“Verheug jou met die vrou van jou jeug”
“Verheug jou met die vrou van jou jeug. Waarom sou jy . . . , my seun, met ’n vreemde vrou in ekstase wees?”—SPREUKE 5:18, 20.
1, 2. Waarom kan daar gesê word dat die romantiese liefde tussen ’n man en sy vrou geseënd is?
DIE Bybel is nie preuts wat geslagsomgang betref nie. In Spreuke 5:18, 19 lees ons: “Laat jou waterbron geseënd wees, en verheug jou met die vrou van jou jeug, ’n lieflike takbokooitjie en ’n bekoorlike bergbokkie. Laat haar borste jou te alle tye bedwelm. Mag jy voortdurend met haar liefde in ekstase wees.”
2 Hier verwys die woord “waterbron” na die bron van seksuele bevrediging. Dit is geseënd omdat die gevoel van romantiese liefde en ekstase wat huweliksmaats geniet, ’n gawe van God is. Maar hierdie intimiteit mag uitsluitlik in die huweliksreëling geniet word. Daarom vra koning Salomo van eertydse Israel, ’n skrywer van Spreuke, hierdie retoriese vraag: “Waarom sou jy . . . , my seun, met ’n vreemde vrou in ekstase wees of die boesem van ’n uitlandse vrou omhels?”—Spreuke 5:20.
3. (a) Wat is die droewige werklikheid vir baie huwelike? (b) Hoe beskou God egbreuk?
3 Op hulle troudag lê ’n man en ’n vrou ’n plegtige gelofte af om mekaar lief te hê en getrou aan mekaar te bly. Nogtans word baie huwelike deur egbreuk verwoes. Trouens, nadat ’n navorser meer as 20 studies ontleed het, het sy tot die slotsom gekom dat “25 persent van vrouens en 44 persent van mans al buite-egtelike geslagsomgang gehad het”. Die apostel Paulus het gesê: “Moenie mislei word nie. Geen hoereerders of afgodedienaars of egbrekers of mans wat vir onnatuurlike doeleindes aangehou word of mans wat by mans lê . . . , sal God se koninkryk beërf nie” (1 Korintiërs 6:9, 10). Dit ly geen twyfel nie. Egbreuk is ’n ernstige sonde in God se oë, en ware aanbidders moet waak teen ontrouheid in die huwelik. Wat sal ons help om ‘die huwelik eerbaar te hou en die huweliksbed sonder verontreiniging’?—Hebreërs 13:4.
Waak teen ’n verraderlike hart
4. Op watter maniere kan ’n getroude Christen onbewustelik by ’n romantiese verhouding buite die huwelik betrokke raak?
4 In vandag se verdorwe sedelike klimaat het baie mense ‘oë wat vol egbreuk is en kan hulle nie ophou sondig nie’ (2 Petrus 2:14). Hulle knoop doelbewus romantiese verhoudings buite die huwelik aan. In sommige lande het baie vroue die arbeidsmark betree, wat ’n vrugbare teelaarde vir ongepaste kantoorromanses skep omdat mans en vroue saam werk. Dan is daar ook Internetkletskamers wat dit vir selfs die skugterste mense maklik maak om intieme vriendskappe op die Internet aan te knoop. Baie getroude mense trap in hierdie strikke sonder dat hulle besef wat met hulle gebeur.
5, 6. Hoe het een Christenvrou verstrik geraak in ’n gevaarlike situasie, en wat leer ons daaruit?
5 Kyk hoe ’n Christen wat ons Marie sal noem, haar in ’n situasie bevind het wat byna daartoe gelei het dat sy haar aan geslagsonsedelikheid skuldig gemaak het. Haar man, wat nie een van Jehovah se Getuies is nie, het baie min liefde teenoor sy gesin betoon. Marie vertel van ’n tyd ’n paar jaar gelede toe sy een van haar man se werksmaats ontmoet het. Die man was baie beleefd, en hy het by ’n latere geleentheid selfs belangstelling in Marie se godsdiensoortuigings getoon. “Hy was so aangenaam, so anders as my man”, sê sy. Kort voor lank het Marie en haar man se werksmaat romantiese gevoelens vir mekaar ontwikkel. “Ek het nie egbreuk gepleeg nie”, het sy geredeneer, “en die man stel belang in die Bybel. Dalk kan ek hom help.”
6 Voordat haar romantiese gevoelens tot egbreuk gelei het, het Marie tot besinning gekom (Galasiërs 5:19-21; Efesiërs 4:19). Haar gewete het haar begin pla, en sy het sake reggestel. Marie se ondervinding lig toe dat ‘die hart verraderliker is as enigiets anders en desperaat is’ (Jeremia 17:9). Die Bybel vermaan ons: “Bewaak jou hart meer as enigiets anders wat bewaar moet word” (Spreuke 4:23). Hoe kan ons dit doen?
‘Die skerpsinnige verberg hom’
7. Watter skriftuurlike raad sal as ’n beskerming dien wanneer ons iemand met huweliksprobleme help?
7 “Wie dink dat hy staan, moet oppas dat hy nie val nie”, het die apostel Paulus geskryf (1 Korintiërs 10:12). En Spreuke 22:3 sê: “Skerpsinnig is die een wat die rampspoed gesien en hom verberg het.” Pleks van selfversekerd te dink: ‘Niks sal met my gebeur nie’, sal dit verstandig wees om situasies vooruit te sien wat tot probleme kan lei. Moet byvoorbeeld nie die enigste vertroueling word van iemand van die teenoorgestelde geslag wat ingewikkelde huweliksprobleme ondervind nie (Spreuke 11:14). Sê vir die persoon dat hy sy huweliksprobleme eerder moet bespreek met sy huweliksmaat, met ’n ryp Christen van dieselfde geslag wat wil hê dat sy huwelik moet slaag, of met die ouer manne (Titus 2:3, 4). Die ouer manne in gemeentes van Jehovah se Getuies stel ’n goeie voorbeeld in hierdie opsig. Wanneer ’n ouer man privaat met ’n Christensuster moet praat, doen hy dit in ’n openbare plek—soos by die Koninkryksaal.
8. Waarteen moet daar gewaak word by die werksplek?
8 Wees versigtig vir situasies by die werksplek en elders wat tot intimiteit kan lei. Om byvoorbeeld ekstra ure in noue kontak met iemand van die teenoorgestelde geslag saam te werk, kan tot versoeking aanleiding gee. As ’n getroude man of vrou moet jy duidelik deur jou spraak en gedrag toon dat jy eenvoudig nie beskikbaar is nie. As iemand wat godvrugtige toegewydheid nastreef, sal jy beslis nie ongepaste aandag wil uitlok deur te flankeer of deur onbeskeie kleredrag en persoonsversorging nie (1 Timoteus 4:8; 6:11; 1 Petrus 3:3, 4). As jy foto’s van jou huweliksmaat en jou kinders by die werk het, sal dit vir jou en vir ander ’n sigbare herinnering wees dat hulle jou prioriteit is. Wees vasbeslote om nooit romantiese toenadering aan te moedig—of selfs te duld nie.—Job 31:1.
“Geniet die lewe met die vrou wat jy liefhet”
9. Watter reeks gebeure kan maak dat ’n nuwe romantiese verhouding aanloklik lyk?
9 Om die hart te bewaak, verg meer as om net gevaarlike situasies te vermy. Romantiese gevoelens vir iemand buite die huwelik kan ’n aanduiding wees dat ’n man en ’n vrou nie mekaar se behoeftes in ag neem nie. Dit kan wees dat ’n vrou voortdurend geïgnoreer word of dat ’n man gedurig gekritiseer word. Skielik is daar iemand anders—hetsy by die werk of selfs in die Christengemeente—wat blykbaar juis dié eienskappe besit wat jou maat nie het nie. Kort voor lank ontstaan daar ’n band, en die nuwe verhouding word byna onweerstaanbaar aanloklik. Hierdie subtiele reeks gebeure bevestig die waarheid van wat die Bybel sê: “Elkeen word beproef deurdat hy deur sy eie begeerte meegesleep en verlok word.”—Jakobus 1:14.
10. Hoe kan ’n man en vrou hulle verhouding versterk?
10 Mans en vrouens moenie hulle begeertes—hetsy na liefde, vriendskap of ondersteuning tydens ’n moeilike tyd—buite die huwelik probeer bevredig nie, maar hulle moet eerder daaraan werk om ’n liefdevolle verhouding met hulle maat op te bou. Bring dus tyd saam deur en kom nader aan mekaar. Dink aan wat jou verlief laat raak het op jou maat. Probeer weer die warm gevoel terugkry wat jy gehad het vir die persoon wat jou huweliksmaat geword het. Dink aan die aangename tye wat julle saam geniet het. Bid tot God oor die saak. Die psalmis Dawid het Jehovah gesmeek: “Skep in my ook ’n suiwer hart, o God, en plaas in my ’n nuwe, standvastige gees” (Psalm 51:10). Wees vasbeslote om ‘die lewe te geniet met die vrou wat jy liefhet, al die dae van jou lewe wat God jou onder die son gegee het’.—Prediker 9:9.
11. Watter rol speel kennis, wysheid en onderskeidingsvermoë daarin om die huweliksband te versterk?
11 Nog iets wat nie oor die hoof gesien moet word nie, is die rol wat kennis, wysheid en onderskeidingsvermoë daarin speel om die huweliksband te versterk. Spreuke 24:3, 4 sê: “Deur wysheid sal ’n huisgesin opgebou word, en deur onderskeidingsvermoë sal dit stewig gevestig word. En deur kennis sal die binnekamers met allerhande kosbare en lieflike dinge van waarde gevul word.” Onder die kosbare dinge wat ’n gelukkige huis vul, is eienskappe soos liefde, lojaliteit, godvrugtige vrees en geloof. Kennis van God is nodig om hierdie eienskappe aan te kweek. Egpare moet dus ernstige studente van die Bybel wees. En hoe belangrik is wysheid en onderskeidingsvermoë? Om daaglikse probleme met welslae die hoof te bied, verg wysheid, die vermoë om skriftuurlike kennis toe te pas. Iemand met onderskeidingsvermoë is in staat om die gedagtes en gevoelens van sy of haar maat te verstaan (Spreuke 20:5). “My seun, skenk tog aandag aan my wysheid”, sê Jehovah deur middel van Salomo. “Neig jou ore tot my onderskeidingsvermoë.”—Spreuke 5:1.
Wanneer daar “verdrukking” is
12. Waarom is dit nie verbasend dat egpare probleme ondervind nie?
12 Geen huwelik is volmaak nie. Die Bybel sê selfs dat mans en vrouens “verdrukking in hulle vlees” sal hê (1 Korintiërs 7:28). Sorge, siekte, vervolging en ander faktore kan druk op ’n huwelik plaas. Wanneer daar egter probleme ontstaan, moet julle saam na oplossings soek as lojale huweliksmaats wat Jehovah wil behaag.
13. Op watter gebiede kan ’n man en vrou selfondersoek doen?
13 Gestel die huwelik is onder druk weens die manier waarop die man en vrou mekaar behandel. Dit verg inspanning om ’n oplossing te vind. Byvoorbeeld, dalk het die gewoonte om onvriendelike spraak te gebruik in hulle huwelik ingesluip en word dit nou daardeur gekenmerk (Spreuke 12:18). Soos in die vorige artikel bespreek is, kan dit vernietigende gevolge hê. ’n Bybelspreuk sê: “Dit is beter om in ’n woeste land te woon as saam met ’n twisgierige vrou en ergernis daarby” (Spreuke 21:19). As jy ’n vrou in so ’n huwelik is, moet jy jou afvra: ‘Maak my gesindheid dit vir my man moeilik om in my geselskap te wees?’ Die Bybel sê vir mans: “Hou aan om julle vrouens lief te hê en moenie vir hulle bitter kwaad wees nie” (Kolossense 3:19). As jy ’n man is, moet jy jou afvra: ‘Is my houding kil, sodat my vrou in die versoeking kan kom om elders troos te soek?’ Daar is natuurlik geen verskoning vir geslagsonsedelikheid nie. Maar die feit dat so ’n tragedie moontlik is, is goeie rede om probleme openhartig te bespreek.
14, 15. Waarom is dit nie die antwoord op huweliksprobleme om troos buite die huwelik te soek nie?
14 Om in ’n romanse buite die huwelik troos te soek, is nie die antwoord op huweliksprobleme nie. Waartoe kan so ’n verhouding lei? Tot ’n nuwe en beter huwelik? Sommige dink dalk so. ‘Hierdie persoon’, redeneer hulle, ‘het immers juis die eienskappe waarna ek in ’n huweliksmaat soek.’ Maar so ’n redenasie is vals, want enigiemand wat bereid is om sy of haar maat te verlaat—of wat jou aanmoedig om joune te verlaat—toon growwe minagting vir die heiligheid van die huwelik. Dit is onredelik om te verwag dat daardie verhouding tot ’n beter huwelik sal lei.
15 Marie, wat vroeër gemeld is, het ernstig nagedink oor die gevolge van haar optrede, soos die moontlikheid dat sy God se guns kan verloor en ook kan veroorsaak dat iemand anders dit verloor (Galasiërs 6:7). “Toe ek my gevoelens vir my man se werksmaat begin ontleed het”, sê sy, “het ek besef dat ek besig is om enige kans wat hierdie man dalk het om tot ’n kennis van die waarheid te kom, te verydel. Sonde sal almal wat betrokke is, erg skaad en ander laat struikel!”—2 Korintiërs 6:3.
Die kragtigste aansporing
16. Wat is van die gevolge van sedelike onreinheid?
16 Die Bybel waarsku: “Soos ’n heuningkoek bly die lippe van ’n vreemde vrou drup, en haar verhemelte is gladder as olie. Maar wat sy veroorsaak, is so bitter soos als; dit is so skerp soos ’n tweesnydende swaard” (Spreuke 5:3, 4). Die gevolge van sedelike onreinheid is pynlik en kan dodelik wees. Dit sluit ’n gekwelde gewete in, seksueel oordraagbare siektes, asook die emosionele verwoesting wat dit vir die huweliksmaat van die ontroue individu veroorsaak. Dit is genoeg rede om nie ’n weg in te slaan wat tot ontrouheid in die huwelik kan lei nie.
17. Wat is die kragtigste rede om in die huwelik getrou te bly?
17 Die vernaamste rede waarom ontrouheid in die huwelik verkeerd is, is dat Jehovah, die Insteller van die huwelik en die Skenker van seksuele vermoëns, dit veroordeel. Deur die profeet Maleagi sê Hy: “Ek sal nader kom na julle toe vir die oordeel, en ek sal ’n haastige getuie word teen . . . die egbrekers” (Maleagi 3:5). Spreuke 5:21 sê aangaande dit wat Jehovah sien: “Die weë van die mens is voor die oë van Jehovah, en hy beskou al sy spore.” Ja, “alles lê naak en oop en bloot voor die oë van hom aan wie ons rekenskap moet gee” (Hebreërs 4:13). Die kragtigste aansporing om in die huwelik getrou te bly, is dus die besef dat enige daad van seksuele onreinheid ons verhouding met Jehovah skaad, ongeag hoe goed dit geheim gehou word en hoe gering die fisiese of sosiale gevolge dalk lyk.
18, 19. Wat leer ons uit Josef se ondervinding met Potifar se vrou?
18 Die voorbeeld van Josef, die seun van die aartsvader Jakob, toon dat die begeerte om in ’n vreedsame verhouding met God te bly, ’n kragtige aansporing is. Omdat Josef guns gevind het in die oë van Potifar, ’n hofbeampte van Farao, het hy ’n bevoorregte posisie in Potifar se huishouding verkry. Josef was ook “mooi van gestalte en mooi in voorkoms”, ’n feit wat nie onopgemerk by Potifar se vrou verbygegaan het nie. Sy het Josef elke dag probeer verlei, maar haar pogings was onsuksesvol. Waarom kon Josef al haar toenaderings weerstaan? Die Bybel sê vir ons: “Hy het geweier en vir sy heer se vrou gesê: ‘Kyk, my heer . . . het niks van my teruggehou nie, behalwe u, omdat u sy vrou is. Hoe kan ek dan hierdie groot kwaad doen en in werklikheid teen God sondig?’”—Genesis 39:1-12.
19 Die ongetroude Josef het sedelik rein gebly deur te weier om by ’n ander man se vrou betrokke te raak. “Drink water uit jou eie reënbak”, sê Spreuke 5:15 vir getroude mans, “en stroompies uit jou eie put.” Waak daarteen om selfs onbewustelik romantiese gevoelens vir iemand buite die huwelik te ontwikkel. Span jou in om die band van liefde in jou eie huwelik te versterk, en werk hard om enige huweliksprobleme waarvoor julle te staan kom, op te los. Ja, “verheug jou met die vrou van jou jeug”.—Spreuke 5:18.
Wat het jy geleer?
• Hoe kan ’n Christen onbewustelik in ’n romantiese verhouding verstrik raak?
• Watter voorsorg kan ’n mens tref om nie romantiese gevoelens vir iemand buite die huwelik te ontwikkel nie?
• Wat moet ’n egpaar doen wanneer hulle probleme ondervind?
• Wat is die kragtigste aansporing om in die huwelik getrou te bly?
[Prent op bladsy 26]
Ongelukkig kan die werksplek ’n vrugbare teelaarde vir ’n ongepaste kantoorromanse word
[Prent op bladsy 28]
‘Deur kennis sal die binnekamers met lieflike dinge gevul word’