Jehovah, die God van waarheid
“U het my verlos, o Jehovah, die God van waarheid.”—PSALM 31:5.
1. Watter toestande het in die hemel en op aarde geheers toe daar geen onwaarheid was nie?
DAAR was ’n tyd toe daar geen onwaarheid was nie. In die onsigbare hemele het volmaakte geesskepsele gewoon wat hulle Skepper, “die God van waarheid”, gedien het (Psalm 31:5). Daar was geen leuens, geen bedrog nie. Jehovah het waarheid aan sy geesseuns oorgedra. Hy het dit gedoen weens sy liefde vir hulle en sy opregte besorgdheid oor hulle welsyn. Die situasie op die aarde was dieselfde. Jehovah het die eerste man en vrou geskep, en deur sy aangestelde kanaal het hy altyd met hulle gekommunikeer op ’n duidelike, openhartige manier en in waarheid. Hoe wonderlik moes dit tog gewees het!
2. Wie het onwaarheid ingebring, en waarom?
2 Later het ’n geesseun van God egter vermetel opgetree deur homself ’n mededingende god in verset teen Jehovah te maak. Hierdie geesskepsel, wat bekend geword het as Satan die Duiwel, wou hê dat ander hom moet aanbid. Om sy doel te bereik, het hy onwaarheid ingebring sodat hy ander onder sy beheer kon kry. Sodoende het hy “’n leuenaar en die vader van die leuen” geword.—Johannes 8:44.
3. Hoe het Adam en Eva op Satan se leuens gereageer, en met watter gevolge?
3 Deur middel van ’n slang het Satan vir die eerste vrou, Eva, gesê dat sy nie sou sterf as sy God se gebod oortree en die verbode vrug eet nie. Dit was ’n leuen. Hy het verder vir haar gesê dat sy soos God sou word en goed en kwaad sou ken as sy van die vrug eet. Dit was ook ’n leuen. Hoewel Eva nog nooit tevore leuens gehoor het nie, moes sy besef het dat dit wat die slang haar vertel het, nie ooreengestem het met wat God vir haar man, Adam, gesê het nie. Nogtans het sy besluit om eerder Satan te glo, nie Jehovah nie. Sy was geheel en al bedrieg en het die vrug geneem en dit geëet. Later het Adam ook van die vrug geëet (Genesis 3:1-6). Soos Eva het Adam ook nog nooit tevore ’n leuen gehoor nie, en tog is hy nie bedrieg nie (1 Timoteus 2:14). Deur sy dade het hy getoon dat hy sy Maker verwerp. Dit het rampspoedige gevolge vir die mensdom gehad. Weens Adam se ongehoorsaamheid het sonde en die dood—tesame met verdorwenheid en eindelose ellende—tot al sy nakomelinge deurgedring.—Romeine 5:12.
4. (a) Watter vorm het die leuens wat in Eden vertel is, aangeneem? (b) Wat moet ons doen om nie deur Satan mislei te word nie?
4 Onwaarheid het ook versprei. Ons moet besef dat daardie leuens wat in die tuin van Eden vertel is, ’n aanval op die waaragtigheid van Jehovah self was. Satan het beweer dat God die eerste mensepaar op bedrieglike wyse iets goeds ontneem het. Dit was natuurlik nie waar nie. Adam en Eva het nie by hulle ongehoorsaamheid baat gevind nie. Hulle het gesterf, net soos Jehovah gesê het. Nietemin het Satan se lasterlike aanval teen Jehovah voortgeduur, in dié mate dat die apostel Johannes eeue later geïnspireer is om te skryf dat Satan “die hele bewoonde aarde mislei” (Openbaring 12:9). As ons nie deur Satan die Duiwel mislei wil word nie, moet ons ons volle vertroue stel in die waaragtigheid van Jehovah en sy Woord. Hoe kan jy jou vertroue in Jehovah opbou en versterk en jou beskerm teen die bedrog en leuens wat deur sy Teenstander bevorder word?
Jehovah ken die waarheid
5, 6. (a) Watter kennis besit Jehovah? (b) Hoe vergelyk mensekennis met Jehovah s’n?
5 Die Bybel identifiseer Jehovah deurgaans as die Een wat “alles geskep het” (Efesiërs 3:9). Hy is “die Een wat die hemel en die aarde en die see en alles wat in hulle is, gemaak het” (Handelinge 4:24). Aangesien Jehovah die Skepper is, ken hy die waarheid omtrent alles. Ter toeligting: Dink aan ’n man wat sy eie huis ontwerp en daarna gebou het, wat elke plank in posisie geplaas en elke spyker ingeslaan het. Hy sal elke besonderheid van daardie huis ken en hy sal meer daaroor weet as enigeen wat daarna kyk. Mense het ’n goeie kennis van die dinge wat hulle ontwerp en maak. So ook weet die Skepper alles omtrent die dinge wat hy geskep het.
6 Die profeet Jesaja het die omvang van Jehovah se kennis baie mooi beskryf. Ons lees: “Wie het die waters in die holte van sy hand gemeet, en die afmetings van die hemel met ’n span geneem, en die stof van die aarde in ’n maat ingesluit, of die berge met ’n weegtoestel en die heuwels op die weegskaal geweeg? Wie het die afmetings van die gees van Jehovah geneem, en wie kan aan hom as sy raadsman enigiets bekend maak? Met wie het hy beraadslaag sodat ’n mens hom sou laat verstaan, of wie leer hom die pad van geregtigheid of leer hom kennis of maak aan hom die weg van ware begrip bekend?” (Jesaja 40:12-14). Ja, Jehovah is waarlik “’n God van kennis” en hy is ‘volmaak in kennis’ (1 Samuel 2:3; Job 36:4; 37:16). Hoe min weet ons tog in vergelyking met hom! Ten spyte van die indrukwekkende kennis wat die mensdom al opgedoen het, kom ons begrip van die fisiese skepping nog nie eens by “die rande van [God se] weë” nie. Dit is soos “’n fluistering” in vergelyking met “magtige donder”.—Job 26:14.
7. Wat het Dawid omtrent Jehovah se kennis besef, en wat moet ons dus erken?
7 Aangesien Jehovah ons geskep het, is dit vanselfsprekend dat hy ons goed ken. Koning Dawid het dit besef. Hy het geskryf: “O Jehovah, u het my deurvors, en u ken my. U het my sit en my opstaan te wete gekom. U het van ver af op my gedagte gelet. My gaan en my lê het u afgemeet, en met al my weë het u vertroud geraak. Want daar is nog geen woord op my tong nie, maar kyk! o Jehovah, u weet dit reeds alles” (Psalm 139:1-4). Dawid het natuurlik geweet dat mense wilsvryheid het—God het ons die vermoë gegee om gehoorsaam of ongehoorsaam aan hom te wees (Deuteronomium 30:19, 20; Josua 24:15). Maar Jehovah ken ons veel beter as wat ons onsself ken. Hy wil die beste vir ons hê, en hy is in staat om ons weë te rig (Jeremia 10:23). Trouens, daar is geen onderwyser, geen deskundige, geen raadgewer wat beter toegerus is om ons die waarheid te leer en ons wys en gelukkig te maak nie.
Jehovah is waaragtig
8. Hoe weet ons dat Jehovah waaragtig is?
8 Dit is een ding om die waarheid te ken, maar iets heeltemal anders om altyd die waarheid te praat, om waaragtig, of waarheidliewend, te wees. Die Duiwel het byvoorbeeld gekies om “nie in die waarheid [vas te staan] nie” (Johannes 8:44). Daarenteen is Jehovah ‘oorvloedig in waarheid’ (Eksodus 34:6). Die Skrif getuig deurgaans van Jehovah se waaragtigheid. Die apostel Paulus het gesê dat “dit onmoontlik is vir God om te lieg” en dat God “nie kan lieg nie” (Hebreërs 6:18; Titus 1:2). Liefde vir waarheid is ’n belangrike deel van God se persoonlikheid. Ons kan op Jehovah vertrou omdat hy waaragtig is; hy bedrieg nooit sy lojale knegte nie.
9. Hoe hou Jehovah se naam verband met waarheid?
9 Selfs Jehovah se naam getuig van sy waaragtigheid. Die goddelike naam beteken “Hy laat word”. Dit identifiseer Jehovah as die een wat op progressiewe wyse die Vervuller van al sy beloftes word. Niemand anders het daardie vermoë nie. Omdat Jehovah die Allerhoogste is, kan niks die vervulling van sy voornemens dwarsboom nie. Nie alleen is Jehovah waaragtig nie, maar net hy het die krag en die wysheid om alles wat hy sê, waar te laat word.
10. (a) Hoe het Josua die waaragtigheid van Jehovah gesien? (b) Watter beloftes van Jehovah het jy in vervulling sien gaan?
10 Josua en baie ander was ooggetuies van die merkwaardige gebeure wat van Jehovah se waaragtigheid getuig het. Josua was in Egipte toe Jehovah die tien plae oor daardie nasie gebring het, waarvan elkeen voorspel is. Josua het onder meer die vervulling gesien van Jehovah se belofte om die Israeliete uit Egipte te verlos en hulle tot in die Beloofde Land in te lei, waar hy die magtige Kanaänitiese leërs wat teen hulle opgetrek het, verslaan het. Teen die einde van sy lewe het Josua vir die ouer manne van die nasie Israel gesê: “Julle weet goed met julle hele hart en met julle hele siel dat nie een woord van al die goeie woorde wat Jehovah julle God met julle gespreek het, onvervuld gebly het nie. Alles is vir julle bewaarheid. Nie een woord daarvan het onvervuld gebly nie” (Josua 23:14). Het jy, al het jy nie die wonderwerke gesien wat Josua gesien het nie, die waaragtigheid van God se beloftes in jou leeftyd ondervind?
Jehovah openbaar die waarheid
11. Wat toon dat Jehovah die waarheid aan die mensdom wil openbaar?
11 Stel jou ’n ouer voor wat baie kennis het, maar selde met sy kinders praat. Is jy nie dankbaar dat Jehovah nie so is nie? Jehovah kommunikeer uit liefde met die mensdom, en hy doen dit op ruimhartige wyse. Die Skrif noem hom die “Grootse Onderrigter” (Jesaja 30:20). In sy liefderyke goedhartigheid reik hy selfs uit na diegene wat nie geneig is om na hom te luister nie. Esegiël is byvoorbeeld gestuur om vir mense te preek wat Jehovah geweet het onontvanklik sou wees. Jehovah het gesê: “Mensekind, kom, gaan onder die huis van Israel in, en jy moet hulle met my woorde aanspreek.” Toe het hy gewaarsku: “Hulle sal nie na jou wil luister nie, want hulle wil nie na my luister nie; omdat die hele huis van Israel hardkoppig en hard van hart is.” Dit was ’n moeilike toewysing, maar Esegiël het dit getrou uitgevoer en sodoende Jehovah se medelye weerspieël. As jy ’n moeilike predikingstoewysing het en op God vertrou, kan jy seker wees dat hy jou sal versterk net soos hy sy profeet Esegiël versterk het.—Esegiël 3:4, 7-9.
12, 13. Op watter maniere het God met mense gekommunikeer?
12 Jehovah wil graag hê dat “alle soorte mense gered moet word en tot juiste kennis van die waarheid moet kom” (1 Timoteus 2:4). Hy het deur middel van profete, engele en selfs sy geliefde Seun, Jesus Christus, gepraat (Hebreërs 1:1, 2; 2:2). Jesus het vir Pilatus gesê: “Hiervoor is ek gebore en hiervoor het ek in die wêreld ingekom, om van die waarheid te getuig. Elkeen wat aan die kant van die waarheid is, luister na my stem.” Pilatus het ’n kosbare geleentheid gehad om die waarheid oor Jehovah se voorsiening vir redding by die Seun van God self te leer. Maar Pilatus was nie aan die kant van die waarheid nie, en hy wou nie by Jesus leer nie. Pilatus het eerder sinies geantwoord: “Wat is waarheid?” (Johannes 18:37, 38). Hoe jammer tog! Nietemin was daar baie wat wel geluister het na die waarheid wat Jesus verkondig het. Hy het vir sy dissipels gesê: “Gelukkig is julle oë omdat hulle sien, en julle ore omdat hulle hoor.”—Matteus 13:16.
13 Jehovah het deur middel van die Bybel die waarheid bewaar en dit aan mense regoor die wêreld beskikbaar gestel. Die Bybel openbaar dinge soos dit werklik is. Dit beskryf God se eienskappe, voornemens en gebooie, sowel as die werklike situasie waarin die mensdom verkeer. Jesus het in gebed tot Jehovah gesê: “U woord is die waarheid” (Johannes 17:17). Daarom is die Bybel ’n unieke boek. Dit is die enigste boek wat geskryf is onder inspirasie van die God wat alles weet (2 Timoteus 3:16). Dit is ’n kosbare geskenk aan die mensdom, een wat God se knegte hoog op prys stel. Dit sal wys van ons wees om dit elke dag te lees.
Hou vas aan die waarheid
14. Wat is van die dinge wat Jehovah sê hy gaan doen, en waarom moet ons hom glo?
14 Ons moet die dinge wat Jehovah vir ons in sy Woord sê, in ’n ernstige lig beskou. Hy is wat hy sê hy is, en hy sal doen wat hy sê hy gaan doen. Ons het alle rede om op God te vertrou. Ons kan dit glo wanneer Jehovah sê dat hy “wraak [gaan] uitoefen op dié wat God nie ken nie en dié wat die goeie nuus oor ons Here Jesus nie gehoorsaam nie” (2 Tessalonisense 1:8). Ons kan Jehovah ook vertrou wanneer hy sê dat hy diegene liefhet wat regverdigheid nastreef, wanneer hy sê dat hy die ewige lewe sal gee aan diegene wat geloof beoefen en wanneer hy sê dat hy ’n einde gaan maak aan pyn, angsgeroep en selfs die dood. Jehovah het die betroubaarheid van hierdie laaste belofte beklemtoon deur hierdie opdrag aan die apostel Johannes te gee: “Skryf, want hierdie woorde is betroubaar en waaragtig.”—Openbaring 21:4, 5; Spreuke 15:9; Johannes 3:36.
15. Wat is van die leuens wat Satan bevorder?
15 Satan is presies die teenoorgestelde van Jehovah. Hy gee nie insig nie, hy bedrieg. Om sy doel te bereik om mense van rein aanbidding af te keer, bevorder Satan ’n menigte leuens. Satan wil ons byvoorbeeld wysmaak dat God emosioneel ver verwyderd is van mense en ongevoelig is vir die lyding op aarde. Tog toon die Bybel dat Jehovah opreg besorg is oor sy skepsele en dat hy geen behae het in verdorwenheid en lyding nie (Handelinge 17:24-30). Satan wil mense ook wysmaak dat geestelike strewes ’n verkwisting van tyd is. Daarenteen verseker die Skrif ons dat ‘God nie onregverdig is sodat hy julle werk sal vergeet en die liefde wat julle vir sy naam getoon het nie’. Wat meer is, dit toon duidelik dat “hy die beloner word van dié wat hom ernstig soek”.—Hebreërs 6:10; 11:6.
16. Waarom moet Christene waaksaam bly en vashou aan die waarheid?
16 Die apostel Paulus het aangaande Satan gesê: “Die god van hierdie stelsel van dinge [het] die verstande van die ongelowiges verblind . . . , sodat die verligting van die glorieryke goeie nuus oor die Christus, wat die beeld van God is, nie sou deurskyn nie” (2 Korintiërs 4:4). Soos met Eva die geval was, word party geheel en al bedrieg deur Satan die Duiwel. Ander volg die voorbeeld van Adam, wat nie bedrieg is nie, maar doelbewus die weg van ongehoorsaamheid gekies het (Judas 5, 11). Dit is dus noodsaaklik dat Christene waaksaam bly en vashou aan die waarheid.
Jehovah vereis “geloof sonder huigelary”
17. Wat moet ons doen om Jehovah se guns te geniet?
17 Omdat Jehovah waaragtig is in al sy weë, verwag hy van diegene wat hom aanbid om ook waarheid lief te hê. Die psalmis het geskryf: “O Jehovah, wie sal ’n gas in u tent wees? Wie sal op u heilige berg woon? Hy wat onberispelik wandel en regverdigheid beoefen en in sy hart die waarheid spreek” (Psalm 15:1, 2). Wanneer die Jode hierdie woorde oor Jehovah se heilige berg gesing het, het dit hulle ongetwyfeld laat dink aan die berg Sion, waarheen koning Dawid die verbondsark gebring het om dit te plaas in die tent wat hy daar opgeslaan het (2 Samuel 6:12, 17). Die berg en die tent het die volk herinner aan die plek waar Jehovah in simboliese sin gewoon het. Daar kon mense God nader om sy guns af te smeek.
18. (a) Wat is nodig om ’n vriend van God te wees? (b) Wat sal in die volgende artikel bespreek word?
18 Enigiemand wat ’n vriend van Jehovah wil wees, moet die waarheid “in sy hart” spreek, nie net met sy lippe nie. Ware vriende van God moet eerlik in hulle hart wees en “geloof sonder huigelary” openbaar, want eerlike dade kom uit die hart (1 Timoteus 1:5; Matteus 12:34, 35). ’n Vriend van God tree nie slinks of bedrieglik op nie, want “’n man van . . . bedrog word deur Jehovah verfoei” (Psalm 5:6). Jehovah se Getuies in alle wêrelddele span hulle in om God na te volg deur waarheid lief te hê. Die volgende artikel sal hierdie onderwerp bespreek.
Hoe sal jy antwoord?
• Waarom ken Jehovah die waarheid omtrent alles?
• Wat toon dat Jehovah waaragtig is?
• Hoe het Jehovah die waarheid geopenbaar?
• Wat word van ons vereis wanneer dit by waarheid kom?
[Prente op bladsy 10]
Die God van waarheid weet alles omtrent die dinge wat hy geskep het
[Prente op bladsy 12, 13]
Jehovah se beloftes sal vervul word