Keer dat woede jou laat struikel

“HAAL diep asem!” “Tel tot tien!” “Sê eerder niks!” Is hierdie uitdrukkings vir jou bekend? Dalk sê jy dit vir jouself om ontsteltenis te kalmeer. Party mense gaan stap in ’n poging om ’n woedeuitbarsting te keer. Dit is eenvoudige maniere om woede te beheers en om verhoudinge met ander te bewaar.

In die laaste jare het teenstrydige raad van deskundiges oor die kwessie of woede beheers of onderdruk moet word baie mense verward gelaat. Party sielkundiges het byvoorbeeld die teorie bevorder dat jy uiting moet gee aan jou woede “as dit jou beter laat voel”. Ander waarsku dat gereelde woedeuitbarstings “’n sekerder teken [is] dat ’n mens jonk gaan sterf as ander risikofaktore soos rook, hoë bloeddruk en hoë cholesterol”. God se Woord sê eenvoudig: “Laat staan die toorn en verlaat die grimmigheid; wees nie toornig nie: dit is net om kwaad te stig” (Psalm 37:8). Waarom gee die Bybel sulke spesifieke raad?

Onbeheerste emosies lei tot onbeheerste dade. Dit het reeds baie vroeg in die mens se geskiedenis duidelik geword. Ons lees: “Toe word Kain baie kwaad, en hy het sy hoof laat hang.” Wat het dit hom laat doen? Sy woede het hom beetgepak en begin beheers, in so ’n mate dat dit sy hart verhard het sodat hy nie geluister het na Jehovah se vermaning om goed te doen nie. Kain se onbeteuelde woede het daartoe gelei dat hy ’n ernstige sonde pleeg—die moord op sy broer.—Genesis 4:3-8.

Saul, die eerste koning van Israel, is op ’n soortgelyke manier oorval toe hy gehoor het hoe Dawid baie lof ontvang. “Die vroue wat vrolik was, het gesing en gesê: Saul het sy duisende verslaan, maar Dawid sy tienduisende! En Saul het baie kwaad geword, want hierdie woord was verkeerd in sy oë.” Woede het Saul se denke so oorheers dat dit hom daartoe gedryf het om Dawid ’n hele paar keer te probeer vermoor. Hoewel Dawid vriendelik probeer wees het, was Saul onwillig om vrede en versoening na te streef. Uiteindelik het hy Jehovah se guns heeltemal verloor.—1 Samuel 18:6-11; 19:9, 10; 24:1-21; Spreuke 6:34, 35.

Wanneer iemand aan onbeheerste woede toegee, is dit onvermydelik dat hy of sy dinge sal sê en doen wat alle betrokkenes sal seermaak (Spreuke 29:22). Kain en Saul het woedend geword omdat elkeen, op sy eie manier, jaloers en afgunstig was. Maar woede kan om verskeie redes ontstaan. Ongegronde kritiek, ’n belediging, ’n misverstand of onregverdige behandeling kan tot ’n uitbarsting aanleiding gee.

Die voorbeelde van Kain en Saul dui op ’n ernstige tekortkoming wat hulle in gemeen gehad het. Kain is blykbaar nie deur geloof beweeg om sy offer te bring nie (Hebreërs 11:4). Saul se versuim om Jehovah se uitdruklike bevele te gehoorsaam en sy latere pogings om homself te regverdig het daartoe gelei dat hy God se guns en gees verloor. Dit is duidelik dat albei mans hulle verhouding met Jehovah geskend het.

Vergelyk sulke gesindhede met dié van Dawid, wat rede gehad het om woedend te wees oor die manier waarop Saul hom behandel het. Dawid het sy gees beheers. Waarom? Hy het gesê: “Dit is vir my ondenkbaar, vanuit Jehovah se standpunt, dat ek dit aan my heer, die gesalfde van Jehovah, sou doen.” Dawid het sy verhouding met Jehovah duidelik in gedagte gehad, en dit het ’n uitwerking gehad op die manier waarop hy Saul behandel het. Hy het sake nederig aan Jehovah oorgelaat.—1 Samuel 24:6, 15, NW.

Die implikasies van onbeheerste woede is voorwaar ernstig. Die apostel Paulus het gewaarsku: “Wees toornig, en moet nogtans nie sondig nie” (Efesiërs 4:26). Hoewel geregverdigde verontwaardiging sy plek het, is daar altyd die gevaar dat woede vir ons ’n struikelblok kan word. Dit is dan geen wonder nie dat dit vir ons ’n uitdaging is om ons woede te beheers. Hoe kan ons dit doen?

’n Belangrike manier is om ’n sterk verhouding met Jehovah op te bou. Hy spoor jou aan om wat in jou hart en gedagtes is teenoor hom uit te stort. Vertel hom van jou bekommernisse en sorge, en vra ’n rustige hart om woede te beteuel (Spreuke 14:30). Wees verseker dat ‘die oë van Jehovah op die regverdiges is, en sy ore is tot hulle smeking’.—1 Petrus 3:12.

Gebed kan jou vorm en rig. Hoe? Dit kan ’n diepgaande uitwerking hê op die manier waarop jy ander behandel. Onthou hoe Jehovah jou behandel het. Soos die Skrif sê, het Jehovah ‘nie met ons na ons sondes gehandel nie’ (Psalm 103:10). ’n Vergewensgesinde gees is noodsaaklik sodat “Satan nie die oorhand oor [jou] sal kry nie” (2 Korintiërs 2:10, 11). Daarbenewens help gebed om jou hart ontvanklik te maak vir die leiding van die heilige gees, wat diepgewortelde lewenspatrone omver kan werp. Jehovah gee met graagte ’n ‘vrede wat alle denke te bowe gaan’, wat jou van die stywe houvas van woede kan verlos.—Filippense 4:7.

Maar gebed moet gepaardgaan met ’n gereelde ondersoek van die Skrif sodat ons ‘kan voortgaan om te begryp wat die wil van Jehovah is’ (Efesiërs 5:17; Jakobus 3:17). As jy persoonlik sukkel om jou woede te beheers, moet jy daarna streef om Jehovah se beskouing van die saak te kry. Hersien tekste wat spesifiek verband hou met die beheersing van woede.

Die apostel Paulus gee hierdie belangrike herinnering: “Laat ons . . . aan almal goed doen, maar veral aan dié wat in die geloof aan ons verwant is” (Galasiërs 6:10). Hou jou gedagtes en dade daarop gerig om goed te doen aan ander. Sulke heilsame, positiewe bedrywighede sal empatie en vertroue aanmoedig en sal misverstande wat maklik tot woede kan lei, uit die weg ruim.

Die psalmis het gesê: “Maak my voetstappe vas in u woord, en laat geen ongeregtigheid oor my heers nie. Die wat u wet liefhet, het groot vrede, en vir hulle is daar geen struikelblok nie” (Psalm 119:133, 165). Dit kan met jou ook die geval wees.

[Venster/Prent op bladsy 9]

STAPPE OM WOEDE TE BEHEERS

□ Bid tot Jehovah.—Psalm 145:18.

□ Ondersoek die Skrif daagliks.—Psalm 119:133, 165.

□ Bly besig met nuttige werke.—Galasiërs 6:9, 10.