“My hulp is van Jehovah”

Selfopoffering bring Jehovah se seën mee

DIEP in die woude van Kameroen ry ’n man met ’n fiets. Hy ry ure lank op oorstroomde paaie en deur modder terwyl hy gevare trotseer om ander te kan versterk. Om ’n afgesonderde groep te onderrig, loop party in Zimbabwe 15 kilometer deur riviere in vloed, terwyl hulle hulle klere en skoene op hulle kop balanseer om dit droog te hou. Elders staan ’n vrou vieruur in die oggend op sodat sy ’n verpleegster kan besoek en onderrig wat net vroeg in die dag ’n uur kan afstaan.

Wat het hierdie mense wat soveel moeite doen, in gemeen? Hulle is almal voltydse bedienaars van Jehovah se Getuies wat deelneem aan die werk om Bybelwaarhede aan ander te leer. Onder hulle is gewone en spesiale pioniers, sendelinge, reisende opsieners en duisende vrywilligers in Bethelhuise regoor die wêreld. En selfopoffering is hulle kenmerk.a

Die regte beweegrede

Jehovah se Getuies gee gehoor aan die apostel Paulus se vermaning aan Timoteus: “Doen jou uiterste bes om jou goedgekeur voor God te stel, as ’n werker wat hom oor niks hoef te skaam nie, wat die woord van die waarheid reg hanteer” (2 Timoteus 2:15). Maar wat spoor honderdduisende Getuies aan om as voltydse bedienaars te dien?

Wanneer voltydse bedienaars gevra word waarom hulle hulle in Jehovah se diens inspan, sluit hulle antwoord liefde vir God en vir hulle medemens in (Matteus 22:37-39). Dit is uiters gepas, want sonder liefde as beweegrede sal enige mate van inspanning tevergeefs wees.—1 Korintiërs 13:1-3.

Selfopofferende diens

Alle toegewyde Christene het Jesus se uitnodiging aanvaar: “As iemand agter my aan wil kom, laat hy homself verloën en sy folterpaal opneem en my voortdurend volg” (Matteus 16:24). Om onsself te verloën, beteken dat ons ons gewillig daaraan onderwerp om aan Jehovah God en Jesus Christus te behoort en deur hulle gelei te word. Vir baie het dit tot selfopofferende diens in die voltydse bediening gelei.

Baie Getuies doen groot moeite om hulle diens aan Jehovah uit te brei. Kyk byvoorbeeld na 56-jarige Júlia, ’n gewone pionier in São Paulo, Brasilië. “ ’n Chinese broer het my gebel en gevra of ek bereid is om Chinees te leer”, sê sy. “Weens my ouderdom het ek nie daaraan gedink om ’n nuwe taal te leer nie. Maar ná ’n paar dae het ek die uitdaging aanvaar. Vandag kan ek skriftuurlike aanbiedings in Chinees doen.”

Die takkantoor van Jehovah se Getuies in Peru berig: “In onlangse jare het honderde gewone pioniers na ontoegekende gebiede getrek, wat ’n moedige en selfopofferende gees openbaar. Hulle trek na verafgeleë dorpe, waar daar geen basiese dienste is nie en waar werksgeleenthede skaars is. Hierdie broers en susters sal enige opoffering maak om in hulle toewysing aan te bly. Maar die belangrikste is dat hulle deelname aan die bediening ’n seën is in die een plek na die ander. Reisende opsieners berig dat hierdie selfopofferende gewone pioniers gehelp het om nuwe groepe te vorm.”

Party Christene het hulle lewe in gevaar gestel om medegelowiges te help (Romeine 16:3, 4). ’n Kringopsiener in ’n oorloggeteisterde deel van Afrika skryf in ’n verslag: “Voordat ons by die laaste padblokkade tussen die gebied wat deur die rebelle beset is en dié onder die regering se beheer, gekom het, het vier van die rebelle se militêre bevelvoerders en hulle lyfwagte om my en my vrou gaan staan en ons gevra wie ons is. Terwyl hulle ons identiteitskaarte nagegaan het, het hulle gesien dat ons van die regering se gebied kom en het hulle agterdogtig geword. Ek is daarvan beskuldig dat ek ’n spioen is. Daarom het hulle besluit om my in ’n put te gooi. Ek het verduidelik wie ons is, en hulle het ons uiteindelik laat gaan.” Hoe dankbaar was die gemeentes tog dat hierdie selfopofferende egpaar daarin geslaag het om hulle te besoek!

Ondanks die probleme waarmee hulle te kampe het, vermeerder die geledere van die voltydse bedienaars wêreldwyd (Jesaja 6:8). Hierdie ywerige werkers waardeer hulle voorreg om Jehovah te dien. Miljoene ander loof Jehovah nou met ’n soortgelyke gees van selfopoffering. En op sy beurt seën hy hulle ryklik (Spreuke 10:22). In die volle vertroue dat Jehovah sal voortgaan om hulle te seën en te onderskraag, weerspieël hierdie harde werkers die gesindheid van die psalmis wat gesing het: “My hulp is van Jehovah.”—Psalm 121:2.

[Voetnoot]

[Lokteks op bladsy 9]

“U volk sal hulle gewillig aanbied op die dag van u krygsmag.”—PSALM 110:3

[Venster op bladsy 8]

JEHOVAH SE TOEGEWYDE KNEGTE IS VIR HOM KOSBAAR

“Word standvastig, onbeweeglik, terwyl julle altyd baie het om in die werk van die Here te doen, in die wete dat julle arbeid in verband met die Here nie tevergeefs is nie.”—1 Korintiërs 15:58.

“God is nie onregverdig sodat hy julle werk sal vergeet en die liefde wat julle vir sy naam getoon het . . . nie.”—Hebreërs 6:10.