Ondervind jy die geluk wat dit verskaf om te gee?
SY WAS byna 50 jaar lank ywerig in haar Christelike diens. Hoewel sy swak was weens die gevolge van die ouderdom, was sy vasbeslote om die nuwe Koninkryksaal te besoek. Terwyl sy op die arm van ’n behulpsame Christenbroer gesteun het, het sy die saal binnegegaan en stadig maar doelgerig na die bydraebussie gestap. Daar het sy die beskeie bedraggie ingegooi wat sy vir hierdie doel gespaar het. Hoewel sy nie met die bou van die Koninkryksaal kon hand bysit nie, wou sy help.
Hierdie Christenvrou herinner jou dalk aan ’n ander getroue vrou—die “arm weduwee” wat Jesus twee klein muntstukkies in die tempelskatkis sien gooi het. Ons weet nie wat haar omstandighede was nie, maar destyds kon ’n weduwee haar in ’n moeilike finansiële situasie bevind. Jesus het ongetwyfeld medelye met haar gehad, aangesien hy haar situasie ten volle verstaan het. Toe hy haar as ’n voorbeeld vir sy dissipels voorgehou het, het hy gesê dat haar klein gawe ‘alles wat sy gehad het, haar hele lewensonderhoud’, verteenwoordig het.—Markus 12:41-44.
Waarom sou ’n behoeftige vrou soos hierdie arm weduwee so ’n opoffering maak? Klaarblyklik weens haar opregte toegewydheid aan Jehovah God, en die tempel in Jerusalem was die sentrum van sy aanbidding. Hoewel sy beperk was in wat sy kon doen, wou sy heilige diens bevorder. En sy het ongetwyfeld groot vreugde daaruit geput om by te dra wat sy ook al kon.
Gawes om Jehovah se werk te ondersteun
Dit was nog altyd ’n noodsaaklike deel van ware aanbidding om materiële en finansiële bydraes te gee, en dit was nog altyd ’n bron van groot vreugde (1 Kronieke 29:9). In eertydse Israel is bydraes nie net gebruik om die tempel op te knap nie, maar ook om al die aspekte van Jehovah se aanbidding elke dag daar aan die gang te hou. Die Wet het bepaal dat die kinders van Israel ’n tiende van hulle opbrengs gee om die Leviete te ondersteun, wat die tempeldienste verrig het. Maar die Leviete moes ook ’n tiende van die produkte wat hulle ontvang het, aan Jehovah gee.—Numeri 18:21-29.
Hoewel Christene van die vereistes van die Wetsverbond vrygemaak is, het die beginsel dat God se knegte ware aanbidding materieel moet ondersteun, onveranderd gebly (Galasiërs 5:1). Daarbenewens het eerste-eeuse Christene vreugdevol in die behoeftes van hulle broers voorsien (Handelinge 2:45, 46). Die apostel Paulus het Christene daaraan herinner dat hulle vrygewig teenoor ander moet wees, net soos God hulle vrygewig van goeie dinge voorsien. Hy het geskryf: “Beveel dié wat ryk is in die teenswoordige stelsel van dinge, om nie hooghartig te wees nie en om hulle hoop nie op onsekere rykdom te vestig nie, maar op God, wat aan ons alles ryklik vir ons genot verskaf; om goed te doen, om ryk te wees in goeie werke, om vrygewig te wees, mededeelsaam, en vir hulleself ’n goeie fondament vir die toekoms veilig as ’n skat te bewaar, sodat hulle ’n stewige houvas op die werklike lewe kan kry” (1 Timoteus 6:17-19; 2 Korintiërs 9:11). Ja, uit persoonlike ondervinding kon Paulus Jesus se woorde bevestig: “Dit verskaf groter geluk om te gee as om te ontvang.”—Handelinge 20:35.
Hoe Christene vandag gee
Vandag gebruik Jehovah se knegte nog steeds hulle materiële bates om mekaar te help en om God se werk te ondersteun. Selfs diegene wat min het, dra by wat hulle kan. “Die getroue en verstandige slaaf” voel verantwoordelik voor Jehovah om al hierdie bydraes ten beste te benut (Matteus 24:45). Bydraes word gebruik om takkantore aan die gang te hou, Bybels en Bybellektuur te vertaal en te druk, groot Christelike byeenkomste te reël, reisende opsieners en sendelinge op te lei en uit te stuur, noodleniging te voorsien, asook vir talle ander noodsaaklike doeleindes. Kom ons vestig nou die aandag op een van hierdie doeleindes—om plekke van aanbidding te help voorsien.
Jehovah se Getuies vergader verskeie kere per week in hulle Koninkryksale om voordeel te trek uit geestelike onderrigting en heilsame assosiasie. Maar in baie lande kan die plaaslike Getuies weens die ekonomiese situasie nie die bou van Koninkryksale sonder hulp finansier nie. In 1999 het Jehovah se Getuies dus met ’n program begin om bydraes van ryker lande te gebruik om Koninkryksale in armer lande te help bou. Daarbenewens het duisende vrywilligers hulle tyd en vaardighede aangebied en dikwels in afgeleë gebiede van hierdie lande gewerk. Terwyl die bouwerk aan die gang is, word plaaslike Getuies bou- en instandhoudingsvaardighede geleer, en die Koninkryksaalfonds maak dit moontlik om die nodige toerusting en materiaal te koop. Die Getuies wat nou hierdie nuwe sale gebruik, is opreg dankbaar dat hulle medegelowiges hulle tyd opgeoffer en geld bygedra het. Plaaslike Getuies dra ook van maand tot maand by om die nuwe Koninkryksaal in stand te hou en om die boukoste te help dek, sodat meer Koninkryksale gebou kan word.
Plaaslike metodes en materiaal word gebruik om Koninkryksale te bou. Hoewel hierdie sale nie deftige geboue is nie, is hulle aantreklik, prakties en gemaklik. Toe daar in 1999 met die bouprogram begin is, het dit sowat 40 lande met beperkte middele ingesluit. Sedertdien is die bouprogram uitgebrei sodat dit nou 116 van hierdie lande insluit, en meer as die helfte van die gemeentes van Jehovah se Getuies in die wêreld is hierby betrokke. Gedurende die laaste vyf jaar is meer as 9 000 Koninkryksale met behulp van hierdie reëling gebou, gemiddeld meer as 5 nuwe sale per dag! Tog is daar in hierdie 116 lande nog 14 500 nuwe Koninkryksale nodig. Met Jehovah se seën en die bereidwilligheid en vrygewigheid van Getuies regoor die wêreld sal daar hopelik genoeg geld wees om in hierdie behoefte te voorsien.—Psalm 127:1.
Koninkryksale bevorder vermeerdering
Watter impak het hierdie ontsaglike poging op die plaaslike Getuies en op die Koninkrykspredikingswerk gehad? In baie gebiede is die vergaderingbywoning baie hoër nadat ’n nuwe Koninkryksaal gebou is. Ons sien so ’n voorbeeld in hierdie verslag uit Burundi: “Sodra die Koninkryksaal voltooi is, is dit vol tydens vergaderinge. Byvoorbeeld, ’n Koninkryksaal is vir ’n gemeente gebou wat gemiddeld 100 by hulle vergaderinge gehad het. Hulle nuwe Koninkryksaal het sitplek vir 150 mense. Teen die tyd dat dit voltooi is, het 250 die vergaderinge bygewoon.”
Waarom vind hierdie vermeerdering plaas? Een rede is dat groepe Koninkryksverkondigers wat nie ’n amptelike vergaderplek het nie, maar onder ’n boom of in ’n veld moet bymekaarkom, soms met agterdog bejeën word. In een land word sulke klein godsdiensgroepe met etniese geweld geassosieer, en die wet vereis dat alle godsdiensvergaderinge in ’n huis van aanbidding gehou word.
Wanneer Jehovah se Getuies hulle eie sale het, help dit hulle ook om vir die gemeenskap te wys dat hulle nie dissipels van die een of ander pastoor is nie. Die takkantoor van Jehovah se Getuies in Zimbabwe skryf: “In die verlede het broers in hierdie gebied gewoonlik in privaat huise bymekaargekom, en die plaaslike mense het die gemeente vereenselwig met die eienaar van die huis waarin hulle bymekaargekom het. Hulle het na die broers verwys as dié wat aan die kerk van mnr. So-en-so behoort. Dit verander nou omdat die mense naamborde sien wat elke saal duidelik as ’n ‘Koninkryksaal van Jehovah se Getuies’ identifiseer.”
Blymoedige gewers
“God het ’n blymoedige gewer lief”, het die apostel Paulus geskryf (2 Korintiërs 9:7). Groot bydraes help natuurlik baie. Maar die grootste deel van die bydraes vir die werk van Jehovah se Getuies kom uit die bydraebussies in Koninkryksale. Groot of klein, alle bydraes is belangrik en word nie oorgesien nie. Onthou dat Jesus gaan sit het waar hy kon sien hoe die arm weduwee haar twee klein muntstukkies bydra. Die engele en Jehovah het haar ook gesien. Ons weet nie eens wat die weduwee se naam was nie, maar Jehovah het toegesien dat haar onselfsugtige daad vir ewig in die Bybel opgeteken is.
Benewens die bou van Koninkryksale ondersteun ons bydraes alle ander fasette van die noodsaaklike Koninkrykswerk. As ons ons samewerking op hierdie manier gee, gee dit ons rede om vreugdevol te wees en “om ryk te wees aan baie dankbetuigings aan God” (2 Korintiërs 9:12). Ons Christenbroers in Benin vertel: “Elke dag styg baie dankgebede tot Jehovah op vir die finansiële bystand wat ons van die internasionale broederskap gekry het.” Terselfdertyd ondervind almal wat ’n aandeel daaraan het om die Koninkrykswerk finansieel te ondersteun, die geluk wat dit verskaf om as Christene te gee!
[Venster op bladsy 22, 23]
Maniere waarop party verkies om te gee
BYDRAES VIR DIE WÊRELDWYE WERK
Baie sit ’n bedrag opsy wat hulle in die bydraebussies gooi wat gemerk is “Bydraes vir die wêreldwye werk—Matteus 24:14”.
Gemeentes stuur hierdie bydraes elke maand na die takkantoor van Jehovah se Getuies in hulle land. Vrywillige geldelike bydraes kan ook regstreeks gestuur word na die Rekeningafdeling, Watch Tower Bible and Tract Society of Pennsylvania, Privaatsak X2067, Krugersdorp, 1740, Suid-Afrika, of na die takkantoor in die land waar jy woon. Tjeks moet uitgemaak word aan “Watch Tower”. Juwele of ander kosbare artikels kan ook geskenk word. ’n Kort brief wat meld dat dit ’n regstreekse skenking is, moet hierdie bydraes vergesel.
BEPLANDE SKENKINGS
Benewens regstreekse skenkings van geld is daar ander maniere waarop ’n mens kan gee om Koninkryksdiens in alle wêrelddele te bevorder. Dit sluit in:
Versekering: Watch Tower kan as die begunstigde van ’n lewensversekeringspolis of in ’n aftree-/pensioenskema benoem word.
Aandele en obligasies: Aandele en obligasies kan aan Watch Tower geskenk word as ’n regstreekse skenking.
Vaste eiendom: Verkoopbare vaste eiendom kan regstreeks geskenk word of dit kan, in die geval van eiendom met ’n wooneenheid, geskenk word op voorwaarde dat die skenker gedurende sy of haar leeftyd daar kan bly woon. Voordat enige vaste eiendom oorgedra word, moet ’n mens eers in aanraking kom met die takkantoor in die land waar jy woon.
Testamente: Eiendom of geld kan deur ’n wettige testament aan Watch Tower bemaak word.
As jy meer inligting wil hê, kan jy gerus skriftelik of per telefoon met die Rekeningafdeling in verbinding tree by die adres hieronder of by die kantoor van Jehovah se Getuies in die land waar jy woon.
Rekeningafdeling
Watch Tower Bible and Tract Society of Pennsylvania
Privaatsak X2067,
Krugersdorp, 1740,
Suid-Afrika
Telefoon: (011) 761-1000
[Prente op bladsy 20, 21]
Ou en nuwe vergaderplekke van Jehovah se Getuies
Zambië
Die Sentraal-Afrikaanse Republiek