“Gelukkig is dié wat bewus is van hulle geestelike behoefte”
WANNEER voëls soggens wakker word, sit en tjirp hulle dikwels ’n rukkie en dan vlieg hulle weg op soek na kos. Saans keer hulle terug na hulle nes, sit en tjirp weer ’n rukkie en dan gaan slaap hulle. Hulle paar, lê eiers en maak hulle kleintjies groot in sekere seisoene. Ander diere volg ’n soortgelyke voorspelbare patroon.
Mense is anders. Ja, ons eet, slaap en kry kinders, maar die meeste van ons is nie net hiermee tevrede nie. Ons wil weet waarom ons hier is. Ons wil ’n sinvolle lewe hê. Ons wil ook ’n hoop vir die toekoms hê. Hierdie dieper behoeftes dui op ’n eienskap wat uniek is aan die mens—geestelikheid, of die behoefte aan en sin vir geestelike dinge.
Na God se beeld gemaak
Die Bybel verstrek die rede vir die geestelike sy van die mens se natuur en sê: “God het die mens na sy beeld begin skep, na God se beeld het hy hom geskep; man en vrou het hy hulle geskep” (Genesis 1:27). Die feit dat ons “na God se beeld” gemaak is, beteken dat ons die vermoë het om sekere eienskappe van God te weerspieël al is ons met sonde en onvolmaaktheid besmet (Romeine 5:12). Ons kan byvoorbeeld skeppend wees. Ons het ook ’n mate van wysheid, ’n sin vir geregtigheid en die vermoë om selfopofferende liefde aan mekaar te betoon. Verder kan ons oor die verlede nadink en vir die toekoms beplan.—Spreuke 4:7; Prediker 3:1, 11; Miga 6:8; Johannes 13:34; 1 Johannes 4:8.
Ons geestelike vermoë word die duidelikste gesien in ons ingebore begeerte om God te aanbid. Tensy ons die behoefte om ’n verhouding met ons Skepper te hê, behoorlik bevredig, kan ons nie ware en blywende geluk vind nie. “Gelukkig is dié wat bewus is van hulle geestelike behoefte”, het Jesus gesê (Matteus 5:3). Maar ons moet seker maak dat ons hierdie behoefte bevredig met geestelike waarheid—feite oor God, sy standaarde en sy voorneme met die mensdom. Waar kan ons geestelike waarheid vind? In die Bybel.
“U woord is die waarheid”
Die apostel Paulus het geskryf: “Die hele Skrif is deur God geïnspireer en is nuttig om te onderrig, om tereg te wys, om dinge reg te stel” (2 Timoteus 3:16). Paulus se woorde stem ooreen met dié van Jesus, wat in gebed aan God gesê het: “U woord is die waarheid.” Vandag ken ons daardie Woord as die Heilige Bybel, en ons is verstandig as ons seker maak dat ons opvattings en standaarde daarmee ooreenstem.—Johannes 17:17.
As ons ons opvattings met God se Woord vergelyk, volg ons die mense van eertydse Berea na, wat seker gemaak het dat Paulus se leringe met die Skrif ooreengestem het. Lukas het die Bereane nie gekritiseer nie, maar hulle eerder geprys oor hulle gesindheid. “Hulle het die woord met die grootste gretigheid van verstand ontvang”, het hy geskryf, “en die Skrif elke dag sorgvuldig ondersoek of hierdie dinge so was” (Handelinge 17:11). Met die oog op die teenstrydige godsdienstige en sedelike leringe wat vandag so algemeen is, is dit belangrik dat ons die voorbeeld van die edelmoedige Bereane navolg.
Nog ’n manier om geestelike waarheid te identifiseer, is om te kyk hoe dit mense se lewens beïnvloed (Matteus 7:17). Byvoorbeeld, as ’n mens volgens Bybelwaarheid lewe, behoort dit jou ’n beter man, ’n beter vader, ’n beter vrou of ’n beter moeder te maak, wat dan tot gesinsgeluk bydra en tevredenheid bevorder. “Gelukkig is . . . dié wat die woord van God hoor en dit nakom”, het Jesus gesê.—Lukas 11:28.
Jesus se woorde herinner ons aan dié van sy hemelse Vader, wat vir die eertydse Israeliete gesê het: “Ek, Jehovah, is jou God, die Een wat jou leer om jouself te bevoordeel, die Een wat jou laat loop op die weg wat jy moet bewandel. Ag, as jy maar aan my gebooie aandag sal skenk! Dan sal jou vrede net soos ’n rivier word, en jou regverdigheid soos die golwe van die see” (Jesaja 48:17, 18). Almal wat goedheid en regverdigheid liefhet, sal sekerlik deur so ’n liefdevolle pleidooi geroer word!
Party verkies dat hulle “ore gestreel” word
God het daardie innige pleidooi tot die Israeliete gerig omdat hulle deur godsdiensleuens mislei is (Psalm 106:35-40). Ook ons moet op ons hoede wees teen onwaarhede. Paulus het aangaande verklaarde Christene geskryf: “Daar sal ’n tyd wees wanneer hulle nie die gesonde leer sal verdra nie, maar ooreenkomstig hulle eie begeertes vir hulle onderrigters sal versamel sodat hulle ore gestreel kan word; en hulle sal hulle ore van die waarheid afkeer.”—2 Timoteus 4:3, 4.
Godsdiensleiers streel mense se ore deur gebruike goed te keur wat verkeerde begeertes bevredig, soos buite-egtelike geslagsomgang, homoseksualiteit en dronkenskap. Die Bybel sê duidelik dat dié wat sulke dinge goedkeur en dié wat dit beoefen, “God se koninkryk nie sal beërf nie”.—1 Korintiërs 6:9, 10; Romeine 1:24-32.
Dit verg weliswaar moed om volgens Bybelstandaarde te lewe, veral as ’n mens daaroor bespot word, maar dit kan gedoen word. Onder Jehovah se Getuies is daar baie persone wat voorheen dwelmslawe, dronkaards, hoereerders, straatbakleiers, diewe en leuenaars was. Maar hulle het God se Woord ter harte geneem en met die hulp van die heilige gees veranderinge in hulle lewe aangebring sodat hulle “kan wandel op ’n wyse wat Jehovah waardig is” (Kolossense 1:9, 10; 1 Korintiërs 6:11). Omdat hulle vrede met God gemaak het, het hulle ook innerlike vrede verkry en, soos ons sal sien, ’n ware hoop vir die toekoms.
Die Koninkrykshoop
Die Bybelse hoop op blywende vrede vir gehoorsame mense sal deur die Koninkryk van God vervul word. “Laat u koninkryk kom. Laat u wil geskied, soos in die hemel, so ook op die aarde”, het Jesus in sy modelgebed gesê (Matteus 6:10). Ja, net God se Koninkryk kan verseker dat God se wil op die aarde gedoen word. Waarom? Omdat hierdie hemelse Koninkryk—’n regering in die hande van Jesus Christus—die middel is waardeur God Sy regmatige soewereiniteit oor die aarde sal uitoefen.—Psalm 2:7-12; Daniël 7:13, 14.
As Koning van hierdie hemelse Koninkryk sal Jesus Christus gehoorsame mense van elke vorm van slawerny bevry, met inbegrip van die wurggreep van Adamitiese sonde en die erfenis daarvan, naamlik siekte en die dood. Openbaring 21:3, 4 sê: “Kyk! Die tent van God is by die mensdom . . . En hy [Jehovah God] sal elke traan van hulle oë afvee, en die dood sal daar nie meer wees nie, en ook verdriet en angsgeroep en pyn sal daar nie meer wees nie. Die vorige dinge het verbygegaan.”
Blywende vrede sal wêreldwyd heers. Waarom kan ons daarvan seker wees? Die rede word in Jesaja 11:9 geopenbaar, wat sê: “Hulle [die Koninkryk se onderdane] sal geen kwaad doen of enige verderf aanrig op my hele heilige berg nie; want die aarde sal beslis vol wees van die kennis van Jehovah soos die waters die see bedek.” Ja, elke mens op die aarde sal juiste kennis van God hê en aan hom gehoorsaam wees. Verbly hierdie vooruitsig jou hart? Indien wel, is dit nou die tyd om die kosbare “kennis van Jehovah” te begin inneem.
Sal jy na die Koninkryksboodskap luister?
Deur middel van die Koninkryk sal God al die werke van Satan ongedaan maak en mense in Sy regverdige weë onderrig. Dit is dus nie verbasend dat die Koninkryk die hooftema van Jesus se onderrigting was nie. “Ek [moet] die goeie nuus van die koninkryk van God bekend maak”, het hy gesê, “want hiervoor is ek uitgestuur” (Lukas 4:43). Christus het sy dissipels beveel om hierdie selfde boodskap aan ander te verkondig (Matteus 28:19, 20). “Hierdie goeie nuus van die koninkryk”, het hy voorspel, “sal in die hele bewoonde aarde verkondig word as ’n getuienis vir al die nasies; en dan sal die einde kom” (Matteus 24:14). Hierdie einde kom vinnig nader. Hoe belangrik is dit dan tog dat opregtes van hart na die lewensreddende goeie nuus luister!
Albert, wat in die vorige artikel gemeld word, het die Koninkryksboodskap gehoor toe sy vrou en seun die Bybel saam met Jehovah se Getuies begin studeer het. Albert was aanvanklik skepties. Hy het selfs ’n plaaslike geestelike gevra om sy vrou en seun te besoek om die Getuies aan die kaak te stel. Maar die geestelike wou nie by die situasie betrokke raak nie. Albert het dus besluit om na ’n Bybelbespreking te luister sodat hy enige foute kon uitwys. Ná net een sessie het hy by die studie aangesluit, gretig om meer te leer. Hy het later verduidelik waarom sy gesindheid verander het. “Dit was waarna ek nog altyd gesoek het”, het hy gesê.
Uiteindelik het Albert sy geestelike behoefte begin bevredig, en hy was nog nooit spyt daaroor nie. Bybelwaarheid het hom gegee waarna hy sy hele lewe gesoek het—die oplossing vir die onregverdigheid en verdorwenheid waarvan die samelewing deurtrek is en ’n hoop vir die toekoms. Bybelwaarheid het hom innerlike vrede gegee. Word jou geestelike behoefte bevredig? Neem gerus ’n oomblik om deur die vrae in die venster op bladsy 6 te lees. As jy bykomende inligting wil hê, sal Jehovah se Getuies jou met graagte help.
[Venster/Prent op bladsy 6]
WORD JOU GEESTELIKE BEHOEFTE BEVREDIG?
Word jy bevredig deur die geestelike voedsel wat jy ontvang? Ons nooi jou om die volgende vrae te lees en dié te merk wat jy korrek kan beantwoord.
□ Wie is God, en wat is sy naam?
□ Wie is Jesus Christus? Waarom moes hy sterf? Hoe kan sy dood jou tot voordeel strek?
□ Is daar ’n Duiwel? Indien wel, waar het hy vandaan gekom?
□ Wat gebeur met ons wanneer ons sterf?
□ Wat is God se voorneme met die aarde en met die mensdom?
□ Wat is die Koninkryk van God?
□ Wat is God se sedelike standaarde?
□ Wat is die man en die vrou se godgegewe rol in die gesin? Wat is ’n paar Bybelbeginsels wat gesinsgeluk bevorder?
As jy nie seker is wat die antwoord op enige van hierdie vrae is nie, kan jy ’n eksemplaar van die brosjure Wat vereis God van ons? aanvra. Hierdie brosjure, wat in byna 300 tale deur Jehovah se Getuies uitgegee word, bespreek 16 basiese Bybelonderwerpe en voorsien ’n skriftuurlike antwoord op al die vrae hierbo.
[Prente op bladsy 4]
In teenstelling met diere het mense ’n geestelike behoefte
[Prent op bladsy 5]
“Hulle [sal] vir hulle onderrigters . . . versamel sodat hulle ore gestreel kan word.”—2 Timoteus 4:3
[Prent op bladsy 7]
Blywende vrede sal deur die Messiaanse Koninkryk van God tot stand gebring word