Onthou jy?

Was die onlangse nommers van Die Wagtoring vir jou van praktiese waarde? Dan kan jy gerus jou geheue deur middel van die volgende vrae toets.

◻ Wat is die verskil tussen “die dag van die Here” en “die dag van Jehovah”? (Openbaring 1:10; Joël 2:11, NW).

“Die dag van die Here” sluit die vervulling in van die 16 visioene wat in Openbaring hoofstukke 1 tot 22 beskryf word en die basiese gebeure wat Jesus voorspel het in antwoord op sy dissipels se vraag oor die teken van sy teenwoordigheid. As die hoogtepunt van die Here se dag, sal die vreesinboesemende dag van Jehovah aanbreek waarop hy oordeel gaan voltrek aan Satan se verdorwe wêreld (Matteus 24:3-14; Lukas 21:11).—12/15, bladsy 11.

◻ Wat is van die vernaamste kenmerke van die Makarios-Bybel?

Die naam Jehovah verskyn meer as 3500 keer in die Makarios-Bybel. ’n Kenner van Russiese godsdiensliteratuur het gesê: “[Die] vertaling is getrou aan die Hebreeuse teks, en die taal van die vertaling is suiwer en pas by die onderwerp.”—12/15, bladsy 27.

◻ Wat is “die waarheid” wat Jesus gesê het ons vry sal maak? (Johannes 8:32).

Met “die waarheid” het Jesus die Goddelik geïnspireerde inligting bedoel—veral inligting aangaande God se wil—wat vir ons in die Bybel bewaar is.—1/1, bladsy 3.

◻ Wie is die hedendaagse Jehu en Jonadab?

Jehu beeld Jesus Christus af, wat op die aarde deur “die Israel van God”, gesalfde Christene, verteenwoordig word (Galasiërs 6:16; Openbaring 12:17). Net soos Jonadab Jehu tegemoetgekom het, het ’n “groot skare” uit die nasies gekom om Jesus se aardse verteenwoordigers te ondersteun (Openbaring 7:9, 10; 2 Konings 10:15).—1/1, bladsy 13.

◻ Wat beteken dit om ‘met God te wandel’? (Genesis 5:24; 6:9).

Dit beteken dat diegene wat dit doen, soos Henog en Noag, gehandel het op ’n manier wat van sterk geloof in God getuig het. Hulle het gedoen wat Jehovah hulle beveel het en hulle lewe gerig in ooreenstemming met wat hulle van hom geweet het uit sy handelinge met die mensdom.—1/15, bladsy 13.

◻ Waarom moet ’n mens vooruit beplan vir die moontlikheid van jou dood?

In sekere sin is dit ’n geskenk aan jou gesin om sulke reëlings te tref. Dit toon liefde. Dit bewys dat jy graag wil ‘sorg vir dié wat lede van jou huisgesin is’ selfs wanneer jy nie meer met hulle is nie (1 Timoteus 5:8).—1/15, bladsy 22.

◻ Wat is deur “die ou verbond” bereik? (2 Korintiërs 3:14).

Dit het voorafskaduwings van die nuwe verbond bevat en het, met sy herhaalde offerandes, getoon dat die mens verlossing van sonde en die dood bitter nodig het. Dit was ’n ‘tugmeester wat na Christus toe gelei het’ (Galasiërs 3:24).—2/1, bladsy 14.

◻ In watter opsigte is die nuwe verbond ’n ewige verbond? (Hebreërs 13:20).

Eerstens, in teenstelling met die Wetsverbond sal dit nooit vervang word nie. Tweedens, die resultate wat dit lewer, is permanent. En derdens, die aardse onderdane van God se Koninkryk sal deur die Millennium heen voortgaan om by die nuwe verbondsreëling baat te vind.—2/1, bladsy 22.

◻ Watter voordele spruit uit dankbaarheid?

Die hartlike gevoel wat iemand ervaar omdat hy innig dankbaar is, dra tot sy geluk en vrede by. (Vergelyk Spreuke 15:13, 15.) Aangesien dankbaarheid ’n positiewe eienskap is, beskerm dit ’n mens teen negatiewe emosies soos woede, jaloesie en gegriefdheid.—2/15, bladsy 4.

◻ In watter verbonde is geesverwektes ingebring?

Die nuwe verbond, wat Jehovah met lede van geestelike Israel sluit, en die verbond vir die Koninkryk, wat Jesus met sy gesalfde voetstapnavolgers sluit (Lukas 22:20, 28-30).—2/15, bladsy 16.

◻ Watter drie groot feeste is die Israeliete beveel om by te woon?

Die Fees van die Ongesuurde Brode, onmiddellik ná die Pasga van 14 Nisan; die Fees van die Weke, op die 50ste dag vanaf 16 Nisan; die Fees van die Insameling, of die Huttefees, in die sewende maand (Deuteronomium 16:1-15).—3/1, bladsy 8, 9.

◻ Waarom is dit ’n voorreg om Christelike samekomste by te woon?

Jesus het gesê: “Waar twee of drie in my naam bymekaar is, daar is ek in hulle midde” (Matteus 18:20; 28:20). ’n Belangrike manier waarop geestelike voeding ook plaasvind, is deur gemeentelike vergaderinge en groter samekomste (Matteus 24:45).—3/1, bladsy 14.

◻ Wat is die oorsprong van die naam Nimrod?

Etlike geleerdes is dit eens dat die naam Nimrod nie ’n naam is wat by geboorte aan hom gegee is nie. Hulle beskou dit eerder as ’n naam wat later gegee is om by sy opstandige karakter te pas nadat dit duidelik geword het.—3/15, bladsy 25.

◻ Hoe belangrik is die gesin vir die mensegemeenskap?

Die gesin is noodsaaklik vir die mens. Die geskiedenis toon dat die sterkte van gemeenskappe en nasies afneem namate die gesinsreëling verswak. Die gesin het dus ’n direkte uitwerking op die stabiliteit van die gemeenskap en die welsyn van kinders en toekomstige geslagte.—4/1, bladsy 6.

◻ Wat is drie bewysgronde dat die Bybel God se Woord is?

(1) Dit is wetenskaplik akkuraat; (2) dit bevat tydlose beginsels wat prakties is vir die hedendaagse lewe; (3) dit bevat spesifieke profesieë wat al vervul is, soos deur geskiedkundige feite bewys is.—4/1, bladsy 15.