Is dit verkeerd om God se naam te gebruik?

IN die Hebreeuse Geskrifte, wat dikwels die “Ou Testament” genoem word, kom God se naam byna 7 000 keer voor in die vorm יהוה (wat van regs na links gelees word). Dit wil sê, God se naam word voorgestel deur vier Hebreeuse letters, Jod, He, Wau en He, wat oor die algemeen as JHWH getranslitereer word.

In die oudheid het die bygelowige idee onder die Jode ontstaan dat dit verkeerd is om God se naam te gebruik. Gevolglik het hulle geweier om dit uit te spreek, en in hulle geskrifte het hulle dit met ander uitdrukkings begin vervang. Maar baie Bybelvertalers het die naam as “Jahweh”, of “Jehovah”, weergegee. Een van die vertalings wat dit doen, is die Katolieke Jerusalem Bible. Volgens hierdie vertaling antwoord God Moses se vraag oor wat hy moet sê as die Israeliete hom vra wie hom gestuur het, met die woorde: “Jy moet vir die kinders van Israel sê: ‘Jahweh, die God van julle vaders, die God van Abraham, die God van Isak en die God van Jakob, het my na julle toe gestuur.’ Dit is my naam vir altyd; by hierdie naam sal ek in alle komende geslagte aangeroep word.”—Eksodus 3:15.

Terwyl Jesus gebid het, het hy oor sy gebruik van God se naam gesê: “Ek het u naam aan hulle bekend gemaak en sal aanhou om dit bekend te maak.” En in die gebed wat algemeen as die Onse Vader bekend staan, het Jesus gesê: “Onse Vader in die hemel, laat u naam heilig geag word.”—Johannes 17:26; Matteus 6:9, JB.

Dit sal jou dan miskien verbaas om te hoor dat pous Benediktus XVI in sy onlangse boek Jesus of Nazareth die volgende oor die gebruik van God se naam gesê het: “Die Israeliete het . . . heel tereg geweier om hierdie naam wat God aan homself gegee het, wat deur die woord JHWH weergegee word, uit te spreek sodat hulle dit nie tot die vlak van die name van heidense gode sou verlaag nie. Om dieselfde rede was dit verkeerd van onlangse Bybelvertalings om hierdie naam—wat Israel altyd as geheimsinnig en onuitspreeklik beskou het—uit te skryf asof dit ’n naam soos enige ander naam is.”

Wat dink jy? Is dit reg of verkeerd om God se naam te gebruik? As Jehovah self sê: “Dit is my naam vir altyd; by hierdie naam sal ek in alle komende geslagte aangeroep word”, het enigiemand dan die reg om hom te weerspreek?

[Prent op bladsy 30]

Jesus het God se naam in gebed gebruik