Beloftes waarop jy kan vertrou

GOD se profeet Miga het geweet dat mense dikwels leë beloftes maak. In sy dag kon selfs die beloftes van die intiemste metgeselle nie altyd vertrou word nie. Miga het dus gewaarsku: “Moenie julle geloof in ’n metgesel stel nie. Moenie julle vertroue in ’n vertroude vriend stel nie. Bewaak die poorte van jou mond teenoor haar wat aan jou boesem lê.”—Miga 7:5.

Het Miga toegelaat dat hierdie betreurenswaardige situasie hom skepties maak oor alle beloftes? Nee! Hy het sy volkome vertroue uitgespreek in die beloftes van sy God, Jehovah. “Wat my betref”, het Miga geskryf, “na Jehovah sal ek op die uitkyk bly. Ek sal ’n wagtende houding teenoor die God van my redding inneem.”—Miga 7:7.

Waarom het Miga soveel vertroue gehad? Omdat hy geweet het dat Jehovah altyd sy woord hou. Alles wat God aan Miga se voorvaders met ’n eed beloof het, is gewis bewaarheid (Miga 7:20). Jehovah se getrouheid in die verlede het Miga alle rede gegee om te glo dat Hy Sy woord in die toekoms sou hou.

“Nie een woord . . . het onvervuld gebly nie”

Miga het byvoorbeeld geweet dat Jehovah die Israeliete uit slawerny in Egipte verlos het (Miga 7:15). Josua, wat daardie verlossing beleef het, het sy mede-Israeliete aangespoor om geloof in al God se beloftes te stel. Op grond waarvan? “Julle weet goed met julle hele hart en met julle hele siel”, het Josua hulle herinner, “dat nie een woord van al die goeie woorde wat Jehovah julle God met julle gespreek het, onvervuld gebly het nie. Alles is vir julle bewaarheid. Nie een woord daarvan het onvervuld gebly nie.”—Josua 23:14.

Die Israeliete het goed geweet dat Jehovah wonderlike dinge vir hulle gedoen het. Hy het sy belofte aan hulle godvresende voorvader Abraham vervul dat sy nakomelinge so talryk soos die sterre sou word en die land Kanaän in besit sou neem. Jehovah het ook vir Abraham gesê dat sy nageslag 400 jaar lank verdruk sou word, maar dat hulle “in die vierde geslag” na Kanaän sou terugkeer. Dit alles het net so gebeur.—Genesis 15:5-16; Eksodus 3:6-8.

Die Israeliete is in die dae van Jakob se seun Josef in Egipte verwelkom. Die Egiptenare het hulle later aan wrede slawearbeid onderwerp, maar soos God beloof het, is hierdie nakomelinge van Abraham uit slawerny in Egipte bevry binne ’n tydperk van vier opeenvolgende geslagte vanaf die tyd dat hulle in Egipte aangekom het.a

Gedurende die volgende 40 jaar het die Israeliete verdere bewyse gesien dat Jehovah altyd sy beloftes vervul. Toe die Amalekiete die Israeliete sonder rede aangeval het, het God vir sy volk geveg en hulle beskerm. Hy het in al hulle fisiese behoeftes voorsien gedurende hulle 40 jaar lange trek in die wildernis en hulle uiteindelik die Beloofde Land in besit laat neem. Toe Josua die geskiedenis van Jehovah se handelinge met hierdie afstammelinge van Abraham hersien, kon hy vol vertroue sê: “Geen belofte van al die goeie beloftes wat Jehovah aan die huis van Israel gemaak het, het onvervuld gebly nie; alles is bewaarheid.”—Josua 21:45.

Bou vertroue op in God se beloftes

Hoe kan jy, soos Miga en Josua, vertroue opbou in Jehovah se beloftes? Wel, hoe bou ’n mens vertroue op in ander mense? Jy leer hulle so goed as moontlik ken. Jy vind dalk uit hoe betroubaar hulle is deur te sien hoe getrou hulle al hulle beloftes probeer nakom. Namate jou kennis van sulke mense toeneem, begin jy hulle al hoe meer vertrou. Jy kan dieselfde doen om geloof in God se beloftes op te bou.

Een manier is deur te peins oor die skepping en die wette waardeur dit beheer word. Wetenskaplikes vertrou op hierdie wette, soos dié wat bepaal dat ’n enkele mensesel verdeel en vermenigvuldig om die biljoene selle voort te bring waaruit jou liggaam bestaan. Trouens, die wette wat materie en energie in die ganse heelal beheer, is ongetwyfeld deur ’n absoluut betroubare Wetgewer vasgestel. Jy kan beslis op sy beloftes vertrou, net soos jy vertroue stel in die wette wat sy skepping beheer.—Psalm 139:14-16; Jesaja 40:26; Hebreërs 3:4.

Deur die profeet Jesaja, ’n tydgenoot van Miga, het Jehovah die onveranderlikheid van die seisoene en die indrukwekkende waterkringloop gebruik om toe te lig hoe betroubaar sy woord is. Elke jaar kom die reën. Dit deurweek die grond en maak dit vir mense moontlik om hulle saad te saai en te oes. In dié verband het Jehovah gesê: “Net soos die stortreën en die sneeu uit die hemel neerdaal en nie daarheen terugkeer nie, tensy dit die aarde deurweek en dit laat voortbring en uitspruit, en saad aan die saaier en brood aan die eter gegee word, so sal my woord wees wat uit my mond uitgaan. Dit sal nie sonder resultate na my toe terugkeer nie, maar dit sal beslis doen wat my behaag en sal beslis sukses behaal in alles waarvoor ek dit gestuur het.”—Jesaja 55:10, 11.

Betroubare beloftes van die Paradys

’n Studie van die skepping kan vertroue in die Skepper opbou, maar meer is nodig as jy wil uitvind omtrent die beloftes wat deel vorm van die ‘woord wat uit sy mond uitgaan’. As jy meer wil leer oor hierdie beloftes sodat jy jou vertroue daarin kan stel, moet jy die goddelik geïnspireerde Bybelverslag van God se voorneme met die aarde asook sy handelinge met die mensdom ondersoek.—2 Timoteus 3:14-17.

Die profeet Miga het vertroue in Jehovah se beloftes gestel. Jy het selfs meer van God se geïnspireerde verslag tot jou beskikking as wat Miga gehad het. Wanneer jy die Bybel lees en daaroor peins, kan jy ook geloof in die vervulling van God se beloftes ontwikkel. Hierdie beloftes raak nie net die natuurlike afstammelinge van Abraham nie, maar die hele mensdom. Jehovah het vir daardie godvresende aartsvader beloof: “Deur middel van jou saad sal al die nasies van die aarde hulleself gewis seën omdat jy na my stem geluister het” (Genesis 22:18). Die vernaamste deel van Abraham se “saad”, of nageslag, is die Messias, Jesus Christus.—Galasiërs 3:16.

Jehovah sal toesien dat seëninge deur middel van Jesus Christus op gehoorsame mense uitgestort word. En wat het God beloof om in ons tyd te doen? Miga 4:1, 2 antwoord met hierdie profetiese woorde: “Aan die einde van die dae sal die berg van die huis van Jehovah stewig gevestig word bo die top van die berge, en dit sal beslis bo die heuwels verhef word; en volke sal daarheen stroom. En baie nasies sal beslis heengaan en sê: ‘Kom, en laat ons opgaan na die berg van Jehovah en na die huis van die God van Jakob; en hy sal ons omtrent sy weë onderrig, en ons sal in sy paaie wandel.’”

Diegene wat Jehovah se weë leer ken, ‘smee van hulle swaarde ploegskare en van hulle spiese snoeimesse’. Enige oorlogsugtige neigings verdwyn. Die aarde sal binnekort gevul wees met regskape mense, en niemand sal hulle laat bewe van vrees nie (Miga 4:3, 4). Ja, God se Woord beloof dat Jehovah, onder die Koninkryksheerskappy in die hande van Jesus Christus, die aarde van alle onderdrukkers sal reinig.—Jesaja 11:6-9; Daniël 2:44; Openbaring 11:18.

Selfs diegene wat gely en gesterf het as gevolg van die mens se opstand teen God, sal opgewek word met die vooruitsig om vir ewig op die aarde te lewe (Johannes 5:28, 29). Satan en sy demone, die aanstigters van goddeloosheid, sal van die toneel verwyder word, en die gevolge van Adam se sonde sal deur Jesus se losprysoffer ongedaan gemaak word (Matteus 20:28; Romeine 3:23, 24; 5:12; 6:23; Openbaring 20:1-3). En wat sal die toekoms vir gehoorsame mense inhou? Hulle sal geseën word met ewige lewe in volmaakte gesondheid op ’n paradysaarde!—Psalm 37:10, 11; Lukas 23:43; Openbaring 21:3-5.

Watter wonderlike beloftes tog! Maar kan jy dit glo? Natuurlik kan jy. Dit is nie die beloftes van mense wat dalk goeie bedoelings het, maar nie die mag het om dit te vervul nie. Dit is die beloftes van die almagtige God, wat nie leuens kan vertel nie en wat “nie traag met betrekking tot sy belofte” is nie (2 Petrus 3:9; Hebreërs 6:13-18). Jy kan jou volle vertroue stel in al die beloftes wat in die Bybel gevind word, want die Bron daarvan is “Jehovah, die God van waarheid”.—Psalm 31:5.

[Voetnoot]

[Lokteks op bladsy 6]

‘Nie een woord van al die goeie woorde wat Jehovah julle God met julle gespreek het, het onvervuld gebly nie.’—JOSUA 23:14

[Prente op bladsy 4, 5]

Jehovah het sy beloftes aan Israel by die Rooi See en in die wildernis vervul

[Prente op bladsy 7]

Jehovah het sy belofte aan Abraham vervul. Sy Saad, Jesus Christus, sal seëninge op die mensdom uitstort