Koninkryksverkondigers berig
’n Eerlike volk bring lof aan Jehovah
OOR die hele aarde is Jehovah se Getuies—jonk en oud—bekend vir hulle eerlikheid. Beskou voorbeelde uit drie vastelande.
Die 17-jarige Olusola, wat in Nigerië woon, het eendag ’n beursie op die grond gevind toe sy van die skool af op pad huis toe was. Sy het dit vir die skoolhoof gegee, wat die geld getel het, en daar was ₦6 200 (ongeveer R280). Die hoof het die beursie teruggegee aan die onderwyser wat dit verloor het. Om sy waardering te toon, het die onderwyser vir Olusola ₦1 000 (ongeveer R45) gegee en vir haar gesê om haar skoolgeld daarmee te betaal. Toe ander leerlinge hoor wat gebeur het, het hulle Olusola gespot. ’n Paar weke later het ’n leerling gesê dat sy geld gesteel is, en die onderwysers is gevra om al die leerlinge te deursoek. “Staan jy hier”, het die onderwyser vir Olusola gesê. “Ek weet dat jy as ’n Getuie van Jehovah nie sal steel nie.” Die geld is by twee van die seuns gevind wat Olusola gespot het, en hulle is swaar gestraf. Olusola het geskryf: “Ek is baie bly dat ek bekend staan as een van Jehovah se Getuies, wat nooit sal steel nie, en Jehovah sodoende verheerlik.”
Toe Marcelo, ’n gebore Argentyn, eendag sy huis verlaat het, het hy ’n aktetas ’n paar meter van sy agterdeur af op die grond gevind. Nadat hy die aktetas in die huis ingeneem het, het hy en sy vrou dit versigtig oopgemaak. Tot hulle verbasing het hulle ’n groot som geld daarin gevind, sowel as kredietkaarte en verskeie getekende tjeks, waarvan een vir eenmiljoen peso’s (R2 miljoen) was. Op ’n faktuur het hulle ’n telefoonnommer gekry. Hulle het die eienaar gebel en afgespreek dat hulle die aktetas met sy inhoud by Marcelo se werksplek aan hom sal terugbesorg. Toe die eienaar opdaag, het hy senuweeagtig gelyk. Die werkgewer het vir hom gesê om te kalmeer, aangesien Marcelo een van Jehovah se Getuies is. Die eienaar het vir Marcelo net 20 peso’s (ongeveer R40) as beloning gegee omdat hy die aktetas gevind het. Dit het die werkgewer woedend gemaak, want hy was baie beïndruk deur Marcelo se eerlikheid. Dit het Marcelo die geleentheid gegee om te verduidelik dat hy as een van Jehovah se Getuies te alle tye eerlik wil wees.
Die volgende ondervinding kom uit Kirgistan. Rinat, ’n sesjarige seuntjie, het die handsak opgetel van ’n vrou wat daar naby gewoon het. Die handsak het 1 100 som (sowat R150) daarin gehad. Toe Rinat die verlore handsak aan die vrou terugbesorg, het sy die geld getel en toe vir Rinat se ma gesê dat daar 200 som (ongeveer R30) weg is. Rinat het gesê dat hy nie die geld gevat het nie. Toe het almal na die verlore geld gaan soek, en dit is naby die plek gevind waar die handsak opgetel is. Die vrou was verbaas. Sy het haar dankbaarheid uitgespreek teenoor Rinat en sy ma, eerstens omdat hulle die verlore geld terugbesorg het en tweedens vir sy Christelike opvoeding.