Onthou jy?

Het jy dit geniet om onlangse nommers van Die Wagtoring te lees? Wel, kyk of jy die volgende vrae kan beantwoord:

• Hoe sal Jesus “die arme verlos”, soos Psalm 72:12 voorspel het?

Gedurende sy heerskappy sal geregtigheid vir almal geskied, en daar sal geen korrupsie wees nie. Oorlog bring dikwels armoede, maar Christus sal volmaakte vrede bring. Hy het medelye met mense en sal almal verenig, en hy sal toesien dat daar genoeg voedsel vir die mensdom is (Psalm 72:4-16).—5/1, bladsy 7.

• Hoe kan ons as Christene ons “vrymoedigheid van spraak” openbaar? (1 Timoteus 3:13; Filemon 8; Hebreërs 4:16).

Ons kan dit doen deur moedig en ywerig te getuig, ander te onderrig en sonder versuim doeltreffende raad te gee en deur ons hart in gebed voor God uit te stort, met die vertroue dat hy ons sal hoor en daarop sal reageer.—5/15, bladsye 14-16.

• Waarom het sekere natuurlike geslagtelike funksies ’n mens volgens die Wet “onrein” gemaak?

Die wette aangaande onreinheid weens saadstorting, menstruasie en kindergeboorte het goeie higiëne en ’n gesonde lewenswyse bevorder en die heiligheid van bloed sowel as die behoefte aan versoening vir sondes beklemtoon.—6/1, bladsy 31.

• As iemand gelukkig wil wees, waarom sal dit goed wees as hy die boek Psalms ondersoek?

Die skrywers van die Psalms het geweet dat geluk voortspruit uit ’n goeie verhouding met God (Psalm 112:1). Hulle het beklemtoon dat geen menseverhouding, geen besitting en geen prestasie die geluk kan bring wat diegene ervaar wat deel is van “die volk wie se God Jehovah is” nie (Psalm 144:15).—6/15, bladsy 12.

• Watter spesiale verhouding met Jehovah het die eertydse Israeliete gehad?

In 1513 v.G.J. het Jehovah die Israeliete in ’n nuwe verhouding, in ’n verbond, met hom laat kom (Eksodus 19:5, 6; 24:7). Daarna is Israeliete gebore as lede van God se uitverkore nasie, wat aan hom toegewy was. Elke individu moes nietemin ’n persoonlike besluit neem om God te dien.—7/1, bladsye 21-2.

• Waarom moet ons alles “sonder murmurering” doen? (Filippense 2:14).

Daar is baie skriftuurlike voorbeelde wat toon dat murmurering skade onder God se volk aangerig het. Dit is verstandig van ons om ernstig na te dink oor die ondermynende invloed wat dit vandag kan hê. Onvolmaakte mense is geneig om te kla, en ons moet wakker wees om enige teken hiervan te identifiseer en dit te vermy.—7/15, bladsye 16-17.

• Hoe weet ons dat die wysheid wat in Spreuke 8:22-31 beskryf word, nie abstrakte wysheid is nie?

Daardie wysheid was “voortgebring”, of geskep, as die begin van Jehovah se weg. God het nog altyd bestaan en hy was nog altyd wys; sy wysheid is nie geskep nie. Die wysheid van Spreuke 8:22-31 was “’n meesterwerker” naas God; dit is van toepassing op die geesskepsel wat Jesus geword het en wat tydens die skepping ten nouste saam met God gewerk het (Kolossense 1:17; Openbaring 3:14).—8/1, bladsy 31.