Is jy gereed om jou geloof te verdedig?
WAS jy al ooit in ’n situasie waar jy gevoel het dat jy jou geloof eenvoudig móét verdedig? Kyk na wat met Susana, ’n 16-jarige suster in Paraguay, gebeur het. Tydens ’n etiekklas op hoërskool is daar gesê dat Jehovah se Getuies nie die “Ou Testament”, Jesus Christus of Maria aanvaar nie. Daar is ook beweer dat die Getuies fanatici is wat eerder sal sterf as om mediese sorg te aanvaar. Hoe sou jy gereageer het?
Susana het tot Jehovah gebid en haar hand opgesteek. Omdat die periode amper verby was, het sy haar onderwyseres gevra of sy ’n aanbieding mag doen oor haar geloofsoortuigings as een van Jehovah se Getuies. Die onderwyseres het geredelik ingestem. Susana het gedurende die volgende twee weke vir die bespreking voorberei met behulp van die brosjure Jehovah se Getuies—Wie is hulle? Wat glo hulle?
Die dag vir die aanbieding het aangebreek. Susana het verduidelik waar die naam Jehovah se Getuies vandaan kom. Sy het ook verduidelik wat ons hoop vir die toekoms is en waarom ons nie bloedoortappings aanvaar nie. Toe het sy die klas genooi om vrae te vra. Die meeste van haar klasmaats het hulle hand opgesteek. Die onderwyseres was beïndruk met die jong meisie se skriftuurlike antwoorde op die vrae.
Een van die kinders het gesê: “Ek was eenkeer in ’n Koninkryksaal, en daar was nie ’n enkele beeld nie.” Die onderwyseres wou weet waarom nie. Susana het Psalm 115:4-8 en Eksodus 20:4 gelees. Die onderwyseres het verbaas gesê: “Waarom is ons kerke dan so vol beelde as die Bybel dit veroordeel?”
Die vraag-en-antwoord-bespreking het 40 minute geduur. Toe Susana die klas vra of hulle die video No Blood—Medicine Meets the Challenge wil sien, het almal ja gesê. Die onderwyseres het dus nog ’n sessie vir die volgende dag gereël. Ná die video het Susana verduidelik watter alternatiewe behandelings vir party van Jehovah se Getuies aanvaarbaar is. Hierop het die onderwyseres gesê: “Ek het nie geweet dat daar so baie alternatiewe behandelings is nie; ek was ook nie bewus van die voordele van bloedlose behandeling nie. Is hierdie behandelings slegs vir Jehovah se Getuies?” Toe sy hoor dat dit nie die geval is nie, het die onderwyseres gesê: “Die volgende keer wanneer Jehovah se Getuies na my deur toe kom, gaan ek met hulle praat.”
Die bespreking van 20 minute wat Susana oorspronklik voorberei het, het drie uur geduur. ’n Week later het ander skoliere ’n aanbieding oor hulle geloofsoortuigings as kerklidmate gedoen. Aan die einde daarvan is baie vrae gevra, maar die betrokke skoliere kon nie hulle geloof verdedig nie. Die onderwyseres het hulle gevra: “Waarom kan julle nie julle geloof verdedig soos julle klasmaat wat een van Jehovah se Getuies is nie?”
Die antwoord was: “Hulle bestudeer werklik die Bybel. Ons nie.”
Die onderwyseres het vir Susana gesê: “Ja, julle bestudeer werklik die Bybel en span julle in om te doen wat dit sê. Julle moet daarvoor geprys word.”
Susana kon aanvanklik stilgebly het. Maar deur vir haar geloof op te kom, het sy die goeie voorbeeld gevolg van ’n onbekende Israelitiese meisietjie wat deur die Siriërs gevange geneem is. Hierdie meisie het beland in die huishouding van die Siriese generaal Naäman, wat ’n afstootlike velsiekte gehad het. Sy het nie stilgebly nie, maar vir haar meesteres gesê: “Was my heer tog maar voor die profeet wat in Samaria is! Dan sou hy hom van sy melaatsheid genees.” Die meisie kon nie anders as om van die ware God te getuig nie. Dit het daartoe gelei dat haar eienaar, Naäman, ’n aanbidder van Jehovah geword het.—2 Kon. 5:3, 17.
Net so kon Susana nie anders as om van Jehovah en sy volk te getuig nie. Deur die inisiatief te neem om haar geloof te verdedig toe haar geloofsoortuigings bevraagteken is, was Susana gehoorsaam aan die skriftuurlike opdrag: “Heilig die Christus as Here in julle harte, en wees altyd gereed om julle te verdedig voor elkeen wat van julle ’n rede vir die hoop in julle eis, maar doen dit met sagmoedigheid en diep respek” (1 Pet. 3:15). Is jy gereed om jou geloof te verdedig en die inisiatief te neem wanneer die geleentheid hom voordoen?
[Prent op bladsy 17]
Hierdie hulpmiddele kan jou help om jou geloof te verdedig