Wandel met God—die eerste stappe

“Kom nader aan God, en hy sal nader aan julle kom.”—JAKOBUS 4:8.

1, 2. Waarom sou jy sê is dit ’n groot voorreg om Jehovah te dien?

DIE man het jare lank in die tronk gesit. Toe is hy ontbied om voor die heerser van die land te verskyn. Daarna het alles vinnig gebeur. Die gevangene het hom skielik in die diens bevind van die magtigste koning wat destyds op die aarde was. Die voormalige gevangene is in ’n posisie van groot verantwoordelikheid en buitengewone eer geplaas. Josef—die man wie se voete vroeër in kettings geboei was—het nou met ’n koning gewandel!—Genesis 41:14, 39-43; Psalm 105:17, 18.

² Mense het vandag die geleentheid om iemand te dien wat baie groter is as Farao van Egipte. Die Allerhoogste van die heelal nooi ons almal om hom te dien. Wat ’n ontsagwekkende voorreg is dit tog om Jehovah, die almagtige God, te dien en om ’n hegte verhouding met hom aan te kweek! In die Skrif word grootse krag en luister sowel as rustigheid, prag en lieflikheid met hom geassosieer (Esegiël 1:26-28; Openbaring 4:1-3). Liefde is ’n kenmerk van alles wat hy doen (1 Johannes 4:8). Hy vertel nooit ’n leuen nie (Numeri 23:19). En Jehovah stel diegene wat lojaal aan hom is nooit teleur nie (Psalm 18:25, NW). As ons aan sy regverdige vereistes voldoen, kan ons nou gelukkige, sinvolle lewens geniet, met die ewige lewe in die vooruitsig (Johannes 17:3). Geen menseheerser bied enigiets wat naastenby vergelyk kan word met sulke seëninge en voorregte nie.

3. In watter opsig het Noag “met God gewandel”?

³ Lank gelede het die aartsvader Noag hom voorgeneem om in ooreenstemming met God se wil en voorneme te lewe. Van hom sê die Bybel: “Noag was ’n regverdige, opregte man onder sy tydgenote. Noag het met God gewandel” (Genesis 6:9). Noag het natuurlik nie letterlik met Jehovah gewandel nie, aangesien geen mens “God ooit gesien [het] nie” (Johannes 1:18). Noag het eerder met God gewandel in die sin dat hy gedoen het wat God vir hom gesê het om te doen. Omdat Noag sy lewe daaraan gewy het om Jehovah se wil te doen, het hy ’n hegte, innige verhouding met die almagtige God geniet. Soos Noag is daar vandag miljoene mense wat ‘met God wandel’ deur in ooreenstemming met Jehovah se raad en onderrigting te lewe. Hoe begin ’n mens om so ’n weg te bewandel?

Juiste kennis noodsaaklik

4. Hoe onderrig Jehovah sy volk?

⁴ As ons met Jehovah wil wandel, moet ons hom eers leer ken. Die profeet Jesaja het voorspel: “Aan die einde van die dae sal die berg van die huis van die HERE vasstaan op die top van die berge en verhewe wees bo die heuwels, en al die nasies sal daarheen toestroom. En baie volke sal heengaan en sê: Kom laat ons optrek na die berg van die HERE, na die huis van die God van Jakob, dat Hy ons sy weë kan leer en ons in sy paaie kan wandel. Want uit Sion sal die wet uitgaan en die woord van die HERE uit Jerusalem” (Jesaja 2:2, 3). Ja, ons kan seker wees dat Jehovah almal sal onderrig wat in sy weë probeer wandel. Jehovah het ons sy Woord, die Bybel, gegee, en hy help ons om dit te verstaan. Een manier waarop hy dit doen, is deur “die getroue en verstandige slaaf” (Matteus 24:45-47). Jehovah gebruik ‘die getroue slaaf’ om geestelike onderrigting deur middel van Bybelpublikasies, Christelike vergaderinge en die gratis tuisbybelstudiereëling te voorsien. God help sy volk ook deur middel van sy heilige gees om sy Woord te verstaan.—1 Korintiërs 2:10-16.

5. Waarom is skriftuurlike waarheid so kosbaar?

⁵ Hoewel ons nie geld vir Bybelwaarheid betaal nie, is dit kosbaar. Wanneer ons God se Woord bestudeer, leer ons omtrent God self—sy naam, sy persoonlikheid, sy voorneme en die manier waarop hy met mense handel. Ons leer ook die bevrydende antwoorde op die lewe se fundamentele vrae: Waarom is ons hier? Waarom laat God lyding toe? Wat hou die toekoms in? Waarom word ons oud en sterf ons? Is daar lewe ná die dood? Daarbenewens leer ons wat God se wil vir ons is, dit wil sê hoe ons moet wandel om hom ten volle te behaag. Ons leer dat sy vereistes redelik en uiters voordelig is wanneer ons dit nakom. Sonder God se onderrigting sou ons nooit hierdie dinge kon verstaan nie.

6. Watter weg stel juiste Bybelkennis ons in staat om te volg?

⁶ Bybelwaarheid is kragtig en beweeg ons om veranderinge in ons lewe aan te bring (Hebreërs 4:12). Voor ons kennis van die Skrif opgedoen het, kon ons slegs “volgens die stelsel van dinge van hierdie wêreld” wandel (Efesiërs 2:2). Maar juiste kennis van God se Woord laat ons ’n ander koers inslaan sodat ons kan “wandel op ’n wyse wat Jehovah waardig is om hom ten volle te behaag” (Kolossense 1:10). Wat ’n vreugde is dit tog om met Jehovah, die luisterrykste Persoon in die ganse heelal, te begin wandel!—Lukas 11:28.

Twee belangrike stappe —toewyding en doop

7. Watter waarheid omtrent menseleierskap word duidelik namate ons God se Woord bestudeer?

⁷ Wanneer ons begrip van die Bybel toeneem, begin ons menseaangeleenthede en ons eie lewe in die geestelike lig van God se Woord ondersoek. ’n Belangrike waarheid word dan duidelik. Daardie waarheid is lank gelede verwoord deur die profeet Jeremia, wat geskryf het: “Ek weet, o HERE, dat aan die mens sy weg nie toebehoort nie; nie aan ’n man om te loop en sy voetstappe te rig nie” (Jeremia 10:23). Mense—elkeen van ons—het God se leiding nodig.

8. (a) Wat beweeg mense om hulle aan God toe te wy? (b) Wat is Christelike toewyding?

⁸ As ons hierdie belangrike feit verstaan, beweeg dit ons om op Jehovah vir leiding te vertrou. En liefde vir God beweeg ons om ons lewe aan hom toe te wy. Om ons aan God toe te wy, beteken dat ons hom in gebed nader en plegtig belowe om ons lewe te gebruik om hom te dien en getrou in sy weë te wandel. Deur dit te doen, volg ons Jesus se voorbeeld, wat homself vir Jehovah aangebied het met die vaste voorneme om God se wil te doen.—Hebreërs 10:7.

9. Waarom wy mense hulle lewe aan Jehovah toe?

⁹ Jehovah God dwing niemand ooit om hulle aan hom toe te wy nie. (Vergelyk 2 Korintiërs 9:7.) Daarbenewens verwag God nie van enigeen om sy lewe aan Hom toe te wy weens ’n vlietende emosie nie. Voor iemand gedoop word, moet hy reeds ’n dissipel wees, en dit verg ywerige inspanning om kennis op te doen (Matteus 28:19, 20). Paulus het diegene wat reeds gedoop was dringend versoek ‘om hulle liggame aan te bied as ’n offerande wat lewend, heilig en vir God aanneemlik is, ’n heilige diens met hulle denkvermoë’ (Romeine 12:1). Dit is deur ons denkvermoë op ’n soortgelyke wyse te gebruik dat ons ons aan Jehovah God toewy. Nadat ons geleer het wat dit behels en noukeurig oor die saak nagedink het, wy ons ons lewe gewillig en vreugdevol aan God toe.—Psalm 110:3.

10. Watter verband is daar tussen toewyding en doop?

¹⁰ Nadat ons God privaat in gebed genader het om ons vasbeslotenheid uit te spreek om in sy weë te wandel, neem ons die volgende stap. Ons maak deur ons waterdoop ons toewyding in die openbaar bekend. Dit is ’n openbare bekendmaking van ons gelofte aan God om sy wil te doen. Aan die begin van Jesus se aardse bediening is hy deur Johannes gedoop, en het sodoende vir ons ’n voorbeeld gestel (Matteus 3:13-17). Later het Jesus sy volgelinge beveel om dissipels te maak en hulle te doop. Toewyding en doop is derhalwe noodsaaklike stappe vir enigeen wat met Jehovah wil wandel.

11, 12. (a) Hoe kan doop met ’n troue vergelyk word? (b) Watter vergelyking kan tussen ons verhouding met Jehovah en die verhouding tussen ’n man en vrou gemaak word?

¹¹ Om ’n toegewyde, gedoopte dissipel van Jesus Christus te word, is in baie opsigte dieselfde as om te trou. In baie lande word die troudag deur verskeie stappe voorafgegaan. ’n Man en vrou ontmoet, leer mekaar ken en raak verlief. Dan kom die verlowing. Die troue maak in die openbaar bekend wat privaat besluit is—om te trou en dan as man en vrou saam te lewe. Dit is die troue wat in die openbaar die begin van daardie spesiale verhouding aandui. Daardie dag dui die begin van die huwelik aan. Net so dui doop die begin aan van ’n lewe wat daaraan gewy is om in ’n toegewyde verhouding met Jehovah te wandel.

¹² Kom ons kyk na nog ’n ooreenkoms. Ná die troudag moet die liefde tussen man en vrou verinnig en groei. As hulle nader aan mekaar wil kom, moet albei huweliksmaats hulle onselfsugtig daarop toelê om hulle verhouding as man en vrou te koester en te versterk. Hoewel ons nie in ’n huweliksverbintenis met God tree nie, moet ons ons ná ons doop inspan om ’n hegte verhouding met Jehovah te handhaaf. Hy sien en waardeer ons pogings om sy wil te doen, en hy kom nader aan ons. “Kom nader aan God”, het die dissipel Jakobus geskryf, “en hy sal nader aan julle kom.”—Jakobus 4:8.

Wandel in Jesus se voetstappe

13. Wie se voorbeeld moet ons navolg sodat ons met God kan wandel?

¹³ As ons met Jehovah wil wandel, moet ons die voorbeeld volg wat Jesus Christus gestel het. Die apostel Petrus het geskryf: “Tot hierdie weg is julle geroep, omdat ook Christus vir julle gely het en vir julle ’n voorbeeld gelaat het sodat julle sy voetstappe noukeurig kan volg” (1 Petrus 2:21). Aangesien Jesus volmaak was en ons onvolmaak is, kan ons sy voorbeeld nie volmaak navolg nie. Jehovah verwag nietemin dat ons ons bes doen. Kom ons bespreek vyf aspekte van Jesus se lewe en bediening wat toegewyde Christene moet probeer navolg.

14. Wat behels dit om God se Woord te ken?

¹⁴ Jesus het ’n juiste en deeglike kennis van God se Woord gehad. Jesus het dikwels tydens sy bediening uit die Hebreeuse Geskrifte aangehaal (Lukas 4:4, 8). Die goddelose godsdiensleiers van daardie tyd het natuurlik ook uit die Skrif aangehaal (Matteus 22:23, 24). Die verskil was dat Jesus die betekenis van die Skrif verstaan het, en hy het dit in sy lewe toegepas. Hy het nie net die letter van die Wet nie, maar ook die gees daarvan verstaan. Terwyl ons Christus se voorbeeld navolg, moet ons ook God se Woord probeer verstaan en die sin, of gees daarvan, begryp. Deur dit te doen, kan ons werkers word wat deur God goedgekeur is en wat “die woord van die waarheid reg [kan] hanteer”.—2 Timoteus 2:15.

15. Hoe het Jesus ’n voorbeeld gestel in die manier waarop hy met ander oor God gepraat het?

¹⁵ Christus Jesus het met ander oor sy hemelse Vader gepraat. Jesus het nie sy kennis van God se Woord vir homself gehou nie. Selfs sy vyande het hom as “Leermeester” aangespreek, want waar hy ook al gegaan het, het hy met ander oor Jehovah en Sy voornemens gepraat (Matteus 12:38). Jesus het openlik in die tempelgebied, in sinagoges, in stede en in plattelandse gebiede getuig (Markus 1:39; Lukas 8:1; Johannes 18:20). Hy het met medelye en goedhartigheid geleer en liefde bewys teenoor diegene wat hy gehelp het (Matteus 4:23). Diegene wat Jesus se voorbeeld navolg, vind ook baie plekke en maniere om met ander oor Jehovah God en sy wonderlike voornemens te praat.

16. Hoe heg was Jesus se verhouding met medeaanbidders van Jehovah?

¹⁶ Jesus het baie na aan diegene gevoel wat Jehovah aanbid het. Terwyl Jesus eenkeer met die skare gepraat het, het sy moeder en sy ongelowige broers met hom kom praat. Die Bybelverslag sê: “Iemand het . . . vir hom gesê: ‘Kyk! U moeder en u broers staan buite en wil met u praat.’ As antwoord het hy vir die een wat hom dit vertel het, gesê: ‘Wie is my moeder, en wie is my broers?’ En hy het sy hand na sy dissipels uitgesteek en gesê: ‘Kyk! My moeder en my broers! Want elkeen wat die wil doen van my Vader wat in die hemel is, dié is my broer en suster en moeder’” (Matteus 12:47-50). Dit beteken nie dat Jesus sy familie verwerp het nie, want latere gebeure toon dat hy dit nie gedoen het nie (Johannes 19:25-27). Hierdie verslag beklemtoon egter die liefde wat Jesus vir medegelowiges gehad het. Diegene wat vandag met God wandel, soek eweneens die vriendskap van ander knegte van Jehovah en leer om hulle innig lief te kry.—1 Petrus 4:8.

17. Hoe het Jesus daaroor gevoel om sy hemelse Vader se wil te doen, en hoe behoort ons daarop te reageer?

¹⁷ Jesus het liefde vir sy hemelse Vader getoon deur God se wil te doen. Jesus was in alles aan Jehovah gehoorsaam. Hy het gesê: “My voedsel is om die wil te doen van hom wat my gestuur het en om sy werk te volbring” (Johannes 4:34). Christus het ook gesê: ‘Ek doen altyd die dinge wat God behaag’ (Johannes 8:29). Jesus was só lief vir sy hemelse Vader dat “hy homself verneder en gehoorsaam geword [het] tot in die dood, ja, die dood aan ’n folterpaal” (Filippense 2:8). Op sy beurt het Jehovah Jesus geseën en hom tot ’n posisie van gesag en eer verhef sodat net Jehovah self bo hom verhewe is (Filippense 2:9-11). Soos Jesus toon ons ons liefde vir God deur sy gebooie te onderhou en deur sy wil te doen.—1 Johannes 5:3.

18. Hoe het Jesus ’n voorbeeld gestel wat gebed betref?

¹⁸ Jesus was ’n man van gebed. Hy het gebid toe hy gedoop is (Lukas 3:21). Voor hy sy 12 apostels gekies het, het hy die hele nag aan gebed gewy (Lukas 6:12, 13). Jesus het sy dissipels geleer hoe om te bid (Lukas 11:1-4). Op die vooraand van sy dood het hy vir en saam met sy dissipels gebid (Johannes 17:1-26). Gebed was ’n belangrike deel van Jesus se lewe, net soos dit in ons lewe moet wees, aangesien ons sy volgelinge is. Wat ’n eer is dit tog om met die Universele Soewerein in gebed te praat! Daarbenewens verhoor Jehovah gebede, want Johannes het geskryf: “Dít is die vertroue wat ons teenoor hom het, dat hy ons hoor, ongeag wat ons volgens sy wil vra. Verder, as ons weet dat hy ons hoor met betrekking tot wat ons ook al vra, weet ons dat ons die dinge gaan kry wat ons gevra het, aangesien ons dit van hom gevra het.”—1 Johannes 5:14, 15.

19. (a) Watter eienskappe van Jesus moet ons navolg? (b) In watter opsigte is dit vir ons nuttig om Jesus se lewe en bediening te bestudeer?

¹⁹ Ons kan soveel leer as ons Jesus Christus se aardse lewe en bediening noukeurig ondersoek! Dink na oor die eienskappe wat hy geopenbaar het: liefde, medelye, goedhartigheid, innerlike krag, balans, redelikheid, nederigheid, moed en onselfsugtigheid. Hoe meer ons oor Jesus leer, hoe groter is ons begeerte om sy getroue volgelinge te wees. Kennis van Jesus laat ons ook nader aan Jehovah kom. Jesus was op stuk van sake ’n volmaakte weerspieëling van sy hemelse Vader. Hy was so intiem met Jehovah dat hy kon sê: “Hy wat my gesien het, het ook die Vader gesien.”—Johannes 14:9.

Vertrou op God om jou te onderskraag

20. Hoe kan ons vertroue opbou terwyl ons met Jehovah wandel?

²⁰ Wanneer kinders net begin loop, is hulle nie baie vas op hulle voete nie. Hoe leer hulle om met vertroue te loop? Slegs deur oefening en volharding. Wel, diegene wat met Jehovah wandel, probeer dit met vertroue en sekerheid doen. Dit verg ook tyd en volharding. Paulus het op die belangrikheid van volharding gewys wanneer ’n mens met God wandel toe hy geskryf het: “Laastens, broers, versoek en vermaan ons julle by die Here Jesus dat julle, net soos julle onderrig van ons ontvang het oor hoe julle behoort te wandel en God behoort te behaag, soos julle in werklikheid reeds wandel, aanhou om dit in voller mate te doen.”—1 Tessalonisense 4:1.

21. Watter seëninge kan ons geniet terwyl ons met Jehovah wandel?

²¹ As ons ten volle aan God toegewy is, sal hy ons help sodat ons kan aanhou om met hom te wandel (Jesaja 40:29-31). Niks wat hierdie wêreld aanbied, kan met die seëninge vergelyk word wat hy op diegene uitstort wat in sy weë wandel nie. Dit is hy ‘wat ons leer wat heilsaam is, wat ons lei op die weg wat ons moet gaan. En as ons na sy gebooie luister, dan sal ons vrede wees soos ’n rivier en ons geregtigheid soos die golwe van die see’ (Jesaja 48:17, 18). As ons die uitnodiging aanvaar om met God te wandel en dit getrou doen, kan ons vir ewig vrede met hom geniet.

Hoe sou jy antwoord?

◻ Waarom is dit ’n eer om met die ware God te wandel?

◻ Waarom is studie, toewyding en doop van die eerste stappe om met Jehovah te wandel?

◻ Hoe kan ons in die voetstappe van Jesus volg?

◻ Hoe weet ons dat Jehovah ons sal onderskraag terwyl ons met hom wandel?

[Prente op bladsy 13]

Studie, toewyding en doop is van die eerste stappe as ’n mens met God wil wandel