Vrae van lesers

Het Jesus in sy modelgebed te kenne gegee dat God se wil reeds in die hemel geskied het, hoewel die bose engele toe nog nie uitgewerp was nie?

Volgens Matteus 6:10 het Jesus gesê: “Laat u wil geskied, soos in die hemel, so ook op die aarde.” Hierdie versoek kan op twee maniere verstaan word. Eerstens, as ’n versoek dat God se wil op die aarde moet geskied soos dit alreeds in die hemel geskied het of, tweedens, as ’n versoek dat dit ten volle in die hemel sowel as op die aarde moet geskied.a Die betekenis van Jesus se voorafgaande woorde, “laat u koninkryk kom”, dui aan dat die tweede beskouing meer met die Skrif ooreenstem. En dit is ’n weerspieëling van die situasie wat geheers het toe Jesus op die aarde was en die lang tydperk daarna. Hoe so?

Die boek Openbaring toon dat die oprigting van God se Koninkryk in die hemel twee duidelike gevolge gehad het. Die eerste raak die hemel self, en die tweede die aarde. Openbaring 12:7-9, 12 sê: “Oorlog het in die hemel uitgebreek: Migael en sy engele het teen die draak geveg, en die draak en sy engele het geveg, maar hy het nie geseëvier nie, en ook is daar vir hulle geen plek meer in die hemel gevind nie. Toe is die groot draak neergeslinger, die oorspronklike slang, die een wat Duiwel en Satan genoem word, wat die hele bewoonde aarde mislei; hy is na die aarde neergeslinger, en sy engele is saam met hom neergeslinger. Daarom, wees bly, o hemele en julle wat daarin woon! Wee die aarde en die see, want die Duiwel het na julle toe neergedaal en het groot toorn, omdat hy weet dat hy ’n kort tydjie het.”

Toe Satan en die demone ná 1914 uit die hemel gewerp is, het dit daardie ryk van alle opstandige geesskepsele gereinig, tot groot blydskap van Jehovah se lojale engeleseuns, wat verreweg die meerderheid van sy geesskepsele uitmaak (Job 1:6-12; 2:1-7; Openbaring 12:10). Die versoek in Jesus se modelgebed is dus vervul sover dit die hemel betref. Almal wat in daardie hemelse ryk oorgebly het, was lojaal aan Jehovah en ten volle onderworpe aan sy soewereiniteit.

Die feit moet beklemtoon word dat die bose engele selfs voor daardie tyd, toe hulle nog toegang tot die hemel gehad het, uitgeworpenes uit God se gesin was en dat hulle onder besliste beperkings was. Judas 6 wys byvoorbeeld dat hulle alreeds in die eerste eeu G.J. “met ewige boeie onder dik [geestelike] duisternis vir die oordeel van die groot dag bewaar” is. In 2 Petrus 2:4 sê dit eweneens dat “God hom nie daarvan weerhou het om die engele te straf wat gesondig het nie, maar hulle, deur hulle in Tartarus [’n toestand van algehele verlaging] te werp, aan kuile van dik [geestelike] duisternis oorgelewer het om vir die oordeel bewaar te word”.b

In skerp teenstelling met die bose engele se posisie as uitgeworpenes terwyl hulle nog in die hemel was, het hulle groot gesag oor die aarde uitgeoefen. Trouens, God se Woord noem Satan “die heerser van hierdie wêreld” en die demone “die wêreldheersers van hierdie duisternis” (Johannes 12:31; Efesiërs 6:11, 12; 1 Johannes 5:19). Vanweë die Duiwel se gesag kon hy Jesus “al die koninkryke van die wêreld en hulle heerlikheid” in ruil vir een daad van aanbidding aanbied (Matteus 4:8, 9). Dit is dus duidelik dat God se Koninkryk drastiese veranderinge sal meebring wanneer dit “kom” met betrekking tot die aarde.

Hier op die aarde sal die ‘koms’ van God se Koninkryk ’n totale nuwe stelsel van dinge teweegbring. Die Koninkryk sal alle mensgemaakte heerskappye verbrysel en die aarde se enigste regering word. Terselfdertyd sal die godvresende menseonderdane daarvan “’n nuwe aarde” uitmaak (2 Petrus 3:13; Daniël 2:44). Die Koninkryk sal ook sonde van die gehoorsame mensdom wegneem en mettertyd die aarde in ’n paradys omskep en sodoende elke spoor van sataniese heerskappy verwyder.—Romeine 8:20, 21; Openbaring 19:17-21.

Aan die einde van die Millennium, wanneer die Messiaanse Koninkryk God se wil daarvoor volbring het, “sal die Seun self hom ook onderwerp aan die Een wat alles aan hom onderwerp het, sodat God alles vir elkeen kan wees” (1 Korintiërs 15:28). Dan sal daar ’n finale toets wees, waarna Satan, sy demone en enige opstandige mense wat mislei is, permanent uitgewis sal word in “die tweede dood” (Openbaring 20:7-15). Daarna sal alle intelligente skepsele in die hemel en op die aarde hulle tot in alle ewigheid vreugdevol onderwerp aan Jehovah se liefdevolle soewereiniteit. Dit sal in alle opsigte die volkome vervulling van die woorde van Jesus se modelgebed wees.—1 Johannes 4:8.

[Voetnote]