Goeie voorbeelde—Vind jy baat daarby?

“JULLE [het] ’n voorbeeld vir al die gelowiges in Masedonië en in Agaje geword.” Die apostel Paulus het hierdie woorde aan die getroue Christene in Tessalonika geskryf. Die voorbeeld wat hulle vir medegelowiges gestel het, was waarlik prysenswaardig. Maar die Tessalonisense het self goed gereageer op die voorbeeld wat Paulus en sy metgeselle gestel het. Paulus het gesê: ‘Die goeie nuus wat ons verkondig, het nie met woorde alleen tot julle gekom nie, maar ook met krag en met heilige gees en sterk oortuiging, net soos julle weet watter soort mense ons om julle onthalwe vir julle geword het; en julle het navolgers van ons geword.’—1 Tessalonisense 1:5-7.

Ja, Paulus het nie net vir ander getuig nie. Sy lewe was ’n voorbeeld van geloof, volharding en selfopoffering. Om dié rede het Paulus en sy metgeselle ’n baie kragtige invloed op die lewens van die Tessalonisense gehad, wat hulle beweeg het om die waarheid “onder groot verdrukking” aan te neem. Maar Paulus en sy medewerkers was hoegenaamd nie die enigste persone wat ’n positiewe invloed op daardie gelowiges gehad het nie. Die voorbeeld van ander wat verdrukking verduur het, was ook ’n aanmoediging. Paulus het aan die Tessalonisense geskryf: “Julle het navolgers geword, broers, van die gemeentes van God in Judea wat in eenheid met Christus Jesus is, omdat julle ook dieselfde dinge onder julle eie landgenote begin ly het as wat hulle ook onder die Jode ly.”—1 Tessalonisense 2:14.

Christus Jesus—die vernaamste Voorbeeld

Hoewel Paulus self ’n navolgenswaardige voorbeeld gestel het, het hy nie nagelaat om na Jesus Christus te wys as die hoofvoorbeeld wat Christene moet navolg nie (1 Tessalonisense 1:6). Christus was en is ons vernaamste Voorbeeld. Die apostel Petrus het geskryf: “Tot hierdie weg is julle geroep, omdat ook Christus vir julle gely het en vir julle ’n voorbeeld gelaat het sodat julle sy voetstappe noukeurig kan volg.”—1 Petrus 2:21.

Maar Jesus se lewe as ’n mens het byna 2 000 jaar gelede geëindig. Nou ‘woon hy in ontoeganklike lig’ as ’n onsterflike geesskepsel. Daarom ‘het nie een van die mense hom gesien of kan hulle hom sien nie’ (1 Timoteus 6:16). Hoe kan ons hom dan navolg? Een manier is deur die vier Bybelverslae van Jesus se lewe te bestudeer. Die Evangelies gee ons insig in sy persoonlikheid, lewenswandel en “geestesgesindheid” (Filippense 2:5-8). Ons kan verdere insig kry deur ’n noukeurige studie te maak van die boek Die grootste mens wat nog geleef het, wat die gebeure in Jesus se lewe breedvoerig en in chronologiese volgorde bespreek.a

Jesus se voorbeeld van selfopoffering het ’n kragtige uitwerking op die apostel Paulus gehad. Hy het vir die Christene in Korinte gesê: “Wat my betref, ek sal met die grootste genoeë uitgee en heeltemal uitgegee word vir julle siele” (2 Korintiërs 12:15). Hy het beslis ’n gesindheid soos dié van Christus gehad! Namate ons oor Christus se volmaakte voorbeeld nadink, moet dit ons ook beweeg om hom in ons lewenswandel na te volg.

Jesus het ons byvoorbeeld geleer dat ons op God se belofte moet vertrou dat hy materieel vir ons sal sorg. Maar hy het meer as dit gedoen. Hy het daagliks hierdie soort geloof en vertroue in Jehovah geopenbaar. Hy het gesê: “Vosse het gate en voëls van die hemel het slaapplekke, maar die Seun van die mens het geen plek om sy kop neer te lê nie” (Matteus 6:25; 8:20). Oorheers bekommernisse oor materiële dinge jou denke en dade? Of getuig jou lewe daarvan dat jy die Koninkryk eerste soek? En wat van jou gesindheid teenoor Jehovah se diens? Is dit soos dié van ons Voorbeeld, Jesus? Die Bybel toon dat Jesus nie net van ywer gepraat het nie, maar dat hy by baie geleenthede vurige ywer aan die dag gelê het (Johannes 2:14-17). Wat ’n uitstekende voorbeeld het Jesus ook gestel wat liefde betref! Hy het immers sy eie lewe vir sy dissipels opgeoffer! (Johannes 15:13). Volg jy Jesus na deur liefde teenoor jou Christenbroers te betoon? Of laat jy toe dat die onvolmaakthede van party verhinder dat jy hulle liefhet?

In ons strewe om Christus se voorbeeld na te volg, sal ons dikwels te kort skiet. Maar Jehovah is ongetwyfeld verheug oor ons pogings om ‘ons met die Here Jesus Christus te beklee’.—Romeine 13:14.

“Voorbeelde vir die kudde”

Is daar vandag individue in die gemeente wat vir ons as voorbeelde kan dien? Daar is beslis! Broers wat in posisies van verantwoordelikheid aangestel is, moet veral ’n voorbeeld stel. Paulus het vir Titus, wat gemeentes in Kreta bedien het en wat opsieners aangestel het, gesê dat elke ouer man wat aangestel word “vry van beskuldiging” moet wees (Titus 1:5, 6). Die apostel Petrus het “ouer manne” eweneens vermaan om “voorbeelde vir die kudde” te word (1 Petrus 5:1-3). En wat van diegene wat as bedieningsknegte dien? Hulle moet ook manne wees “wat op voortreflike wyse dien”.—1 Timoteus 3:13.

Dit is natuurlik nie realisties om te verwag dat elke ouer man of bedieningskneg in elke aspek van die Christelike bediening besonder bekwaam sal wees nie. Paulus het vir die Christene in Rome gesê: “Ons [het] gawes . . . wat verskil ooreenkomstig die onverdiende goedhartigheid wat aan ons gegee is” (Romeine 12:6). Verskillende broers doen op verskillende gebiede goed. Dit is nie redelik om te verwag dat ouer manne alles volmaak sal doen en sê nie. “Ons almal struikel baie kere”, sê die Bybel in Jakobus 3:2. “As iemand in woord nie struikel nie, is hy ’n volmaakte man, in staat om ook sy hele liggaam in toom te hou.” Maar ondanks hulle onvolmaakthede kan ouer manne nog steeds, soos Timoteus, “[voorbeelde] vir die getroues in woord, in gedrag, in liefde, in geloof, in kuisheid” word (1 Timoteus 4:12). Wanneer ouer manne dit doen, sal die kudde geredelik ag slaan op die vermaning in Hebreërs 13:7: “Hou dié in gedagte wat die leiding onder julle neem, . . . en namate julle die uiteinde van hulle gedrag aanskou, moet julle hulle geloof navolg.”

Ander hedendaagse voorbeelde

Gedurende die afgelope paar dekades het baie ander getoon dat hulle goeie voorbeelde is. Wat van die duisende selfopofferende sendelinge wat “huise of broers of susters of vader of moeder of kinders of landerye . . . verlaat het” om die Christelike opdrag in ander lande uit te voer? (Matteus 19:29). Dink ook aan die reisende opsieners en hulle vrouens, die mans en vroue wat as vrywilligers by die kantore van die Wagtoringgenootskap dien, asook die pioniers wat in die gemeentes dien. Kan sulke voorbeelde ander motiveer? Een Christenevangeliedienaar in Asië onthou ’n sendeling van die agtste klas van die Wagtoring-Bybelskool Gilead. Hy het gesê dat hierdie getroue broer “gewillig [was] om die swerms muskiete en die drukkende, vogtige klimaat te trotseer. . . . Nog indrukwekkender was sy vermoë om aanbiedings in Chinees sowel as Maleis te doen, hoewel hy van Engeland was.” Watter uitwerking het hierdie goeie voorbeeld gehad? Die broer het gesê: “Sy kalm houding en selfvertroue het my laat besluit dat ek ’n sendeling wil word wanneer ek groot is.” Dit is nie verbasend dat hierdie broer wel ’n sendeling geword het nie.

Die Watch Tower Publications Index bevat ’n lys van tientalle lewensverhale wat in Die Wagtoring en Ontwaak! verskyn het. Dit is verhale van persone wat wêreldse loopbane en doelwitte prysgegee het, swakhede oorkom het, drastiese veranderinge in hulle persoonlikheid aangebring het, ten spyte van teenstand ’n positiewe gesindheid behou het en ywer, volharding, lojaliteit, nederigheid en ’n selfopofferende gees aan die dag gelê het. ’n Leser het aangaande hierdie verslae geskryf: “Wanneer ek lees wat ander alles deurgemaak het, help dit my as Christen om nederiger en dankbaarder te wees en nie te veel van myself te dink of selfsugtig te wees nie.”

Daarbenewens moet jy nie vergeet van die goeie voorbeelde in jou eie gemeente nie: gesinshoofde wat getrou omsien na die materiële sowel as die geestelike behoeftes van hulle gesin; susters—insluitende enkelmoeders—wat die druk hanteer om kinders groot te maak terwyl hulle nog steeds ywerig in die bediening is; bejaardes en gestremdes wat getrou bly ondanks toenemende swakheid en slegte gesondheid. Word jy nie deur sulke voorbeelde aangemoedig nie?

Die wêreld is weliswaar vol slegte voorbeelde (2 Timoteus 3:13). Maar kyk na Paulus se vermaning aan Christene wat in Judea gewoon het. Nadat hy die voorbeeldige gedrag van baie manne en vroue van geloof van die ou tyd bespreek het, het die apostel Paulus hulle aangespoor: “Daarom dan, omdat ons so ’n groot wolk van getuies rondom ons het, laat ons ook . . . die wedloop wat voor ons gestel is met volharding hardloop, terwyl ons die blik stip gerig hou op die Hoofbewerker en Vervolmaker van ons geloof, Jesus” (Hebreërs 12:1, 2). Christene van vandag het ook ’n “groot wolk” van goeie voorbeelde—van die ou tyd sowel as hedendaagse voorbeelde—rondom hulle. Vind jy waarlik baat daarby? Jy kan, as jy vasbeslote is om “’n navolger, nie van wat sleg is nie, maar van wat goed is” te wees.—3 Johannes 11.

[Voetnoot]

[Lokteks op bladsy 20]

Dit is nie realisties om te verwag dat elke ouer man of bedieningskneg in elke aspek van die Christelike bediening besonder bekwaam sal wees nie

[Prente op bladsy 21]

Ouer manne moet “voorbeelde vir die kudde” wees