Getroue Christenvroue—Kosbare aanbidders van God
“Bekoorlikheid kan vals wees, en skoonheid kan nietig wees; maar die vrou wat Jehovah vrees, sy verwerf lof vir haarself.”—SPREUKE 31:30.
1. Hoe vergelyk Jehovah se beskouing van skoonheid met dié van die wêreld?
DIE wêreld plaas groot klem op die uiterlike voorkoms, veral wanneer dit by vroue kom. Maar Jehovah stel hoofsaaklik belang in die innerlike mens, wat met die jare selfs pragtiger kan word (Spreuke 16:31). Daarom vermaan die Bybel vroue: “Laat julle versiering nie dié wees van uiterlike haarvlegtery en van die omhang van goue sierade of die dra van boklere nie, maar laat dit die geheime persoon van die hart in die onverderflike versiering van die stille en sagmoedige gees wees, wat in die oë van God van groot waarde is.”—1 Petrus 3:3, 4.
2, 3. Hoe het vroue bygedra tot die verspreiding van die goeie nuus in die eerste eeu, en hoe is dit voorspel?
2 Baie van die vroue wat in die Bybel gemeld word, het so ’n prysenswaardige gees geopenbaar. In die eerste eeu het party van hulle die voorreg gehad om Jesus en sy apostels te bedien (Lukas 8:1-3). Later het Christenvroue ywerige evangeliedienaars geword; ander het waardevolle ondersteuning gegee aan Christenmanne wat die leiding geneem het, waaronder die apostel Paulus; en party het uitsonderlike gasvryheid betoon, en selfs hulle huis beskikbaar gestel vir gemeentelike vergaderinge.
3 Die Skrif het voorspel dat Jehovah vroue op ’n magtige wyse sou gebruik in die vervulling van sy voorneme. Joël 2:28, 29 het byvoorbeeld voorspel dat mans en vroue, oud en jonk, die heilige gees sou ontvang en die goeie nuus van die Koninkryk bekend sou maak. Daardie profesie het op Pinkster 33 G.J. in vervulling begin gaan (Handelinge 2:1-4, 16-18). Party geesgesalfde vroue het wonderdadige gawes ontvang, soos die gawe om te profeteer (Handelinge 21:8, 9). Deur hulle ywer in die bediening het hierdie groot geestelike leër van getroue susters bygedra tot die vinnige verspreiding van die Christelike geloof in die eerste eeu. Trouens, omstreeks 60 G.J. het die apostel Paulus geskryf dat die goeie nuus “verkondig is in die hele skepping wat onder die hemel is”.—Kolossense 1:23.
Geprys vir hulle moed, ywer en gasvryheid
4. Waarom het Paulus goeie rede gehad om ’n aantal vroue in die eerste-eeuse Christengemeente te prys?
4 Die apostel Paulus het byvoorbeeld die bediening van party vroue in die besonder waardeer—soos Christenopsieners vandag ook die bediening van ywerige vroue waardeer. Onder die vroue wat Paulus by name genoem het, was “Trifena en Trifosa, vroue wat hard werk in die Here”, en “Persis, ons geliefde, want sy het baie in die Here gearbei” (Romeine 16:12). Euodia en Sintige, het Paulus geskryf, het “sy aan sy met [hom] in die goeie nuus gestry” (Filippense 4:2, 3). Priscilla, en haar man, Aquila, het ook saam met Paulus gedien. Sy en Aquila het selfs ‘hulle nekke gewaag’ vir Paulus, wat hom beweeg het om te skryf: “Aan wie nie net ek dank betuig nie, maar ook al die gemeentes van die nasies.”—Romeine 16:3, 4; Handelinge 18:2.
5, 6. In watter opsigte het Priscilla ’n goeie voorbeeld vir susters van vandag gestel?
5 Waarom het Priscilla soveel ywer en moed gehad? Ons vind ’n leidraad in Handelinge 18:24-26, waar ons lees dat sy haar man gehelp het om Apollos, ’n begaafde spreker, op hoogte te bring van geopenbaarde waarheid. Priscilla was dus ongetwyfeld ’n goeie student van God se Woord en van die leer van die apostels. Gevolglik het sy voortreflike eienskappe ontwikkel wat haar kosbaar vir God en haar man gemaak het, asook ’n waardevolle lid van die vroeë gemeente. Vandag is die talle hardwerkende Christensusters wat die Bybel ywerig bestudeer en ook die geestelike voedsel inneem wat Jehovah deur “die getroue bestuurder” voorsien, net so kosbaar.—Lukas 12:42.
6 Aquila en Priscilla was besonder gasvry. Paulus het by hulle tuisgegaan toe hy saam met hulle as tentmakers in Korinte gewerk het (Handelinge 18:1-3). Toe die egpaar na Efese en later na Rome verhuis het, het hulle voortgegaan om Christelike gasvryheid te betoon, en hulle het selfs hulle huis vir gemeentelike vergaderinge beskikbaar gestel (Handelinge 18:18, 19; 1 Korintiërs 16:8, 19). Nimfa en Maria die moeder van Johannes Markus het eweneens hulle huise vir gemeentelike vergaderinge beskikbaar gestel.—Handelinge 12:12; Kolossense 4:15.
’n Kosbare gawe vandag
7, 8. Watter prysenswaardige rekord van heilige diens het baie Christenvroue van vandag opgebou, en waarvan kan hulle seker wees?
7 Soos in die eerste eeu speel getroue Christenvroue van vandag ’n sleutelrol in die vervulling van God se voorneme, veral in die evangelisasiewerk. En wat ’n uitstekende rekord het hierdie susters tog opgebou! Neem die voorbeeld van Gwen, wat Jehovah meer as 50 jaar getrou gedien het tot haar dood in 2002. “Gwen se ywer as evangeliedienaar was feitlik legendaries in ons stad”, sê haar man. “Sy het elke mens beskou as iemand wat moontlik op Jehovah se liefde en beloftes sal reageer. Haar lojaliteit teenoor God, sy organisasie en ons gesin—om nie eens te praat van haar liefdevolle aanmoediging wanneer ons mismoedig gevoel het nie—het my en die kinders grootliks gehelp in ons vol en lonende lewe saam. Ons mis haar baie.” Gwen en haar man was 61 jaar getroud.
8 Tienduisende Christenvroue, getroud of ongetroud, dien as pionierbedienaars en sendelinge en is tevrede met die basiese lewensbenodigdhede, terwyl hulle die Koninkryksboodskap verkondig in gebiede wat wissel van besige stede tot afgesonderde streke (Handelinge 1:8). Baie het besluit om nie ’n huis of kinders te hê nie sodat hulle Jehovah in voller mate kan dien. Daar is dié wat lojale ondersteuning gee aan hulle mans wat as reisende opsieners dien, en duisende susters dien in Bethelhuise regoor die wêreld. Dit ly geen twyfel nie dat hierdie selfopofferende vroue onder “die begeerlike dinge van al die nasies” is wat Jehovah se huis met heerlikheid vul.—Haggai 2:7.
9, 10. Watter woorde van waardering het sommige familielede uitgespreek vir die goeie voorbeeld van hulle Christenvrouens en -moeders?
9 Baie Christenvroue moet natuurlik na gesinsverantwoordelikhede omsien; tog stel hulle Koninkryksbelange eerste (Matteus 6:33). ’n Ongetroude pioniersuster het geskryf: “My ma het, weens haar onwankelbare geloof en goeie voorbeeld, ’n sleutelrol gespeel in die feit dat ek ’n gewone pionier geword het. Om die waarheid te sê, sy was een van my beste pioniermaats.” ’n Man sê van sy vrou, ’n moeder van vyf volwasse dogters: “Ons huis was altyd skoon en netjies. Bonnie het alles eenvoudig en op sy plek gehou sodat ons gesin ons aandag op geestelike strewes kon toespits. Haar uitstekende hantering van die geldsake het dit vir my moontlik gemaak om 32 jaar lank deeltyds te werk en meer tyd aan ons gesin en geestelike sake te wy. My vrou het ons kinders ook die waarde van harde werk geleer. Ek het net lof vir haar.” Vandag dien beide man en vrou by die wêreldhoofkwartier van Jehovah se Getuies.
10 ’n Man skryf van sy vrou, ’n moeder van volwasse kinders: “Die eienskappe wat ek die meeste in Susan bewonder, is haar opregte liefde vir God en vir mense, sowel as haar begrip, empatie en eerlikheid. Sy het nog altyd geglo dat Jehovah ons heel beste verdien—’n beginsel wat sy op haarself toepas as ’n kneg van God sowel as ’n moeder.” Met sy vrou se ondersteuning kon hierdie man ’n aantal geestelike voorregte geniet, soos om te dien as ’n ouer man, pionier, waarnemende kringopsiener en lid van ’n Hospitaalskakelkomitee. Hoe kosbaar is hierdie vroue tog vir hulle mans, vir mede-Christene en bowenal vir Jehovah!—Spreuke 31:28, 30.
Kosbare vroue sonder ’n huweliksmaat
11. (a) Hoe het Jehovah sy besorgdheid oor getroue vroue, veral weduwees, geopenbaar? (b) Waarvan kan Christenweduwees en ander getroue susters wat nie ’n huweliksmaat het nie, verseker wees?
11 Jehovah het dikwels sy besorgdheid oor die welsyn van weduwees uitgespreek (Deuteronomium 27:19; Psalm 68:5; Jesaja 10:1, 2). Hy het nie verander nie. Hy stel steeds opreg belang in nie net weduwees nie, maar ook enkelmoeders sowel as vroue wat uit eie keuse ongetroud is of wat nog nie ’n geskikte Christenhuweliksmaat gevind het nie (Maleagi 3:6; Jakobus 1:27). As jy onder diegene is wat Jehovah getrou dien sonder die ondersteuning van ’n Christenhuweliksmaat, kan jy daarvan seker wees dat jy kosbaar in God se oë is.
12. (a) Hoe toon sommige Christensusters hulle lojaliteit teenoor Jehovah? (b) Watter gevoelens ondervind party van ons susters?
12 Dink byvoorbeeld aan ons Christensusters wat ongetroud is omdat hulle lojaal Jehovah se raad gehoorsaam om “net in die Here” te trou (1 Korintiërs 7:39; Spreuke 3:1). God se Woord verseker hulle: “Met iemand wat lojaal is, sal [Jehovah] lojaal handel” (2 Samuel 22:26). Maar vir baie van hulle is dit ’n uitdaging om ongetroud te bly. Een suster sê: “Ek het my voorgeneem om net in die Here te trou, maar ek het al baie trane gestort wanneer ek my vriendinne met wonderlike Christenmans sien trou terwyl ek nog ongetroud is.” ’n Ander suster sê: “Ek dien Jehovah al 25 jaar. Ek is vasbeslote om lojaal aan hom te bly, maar eensaamheid laat my dikwels hartseer voel.” Sy voeg by: “Susters soos ek smag na aanmoediging.” Hoe kan ons sulke lojale persone help?
13. (a) Wat leer ons uit die voorbeeld van diegene wat Jefta se dogter besoek het? (b) Op watter ander maniere kan ons besorgdheid toon teenoor ongetroude susters in ons gemeente?
13 Een manier waarop ons dit kan doen, kan gesien word uit ’n voorbeeld van die ou tyd. Toe Jefta se dogter die geleentheid om te trou, prysgegee het, het die volk besef dat sy ’n groot opoffering maak. Wat is gedoen om haar aan te moedig? “Van jaar tot jaar het die dogters van Israel gegaan om die dogter van Jefta, die Gileadiet, vier dae in die jaar lof toe te swaai” (Rigters 11:30-40). Ons moet eweneens ons ongetroude susters wat lojaal God se wet gehoorsaam, opreg prys.a Wat is nog ’n manier waarop ons ons besorgdheid kan toon? In ons gebede kan ons Jehovah vra om hierdie dierbare, getroue susters te onderskraag om lojaal in hulle diens voort te gaan. Hulle verdien die versekering dat Jehovah en die hele Christengemeente hulle opreg liefhet en baie waardeer.—Psalm 37:28.
Hoe enkelouers sukses behaal
14, 15. (a) Waarom moet Christene wat enkelmoeders is, Jehovah om hulp nader? (b) Hoe kan enkelouers in ooreenstemming met hulle gebede optree?
14 Christenvroue wat enkelouers is, kom ook voor tallose uitdagings te staan. Maar hulle kan hulle tot Jehovah wend vir hulp om hulle kinders in ooreenstemming met Bybelbeginsels groot te maak. As jy ’n enkelouer is, kan jy weliswaar nie in alle opsigte ’n moeder sowel as ’n vader wees nie. Nietemin sal Jehovah jou help om na jou talle verantwoordelikhede om te sien as jy hom in geloof aanroep. Ter toeligting: Gestel jy moet ’n swaar sak kruideniersware dra na jou woonstel op een van die boonste verdiepings van ’n hoë gebou. Sal jy met die trappe opsukkel as daar ’n hyser naby is? Natuurlik nie! So ook moet jy nie swaar emosionele laste alleen probeer dra as jy Jehovah om hulp kan vra nie. Trouens, hy nooi jou om hom aan te roep. Psalm 68:19 sê: “Mag Jehovah geloof word, wat elke dag die vrag vir ons dra.” Ook 1 Petrus 5:7 nooi jou om al jou sorge op Jehovah te werp, ‘want hy sorg vir jou’. Wanneer probleme en sorge jou dus onderkry, kan jy jou hart voor jou hemelse Vader uitstort, en dit “onophoudelik” doen.—1 Tessalonisense 5:17; Psalm 18:6; 55:22.
15 As jy byvoorbeeld ’n moeder is, is jy ongetwyfeld besorg oor die invloed wat portuurs by die skool op jou kinders kan hê of oor die toetse van onkreukbaarheid waarvoor hulle te staan kan kom (1 Korintiërs 15:33). Dit is gegronde redes vir kommer. Maar dit is ook dinge waaroor jy kan bid. Trouens, waarom bid jy nie saam met jou kinders hieroor voordat hulle soggens skool toe gaan nie, dalk nadat julle die dagteks saam bespreek het? Hartgrondige, spesifieke gebede kan ’n baie groot indruk op jong verstande maak. Bowenal sal Jehovah jou seën as jy geduldig daarna streef om sy Woord in jou kinders se harte in te skerp (Deuteronomium 6:6, 7; Spreuke 22:6). Onthou, “die oë van Jehovah is op die regverdiges, en sy ore is tot hulle smeking”.—1 Petrus 3:12; Filippense 4:6, 7.
16, 17. (a) Wat het een seun gesê oor die liefde van sy moeder? (b) Hoe het hierdie moeder se geestelike uitkyk haar kinders beïnvloed?
16 Beskou die voorbeeld van Olivia, ’n moeder van ses. Haar ongelowige man het die gesin verlaat kort nadat die laaste kind gebore is, maar sy het die verantwoordelikheid om haar kinders in God se weë op te voed, geredelik aanvaar. Olivia se seun, Darren, wat nou 31 is en as ’n Christen- ouer man en pionier dien, was op daardie stadium omtrent 5 jaar oud. Olivia se bekommernisse is vererger toe Darren ’n ernstige siekte opgedoen het wat hom nog steeds probleme besorg. Darren skryf oor sy kinderjare: “Ek onthou nog hoe ek in my hospitaalbed gretig vir my ma gesit en wag het. Sy het elke dag by my kom sit en vir my uit die Bybel gelees. Daarna het sy die Koninkrykslied ‘Ons dank u, Jehovah’ gesing.b Dit is tot vandag toe my geliefkoosde Koninkrykslied.”
17 Olivia se vertroue in Jehovah en haar liefde vir hom het tot haar sukses as ’n enkelmoeder bygedra (Spreuke 3:5, 6). Haar goeie gesindheid is weerspieël in die doelwitte wat sy vir haar kinders voorgehou het. “My ma het ons altyd aangemoedig om die voltydse bediening as doelwit na te streef”, sê Darren. “Gevolglik het ek en vier van my vyf susters die voltydse bediening betree. Maar my ma het nooit by ander hieroor gespog nie. Ek probeer hard om haar wonderlike eienskappe na te volg.” Nie alle kinders hou weliswaar aan om, soos Olivia se kinders, God te dien wanneer hulle groot is nie. Maar wanneer ’n moeder haar bes doen om volgens Bybelbeginsels te lewe, kan sy verseker wees van Jehovah se leiding en liefdevolle ondersteuning.—Psalm 32:8.
18. Hoe kan ons toon dat ons Jehovah se voorsiening van die Christengemeente waardeer?
18 God voorsien baie van sy ondersteuning deur middel van die Christengemeente, met sy gereelde geestelike voedingsprogram, die Christenbroederskap en geestelik ryp “gawes in die vorm van mense” (Efesiërs 4:8). Getroue ouer manne werk hard om almal in die gemeente op te bou en skenk spesiale aandag aan die behoeftes van “wese en weduwees in hulle verdrukking” (Jakobus 1:27). Bly dus na aan God se volk en moet jou nooit afsonder nie.—Spreuke 18:1; Romeine 14:7.
Onderdanigheid—’n aantreklike eienskap
19. Waarom dui ’n vrou se onderdanigheid nie op minderwaardigheid nie, en watter Bybelse voorbeeld staaf dit?
19 Jehovah het die vrou as ’n komplement van die man geskep (Genesis 2:18). Die vrou se onderdanigheid aan haar man dui dus geensins op minderwaardigheid nie. Dit verleen eerder waardigheid aan ’n vrou en laat haar toe om haar talle gawes en talente in ooreenstemming met God se wil te gebruik. Spreuke hoofstuk 31 beskryf die groot verskeidenheid take van ’n bekwame vrou in eertydse Israel. Sy het die behoeftiges gehelp, wingerde geplant en grond gekoop. Ja, “in haar het die hart van haar eienaar vertroue gestel, en aan wins ontbreek dit nie”.—Verse 11, 16, 20.
20. (a) Hoe moet ’n Christenvrou haar godgegewe vermoëns, of gawes, beskou? (b) Watter voortreflike eienskappe het Ester aan die dag gelê, en hoe kon Jehovah haar gevolglik gebruik?
20 ’n Beskeie, godvresende vrou word nie deur ambisie aangevuur om haarself te verhef of met haar man mee te ding nie (Spreuke 16:18). Sy jaag nie hoofsaaklik sekulêre strewes na om selfbevrediging te verkry nie, maar gebruik eerder haar godgegewe gawes om ander te dien—haar gesin, mede-Christene, haar medemens en bowenal Jehovah (Galasiërs 6:10; Titus 2:3-5). Dink aan die Bybelse voorbeeld van koningin Ester. Hoewel sy fisies baie mooi was, was sy beskeie en onderdanig (Ester 2:13, 15). Nadat sy getroud is, het sy diep respek vir haar man, koning Ahasveros, getoon, in teenstelling met die koning se vorige vrou, Vasti (Ester 1:10-12; 2:16, 17). Ester het ook, wanneer dit gepas was, eerbiedig geluister na die raad van Mordegai, haar ouer neef—selfs nadat sy koningin geword het. Maar sy was beslis nie ’n swakkeling nie! Sy het Haman, ’n magtige en wrede man wat planne beraam het om die Jode uit te wis, moedig aan die kaak gestel. Jehovah het Ester op magtige wyse gebruik om sy volk van uitwissing te red.—Ester 3:8–4:17; 7:1-10; 9:13.
21. Hoe kan ’n Christenvrou al hoe kosbaarder in Jehovah se oë word?
21 Dit is duidelik dat godvrugtige vroue, in die verlede en vandag, hulle uitsluitlike toegewydheid teenoor Jehovah en sy aanbidding getoon het. Daarom is godvresende vroue kosbaar in Jehovah se oë. Christensusters, laat Jehovah julle deur sy gees stelselmatig vorm om ’n al hoe begeerliker “voorwerp” te word, een wat “toeberei [is] vir elke goeie werk” (2 Timoteus 2:21; Romeine 12:2). God se Woord sê aangaande sulke kosbare aanbidders: “Gee haar van die vrug van haar hande, en laat haar werke haar selfs in die poorte prys” (Spreuke 31:31). Mag dit waar wees van elkeen van julle.
[Voetnote]
a Sien Die Wagtoring van 15 Maart 2002, bladsye 26-8, vir ’n bespreking oor hoe sulke lof gegee kan word.
b Lied 212 in Sing lofliedere voor Jehovah, uitgegee deur Jehovah se Getuies.
Ter hersiening
• Waarom was party eerste-eeuse Christenvroue kosbaar in Jehovah se oë?
• Hoe het baie susters in ons tyd hulleself kosbaar in God se oë gemaak?
• Op watter maniere ondersteun Jehovah enkelmoeders en ander susters wat nie ’n huweliksmaat het nie?
• Hoe kan ’n vrou opregte eerbied vir die hoofskapreëling toon?
[Venster op bladsy 17]
VOORBEELDE OM OOR NA TE DINK
Sou jy graag ’n paar ander voorbeelde wou ondersoek van getroue vroue wat in die Bybel gemeld word? Indien wel, kan jy gerus die tekste hieronder lees. Terwyl jy peins oor die verskillende vroue wat genoem word, kan jy beginsels probeer onderskei wat jy dalk tot ’n groter mate in jou lewe kan toepas.—Romeine 15:4.
◆ Sara: Genesis 12:1, 5; 13:18a; 21:9-12; 1 Petrus 3:5, 6.
◆ Vrygewige Israelitiese vroue: Eksodus 35:5, 22, 25, 26; 36:3-7; Lukas 21:1-4.
◆ Debora: Rigters 4:1–5:31.
◆ Rut: Rut 1:4, 5, 16, 17; 2:2, 3, 11-13; 4:15.
◆ Vrou van Sunem: 2 Konings 4:8-37.
◆ Fenisiese vrou: Matteus 15:22-28.
◆ Marta en Maria: Markus 14:3-9; Lukas 10:38-42; Johannes 11:17-29; 12:1-8.
◆ Tabita: Handelinge 9:36-41.
◆ Filippus se vier dogters: Handelinge 21:9.
◆ Febe: Romeine 16:1, 2.
[Prent op bladsy 15]
Prys jy ongetroude susters wat lojaal God se wet gehoorsaam?
[Prent op bladsy 16]
Watter spesifieke dinge kan ons in gebed vra voordat ons kinders soggens skool toe gaan?