Vrae van lesers
Wat is die doop vir die dooies?
Toe die apostel Paulus oor die hemelse opstanding geskryf het, het hy ’n uiters interessante versgedeelte opgeteken. In Die Bybel van 1953 lees ons: “Anders, wat sal hulle doen wat hulle vir die dode laat doop, as die dode geheel en al nie opgewek word nie? Waarom laat hulle hul nog vir die dode doop?” En The New Jerusalem Bible vertaal hierdie gedeelte soos volg: “Wat wil mense bereik wat hulle ten behoewe van die dooies laat doop? As die dooies glad nie opgewek word nie, waarom laat hulle hulle dan ten behoewe van die dooies doop?”—1 Korintiërs 15:29.
Gee Paulus hier te kenne dat lewende persone gedoop moet word ten behoewe van dié wat in ’n ongedoopte toestand gesterf het? Dit lyk miskien so as ’n mens na hierdie en ander Bybelvertalings kyk. Maar ’n noukeuriger ondersoek van die Skrif sowel as die oorspronklike Grieks wat Paulus gebruik het, gee aanleiding tot ’n ander slotsom. Paulus het bedoel dat gesalfde Christene gedoop, of gedompel, word in ’n lewensweg wat sal lei tot hulle dood as handhawers van onkreukbaarheid, soos in die geval van Christus. Daarna sal hulle soos hy tot geeslewe opgewek word.
Die Skrif ondersteun hierdie verduideliking. In sy brief aan die Romeine het Paulus geskryf: “Weet julle nie dat ons almal wat in Christus Jesus gedoop is, in sy dood gedoop is nie?” (Romeine 6:3). In sy brief aan die Filippense het Paulus van homself gepraat as iemand met “deelgenootskap in [Christus se] lyding, terwyl ek my aan ’n dood soos syne onderwerp, om te sien of ek op die een of ander wyse tot die vroeër opstanding uit die dode kan kom” (Filippense 3:10, 11). Paulus het daarop gewys dat die lewe van ’n gesalfde volgeling van Christus ’n weg behels waarin hy sy onkreukbaarheid tydens beproewinge handhaaf, daagliks voor die dood te staan kom en uiteindelik sterf as ’n handhawer van onkreukbaarheid, wat die hoop op die hemelse opstanding het.
Dit is opmerkenswaardig dat hierdie en ander tekste wat die dood direk in verband met gedoopte persone noem, na lewende individue verwys wat reeds gedoop is en nie na dié wat gesterf het nie. Paulus het ook vir gesalfde mede-Christene gesê: “Julle is saam met hom in sy doop begrawe, en deur gemeenskap met hom is julle ook saam opgewek deur julle geloof in die werking van God, wat hom uit die dode opgewek het.”—Kolossense 2:12.
Die Griekse voorsetsel hy·perʹ wat in 1 Korintiërs 15:29 met “vir” of “ten behoewe van” in verskeie Bybelvertalings vertaal is, kan ook “met die doel om” beteken. In ooreenstemming met ander Bybelverse gee die Nuwe Wêreld-vertaling van die Heilige Skrif hierdie vers tereg soos volg weer: “Wat sal dié doen wat gedoop word met die doel om dooies te wees? As die dooies glad nie opgewek gaan word nie, waarom word hulle ook gedoop met die doel om sodaniges te wees?”