Vrae van lesers
Is dit verkeerd om ’n troeteldier te laat uitsit as hy baie siek of oud is?
Die meeste mense hou van diere. Party diere word geliefde troeteldiere. Honde is byvoorbeeld bekend vir hulle onvoorwaardelike gehoorsaamheid en hulle liefde vir hulle baas. Daarom is dit te verstane dat mense dalk geheg is aan so ’n troeteldier, veral as hulle die troeteldier al jare lank het.
Die lewensduur van die meeste troeteldiere is egter nie baie lank nie. Honde, sowel as katte, leef sowat 10 tot 15 jaar, na gelang van die soort. Wanneer troeteldiere oud word, kan hulle aan siektes en gebreke begin ly wat vir hulle eienaars ontstellend kan wees, veral as hulle terugdink aan die jare toe hierdie diere jonger en aktiewer was. Sou dit verkeerd wees om sulke diere van hulle lyding te verlos deur hulle te laat uitsit?
’n Christen wil graag in ooreenstemming met God se wil optree wanneer dit by diere kom. Dit is beslis strydig met die wil van God om diere wreed te behandel, want sy Woord sê: “Die regverdige sorg vir die siel van sy mak dier” (Spreuke 12:10). Dit beteken egter nie dat God diere in dieselfde lig as mense beskou nie. Toe God mense geskep het, het hy getoon dat daar ’n duidelike onderskeid tussen hulle en diere is. Hy het byvoorbeeld vir mense die hoop op die ewige lewe gegee, maar nooit vir diere nie (Romeine 6:23; 2 Petrus 2:12). As die Skepper het hy die reg om die gepaste verhouding tussen mense en diere te bepaal.
Genesis 1:28 sê vir ons wat daardie verhouding is. God het vir die eerste mense gesê: “Die visse van die see en die voëls van die hemel en al die diere wat op die aarde kruip, moet aan julle onderworpe wees.” Psalm 8:6-8 sê eweneens: “Alles het u [God] onder sy [die mens se] voete gestel: kleinvee en beeste, hulle almal, en ook die diere van die oop veld, die voëls van die hemel en die visse van die see.”
God het dit duidelik gestel dat mense diere kon gebruik en kon doodmaak. Hulle vel kon byvoorbeeld vir klere gebruik word. Ná die Vloed van Noag se dag het God die mens ook toestemming gegee om die vleis van diere te eet en sodoende die vegetariese dieet aan te vul wat oorspronklik aan hulle gegee is.—Genesis 3:21; 4:4; 9:3.
Dit het mense nie die reg gegee om diere sommer na willekeur, of vir die pret, dood te maak nie. In Genesis 10:9 beskryf die Bybel Nimrod as “’n magtige jagter”. Maar dieselfde vers sê dat dit hom “in verset teen Jehovah” gebring het.
Hoewel die mens dus oor die diere heers, moet hy nie hierdie gesag misbruik nie, maar dit in ooreenstemming met die beginsels van God se Woord uitoefen. Dit sluit dalk in dat hy ’n troeteldier nie onnodig sal laat ly as hy baie oud, ernstig beseer of dodelik siek is nie. In so ’n geval is dit die Christen se verantwoordelikheid om self te besluit wat hy gaan doen. As hy dink dat dit liefdevol sal wees om ’n troeteldier nie verder te laat ly as daar geen redelike hoop op herstel is nie, kan hy besluit om hom te laat uitsit.