Ons sal in die naam van Jehovah ons God wandel
“Wat ons betref, ons sal in die naam van Jehovah ons God wandel tot onbepaalde tyd, ja, vir ewig.”—MIGA 4:5.
1. Wat was die situasie in Noag se dag ten opsigte van sedelikheid, en hoe was Noag anders?
DIE eerste man van wie die Bybel sê dat hy met God gewandel het, was Henog. Die tweede was Noag. Die verslag sê vir ons: “Noag was ’n regverdige man. Hy was onberispelik onder sy tydgenote. Noag het met die ware God gewandel” (Genesis 6:9). Teen Noag se tyd het die mensdom oor die algemeen van ware aanbidding afgewyk. Die slegte situasie is vererger deur ontroue engele wat onnatuurlike verbintenisse met vroue gevorm het en nakomelinge voortgebring het wat Nefilim genoem is, “die sterkes”, of “die manne van naam”, van daardie dae. Geen wonder dat die aarde vol geweld geraak het nie! (Genesis 6:2, 4, 11). Maar Noag was ’n onberispelike man en “’n prediker van regverdigheid” (2 Petrus 2:5). Toe God hom beveel het om ’n ark te bou vir die behoud van lewe, het Noag gehoorsaam “gedoen volgens alles wat God hom beveel het. Hy het net so gedoen” (Genesis 6:22). Ja, Noag het met God gewandel.
2, 3. Watter goeie voorbeeld het Noag gestel vir ons wat vandag lewe?
2 Paulus het Noag ingesluit in sy lys van getroue getuies toe hy geskryf het: “Deur geloof het Noag, nadat hy ’n goddelike waarskuwing gegee is oor dinge wat nog nie gesien is nie, godvrugtige vrees aan die dag gelê en ’n ark gebou tot redding van sy huisgesin; en deur hierdie geloof het hy die wêreld veroordeel, en hy het ’n erfgenaam geword van die regverdigheid wat volgens geloof is” (Hebreërs 11:7). Wat ’n uitstekende voorbeeld! Noag was seker dat Jehovah se woorde bewaarheid sou word en het sy tyd, energie en middele gebruik om God se bevele uit te voer. Net so is daar vandag baie wat sekulêre geleenthede in hierdie wêreld die rug toekeer en hulle tyd, energie en middele gebruik om Jehovah se bevele te gehoorsaam. Hulle geloof is merkwaardig en sal lei tot hulle eie redding sowel as dié van ander.—Lukas 16:9; 1 Timoteus 4:16.
3 Dit was ongetwyfeld vir Noag en sy gesin net so moeilik om geloof te beoefen as wat dit was vir Henog, Noag se oupagrootjie, wat in die vorige artikel bespreek is. Net soos in Henog se dag, was ware aanbidders in Noag se dag ’n klein minderheid—net agt mense was getrou en het die Vloed oorleef. Noag het regverdigheid in ’n gewelddadige en onsedelike wêreld verkondig. Ook het hy en sy gesin ’n groot ark van hout gebou ter voorbereiding van ’n wêreldwye vloed, hoewel niemand al voorheen so ’n vloed gesien het nie. Dit het sekerlik baie vreemd gelyk vir dié wat hulle dopgehou het.
4. Watter fout van Noag se tydgenote het Jesus beklemtoon?
4 Interessant genoeg, toe Jesus na die dae van Noag verwys het, het hy nie van die geweld, die valse godsdiens of die onsedelikheid gepraat nie—hoewel dit baie ernstig was. Die fout wat Jesus beklemtoon het, was mense se versuim om ag te slaan op die waarskuwing wat gegee is. Hy het gesê: “Hulle het geëet en gedrink, manne het getrou en vroue is in die huwelik gegee, tot die dag dat Noag in die ark ingegaan het.” Om te eet, te drink, te trou, in die huwelik gegee te word—wat was verkeerd daarmee? Hulle het maar net ’n “normale” lewe gelei! Maar ’n vloed was aan die kom, en Noag het regverdigheid verkondig. Sy woorde en sy gedrag moes vir hulle ’n waarskuwing gewees het. Nogtans het hulle “geen ag daarop geslaan totdat die vloed gekom en hulle almal weggesleur het nie”.—Matteus 24:38, 39.
5. Watter eienskappe het Noag en sy gesin nodig gehad?
5 Wanneer ons terugkyk op daardie tye, sien ons hoe wys Noag se weg was. Maar in die dae voor die Vloed het dit moed geverg om anders te wees as al die ander. Sterk oortuiging was nodig vir Noag en sy gesin om die ontsaglike ark te bou en dit met verteenwoordigers van die diersoorte te vul. Het party van daardie paar getroue siele soms gewens dat hulle minder opvallend kon wees en net ’n “normale” lewe kon lei? Selfs as sulke gedagtes by hulle opgekom het, het hulle hulle onkreukbaarheid gehandhaaf. Ná baie jare—langer as wat enige van ons in hierdie stelsel van dinge sal hoef te volhard—het Noag se geloof gelei tot sy redding deur die Vloed heen. Maar Jehovah het oordeel voltrek aan almal wat ’n “normale” lewe gelei het en geen ag geslaan het op die betekenis van die tye waarin hulle gelewe het nie.
Die mensdom word weer eens deur geweld geteister
6. Watter situasie het nog steeds ná die Vloed bestaan?
6 Nadat die waters van die Vloed gesak het, het die mensdom ’n nuwe begin gehad. Maar die mens was nog onvolmaak, en “die neiging van die mens se hart” was steeds “sleg van sy jeug af” (Genesis 8:21). Wat meer is, al kon die demone nie meer in menseliggame materialiseer nie, was hulle nog steeds baie aktief. Die wêreld van goddelose mense het gou getoon dat dit “in die mag van die bose [lê]”, en net soos vandag, moes ware aanbidders teen “die sette van die Duiwel” stry.—1 Johannes 5:19; Efesiërs 6:11, 12.
7. Hoe het geweld in die wêreld ná die Vloed toegeneem?
7 Minstens van Nimrod se tyd af het die wêreld ná die Vloed weer eens die toneel van mensegeweld geword. As gevolg van die bevolkingsgroei en tegnologiese vooruitgang het hierdie geweld met verloop van tyd toegeneem. In vroeëre jare was daar die swaard, die spies, die pyl en boog en die strydwa. In onlangser tye het die musket en die kanon die lig gesien, toe die geweer en die gesofistikeerde artillerie van die vroeë 20ste eeu. Die Eerste Wêreldoorlog het nog skrikwekkender wapens op die toneel laat verskyn, soos die vliegtuig, die tenk, die duikboot en gifgas. Hierdie wapens het gedurende daardie oorlog miljoene lewens uitgewis. Was dit iets onverwags? Nee.
8. Hoe is Openbaring 6:1-4 al vervul?
8 In die jaar 1914 is Jesus as Koning van God se hemelse Koninkryk gekroon en het “die dag van die Here” begin (Openbaring 1:10). In ’n visioen wat in die boek Openbaring opgeteken is, word Jesus uitgebeeld as ’n Koning wat seëvierend op ’n wit perd ry. Hy word gevolg deur ander perderuiters, wat elkeen ’n ander plaag oor die mensdom voorstel. Een van hulle ry op ’n vuurkleurige perd, en aan hom is dit gegee “om vrede van die aarde weg te neem sodat hulle mekaar sou doodmaak; en ’n groot swaard is vir hom gegee” (Openbaring 6:1-4). Hierdie perd en sy ruiter stel oorlogvoering voor, en die groot swaard stel die ongeëwenaarde vernietigingskrag voor van moderne oorlogvoering met sy kragtige wapens. Hierdie wapens sluit vandag kerntoestelle in, wat elk die vermoë het om tienduisende mense uit te wis; vuurpyle wat hierdie toestelle na teikens kan neem wat duisende kilometers ver is; sowel as gesofistikeerde chemiese en biologiese wapens vir massavernietiging.
Ons slaan ag op Jehovah se waarskuwings
9. Hoe vergelyk vandag se wêreld met die een wat voor die Vloed bestaan het?
9 In die dae van Noag het Jehovah ’n vernietiging oor die mensdom gebring weens die uiterste gewelddadigheid van goddelose mense wat deur die Nefilim aangehits is. Wat van vandag? Is daar enigsins minder geweld op die aarde as destyds? Glad nie! Wat meer is, net soos in Noag se dag, gaan mense vandag maar net voort met hulle bedrywighede en probeer hulle ’n “normale” lewe lei, terwyl hulle weier om ag te slaan op die waarskuwings wat gegee word (Lukas 17:26, 27). Is daar dan enige rede om te twyfel dat Jehovah weer eens ’n vernietiging oor die mensdom sal bring? Nee.
10. (a) Watter waarskuwing word herhaaldelik in Bybelprofesieë gegee? (b) Wat is vandag die enigste verstandige weg?
10 Honderde jare voor die Vloed het Henog die vernietiging voorspel wat in ons dag moet kom (Judas 14, 15). Jesus het ook van die komende “groot verdrukking” gepraat (Matteus 24:21). Ander profete het van daardie tyd gewaarsku (Esegiël 38:18-23; Daniël 12:1; Joël 2:31, 32). En in die boek Openbaring vind ons ’n aanskoulike beskrywing van daardie finale vernietiging (Openbaring 19:11-21). As individue volg ons Noag na en is ons bedrywig as predikers van regverdigheid. Ons slaan ag op Jehovah se waarskuwings en help ons bure liefdevol om dieselfde te doen. Soos Noag, wandel ons dus met God. Trouens, dit is noodsaaklik dat almal wat die lewe begeer, aanhou om met God te wandel. Hoe kan ons dit doen te midde van die druk waarvoor ons elke dag te staan kom? Ons moet sterk geloof in die verwesenliking van God se voorneme opbou.—Hebreërs 11:6.
Hou aan om in moeilike tye met God te wandel
11. Op watter manier volg ons eerste-eeuse Christene na?
11 In die eerste eeu is daar van gesalfde Christene gesê dat hulle tot “Die Weg” behoort het (Handelinge 9:2). Hulle hele lewenswyse het gedraai om geloof in Jehovah en Jesus Christus. Hulle het dieselfde weg bewandel as hulle Heer. Vandag doen getroue Christene dieselfde.
12. Wat het gebeur nadat Jesus ’n skare wonderdadig gevoed het?
12 Die belangrikheid van geloof word gesien in ’n gebeurtenis wat gedurende Jesus se bediening plaasgevind het. By een geleentheid het Jesus ’n skare van omtrent 5 000 manne wonderdadig gevoed. Die mense was verbaas en verheug. Maar let op wat daarna gebeur het. Ons lees: “Toe die mense derhalwe die tekens sien wat hy gedoen het, het hulle begin sê: ‘Dit is vir seker die profeet wat in die wêreld sou inkom.’ Omdat Jesus geweet het dat hulle op die punt staan om hom te kom gryp om hom koning te maak, het hy weer na die berg weggegaan, heeltemal alleen” (Johannes 6:10-15). Daardie nag het hy na ’n ander plek gereis. Jesus se weiering om die koningskap te aanvaar, het baie mense waarskynlik teleurgestel. Hy het immers getoon dat hy wys genoeg was om koning te wees en dat hy die krag gehad het om in die mense se fisiese behoeftes te voorsien. Maar dit was nog nie Jehovah se tyd vir hom om as Koning te heers nie. Wat meer is, Jesus se Koninkryk sou ’n hemelse koninkryk wees, nie ’n aardse nie.
13, 14. Watter beskouing het baie geopenbaar, en hoe is hulle geloof getoets?
13 Die skares het Jesus nietemin vasbeslote gevolg en hom, soos Johannes sê, “aan die oorkant van die see” gevind. Waarom het hulle hom gevolg nadat hy hulle pogings ontduik het om hom koning te maak? Baie het ’n vleeslike beskouing geopenbaar deur spesifiek te praat van die materiële voorsienings wat Jehovah in Moses se dag in die wildernis gemaak het. Die implikasie was dat Jesus moes voortgaan om materieel vir hulle te voorsien. Jesus het hulle verkeerde beweegredes onderskei en het hulle geestelike waarhede begin leer wat kon help om hulle denke reg te stel (Johannes 6:17, 24, 25, 30, 31, 35-40). In reaksie hierop het party teen hom gemurmureer, veral toe hy hierdie illustrasie vertel het: “Voorwaar, voorwaar, ek sê vir julle: Tensy julle die vlees van die Seun van die mens eet en sy bloed drink, het julle geen lewe in julleself nie. Hy wat hom met my vlees voed en my bloed drink, het die ewige lewe, en ek sal hom op die laaste dag opwek.”—Johannes 6:53, 54.
14 Jesus se illustrasies het mense dikwels beweeg om te toon of hulle werklik met God wou wandel. Hierdie een was geen uitsondering nie. Dit het sterk reaksies uitgelok. Ons lees: “Baie van sy dissipels [het], toe hulle dit hoor, gesê: ‘Hierdie woord is skokkend; wie kan daarna luister?’” Jesus het toe verduidelik dat hulle die geestelike betekenis van sy woorde moet probeer onderskei. Hy het gesê: “Dit is die gees wat lewegewend is; die vlees is van hoegenaamd geen nut nie. Die woorde wat ek tot julle gespreek het, is gees en is lewe.” Baie het nietemin nie geluister nie, en die verslag sê: “As gevolg hiervan het baie van sy dissipels teruggegaan na die dinge wat hulle agtergelaat het en nie meer saam met hom gewandel nie.”—Johannes 6:60, 63, 66.
15. Watter gepaste beskouing het party van Jesus se volgelinge gehad?
15 Nie al Jesus se dissipels het egter so gereageer nie. Die lojale dissipels het weliswaar nie heeltemal verstaan wat Jesus gesê het nie. Maar hulle vertroue in hom het sterk gebly. Petrus, een van daardie lojale dissipels, het die gevoelens van almal wat gebly het, uitgespreek toe hy gesê het: “Here, na wie toe sal ons weggaan? U het woorde van die ewige lewe” (Johannes 6:68). Wat ’n uitstekende gesindheid, en wat ’n goeie voorbeeld!
16. Hoe kan ons getoets word, en watter gepaste beskouing moet ons aankweek?
16 Vandag kan ons net soos daardie vroeë dissipels getoets word. Ons is miskien teleurgesteld omdat Jehovah se beloftes nie so gou vervul word as wat ons wou hê nie. Ons voel moontlik dat verduidelikings van die Skrif in ons Bybelpublikasies moeilik is om te verstaan. Die gedrag van ’n mede-Christen stel ons dalk teleur. Sal dit reg wees om weens hierdie of soortgelyke redes op te hou om met God te wandel? Natuurlik nie! Die dissipels wat Jesus verlaat het, het ’n vleeslike beskouing geopenbaar. Ons moet daarop let dat ons nie dieselfde doen nie.
‘Ons is nie die soort wat terugdeins nie’
17. Wat kan ons help om met God te bly wandel?
17 Die apostel Paulus het geskryf: “Die hele Skrif is deur God geïnspireer” (2 Timoteus 3:16). Deur middel van die bladsye van die Bybel sê Jehovah duidelik vir ons: “Dit is die weg. Wandel daarop” (Jesaja 30:21). As ons God se Woord gehoorsaam, help dit ons om ‘voortdurend streng te let op hoe ons wandel’ (Efesiërs 5:15). Bybelstudie en bepeinsing oor wat ons leer, help ons om “[voort te gaan] om in die waarheid te wandel” (3 Johannes 3). Ja, soos Jesus gesê het, “die gees [is] lewegewend . . . ; die vlees is van hoegenaamd geen nut nie”. Die enigste betroubare leiding waarvolgens ons ons voetstappe kan rig, is geestelike leiding, wat ons deur Jehovah se Woord, sy gees en sy organisasie ontvang.
18. (a) Watter onwyse weg volg party? (b) Watter soort geloof kweek ons aan?
18 Vandag probeer diegene wat as gevolg van vleeslike denke of onvervulde verwagtinge onvergenoegd raak, dikwels om ten volle gebruik te maak van die dinge wat die wêreld bied. Omdat hulle hulle gevoel van dringendheid verloor, sien hulle geen rede om ‘aan te hou waak’ nie en verkies hulle om eerder selfsugtige doelwitte na te jaag as om Koninkryksbelange eerste te stel (Matteus 24:42). Dit is uiters onwys om so ’n weg te bewandel. Let op die apostel Paulus se woorde: “Ons is dan nou nie die soort wat terugdeins tot vernietiging nie, maar die soort wat geloof het tot die behoud van die siel” (Hebreërs 10:39). Soos Henog en Noag, lewe ons in onstuimige tye, maar soos hulle, het ons die voorreg om met God te wandel. As ons dit doen, het ons die gewaarborgde verwagting dat ons sal sien hoe Jehovah se beloftes vervul word, goddeloosheid vernietig word en ’n regverdige nuwe wêreld tot stand gebring word. Wat ’n wonderlike vooruitsig!
19. Hoe beskryf Miga die weg wat ware aanbidders volg?
19 Die geïnspireerde profeet Miga het gesê dat die nasies van die wêreld ‘elkeen in die naam van sy god sou wandel’. Toe het hy van homself en ander getroue aanbidders gepraat en gesê: “Wat ons betref, ons sal in die naam van Jehovah ons God wandel tot onbepaalde tyd, ja, vir ewig” (Miga 4:5). As jy dieselfde vaste voorneme as Miga het, moet jy na aan Jehovah bly ongeag hoe onstuimig die tye word (Jakobus 4:8). Mag dit elkeen van ons se hartgrondige begeerte wees om nou en tot onbepaalde tyd, ja, vir ewig, met Jehovah ons God te wandel!
Hoe sal jy antwoord?
• Watter ooreenkomste is daar tussen Noag se dag en vandag?
• Watter weg het Noag en sy gesin gevolg, en hoe kan ons hulle geloof navolg?
• Watter verkeerde beskouing het party van Jesus se volgelinge geopenbaar?
• Wat is ware Christene vasbeslote om te doen?
[Prente op bladsy 20]
Net soos in Noag se dag, is mense vandag heeltemal behep met hulle daaglikse bedrywighede
[Prent op bladsy 21]
As Koninkryksverkondigers is ‘ons nie die soort wat terugdeins nie’