Bestaan die Duiwel werklik?

HOE beskou jy die Duiwel? Beskou jy hom as ’n werklike persoon wat mense verlei om bose dinge te doen, of verteenwoordig hy maar net die begrip boosheid? Is die Duiwel iemand wat gevrees moet word, of moet hy afgemaak word as bloot ’n bygelowige idee of ’n mitiese onwerklikheid? Verwys die woord “duiwel” na die een of ander abstrakte vernietigende krag in die heelal? Is die term moontlik net ’n simbool van die bose eienskappe van mense, soos baie hedendaagse teoloë beweer?

Dit is nie verbasend dat die mensdom verdeeld is oor die kwessie van wie die Duiwel is nie. Stel jou voor hoe moeilik dit kan wees om die ware identiteit vas te stel van iemand wat ’n meester van vermomming is! Dit is veral die geval as hy vasbeslote is om agter ’n masker verberg te bly. Die Bybel beskryf die Duiwel as so ’n persoon. Dit verwys na hom as Satan en sê: “Satan self hou aan om hom in ’n engel van lig te verander” (2 Korintiërs 11:14). Hoewel die Duiwel boos is, doen hy hom as goed voor om ander te mislei. En as hy mense kan kry om te glo dat hy eenvoudig nie bestaan nie, pas dit hom nog beter.

Wie is die Duiwel dan werklik? Wanneer en hoe het hy ontstaan? Hoe beïnvloed hy die mensdom vandag? Wat, indien enigiets, kan ons doen om daardie invloed te weerstaan? Die Bybel bevat die akkurate geskiedenis van die Duiwel, van sy begin af, en voorsien betroubare antwoorde op hierdie vrae.

[Prent op bladsy 3]

Hoe moeilik kan dit tog wees om iemand te identifiseer wat vasbeslote is om agter ’n masker verberg te bly!