Waarom moet jy bid?
“JULLE vra wel, en tog ontvang julle nie, want julle vra met ’n verkeerde doel . . . Kom nader aan God, en hy sal nader aan julle kom” (Jakobus 4:3, 8). Hierdie woorde van Jesus se dissipel Jakobus sal ons heel moontlik aanspoor om na te dink oor die redes waarom ons bid.
Gebed is nie net ’n manier waarop ons vir God sê wat ons nodig het nie. Jesus het in sy welbekende Bergpredikasie gesê: “Julle Vader weet watter dinge julle nodig het nog voordat julle hom vra.” Maar Jesus het ook gesê: “Hou aan vra, en daar sal vir julle gegee word” (Matteus 6:8; 7:7). Jehovah wil dus wel hê dat ons vir hom moet sê wat ons voel ons nodig het. Maar gebed behels baie meer as dit.
Ware vriende kommunikeer nie net wanneer hulle iets nodig het nie. Hulle stel in mekaar belang, en hulle vriendskap verinnig wanneer hulle hulle gevoelens uitspreek. Gebed het eweneens ’n belangriker doel as om bloot gebruik te word wanneer ’n mens iets wil vra wat jy nodig het. Dit gee ons die geleentheid om ons verhouding met Jehovah te versterk deur ons hartgrondige toegewydheid aan hom uit te spreek.
Ja, God het ons die voorreg van gebed gegee sodat ons nader aan hom kan kom. Dit kan slegs gebeur as ons ons eie gevoelens teenoor God uitspreek en nie gememoriseerde gebede opsê nie. Hoe aangenaam is dit tog om met Jehovah in gebed te praat! Bowendien sê ’n Bybelspreuk: “Die gebed van die opregtes is Hom welgevallig.”—Spreuke 15:8.
“Wat my aangaan, dit is vir my goed om naby God te wees”, het die psalmis Asaf gesing (Psalm 73:28). Maar om na aan God te kom, moet ons meer doen as net bid. Let op hoe die volgende verslag dit toon:
“Een van [Jesus se] dissipels [het] vir hom gesê: ‘Here, leer ons hoe om te bid.’” In antwoord het Jesus gesê: “Wanneer julle bid, sê: ‘Vader, laat u naam geheilig word. Laat u koninkryk kom’” (Lukas 11:1, 2). Kan ons só bid en ons gebed betekenisvol wees sonder dat ons eers leer wat God se naam is en hoe dit geheilig sal word? En kan ons in ooreenstemming met hierdie woorde van Jesus bid as ons nie verstaan wat God se Koninkryk is nie? Ons kan hierdie sake verstaan as ons die Bybel sorgvuldig bestudeer. Die kennis wat ons sodoende opdoen, sal ons help om God te ken en sy weë te verstaan. Wat meer is, as ons Jehovah God leer ken, sal dit ons nader en meer toegewyd aan hom laat voel. Dit sal ons weer help om meer vryelik met hom in gebed te praat.
Gebed kan probleme oplos
As ons ’n hegte verhouding met Jehovah opbou, sal dit ons help om probleme op te los. Let op hoe dit in elk van die volgende gevalle waar was. Dit lig toe dat gebed mense help om hulle verhouding met Jehovah te versterk.
In Brasilië het ’n vrou met die naam Maria tot God gebid vir hulp. Sy wou nie langer die aanvaarde gedragstandaarde volg nie, deels as gevolg van die huigelary wat sy in die gemeenskap gesien het. Maria het selfs haar man, kinders en huis verlaat. Sy het ook dwelms begin gebruik. Maar toe sy nie geluk kon vind nie, het sy haar hart teenoor God uitgestort en vir hulp gebid.
Weldra het twee van Jehovah se Getuies Maria besoek en ’n eksemplaar van Die Wagtoring by haar gelaat wat gehandel het oor die waarde daarvan om God se leiding te aanvaar. Dit het haar hart geraak, en sy het daardie selfde dag nog die Bybel saam met die Getuies begin studeer. Dit het uiteindelik daartoe gelei dat haar gesinslewe herstel is. Namate sy van Jehovah geleer het, wou sy haar liefde vir hom bewys. “Ek het verbeteringe aangebring”, het Maria gesê. “My man en gesin het aan die begin beswaar gemaak teen my studie van die Bybel. Maar namate hulle die veranderinge gesien het wat ek gemaak het, het hulle my begin aanmoedig.” Later het Maria haar lewe aan die Hoorder van gebed toegewy om hom te dien.
Hoewel José ’n pragtige vrou en ’n florerende sakeonderneming in Bolivia gehad het, was hy ongelukkig. ’n Buite-egtelike verhouding het veroorsaak dat sy vrou hom verlaat het. Hy was ’n strawwe drinker en het nutteloos gevoel. José sê: “Ek het met my hele hart begin bid en gevra wat ek moet doen om God te behaag. Jehovah se Getuies het kort daarna my werksplek besoek en gratis tuisbybelstudies aangebied, maar ek het nie na hulle geluister nie. Dit het drie keer gebeur. Elke keer as ek vir hulp gebid het, het hulle gekom. Uiteindelik het ek my voorgeneem om die volgende keer te luister. Ek het reeds die hele Bybel gelees en het baie vrae gehad, maar hulle het my altyd bevredigende antwoorde gegee. Om van Jehovah te leer, het my ’n nuwe doel in die lewe gegee, en my vriende onder die Getuies was sulke aanmoedigende voorbeelde! Ek het my meisie en my drinkmaats verlaat. Kort voor lank was ek weer terug by my vrou en kinders. Ek is vroeg in 1999 gedoop.”
In Italië het Tamara huweliksprobleme gehad en daarom het sy vir wysheid gebid. Sy het aggressief begin word nadat haar familie haar geslaan en uit die huis gesit het toe sy 14 was. Tamara sê: “Ek het ’n Bybel gevind en dit begin lees. Ek het een aand ’n gedeelte gelees wat sê: ‘Om wysheid te verkry, is soos om verborge skatte te vind.’ Ek het vir daardie wysheid gebid (Spreuke 2:1-6). Die volgende oggend het Jehovah se Getuies my besoek. Ek het die Bybel saam met hulle begin studeer, maar dit het my ’n rukkie geneem om die dinge wat ek geleer het, toe te pas. Ek het uiteindelik besluit om die Christelike lewenswyse te volg en is gedoop. Nou help ek en my man ander om by God se wysheid baat te vind.”
Beatriz was deel van die hoëlui in Caracas, Venezuela. En tog was sy geskei en neerslagtig. Omdat sy radeloos was, het sy eenkeer ure lank gebid. Die volgende oggend het die deurklokkie gelui. Sy was geïrriteerd toe sy deur die loergaatjie kyk en twee mense met aktetasse sien. Sy het gemaak asof sy nie by die huis is nie, maar voordat die twee weggeloop het, het hulle ’n strooibiljet onder die deur ingedruk. “Ken jou Bybel”, het dit gesê. Kon hulle besoek iets te doen hê met haar gebede van die vorige nag? Sy het hulle teruggeroep. Sy het die Bybel begin studeer, en later is sy gedoop. Beatriz is uiteindelik gelukkig, en nou leer sy ander hoe om geluk te vind.
Carmen het oor haar stryd teen armoede gebid. Sy het tien kinders gehad, en haar man, Rafael, was ’n dronkaard. “Ek het geld probeer verdien deur klere te was”, het Carmen gesê. Maar Rafael het al hoe erger begin drink. “Dit was eers nadat ons die Bybel met Jehovah se Getuies begin studeer het dat my man begin verander het. Ons het van die Koninkryksbelofte geleer—dat Jehovah die wêreld binnekort van armoede en onderdrukking sal bevry. My gebede tot God is uiteindelik verhoor!” Om van Jehovah se weë te leer, het Rafael gehelp om op te hou drink, en hy het hom met “die nuwe persoonlikheid” beklee (Efesiërs 4:24). Hy en sy gesin kon hulle lewenstandaard verbeter. Rafael sê: “Ons is dalk nie ryk nie, en ons besit nie ons eie huis nie, maar ons het die lewensbenodigdhede, en ons is gelukkig.”
Wanneer alle gebede verhoor sal word
Het dit hierdie mense gehelp om te bid? Beslis! En het jy opgelet dat hulle gebede in die meeste gevalle verhoor is toe iemand in die Christengemeente hulle gehelp het om na aan Jehovah God te kom deur die Bybel te studeer?—Handelinge 9:11.
Ons het dus goeie redes om te bid. Binnekort gaan die gebed verhoor word dat God se Koninkryk moet kom en sy wil op die aarde moet geskied (Matteus 6:10). Nadat God ons planeet gereinig het van diegene wat hom teëstaan, ‘sal die aarde vol wees van die kennis van Jehovah’ (Jesaja 11:9). Dan sal almal wat Jehovah liefhet “die glorieryke vryheid van die kinders van God” ondervind—en hulle gebede sal beslis verhoor word.—Romeine 8:18-21.
[Prent op bladsy 7]
Weet jy waarom ons moet bid?