Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • w98 11/1 bl. 30-31
  • Jesus het tyd saam met kinders deurgebring

Video nie beskikbaar nie.

Jammer, die video kon nie laai nie.

  • Jesus het tyd saam met kinders deurgebring
  • Die Wagtoring kondig Jehovah se Koninkryk aan—1998
  • Onderhofies
  • Soortgelyke materiaal
  • Jesus verwelkom kinders
  • ’n Les vir ons
  • Het jy “die denke van Christus”?
    Die Wagtoring kondig Jehovah se Koninkryk aan—2000
  • Ons kinders—’n kosbare erfenis
    Die Wagtoring kondig Jehovah se Koninkryk aan—2005
  • Het jy die sin van Christus?
    Die Wagtoring kondig Jehovah se Koninkryk aan—1986
  • Lei jou kind op om Jehovah te dien
    Die Wagtoring kondig Jehovah se Koninkryk aan—2015
Sien nog
Die Wagtoring kondig Jehovah se Koninkryk aan—1998
w98 11/1 bl. 30-31

Hulle het Jehovah se wil gedoen

Jesus het tyd saam met kinders deurgebring

JESUS het die einde van sy drie en ’n half jaar lange bediening genader. Hy sou Jerusalem kort voor lank binnegaan en ’n pynlike dood sterf. Hy was deeglik bewus van wat voorgelê het, want hy het vir sy dissipels gesê: “Die Seun van die mens gaan in die hande van die mense oorgelewer word, en hulle sal hom doodmaak.”—Markus 9:31.

Jesus sou ongetwyfeld die beste gebruik wou maak van elke dag, elke uur, elke oomblik wat oorgebly het. Hy moes nog steeds aandag aan sy dissipels skenk. Jesus het gesien dat hulle nog streng vermaan moes word oor die belangrikheid van nederigheid en die immerteenwoordige gevaar dat hulle kan struikel (Markus 9:35-37, 42-48). Hulle het ook onderrigting oor die huwelik, egskeiding en die ongetroude lewe nodig gehad (Matteus 19:3-12). Aangesien Jesus geweet het dat hy binnekort sou sterf, het hy ongetwyfeld saaklik en dringend met sy dissipels gepraat. Elke oomblik het nou getel—’n feit wat die volgende optrede van Jesus selfs merkwaardiger gemaak het.

Jesus verwelkom kinders

Die Bybelverslag sê: “Mense het jong kinders na hom toe begin bring sodat hy hulle sou aanraak.” Toe die dissipels dit sien, het hulle onmiddellik hulle ontevredenheid uitgespreek. Hulle het moontlik geredeneer dat Jesus te belangrik of te besig was om oor kinders besorg te wees. Jy kan jou dus net voorstel hoe verbaas die dissipels was toe Jesus vir hulle kwaad geword het! “Laat die jong kinders na my toe kom”, het hy vir hulle gesê. “Moet hulle nie probeer keer nie, want die koninkryk van God behoort aan dié wat soos hulle is.” Daarna het Jesus bygevoeg: “Voorwaar, ek sê vir julle: Elkeen wat die koninkryk van God nie soos ’n jong kind ontvang nie, sal hoegenaamd nie daarin ingaan nie.”—Markus 10:13-15.

Jesus het bewonderenswaardige eienskappe in kinders raakgesien. Hulle is gewoonlik weetgierig en hulle vertrou ander. Hulle sal glo wat hulle ouers sê en hulle selfs voor ander kinders verdedig. Almal wat God se Koninkryk wil binnegaan, kan gerus hulle ontvanklikheid navolg. Dit is soos Jesus gesê het: “Die koninkryk van God behoort aan dié wat soos hulle is”.—Vergelyk Matteus 18:1-5.

Maar Jesus het hierdie kinders nie bloot ter wille van ’n illustrasie gebruik nie. Die verslag stel dit duidelik dat Jesus hulle werklik graag naby hom wou hê. Markus sê dat Jesus “die kinders in sy arms geneem en hulle begin seën [het] terwyl hy hulle die hande opgelê het” (Markus 10:16). Slegs Markus se verslag sluit die tere besonderheid in dat Jesus “die kinders in sy arms geneem” het.a Jesus het dus die verwagtinge oortref van die volwassenes, wat hierdie kinders na Jesus toe gebring het sodat hy hulle net kon “aanraak”.

Waarom was dit betekenisvol dat Jesus die kinders “die hande opgelê het”? Daar is geen aanduiding hier van ’n godsdiensseremonie, soos ’n doopplegtigheid, nie. Hoewel handoplegging in sommige gevalle gedoen is wanneer iemand in ’n amp aangestel is, het dit in ander gevalle bloot beteken dat iemand geseën word (Genesis 48:14; Handelinge 6:6). Derhalwe het Jesus die kinders dalk net geseën.

In elk geval, Markus gebruik ’n sterker woord vir “seën” (ka·teu·lo·geʹo) wat versterkende krag te kenne gee. Dít dui daarop dat Jesus die kinders vurig, teer en hartlik geseën het. Hy het kinders klaarblyklik nie as ’n tydrowende las beskou nie.

’n Les vir ons

Jesus se optrede teenoor kinders sowel as volwassenes was nie intimiderend of kleinerend nie. “Hy moes iemand gewees het wat maklik geglimlag het en lekker kon lag”, sê ’n naslaanwerk. Dit is geen wonder dat mense van alle ouderdomme op hulle gemak by hom gevoel het nie. Ons kan oor Jesus se voorbeeld nadink en ons afvra: ‘Vind mense dit maklik om my te nader?’ ‘Lyk dit of ek te besig is om my oor die bedrywighede en sorge van ander te bekommer?’ As ons ’n opregte belangstelling in mense aankweek, sal dit ons beweeg om van onsself te gee, soos Jesus gedoen het. Ander sal ons opregte belangstelling aanvoel en tot ons aangetrokke wees.—Spreuke 11:25.

Soos Markus se verslag toon, het Jesus dit geniet om by kinders te wees. Hy het klaarblyklik tyd geneem om hulle dop te hou terwyl hulle speel, want hy het in een van sy illustrasies na hulle speletjies verwys (Matteus 11:16-19). Party van die kinders wat Jesus geseën het, was moontlik te klein om te besef wie hy was en wat hy mense geleer het. Maar dit het hom nie laat voel dat hy sy tyd verkwis het nie. Hy het tyd saam met kinders deurgebring omdat hy lief was vir hulle. Baie van die kinders met wie Jesus gedurende sy bediening te doen gekry het, is moontlik later beweeg om op sy liefde te reageer deur sy dissipels te word.

As Jesus tyd saam met kinders kon deurbring gedurende die kritieke laaste weke van sy lewe, kan ons tog sekerlik in ons besige rooster tyd vir hulle inruim. Ons moet veral dink aan dié met spesiale behoeftes, soos die vaderlose seuns en dogters. Alle kinders floreer inderdaad wanneer hulle aandag kry, en dit is Jehovah se wil dat ons hulle soveel liefde en hulp moontlik gee.—Psalm 10:14, NW.

[Voetnoot]

a Een vertaling sê dat Jesus “hulle omhels het”. ’n Ander een sê dat hy “hulle in sy arms opgetel het”.

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel