Hoe is God se gees vandag werksaam?

HY WAS van geboorte af kreupel. Elke dag het hy by die tempeldeur gesit wat Mooi genoem is om barmhartigheidsgawes te vra van dié wat in die tempel ingegaan het. Maar by een geleentheid het hierdie gestremde bedelaar iets ontvang wat baie meer werd was as ’n paar muntstukkies. Hy is gesond gemaak!—Handelinge 3:2-8.

Al was dit die apostels Petrus en Johannes wat “hom opgehelp” het sodat ‘sy voetsole sterk gemaak’ is, het hulle hulle nie die eer vir die genesing toegeëien nie. Waarom nie? Petrus verduidelik self: “Manne van Israel, waarom verwonder julle julle hieroor, of waarom staar julle ons aan asof ons hom deur ons eie krag of godvrugtige toegewydheid laat loop het?” Ja, Petrus sowel as Johannes het besef dat dit nie deur hulle eie krag was nie, maar deur God se heilige gees dat so iets gedoen kon word.—Handelinge 3:7-16; 4:29-31.

Destyds is sulke “kragtige werke” verrig om te toon dat die jong Christengemeente God se steun geniet (Hebreërs 2:4). Maar nadat die doel van hierdie werke bereik is, sou dit “weggedoen word”, het die apostel Paulus gesê (1 Korintiërs 13:8).a Daarom sien ons nie vandag dat daar in die ware Christengemeente enige godgegewe genesings plaasvind of profetiese boodskappe ontvang word of demone uitgedryf word nie.

Maar beteken dit dat God se heilige gees nie meer werksaam is nie? Beslis nie! Kom ons kyk na ’n paar ander maniere waarop God se gees in die eerste eeu werksaam was en hoe dit in ons dag werksaam is.

“Die gees van die waarheid”

Een werking van God se heilige gees is om inligting en geestelike verligting te gee en waarhede te openbaar. Kort voor Jesus se dood het hy vir sy dissipels gesê: “Ek het nog baie dinge om vir julle te sê, maar julle kan dit nie nou dra nie. Wanneer daardie een, die gees van die waarheid, egter kom, sal hy julle in die hele waarheid inlei.”—Johannes 16:12, 13.

“Die gees van die waarheid” is op Pinkster 33 G.J. uitgestort toe ongeveer 120 dissipels wat in ’n bovertrek in Jerusalem bymekaar was met heilige gees gedoop is (Handelinge 2:1-4). Die apostel Petrus was een van die aanwesiges by daardie jaarlikse feesviering. Petrus, wat met heilige gees vervul was, het “opgestaan” en sekere waarhede oor Jesus breedvoerig verduidelik. Hy het byvoorbeeld vertel hoe “Jesus die Nasarener . . . tot die regterhand van God verhef is” (Handelinge 2:14, 22, 33). God se gees het Petrus ook beweeg om moedig vir sy Joodse luisteraars te sê: “Laat die hele huis van Israel . . . vir seker weet dat God hom Here sowel as Christus gemaak het, hierdie Jesus wat julle aan die paal gehang het” (Handelinge 2:36). As gevolg van Petrus se geesgeïnspireerde boodskap het ongeveer drieduisend mense “sy woord van harte aangeneem” en hulle laat doop. Só het God se heilige gees dan gehelp om hulle in die waarheid in te lei.—Handelinge 2:37-41.

God se heilige gees het hulle ook onderrig en gehelp om dinge te herroep. Jesus het gesê: “Die helper, die heilige gees, wat die Vader in my naam sal stuur, dié sal julle alles leer en julle weer gedagtig maak aan alles wat ek julle vertel het.”—Johannes 14:26.

Hoe het die heilige gees hulle onderrig? God se gees het die dissipels se verstand geopen sodat hulle dinge kon verstaan wat hulle voorheen by Jesus gehoor het, maar nie ten volle verstaan het nie. Die apostels het byvoorbeeld geweet dat Jesus gedurende sy verhoor vir die Romeinse goewerneur van Judea, Pontius Pilatus, gesê het: “My koninkryk is geen deel van hierdie wêreld nie.” Maar toe Jesus meer as 40 dae later na die hemel opgevaar het, het sy apostels nog steeds verkeerdelik verwag dat die Koninkryk hier op die aarde opgerig sou word (Johannes 18:36; Handelinge 1:6). Die apostels kon klaarblyklik nie die betekenis van Jesus se woorde ten volle begryp totdat God se heilige gees op Pinkster 33 G.J. uitgestort is nie.

God se gees het ook die apostels gehelp om Jesus se leringe te onthou. Profesieë aangaande Christus se dood en opstanding het byvoorbeeld nuwe betekenis aangeneem met behulp van die heilige gees (Matteus 16:21; Johannes 12:16). Deur Jesus se leringe te onthou, kon die apostels hulle standpunt moedig voor konings, magistrate en godsdiensleiers verdedig.—Markus 13:9-11; Handelinge 4:5-20.

Daarbenewens het God se heilige gees gehelp om die vroeë Christene in die bediening na vrugbare gebiede te lei (Handelinge 16:6-10). God se gees het vroeë Christene ook beweeg om God se Woord, die Bybel, tot voordeel van die ganse mensdom te help skryf (2 Timoteus 3:16). Dit is dus duidelik dat die heilige gees in die eerste eeu op verskeie maniere werksaam was. Dit is nie net gegee om wonderwerke te verrig nie.

Heilige gees in ons dag

In ons dag werk die heilige gees eweneens ten behoewe van ware Christene. Dit het in die laaste helfte van die 19de eeu duidelik geword vir ’n klein groepie Bybelstudente in Allegheny, Pennsilvanië, VSA. Hierdie ernstige studente van die Bybel het daarna gesmag om “die waarheid” te ken.—Johannes 8:32; 16:13.

Een lid van hierdie groep, Charles Taze Russell, het die volgende oor sy soeke na skriftuurlike waarheid gesê: “Ek het gebid . . . dat ek gehelp mag word om van enige vooroordeel in my hart en verstand ontslae te raak wat in my pad kan staan en dat ek deur sy gees tot die regte insig gelei sal word.” God het hierdie nederige gebed verhoor.

Namate Russell en sy metgeselle die Skrif ywerig ondersoek het, het verskeie dinge duidelik geword. Russell het verduidelik: “Ons het gevind dat verskeie sektes en groepe deur die eeue heen die Bybelleerstellings onder mekaar verdeel het en dit vermeng het met meer of minder mensebespiegeling en dwaling.” Dit het daartoe gelei dat “die waarheid verlore geraak het”, soos hy dit gestel het. Trouens, skriftuurlike waarhede is begrawe onder ’n hele klomp heidense leerstellings wat deur die eeue heen in die Christendom ingesypel het. Maar Russell was vasbeslote om die waarheid te ken en te verkondig.

Deur die bladsye van Zion’s Watch Tower and Herald of Christ’s Presence het Russell en sy metgeselle valse godsdiensleerstellings wat God verkeerd voorstel moedig veroordeel. In teenstelling met wat algemeen geglo is, het hulle onderskei dat die siel sterflik is, dat ons na die graf gaan wanneer ons sterf en dat Jehovah die enigste ware God is en gevolglik nie deel van ’n Drie-eenheid is nie.

Maar soos jy jou kan indink, het hierdie blootlegging van valse leerstellings die geestelikes van die Christendom kwaad gemaak. Baie Katolieke en Protestantse geestelikes, wat graag hulle invloedryke posisies wou behou, het kampanjes gereël wat daarop gemik was om Russell in ’n slegte lig te stel. Maar hy en sy metgeselle het nie moed opgegee nie. Hulle het vol vertroue op God se gees gesteun vir leiding. “Ons Here verseker ons”, het Russell gesê, “dat . . . die heilige gees van die Vader, wat deur die toedoen en op versoek van Jesus ons Verlosser, Middelaar en Hoof gestuur word, ons onderrigter sal wees.” En dit het hulle beslis onderrig! Hierdie opregte Bybelstudente het voortgegaan om die suiwer water van waarheid uit die Bybel in te neem en dit regoor die wêreld te verkondig.—Openbaring 22:17.

Die hedendaagse organisasie van Jehovah se Getuies volg nou al meer as ’n eeu getrou die leiding van God se heilige gees. Namate Jehovah se gees hulle geestelike insig progressief verskerp, bring die Getuies gewillig die nodige veranderinge aan om aan te pas by die jongste begrip van Bybelwaarhede.—Spreuke 4:18.

“Julle sal getuies van my wees”

Jesus het nog ’n manier geïdentifiseer waarop God se heilige gees werksaam is toe hy vir sy dissipels gesê het: “Julle sal krag ontvang wanneer die heilige gees op julle kom, en julle sal getuies van my wees . . . tot in die mees afgeleë deel van die aarde” (Handelinge 1:8). Jesus se belofte om sy dissipels met “krag” en “heilige gees” te vervul sodat hulle hulle godgegewe werk kan doen, is vandag nog van toepassing.

As ’n groep is Jehovah se Getuies welbekend vir hulle predikingswerk. (Sien venster.) Trouens, Jehovah se Getuies verkondig die boodskap van waarheid in meer as 230 lande en eilandgroepe. Hulle maak God se Koninkryk moedig bekend onder alle denkbare omstandighede, selfs in oorloggeteisterde gebiede waar hulle lewe in gevaar is. Hulle ywer vir die Christelike bediening lewer kragtige bewys dat die heilige gees vandag werksaam is. En dit is duidelik dat Jehovah God hulle pogings seën.

Verlede jaar het hulle byvoorbeeld ver oor die miljard uur daaraan gewy om die goeie nuus van God se Koninkryk te verkondig. Met watter gevolg? Sowat 323 439 mense het hulle toewyding aan God deur waterdoop gesimboliseer. Daarbenewens is 4 433 884 tuisbybelstudies elke week met nuwe belangstellendes gehou. Altesaam 24 607 741 boeke, 631 162 309 tydskrifte en 63 495 728 brosjures en boekies is versprei. Wat ’n kragtige getuienis dat God se gees werksaam is!

God se gees en jy

Wanneer iemand gunstig op die goeie nuus reageer, volgens God se standaarde begin lewe en geloof in die voorsiening van die losprys beoefen, kan hy ’n rein posisie voor God geniet. Die apostel Paulus het vir sulke mense gesê: ‘God plaas sy heilige gees in julle.’—1 Tessalonisense 4:7, 8; 1 Korintiërs 6:9-11.

Dit bring talle wonderlike seëninge mee as ’n mens God se gees het. Watter soort seëninge? Om maar een ding te noem, God se geïnspireerde Woord sê: “Die vrugte van die gees . . . is liefde, vreugde, vrede, lankmoedigheid, goedhartigheid, goedheid, geloof, sagmoedigheid [en] selfbeheersing” (Galasiërs 5:22, 23). God se heilige gees is dus ’n groot krag ten goede, wat ’n mens in staat stel om godvrugtige eienskappe aan die dag te lê.

Daarbenewens kan God se gees jou help om in wysheid, kennis, insig, oordeel en denkvermoë toe te neem as jy die Bybel lees en toepas wat jy leer. Koning Salomo het “wysheid . . . en ’n baie groot verstand en ’n ruimte van insig” ontvang omdat hy God eerder as mense wou behaag (1 Konings 4:29). Aangesien Jehovah heilige gees aan Salomo gegee het, sal hy beslis nie sy heilige gees terughou van diegene wat hom vandag wil behaag nie.

God se heilige gees help Christene ook om teen Satan en die demone, hierdie goddelose stelsel van dinge en die sondige neigings van hulle gevalle vlees te stry. Hoe is dit moontlik? Die apostel Paulus antwoord: “Vir alles is ek sterk genoeg deur hom wat my krag gee” (Filippense 4:13). Die heilige gees verwyder dalk nie beproewinge of versoekings nie; maar kan jou help om dit te verduur. Deur op God se gees te vertrou, kan ons “krag wat bo die normale is”, ontvang om enige probleem of bekommernis die hoof te bied.—2 Korintiërs 4:7; 1 Korintiërs 10:13.

Wanneer jy na al die bewyse kyk, is daar geen twyfel dat God se heilige gees vandag werksaam is nie. Jehovah se gees motiveer sy knegte om van sy grootse voornemens te getuig. Dit gaan voort om geestelike lig te laat opgaan, en dit versterk ons geloof, wat ons help om lojaal aan ons Skepper te bly. Hoe dankbaar kan ons tog wees dat God sy belofte gestand gedoen het deur heilige gees aan sy getroue knegte van vandag te gee!

[Voetnoot]

[Venster op bladsy 10]

Wat ander omtrent Jehovah se Getuies sê

“Hoewel ander kerke raadgewers huur om mense kerk toe te lok of met hedendaagse kwessies soos homoseksualiteit en aborsie worstel, gaan die Getuies geen kompromis aan met hierdie veranderende wêreld nie. Hulle dek nog steeds die Aarde stelselmatig om mense te werf.”—The Orange County Register van Orange-distrik, Kalifornië, VSA.

“Wat die verkondiging van die geloof betref, is min denominasies so entoesiasties . . . soos die Jehovah se Getuies.”—The Republic van Columbus, Indiana, VSA.

“Hulle is die enigstes wat van huis tot huis gaan met ‘die goeie nuus’ en wat die Bybel se beginsels toepas.”—Życie Literackie, Pole.

“In die grootste predikingsveldtog tot nog toe het Jehovah se Getuies die boodskap van Jehovah regoor die aarde geneem.”—News-Observer, Tamaqua, Pennsilvanië, VSA.

[Prente op bladsy 9]

God se heilige gees verlig ons geestelik,

. . . bevorder goeie Christelike eienskappe

. . . en ondersteun ons in die wêreldwye predikingswerk