Sy het haar klasmaats van haar oortuigings vertel

SAL jy graag jou klasmaats wil help om jou Bybelse oortuigings beter te verstaan? Magdalena, ’n 18-jarige hoërskoolleerling in Pole, praat dikwels met haar klasmaats oor haar oortuigings as een van Jehovah se Getuies. Gevolglik word sy gereeld vrae gevra soos: ‘Wat beteken dit om een van Jehovah se Getuies te wees?’ en ‘Glo julle nie aan Jesus Christus nie?’ Hoe kon sy haar klasmaats help? Magdalena het tot Jehovah gebid vir leiding en in ooreenstemming met haar gebede opgetree.—Jakobus 1:5.

Eendag het Magdalena ’n onderwyseres wat gunstig gesind is, gevra of sy die video Jehovah’s Witnesses—The Organization Behind the Namea vir die klas kon wys. Die onderwyseres het ingestem. Magdalena het toe vir haar klasmaats gesê: “Ek reël met ’n vriend om ’n program van 90 minute vir die klas aan te bied. Dit sal ’n video en ’n bespreking oor Jehovah se Getuies insluit. Sal julle daarvan hou om te kom?” Almal het ingestem. Magdalena en Wojciech, ’n ervare voltydse evangeliedienaar, het vir die projek begin voorberei.

Die plan was om die aanbieding te begin met ’n toespraak van 20 minute, gebaseer op die brosjure Jehovah se Getuies—Wie is hulle? Wat glo hulle?,* gevolg deur ’n vraag-en-antwoord-bespreking. Daarna sou die video in die skoolbiblioteek gewys word. Elke leerling in die klas sou ’n geskenk ontvang—’n groot koevert met ’n paar brosjures, die boek Vrae wat jongmense vra—Antwoorde wat werk* en ’n paar traktate en tydskrifte daarin.

Op die dag van die aanbieding het die gehoor bestaan uit 14 klasmaats, die onderwyseres en 4 ander leerlinge wat toevallig in die biblioteek was. Wojciech het eerstens verduidelik dat ’n aantal Poolse digters en skrywers die goddelike naam, Jehovah, in hulle werke gebruik het. Hy het ook daarop gewys dat party ou Katolieke katkisasieboeke die goddelike naam bevat het. Toe hy die hedendaagse bedrywighede van Jehovah se Getuies verduidelik het, het hy vir hulle brosjures van verskeie takkantore en foto’s van ’n aantal byeenkomssale gewys.

’n Lewendige bespreking het daarna gevolg. Magdalena en Wojciech het die Bybel gebruik om die vrae te beantwoord. Dit het ’n groot indruk op die gehoor gemaak en hulle daarvan oortuig dat Jehovah se Getuies nie hulle eie idees verkondig nie. Wat was van die vrae wat gevra is, en hoe is dit beantwoord?

Vraag: Die Bybel is vol vae uitdrukkings en metafore, wat op baie maniere vertolk kan word. Hoe is dit moontlik om volgens die Bybel te lewe?

Antwoord: Party sê dat die Bybel soos ’n viool is waarop ’n mens enige deuntjie kan speel. Maar gestel jy wil uitvind wat ’n skrywer met sy stellings bedoel. Is dit nie beter om hom eenvoudig te vra nie? In teenstelling met die dooie skrywers van mensewerke lewe die Outeur van die Bybel, Jehovah God (Romeine 1:20; 1 Korintiërs 8:5, 6). Die konteks van ’n vers kan die juiste uitleg daarvan aandui. Verder bespreek die Bybel dikwels dieselfde onderwerp op verskillende plekke, en dit help dus as ons hulle met mekaar vergelyk. Sodoende laat ons toe dat God ons gedagtes rig, asof hy self die teks aan ons verduidelik. Op dié manier kan ons uitvind wat sy wil is, soos dit in die Bybel geopenbaar word, en daarvolgens lewe, nie waar nie?

Vraag: Wat is die verskil tussen Christene en Jehovah se Getuies?

Antwoord: Ons is Christene! Maar Jehovah se Getuies sê nie net dat hulle Christene is nie; hulle streef daarna om te lewe in ooreenstemming met wat hulle glo en met wat God hulle tot hulle eie voordeel leer (Jesaja 48:17, 18). Aangesien al hulle leringe op die Bybel gebaseer is, weet hulle dat hulle die waarheid het.—Matteus 7:13, 14, 21-23.

Vraag: Waarom nader julle wildvreemde mense en dring julle daarop aan om met hulle te praat? Beteken dit nie dat julle julle geloof op ander afdwing nie?

Antwoord: Dink julle dat dit verkeerd is as iemand op straat julle beleef nader en julle mening oor iets vra? (Jeremia 5:1; Sefanja 2:2, 3). (Wojciech en Magdalena het toe gedemonstreer hoe hulle ’n verbyganger vra of God omgee vir diegene wat tydens ’n onlangse vloed in Pole gely het.) Nadat die persoon sy mening gegee het, lees ons ’n Bybelteks. As iemand nie met ons wil praat nie, wens ons hom ’n goeie dag toe en nader ons iemand anders (Matteus 10:11-14). Klink dit of ons ander dwing om met ons te gesels? Of moet mense nie meer met mekaar gesels nie?

Vraag: Waarom vier julle nie vakansiedae nie?

Antwoord: Ons herdenk die enigste gebeurtenis wat die Bybel ons beveel om te vier—die Herdenking van Jesus Christus se dood (1 Korintiërs 11:23-26). Wat vakansiedae betref, kan julle ensiklopedieë en ander betroubare bronne raadpleeg om die oorsprong daarvan uit te vind. As julle dit doen, sal julle maklik kan sien waarom ons nie sulke dae vier nie.—2 Korintiërs 6:14-18.

Baie ander vrae is gevra en beantwoord. Die bespreking het so lank geduur dat die video-aanbieding uitgestel moes word.

Wat was die leerlinge se reaksie? Laat Magdalena ons vertel: “Ek was verbaas dat party leerlinge wat gewoonlik snaaks probeer wees en ander bespot, ernstige vrae gevra het. Hoewel hulle beweer het dat hulle ateïste is, het hulle gedurende die bespreking geloof in God uitgespreek!” Almal wat teenwoordig was, het die geskenke waardeer—altesaam 35 boeke, 63 brosjures en 34 tydskrifte is versprei.

Watter uitstekende resultate het hierdie projek tog opgelewer! Dit het nie net Magdalena se klasmaats gehelp om Jehovah se Getuies beter te leer ken en te verstaan nie, maar het ook baie van die jongmense aangemoedig om oor die doel van die lewe na te dink. Kan jy jou klasmaats probeer help om meer te leer oor wat jy glo?

[Voetnoot]

[Prent op bladsy 31]

Magdalena en Wojciech berei voor vir die bespreking