’n Boek van wysheid met ’n boodskap vir vandag

“’NSAK vol wysheid is meer werd as ’n sak vol pêrels”, het die eertydse aartsvader Job gesê, wat ongetwyfeld een van die rykste manne van sy tyd was (Job 1:3; 28:18, NW; 42:12). Wysheid is waarlik baie meer werd as materiële besittings, veral wanneer dit iemand kan help om welslae in sy lewe te behaal. “Wysheid is ’n beskutting, geld is ’n beskutting”, het die wyse koning Salomo gesê, “maar die voordeel van kennis is: die wysheid hou die besitter daarvan in die lewe.”—Prediker 7:12.

Maar waar kan sulke wysheid vandag gevind word? Mense raadpleeg adviesrubriekskrywers, sielkundiges, psigiaters, selfs haarkappers en taxibestuurders oor hulle persoonlike probleme. En talle deskundiges is gereed om oor byna enige onderwerp raad te gee—natuurlik teen ’n prys. Maar hierdie woorde van “wysheid” het dikwels net tot teleurstelling gelei, selfs tot rampspoed. Hoe kan ons dus ware wysheid vind?

Jesus Christus, wat baie insig in menseaangeleenthede gehad het, het eenkeer gesê: “Die wysheid [word] deur sy werke geregverdig” (Matteus 11:19). Kom ons kyk na ’n paar algemene probleme in mense se lewens en sien watter woorde van wysheid het hulle werklik gehelp en was vir hulle meer werd as “’n sak vol pêrels”. Jy kan dalk ook daardie “sak vol pêrels” kry en daarby baat vind.

Ly jy aan depressie?

“As die 20ste eeu die Eeu van Angs ingelui het, dan lui die uitgang daarvan die Eeu van Swartgalligheid in”, sê die International Herald Tribune van Londen. Dit sê voorts dat “die eerste internasionale studie oor ernstige depressie toon dat die siekte wêreldwyd geleidelik toeneem. In nasies wat so uiteenlopend is soos Taiwan, Libanon en Nieu-Seeland is elke opeenvolgende geslag vatbaarder vir die siekte.” Die moontlikheid dat diegene wat ná 1955 gebore is aan ernstige depressie sal ly, is glo drie keer groter as dié van hulle grootouers.

Dit was die geval met Tomoe, wat aan ernstige depressie gely het en die meeste van die tyd in die bed gebly het. Aangesien sy nie na haar tweejarige seuntjie kon omsien nie, het sy na haar ouers se huis teruggetrek. ’n Buurvrou, wie se dogtertjie net so oud soos Tomoe se seuntjie was, het sommer gou vriendskap aan haar betoon. Toe Tomoe vir die buurvrou vertel hoe nutteloos sy voel, het die buurvrou vir haar ’n teks in ’n boek gewys. Dit het gesê: “Die oog kan nie vir die hand sê: ‘Ek het jou nie nodig nie’; of ook die kop vir die voete: ‘Ek het julle nie nodig nie.’ Maar dit is veel eerder so dat dié lede van die liggaam wat swakker lyk nodig is.”a Tomoe se oë het vol trane geskiet toe sy besef dat almal ’n plek in die wêreld het en nodig is.

Die buurvrou het voorgestel dat sy die boek ondersoek wat hierdie woorde bevat. Tomoe het haar kop geknik, al kon sy tot op daardie stadium niks doen nie, nie eers haarself sover kry om ’n eenvoudige belofte te maak nie. Die buurvrou het haar ook help inkopies doen, en sy het elke dag saam met Tomoe kos gemaak. ’n Maand later het Tomoe net soos enige huisvrou elke oggend opgestaan, die wasgoed gewas, die huis skoongemaak, inkopies gedoen en aandete voorberei. Sy moes baie probleme te bowe kom, maar sy het gesê: “Ek was vol vertroue dat ek sou regkom as ek net die woorde van wysheid toepas wat ek gevind het.”

Tomoe het die sombere dae van haar depressie oorkom deur die wysheid toe te pas wat sy gevind het. Nou help Tomoe ander voltyds om dieselfde woorde toe te pas wat haar in staat gestel het om haar probleme te bowe te kom. Daardie woorde van wysheid is in ’n antieke boek wat vandag ’n boodskap vir alle mense het.

Het jy gesinsprobleme?

Wêreldwyd neem die egskeidingsyfer toe. Gesinsprobleme neem toe selfs in Oosterse lande, waar mense voorheen trots was op hulle hegte gesinsbande. Waar kan ons goeie huweliksvoorligting kry wat werk?

Neem die geval van Sjoego en Mihoko, ’n egpaar wat eindelose huweliksprobleme gehad het. Hulle het oor allerhande nietighede getwis. Sjoego was kort van draad, en Mihoko het elke keer teruggekap as hy met haar foutgevind het. Mihoko het selfs gedink: ‘Ons kan oor net mooi niks saamstem nie.’

Eendag het ’n vrou Mihoko besoek en vir haar hierdie woorde uit ’n boek gelees: “Alles wat julle dus wil hê dat die mense aan julle moet doen, moet julle ook net so aan hulle doen.”b Hoewel Mihoko nie in godsdiens belanggestel het nie, het sy ingestem om die boek te bestudeer wat hierdie woorde bevat. Sy het daarin belanggestel om haar gesinslewe te verbeter. Toe sy dus genooi is om ’n vergadering by te woon waar ’n publikasie met die titel Hoe om ’n gelukkige gesinslewe op te bou bespreek is, het Mihoko—en haar man—dit sonder aarseling aanvaar.c

By die vergadering het Sjoego opgemerk dat die aanwesiges werklik toepas wat hulle leer en dat hulle gelukkig lyk. Hy het besluit om die boek te ondersoek wat sy vrou bestudeer. Een stelling het gou sy aandag getrek: “Die lankmoedige is groot van verstand, maar die kortgebondene behaal sotheid.”d Hoewel dit hom ’n ruk geneem het om hierdie beginsel in sy lewe toe te pas, was die geleidelike verandering in hom duidelik vir diegene om hom, onder andere vir sy vrou.

Toe Mihoko die veranderinge in haar man sien, het sy ook begin toepas wat sy geleer het. Een beginsel wat veral nuttig was, was: “Hou op om te oordeel, sodat julle nie geoordeel word nie; want met die oordeel waarmee julle oordeel, sal julle geoordeel word.”e Mihoko en haar man het derhalwe besluit dat hulle oor hulle goeie punte sal praat en oor hoe hulle kan verbeter in plaas van met mekaar fout te vind. Wat was die gevolg? Mihoko sê: “Dit het my werklik gelukkig gemaak. Ons doen dit elke aand tydens aandete. Selfs ons driejarige seuntjie neem aan die gesprek deel. Dis vir ons waarlik verkwikkend!”

Toe hierdie gesin die betekenisvolle raad toegepas het wat hulle ontvang het, kon hulle die probleme oorkom wat hulle verhouding breekpunt laat bereik het. Is dit nie vir hulle meer werd as ’n sak vol pêrels nie?

Wil jy ’n voorspoedige lewe hê?

Vandag is baie se doelwit in die lewe om rykdom te verkry. Tog het ’n ryk sakeman in die Verenigde State wat honderdmiljoene dollars vir liefdadigheid gegee het eenkeer gesê: “Geld het vir party mense ’n aantrekkingskrag, maar niemand kan twee paar skoene tegelykertyd dra nie.” Min erken hierdie feit en nog minder hou op om rykdom na te jaag.

Hitosji het arm grootgeword, daarom het hy ’n sterk begeerte gehad om ryk te wees. Nadat hy gesien het hoe skuldeisers mense na hulle pype laat dans, het hy besluit: “Die een wat die geld gryp, is die wenner.” Hitosji het soveel geloof in die mag van geld gestel dat hy gedink het selfs menselewens kan daarmee gekoop word. Ten einde rykdom te verkry, het hy hom die hele jaar deur op sy loodgieterswerk toegelê en nie eers een dag afgevat nie. Hitosji het gou besef dat hy, ’n subkontrakteur, nooit so invloedryk sou wees soos die kontrakteurs wat hom die werk gee nie, al probeer hy hoe hard. Frustrasie en vrees vir bankrotskap was deel van sy daaglikse lewe.

’n Man het toe na Hitosji se deur gekom en hom gevra of hy geweet het dat Jesus Christus vir hom gesterf het. Aangesien Hitosji gemeen het dat niemand vir hóm sou sterf nie, was hy nuuskierig en het hy ingestem om dit verder te bespreek. Die volgende week het hy ’n lesing bygewoon en was hy geskok toe hy die vermaning hoor dat ’n mens ‘jou oog eenvoudig moet hou’. Die spreker het verduidelik dat ’n “eenvoudige” oog ver vooruitsien en op geestelike dinge gerig is; daarenteen is ’n ‘goddelose’, of ‘afgunstige’, oog net op onmiddellike vleeslike begeertes gerig en kortsigtig. Die raad: “Waar jou skat is, daar sal jou hart ook wees”, het hom diep getref.f Daar is iets belangrikers as die verkryging van rykdom! Hy het nog nooit so iets gehoor nie.

Hy was beïndruk en het begin toepas wat hy geleer het. Hy het nie meer geswoeg om geld te maak nie, maar eerder geestelike waardes eerste in sy lewe begin stel. Hy het ook tyd aan die geestelike welsyn van sy gesin bestee. Dit het natuurlik beteken dat hy minder tyd vir werk gehad het, maar sy onderneming het ’n gunstige wending geneem. Waarom?

Namate hy op die raad gereageer het wat hy gegee is, het sy aggressiewe persoonlikheid in ’n sagmoedige en vriendelike geaardheid verander. Hy was veral beïndruk deur die vermaning: “Verwyder dan nou al hierdie dinge van julle: gramskap, toorn, slegtheid, smadende taal en onwelvoeglike praatjies uit julle mond. Moenie vir mekaar lieg nie. Lê die ou persoonlikheid met sy gebruike af, en beklee julle met die nuwe persoonlikheid, wat deur juiste kennis nuut gemaak word na die beeld van die Een wat dit geskep het.”g Dit het hom nie ryk gemaak om hierdie raad te volg nie, maar sy “nuwe persoonlikheid” het ’n goeie indruk op sy kliënte gemaak en daartoe gelei dat hy hulle vertroue gewen het. Ja, die woorde van wysheid wat hy gevind het, het hom gehelp om ’n voorspoedige lewe te hê. Vir hom was dit letterlik baie meer werd as ’n sak vol pêrels of geld.

Gaan jy die sak oopmaak?

Kan jy die sak vol wysheid identifiseer wat so kosbaar was vir die mense in die bogenoemde voorbeelde? Dit is die wysheid wat in die Bybel gevind word, die boek op aarde met die grootste verspreiding en wat die maklikste verkrygbaar is. Jy het moontlik ’n eksemplaar of kan maklik een aanskaf. Maar om bloot ’n sak vol kosbare pêrels te hê en dit nie te gebruik nie, sal vir die eienaar baie min beteken, en net so sal dit ook van min waarde wees as ’n mens bloot ’n Bybel besit. Maak as ’t ware die sak oop, pas die Bybel se wyse en tydige raad toe en kyk hoe dit jou kan help om die lewe se probleme te bowe te kom.

As iemand jou ooit ’n sak vol pêrels gee, sou jy dan nie dankbaar wees en probeer uitvind wie jou weldoener is sodat jy hom kon bedank nie? Weet jy wie in die Bybel se geval die Gewer is?

Die Bybel toon wie die Bron van die wysheid is wat daarin gevind word wanneer dit sê: “Die hele Skrif is deur God geïnspireer en is nuttig” (2 Timoteus 3:16). Dit sê ook vir ons dat ‘die woord van God lewend is en krag uitoefen’ (Hebreërs 4:12). Daarom is die wyse woorde in die Bybel tydig en doeltreffend vir ons wat vandag lewe. Jehovah se Getuies sal jou met graagte help om van hierdie ruimhartige Gewer, Jehovah God, te leer sodat jy die vooruitsig kan hê om ’n begunstigde te wees van die “sak vol wysheid” wat in die Bybel is—die boek van wysheid met ’n boodskap vir mense wat vandag lewe.

[Voetnote]

[Venster/Prent op bladsy 4]

Woorde van wysheid om emosionele balans te handhaaf

“As U, HERE, die ongeregtighede in gedagtenis hou, Here, wie sal bestaan? Maar by U is vergewing, dat U gevrees mag word.”—Psalm 130:3, 4.

“’n Vrolike hart maak die aangesig bly, maar by verdriet van die hart is die gees neerslagtig.”—Spreuke 15:13.

“Wees nie alte regverdig en hou jou nie buitengewoon wys nie: waarom sou jy jouself te gronde rig?”—Prediker 7:16.

“Dit verskaf groter geluk om te gee as om te ontvang.”—Handelinge 20:35.

“Wees toornig, en moet nogtans nie sondig nie; laat die son nie ondergaan terwyl julle in ’n ergerlike gemoedstemming is nie.”—Efesiërs 4:26.

[Venster/Prent op bladsy 5]

Woorde van wysheid vir ’n gelukkige gesinslewe

“Planne misluk sonder beraadslaging, maar deur die veelheid van raadgewers kom dit tot stand.”—Spreuke 15:22.

“Die hart van die verstandige verwerf kennis, en die oor van wyse soek na kennis.”—Spreuke 18:15.

“Goue appels op versierde silwerborde, so is ’n woord op sy tyd gespreek.”—Spreuke 25:11.

“Hou aan om mekaar te verdra en mekaar vryelik te vergewe as iemand rede tot klagte teen ’n ander het. Net soos Jehovah julle vryelik vergewe het, so moet julle ook doen. Maar beklee julle, benewens al hierdie dinge, met liefde, want dit is ’n volmaakte band van eenheid.”—Kolossense 3:13, 14.

“Weet dit, my geliefde broers. Elke mens moet gou wees om te hoor, stadig om te praat, stadig ten opsigte van gramskap.”—Jakobus 1:19.

[Venster/Prent op bladsy 6]

Woorde van wysheid om jou lewe voorspoedig te maak

“’n Valse weegskaal is vir die HERE ’n gruwel, maar in ’n volle gewig het Hy behae.”—Spreuke 11:1.

“Trotsheid kom voor die verbreking, en hoogmoed kom voor die val.”—Spreuke 16:18.

“’n Afgebreekte stad sonder muur, so is ’n man wat sy gees nie kan inhou nie.”—Spreuke 25:28.

“Wees nie haastig in jou gees om jou te vererg nie, want ergernis rus in die boesem van die dwase.”—Prediker 7:9.

“Werp jou brood uit op die water, want ná verloop van baie dae sal jy dit vind.”—Prediker 11:1.

“Laat ’n slegte woord nie uit julle mond uitgaan nie, maar watter woord ook al goed is vir opbouing na gelang van die behoefte, sodat dit iets gunstigs aan die hoorders kan meedeel.”—Efesiërs 4:29.

[Prent op bladsy 7]

’n Studie van die Bybel is die eerste stap om ’n begunstigde van die “sak vol wysheid” te word