Vroue wat Jehovah se hart verbly het
“Mag Jehovah jou handelswyse beloon, en mag daar vir jou ’n volmaakte loon wees van Jehovah.”—RUT 2:12.
1, 2. Hoe kan ons daarby baat vind as ons nadink oor Bybelvoorbeelde van vroue wat Jehovah se hart verbly het?
VREES vir God het twee vroue beweeg om ’n Farao se bevel te verontagsaam. Geloof het ’n prostituut haar lewe laat waag om twee Israelitiese spioene te beskerm. Verstandigheid en nederigheid in ’n krisis het ’n vrou gehelp om baie lewens te red en te verhoed dat die gesalfde van Jehovah hom bloedskuldig maak. Geloof in Jehovah God tesame met ’n gees van gasvryheid het ’n weduwee en moeder beweeg om haar laaste bietjie kos vir ’n profeet van God te gee. Dit is net ’n paar van die talle skriftuurlike voorbeelde van vroue wat Jehovah se hart verbly het.
2 Jehovah se gesindheid teenoor hierdie vroue en die seëninge wat hy op hulle uitgestort het, toon dat geestelike eienskappe vir hom die belangrikste is, ongeag wat iemand se geslag is. In vandag se wêreld, wat so behep is met fisiese dinge, is dit ’n uitdaging om ’n mens se geestelikheid eerste te stel. Maar daardie uitdaging kan die hoof gebied word, soos miljoene godvresende vroue toon wat vandag ’n groot deel van God se volk uitmaak. Hierdie Christenvroue volg die geloof, goeie oordeel, gasvryheid en ander goeie eienskappe na van godvresende vroue wat in die Bybel genoem word. Christenmans wil natuurlik ook die eienskappe aan die dag lê wat hierdie voorbeeldige vroue van die ou tyd getoon het. Om te kyk hoe ons dit in groter mate kan doen, kan ons gerus die Bybelverslae oor die vroue wat in die begin genoem is, in meer besonderhede bespreek.—Romeine 15:4; Jakobus 4:8.
Vroue wat ’n Farao se bevel verontagsaam het
3, 4. (a) Waarom het Sifra en Pua geweier om Farao te gehoorsaam toe hy beveel het dat elke pasgebore Israelitiese seuntjie doodgemaak moet word? (b) Hoe het Jehovah die twee vroedvroue beloon vir hulle moed en godvrugtige vrees?
3 By die Neurenberg-verhoor, wat ná die Tweede Wêreldoorlog in Duitsland gehou is, het baie wat aan massamoord skuldig bevind is, hulle misdade probeer verskoon deur aan te voer dat hulle eenvoudig bevele gehoorsaam het. Vergelyk nou hierdie persone met twee Israelitiese vroedvroue, Sifra en Pua, wat in eertydse Egipte gewoon het gedurende die heerskappy van ’n onbekende maar tirannieke Farao. Uit vrees omdat die Hebreeuse bevolking so vinnig toegeneem het, het Farao die twee vroedvroue beveel om toe te sien dat elke pasgebore Hebreeuse seuntjie doodgemaak word. Hoe het die vroue op daardie wrede bevel gereageer? “Hulle het nie gedoen soos die koning van Egipte vir hulle gesê het nie, maar hulle het die seuntjies laat lewe.” Waarom het hierdie vroue nie voor mensevrees geswig nie? Want hulle het “die ware God gevrees”.—Eksodus 1:15, 17; Genesis 9:6.
4 Ja, die vroedvroue het hulle toevlug tot Jehovah geneem, en op sy beurt was hy vir hulle “’n skild” teen Farao se toorn (2 Samuel 22:31; Eksodus 1:18-20). Maar Jehovah se seën het nie daar opgehou nie. Hy het Sifra en Pua met gesinne van hulle eie beloon. Hy het hierdie vroue selfs vereer deur hulle name en optrede in sy geïnspireerde Woord te laat opteken sodat toekomstige geslagte dit kan lees, terwyl die naam van die Farao lank reeds vergete is.—Eksodus 1:21; 1 Samuel 2:30b; Spreuke 10:7.
5. Hoe toon baie Christenvroue vandag dieselfde gesindheid as Sifra en Pua, en hoe sal Jehovah hulle beloon?
5 Is daar vandag vroue soos Sifra en Pua? Ja, beslis! Daar is elke jaar duisende sulke vroue wat die Bybel se lewensreddende boodskap vreesloos verkondig in lande waar “die bevel van die koning” dit verbied, al kan dit hulle hulle vryheid of selfs hulle lewe kos (Hebreërs 11:23; Handelinge 5:28, 29). Omdat hulle deur liefde vir God en hulle naaste beweeg word, laat hierdie dapper vroue nie toe dat enigiemand hulle keer om die goeie nuus van God se Koninkryk aan ander te verkondig nie. Gevolglik het baie Christenvroue met teenstand en vervolging te kampe (Markus 12:30, 31; 13:9-13). Soos in die geval met Sifra en Pua, is Jehovah heeltemal bewus van wat hierdie voortreflike, dapper vroue doen, en hy sal sy liefde vir hulle toon deur hulle name in sy “boek van die lewe” te bewaar, mits hulle tot die einde toe getrou volhard.—Filippense 4:3; Matteus 24:13.
’n Voormalige prostituut verbly Jehovah se hart
6, 7. (a) Wat het Ragab van Jehovah en sy volk geweet, en hoe het hierdie kennis haar geraak? (b) Hoe word Ragab in God se Woord vereer?
6 In die jaar 1473 v.G.J. het ’n prostituut met die naam Ragab in die Kanaänitiese stad Jerigo gewoon. Ragab was klaarblyklik ’n goed ingeligte vrou. Toe twee Israelitiese spioene in haar huis wou wegkruip, kon sy spesifieke besonderhede meld oor Israel se wonderdadige uittog uit Egipte, al het dit 40 jaar vroeër plaasgevind! Sy het ook geweet van Israel se onlangser oorwinnings oor die Amoritiese konings Sihon en Og. Let op hoe daardie kennis haar geraak het. Sy het vir die spioene gesê: “Ek weet dat Jehovah beslis die land aan julle sal gee, . . . want Jehovah julle God is God in die hemel daar bo en op die aarde hier onder” (Josua 2:1, 9-11). Ja, wat Ragab oor Jehovah en sy dade ten behoewe van Israel gehoor het, het haar hart geraak en daartoe gelei dat sy geloof in hom gestel het.—Romeine 10:10.
7 Ragab se geloof het haar tot dade beweeg. Sy het die Israelitiese spioene “vreedsaam” ontvang, en sy het hulle lewensreddende instruksies gehoorsaam toe Israel Jerigo aangeval het (Hebreërs 11:31; Josua 2:18-21). Ragab se werke van geloof het ongetwyfeld Jehovah se hart verbly, want hy het die Christendissipel Jakobus geïnspireer om haar naam saam met dié van Abraham, God se vriend, neer te skryf as ’n voorbeeld vir Christene om na te volg. Jakobus het geskryf: “Is Ragab, die hoer, nie ook net so deur werke regverdig verklaar nadat sy die boodskappers gasvry ontvang en hulle met ’n ander pad weggestuur het nie?”—Jakobus 2:25.
8. Hoe het Jehovah Ragab vir haar geloof en gehoorsaamheid geseën?
8 Jehovah het Ragab op ’n hele paar maniere beloon. In die eerste plek het hy haar lewe wonderdadig gespaar, asook die lewens van almal wat in haar huis skuiling gesoek het—naamlik “die huisgesin van haar vader en almal wat aan haar behoort het”. Toe het hy hulle toegelaat om “onder Israel” te woon, waar hulle soos boorlinge behandel moes word (Josua 2:13; 6:22-25; Levitikus 19:33, 34). Maar dit is nie al nie. Jehovah het aan Ragab ook die eer gegee om ’n voorouer van Jesus Christus te word. Wat ’n oorweldigende betoning van liefderyke goedhartigheid teenoor ’n Kanaänitiese vrou wat vroeër afgode aanbid het!a—Psalm 130:3, 4.
9. Hoe kan Jehovah se gesindheid teenoor Ragab en sekere Christenvroue in die eerste eeu ’n bemoediging vir sommige vroue van vandag wees?
9 Soos Ragab is daar sommige Christenvroue, van die eerste eeu tot vandag toe, wat ’n onsedelike lewenswyse die rug toegekeer het om God te behaag (1 Korintiërs 6:9-11). Party van hulle het ongetwyfeld grootgeword in ’n milieu wat met dié van eertydse Kanaän vergelyk kan word, waar onsedelikheid algemeen was en selfs as normaal beskou is. Tog het hulle hulle weë verander, beweeg deur geloof gegrond op juiste kennis van die Skrif (Romeine 10:17). Daarom kan daar ook van hierdie vroue gesê word dat ‘God hom nie vir hulle skaam, om as hulle God aangeroep te word nie’ (Hebreërs 11:16). Wat ’n eer tog!
Geseën vir haar verstandigheid
10, 11. Watter situasie waarby Nabal en Dawid betrokke was, het Abigail beweeg om op te tree?
10 Talle getroue vroue van die ou tyd het verstandigheid op uitsonderlike wyse geopenbaar, wat hulle kosbaar in die oë van Jehovah se volk gemaak het. Een so ’n vrou was Abigail, die vrou van die welgestelde Israelitiese grondeienaar Nabal. Abigail se verstandigheid het daartoe gelei dat lewens gered is en dat Dawid, Israel se toekomstige koning, hom nie bloedskuldig gemaak het nie. Ons kan die verslag oor Abigail in 1 Samuel hoofstuk 25 lees.
11 Die verhaal begin waar Dawid en sy volgelinge kamp opgeslaan het naby Nabal se kuddes, wat hulle uit goedhartigheid teenoor hulle Israelitiese broer Nabal dag en nag sonder vergoeding beskerm. Wanneer Dawid se voorraad begin min word, stuur hy tien jong manne na Nabal om voedsel te vra. Nabal het nou die geleentheid om sy waardering teenoor Dawid te toon en hom as Jehovah se gesalfde te eer. Maar Nabal doen net mooi die teenoorgestelde. In ’n woedeuitbarsting beledig hy Dawid en stuur hy die jong manne met leë hande weg. Wanneer Dawid hiervan hoor, kry hy 400 gewapende manne bymekaar en vertrek om wraak te neem. Abigail hoor van haar man se hardvogtige optrede en tree vinnig en verstandig op om Dawid te paai deur vir hom ’n groot hoeveelheid kos en drinkgoed te stuur. Dan gaan sy self na Dawid toe.—Verse 2-20.
12, 13. (a) Hoe het Abigail getoon dat sy verstandig sowel as lojaal aan Jehovah en sy gesalfde was? (b) Wat het Abigail gedoen toe sy by die huis kom, en hoe het sake vir haar afgeloop?
12 Wanneer Abigail Dawid ontmoet, openbaar haar nederige versoek om barmhartigheid haar diepe respek vir Jehovah se gesalfde. “Jehovah sal vir seker vir my heer ’n bestendige huis tot stand bring, omdat my heer die oorloë van Jehovah voer”, sê sy en voeg by dat Jehovah Dawid as leier oor Israel sal aanstel (Verse 28-30). Terselfdertyd toon Abigail heelwat moed deur vir Dawid te sê dat sy wraaksug tot bloedskuld sal lei as hy nie versigtig is nie (Verse 26, 31). Abigail se nederigheid, diepe respek en helder denke bring Dawid tot besinning. Hy antwoord: “Mag Jehovah, die God van Israel, geloof word, wat jou vandag gestuur het om my te ontmoet! En mag jou verstandigheid geseënd wees, en mag jy geseënd wees wat my vandag daarvan weerhou het om bloedskuldig te word.”—Verse 32, 33.
13 Abigail keer terug huis toe en gaan moedig na haar man om hom in te lig oor haar geskenk aan Dawid. Maar wanneer sy hom kry, is hy “smoordronk”. Daarom wag sy totdat hy nugter is voordat sy hom vertel. Hoe reageer Nabal? Hy is so stomgeslaan dat hy deur die een of ander vorm van verlamming oorval word. Tien dae later sterf hy deur die hand van God. Wanneer Dawid van Nabal se dood hoor, vra hy Abigail, vir wie hy klaarblyklik bewondering en diepe respek koester, om met hom te trou. Abigail aanvaar Dawid se aanbod.—Verse 34-42.
Kan jy soos Abigail wees?
14. Watter eienskappe van Abigail wil ons moontlik tot ’n groter mate aankweek?
14 Sien jy eienskappe in Abigail wat jy—hetsy jy ’n man of vrou is—graag in ’n groter mate wil aankweek? Dalk wil jy verstandiger optree wanneer probleme opduik. Of miskien wil jy op ’n kalm en redelike manier praat wanneer die gemoedere om jou hoog loop. Indien wel, kan jy gerus tot Jehovah bid oor die saak. Hy belowe om wysheid, onderskeidingsvermoë en denkvermoë te gee aan almal wat “aanhou om in geloof te vra”.—Jakobus 1:5, 6; Spreuke 2:1-6, 10, 11.
15. Onder watter omstandighede is dit veral belangrik vir Christenvroue om die eienskappe van Abigail aan die dag te lê?
15 Sulke goeie eienskappe is veral belangrik vir ’n vrou met ’n ongelowige man wat hom min of glad nie steur aan Bybelbeginsels nie. Dalk drink hy te veel. Sulke mans sal hopelik hulle weë verander. Baie het dit al gedoen—dikwels danksy die sagmoedige optrede, diepe respek en kuis gedrag van hulle vrouens.—1 Petrus 3:1, 2, 4.
16. Hoe sal ’n Christensuster, ongeag haar omstandighede tuis, toon dat sy haar verhouding met Jehovah bo enigiets anders stel?
16 Ongeag die probleme waarvoor jy dalk by die huis te staan kom, onthou dat Jehovah altyd daar is om jou te ondersteun (1 Petrus 3:12). Probeer dus om jouself geestelik te versterk. Bid vir wysheid en ’n kalm hart. Ja, kom nader aan Jehovah deur gereelde Bybelstudie, gebed, bepeinsing en assosiasie met mede-Christene. Abigail se liefde vir God en haar gesindheid teenoor sy gesalfde kneg is nie deur haar man se vleeslike denke beïnvloed nie. Haar optrede was gegrond op regverdige beginsels. Selfs in ’n gesin waar die man ’n voorbeeldige kneg van God is, besef ’n Christenvrou dat sy steeds hard moet werk om haar eie geestelikheid op te bou en te handhaaf. Haar man het weliswaar die skriftuurlike verpligting om geestelik en materieel na haar om te sien, maar uiteindelik moet sy haar “eie redding met vrees en bewing” bewerk.—Filippense 2:12; 1 Timoteus 5:8.
Sy het “’n profeet se beloning” ontvang
17, 18. (a) Voor watter ongewone toets van geloof het die weduwee van Sarfat te staan gekom? (b) Hoe het die weduwee op Elia se versoek gereageer, en hoe het Jehovah haar hiervoor beloon?
17 Die manier waarop Jehovah in die profeet Elia se tyd vir ’n arm weduwee gesorg het, toon dat hy diepe waardering het vir diegene wat ware aanbidding ondersteun deur van hulleself en hulle middele te gee. Weens ’n langdurige droogte in Elia se dag het hongersnood baie mense in die gesig gestaar, ook ’n weduwee en haar jong seun wat in Sarfat gewoon het. Toe hulle nog net een maaltyd oorgehad het, het ’n besoeker opgedaag—die profeet Elia. Hy het ’n baie vreemde versoek gerig. Hoewel hy van die vrou se benarde situasie bewus was, het hy haar gevra om vir hom “’n klein ronde koek” te bak met haar laaste bietjie olie en meel. Maar hy het bygevoeg: “Want só het Jehovah, die God van Israel, gesê: ‘Die groot kruik meel sal nie opraak nie, en die klein kruik olie sal nie leegraak nie tot die dag dat Jehovah ’n stortreën op die oppervlak van die aarde gee.’”—1 Konings 17:8-14.
18 Hoe sou jy op daardie buitengewone versoek gereageer het? Die weduwee van Sarfat, wat Elia blykbaar as Jehovah se profeet erken het, het “gedoen volgens Elia se woord”. Hoe het Jehovah op haar gasvryheid gereageer? Hy het op wonderdadige wyse vir die vrou, haar seun en Elia voedsel gedurende die droogte voorsien (1 Konings 17:15, 16). Ja, Jehovah het vir die weduwee van Sarfat “’n profeet se beloning” gegee, selfs al was sy nie ’n Israeliet nie (Matteus 10:41). Ook die Seun van God het hierdie weduwee vereer toe hy haar voorgehou het as ’n voorbeeld vir die ongelowige mense van sy tuisdorp, Nasaret.—Lukas 4:24-26.
19. Op watter maniere weerspieël baie Christenvroue vandag die gees van die weduwee van Sarfat, en hoe voel Jehovah oor hulle?
19 Baie Christenvroue weerspieël vandag dieselfde gees as die weduwee van Sarfat. Byvoorbeeld, elke week betoon onselfsugtige Christensusters—waarvan baie arm is en gesinne het om na om te sien—gasvryheid aan reisende opsieners en hulle vrouens. Ander nooi plaaslike voltydse bedienaars vir ete, help die behoeftiges of gee op ’n ander manier van hulleself en hulle middele om die Koninkrykswerk te ondersteun (Lukas 21:4). Sien Jehovah sulke opofferings raak? Ongetwyfeld! “God is nie onregverdig sodat hy julle werk sal vergeet en die liefde wat julle vir sy naam getoon het deurdat julle die heiliges gedien het en nog dien nie.”—Hebreërs 6:10.
20. Wat sal in die volgende artikel bespreek word?
20 In die eerste eeu het verskeie godvresende vroue die voorreg gehad om Jesus en sy apostels te bedien. In die volgende artikel sal ons kyk hoe hierdie vroue Jehovah se hart verbly het, en ons sal die voorbeeld van hedendaagse vroue bespreek wat Jehovah, selfs onder moeilike omstandighede, heelhartig dien.
[Voetnoot]
a Jesus se geslagsregister, soos opgeteken deur Matteus, noem vier vroue by name—Tamar, Ragab, Rut en Maria. Hulle almal word hoog aangeskryf in God se Woord.—Matteus 1:3, 5, 16.
Ter hersiening
• Hoe het die volgende vroue Jehovah se hart verbly?
• Sifra en Pua
• Ragab
• Abigail
• Die weduwee van Sarfat
• Hoe kan dit ons persoonlik help as ons oor die voorbeelde van hierdie vroue peins? Lig toe.
[Prente op bladsy 9]
Talle getroue vroue het God ondanks “die bevel van die koning” gedien
[Prent op bladsy 10]
Waarom is Ragab ’n goeie voorbeeld van iemand wat in geloof opgetree het?
[Prent op bladsy 10]
Watter eienskappe van Abigail wil jy navolg?
[Prent op bladsy 12]
Talle Christenvroue weerspieël vandag die gees van die weduwee van Sarfat