die belangriker dinge is” wat met ons geloof verband hou.—Filippense 1:9, 10.
Vervolgens is ’n simposium van drie toesprake gehou oor die onderwerp “Volgens wie se standaarde lewe jy?” Geloof in God se Woord beweeg ons om by Bybelstandaarde te bly. Christene gehoorsaam Jehovah se wette en beginsels. Die Skrif vermaan ons byvoorbeeld om nie onwelvoeglike en smadende taal te gebruik nie (Efesiërs 4:31, 32). Die spreker het gevra: “Skreeu en skel jy op jou huweliksmaat of jou kinders wanneer jy kwaad of geïrriteerd is?” Dit sal natuurlik onchristelik wees. God het ook standaarde gestel wat ons voorkoms betref. Christene moet hulle “met goed versorgde kleredrag . . . , met beskeidenheid” versier (1 Timoteus 2:9, 10). Die woord “beskeidenheid” dra die gedagte oor van selfrespek, eergevoel, ingetoënheid en matigheid. Ons word deur liefde vir ander beweeg en word gerig deur Bybelbeginsels en ’n sin vir wat gepas is.
Die volgende twee toesprake het ’n vers-vir-vers-bespreking van Hebreërs 3:7-15 en 4:1-16 ingesluit. Hierdie Bybelgedeeltes waarsku ons teen die gevaar om “deur die bedrieglike krag van die sonde verhard” te word (Hebreërs 3:13). Hoe kan ons sukses behaal in ons stryd teen sonde? Jehovah help ons deur sy Woord. Ja, “die woord van God is lewend en oefen krag uit en . . . kan gedagtes en bedoelinge van die hart onderskei”.—Hebreërs 4:12.
Die laaste toespraak op die eerste dag van die byeenkoms was “’n Boek vir alle mense”. Dit het die egtheid, akkuraatheid en praktiese waarde van die Bybel beklemtoon. Hoe opwindend was dit tog om te hoor hoe die spreker die vrystelling aankondig van ’n nuwe brosjure met 32 bladsye met die titel ’n Boek vir alle mense! Hierdie nuwe publikasie is in die besonder voorberei vir mense wat, hoewel hulle geleerd is, baie min van die Bybel weet. Die toespraak het afgesluit met die woorde: “Mense moet God se Woord self ondersoek. Ons is vol vertroue dat hulle, ná ’n persoonlike ondersoek daarvan, sal besef dat hierdie unieke boek, die Bybel, inderdaad ’n boek vir alle mense is!”
Volg die “Vervolmaker van ons geloof” na
Hierdie tema van die byeenkoms se tweede dag het die aandag gevestig op Jesus Christus, die “Vervolmaker van ons geloof”. Ons moet “sy voetstappe noukeurig . . . volg” (Hebreërs 12:2; 1 Petrus 2:21). In die Christendom word talle vertel: ‘Glo in die Here Jesus, en jy sal gered word!’ Maar is dit al wat geloof behels? Die Bybel sê dat “geloof sonder werke dood” is (Jakobus 2:26). Daarom moet ons nie net in Jesus glo nie, maar ook die werke doen wat hy gedoen het, veral deur die goeie nuus van God se Koninkryk te verkondig.
Die oggendprogram het veral oor die evangelisasiewerk gehandel. Ons moet soos Paulus gretig wees om die goeie nuus van redding te verkondig (Romeine 1:14-16). Jesus het oral vir mense gepreek. Hoewel ons gewone huis-tot-huis-bediening vrugte oplewer, is al hoe meer mense nie tuis wanneer ons hulle besoek nie (Handelinge 20:20). Baie is op skool, werk, doen inkopies of is op reis. Ons moet derhalwe ook in openbare plekke en waar mense ook al gevind kan word die predikingswerk doen.
Die toespraak “Word in die waarheid gewortel en standvastig gemaak” het ons herinner aan die groot getal nuwe dissipels wat gedoop word—gemiddeld meer as 1000 elke dag! Dit is noodsaaklik dat hierdie nuwelinge goed gewortel en standvastig gemaak word in die geloof (Kolossense 2:6, 7). Die spreker het verduidelik dat letterlike wortels water en voedingstowwe opneem en die plant terselfdertyd ook anker of ondersteun. Net so kan nuwe dissipels deur goeie studiegewoontes en heilsame omgang standvastig in die waarheid word.
Hierdie raad was veral vir doopkandidate gepas. Ja, op die tweede dag van die byeenkoms, het groot getalle nuwe dissipels Jesus se voorbeeld gevolg deur hulle te laat doop. Die toespraak “Geloof in God se Woord lei tot doop” het die kandidate daaraan herinner dat algehele onderdompeling in water ’n gepaste simbool daarvan is dat hulle ten opsigte van hulle vorige selfsugtige lewenswyse gesterf het. Die feit dat hulle uit die water opgelig word, verteenwoordig dat hulle lewend gemaak word om God se wil te doen.
Die toespraak “Stry hard vir die geloof” was op die Bybelboek Judas gebaseer. Ons is aangemoedig om ons geloof te beskerm deur skadelike invloede, soos onsedelikheid, opstandigheid en afvalligheid, te vermy. Daarna is die aandag gevestig op ouers—veral vaders—in die toespraak “Sorg vir jou huisgesin”. Dit is ’n skriftuurlike verpligting om na die gesin se geestelike, fisiese en emosionele behoeftes om te sien (1 Timoteus 5:8). Dit verg tyd, kommunikasie en gehegtheid. Al die harde werk wat Christenouers doen om hulle kinders in die waarheid groot te maak, behaag Jehovah God beslis.
Die volgende simposium, “Laat ons na die huis van Jehovah gaan”, het waardering vir Christelike vergaderinge opgebou. Daar kan ons rus vind van die bekommernisse van hierdie wêreld. By vergaderinge het ons die geleentheid vir ’n uitwisseling van aanmoediging, en ons kan ons liefde aan ons medegelowiges betoon (Hebreërs 10:24, 25). Vergaderinge help ons ook om bekwamer onderrigters te word en verbeter ons begrip van God se voorneme (Spreuke 27:17). Mag ons ons nooit afsonder van die gemeente nie, en laat ons Jesus se woorde onthou: “Waar twee of drie in my naam bymekaar is, daar is ek in hulle midde.”—Matteus 18:20.
Die laaste toespraak van die dag was “Die gehalte van jou geloof word nou op die proef gestel”. Geloof wat nie op die proef gestel is nie, het geen bewese waarde nie, en die gehalte daarvan is nog onbekend. Dit is soos ’n tjek wat nog nie gewissel is nie. Is dit werklik die bedrag werd wat daarop verskyn? Ons geloof moet eweneens op die proef gestel word om te bewys dat dit bestaan en van goeie gehalte is (1 Petrus 1:6, 7). Die spreker het gesê: “Soms word die nuusmedia sowel as die owerheid deur geestelikes en afvalliges mislei om ’n wanvoorstelling van ons en ons Christelike opvattings en lewenswyse te gee. . . . Sal ons toelaat dat diegene wat deur Satan verblind is ons intimideer en ontmoedig en ons beskaamd maak oor die goeie nuus? Sal ons toelaat dat leuens omtrent die waarheid ons gereelde vergaderingbywoning en ons predikingswerk beïnvloed? Of sal ons vasstaan en moedig en meer vasbeslote wees as ooit tevore om steeds die waarheid aangaande Jehovah en sy Koninkryk te verkondig?”
Lewe weens geloof
Die tema van die byeenkoms se derde dag was op Paulus se woorde gegrond: “Dat niemand deur die wet by God regverdig verklaar word nie, is duidelik, want ‘die regverdige sal weens geloof lewe’” (Galasiërs 3:11). Die simposium “Joël se profetiese woorde vir ons dag” was een van die hoogtepunte van die oggend. Die boek Joël verwys na ons tyd en sê met ’n gevoel van dringendheid: “Ag, die dag! Want naby is die dag van die HERE, en hy kom soos ’n verwoesting van die Almagtige” (Joël 1:15). Net soos meedoënlose sprinkane het gesalfde Christene niks in die pad van die verkondiging van die Koninkryk laat staan in hierdie tyd van die einde nie.
Die boek Joël gee ook hoop en sê: “Elkeen wat die Naam van [Jehovah, NW] aanroep, sal gered word” (Joël 2:32). Dit beteken meer as om net Jehovah se naam te gebruik. Hartgrondige berou is nodig, en dit sluit in dat ons verkeerde dade die rug toekeer (Joël 2:12, 13). Daar is nie tyd om te talm nie, want Jehovah gaan binnekort oordeel voltrek aan die nasies, net soos hy in die geval van Moab, Ammon en die gebergte Seïr gedoen het in die dae van koning Josafat van Juda.—2 Kronieke 20:1-30; Joël 3:2, 12.
Almal is aangemoedig deur die toespraak “Toon geloof deur op Jehovah te wag”. Noudat ons diep in die tyd van die einde is, kan ons terugkyk op die vervulling van baie van Jehovah se beloftes, en ons het ’n lewendige belangstelling in dinge wat nog gaan gebeur. Jehovah se volk moet geduldig bly en onthou dat alles wat God beloof het, sal plaasvind.—Titus 2:13; 2 Petrus 3:9, 10.
Die oggendprogram is afgesluit met die drama “Hou jou oog eenvoudig”. Hierdie realistiese drama het ons aangemoedig om ons gesindheid ten opsigte van materiële strewes te ondersoek. As ons, ongeag waar ons bly, wil hê dat ons lewe vry van bekommernis moet wees, moet ons ag slaan op Jesus se vermaning om ons oog eenvoudig te hou, skerp ingestel op die Koninkryk van God.—Matteus 6:22.
Die openbare toespraak het die boeiende titel “Geloof en jou toekoms” gehad. Dit het bewys gelewer dat menseleiers nie die vermoë het om die probleme van die wêreld op te los nie (Jeremia 10:23). Die mensegeskiedenis herhaal hom voortdurend—op ’n groter en verwoestender skaal. Hoe voel Jehovah se Getuies oor die toekoms? Ons glo dat ’n rooskleurige toekoms onder God se Koninkryk op die getroue mensdom wag (Matteus 5:5). God sal sy beloftes vervul tot die voordeel van almal wat geloof in sy Woord het, waarin ons aangespoor word: “Soek die HERE terwyl Hy nog te vinde is; roep Hom aan terwyl Hy naby is.”—Jesaja 55:6.
Jesus het ’n belangrike vraag met die oog op ons dag geopper. Hy het gevra: “Wanneer die Seun van die mens kom, sal hy werklik die geloof op die aarde vind?” (Lukas 18:8). Die slottoespraak het die byeenkomsprogram hersien en getoon hoe dit oorweldigende getuienis gelewer het dat geloof in God se Woord bestaan, al lewe ons in ’n ongelowige en wêreldsgesinde stelsel.
As individue kan ons ons nietemin afvra: ‘Is ek onder diegene met onwrikbare geloof in God en sy Woord?’ Die “Geloof in God se Woord”-streekbyeenkoms behoort ons te help om ‘ja’ op daardie vraag te antwoord. En hoe dankbaar is ons tog teenoor Jehovah dat hy ons geloof in hom en in sy geïnspireerde Woord, die Bybel, versterk het!
[Prente op bladsy 24]
Baie vrywilligers het blymoedig gewerk om alles vir duisende byeenkomsgangers gereed te kry
[Prente op bladsy 25]
L. A. Swingle van die Bestuursliggaam stel die nuwe brosjure vry
[Prent op bladsy 25]
Groot stadions soos dié is oor die hele wêreld gebruik
[Prent op bladsy 26]
Talle is gedoop as simbool van hulle toewyding aan Jehovah
[Prente op bladsy 27]
Byeenkomsgangers het Koninkryksliedere vreugdevol gesing. Insetsel: die drama “Hou jou oog eenvoudig”