Ons lesers vra

Sal die Aarde behoue bly?

Ons planeet Aarde sal nie deur enige ramp vernietig word nie. Waarom kan ons daarvan seker wees? Want God belowe dat die aarde ‘tot onbepaalde tyd of tot in ewigheid nie sal wankel nie’ (Psalm 104:5). “Die een geslag gaan, en die ander geslag kom”, sê die Bybel, maar “die aarde bly vir ewig staan”.—Prediker 1:4, Ou Afrikaanse Bybelvertaling.

In Psalm 104:5 word die feit dat die aarde behoue sal bly, beklemtoon deur twee woorde wat in die oorspronklike Hebreeus van daardie teks gebruik word—ʽoh·lamʹ vir “onbepaalde tyd” en ʽadh vir “ewigheid”. ʽOh·lamʹ kan vertaal word met “baie jare” of “ewigdurend”. Volgens Harkavy se Students’ Hebrew and Chaldee Dictionary beteken ʽadh “duur, ewigdurendheid, vir altyd”. Hierdie twee Hebreeuse woorde toon dat die voortbestaan van die aarde absoluut seker is. Kyk na nog drie Bybelse redes waarom ons kan glo dat die aarde vir ewig sal bestaan.

Eerstens, God het die aarde gemaak om deur mense bewoon te word—om ’n welige, aardwye paradys van genot te wees, nie ’n woesteny nie. Jesaja 45:18 beskryf Jehovah as “die Skepper van die hemele, Hy, die ware God, die Formeerder van die aarde en die Maker daarvan, Hy, wat dit stewig gevestig het, wat dit nie verniet geskep het nie, wat dit gevorm het om bewoon te word”.

Tweedens, God het lank gelede belowe dat mense wat kies om hom te gehoorsaam, vir ewig in vrede op hierdie aarde sal woon. Miga 4:4 belowe: “Hulle sal elkeen onder sy wingerdstok en onder sy vyeboom sit, en daar sal niemand wees wat hulle laat bewe nie; want die mond van Jehovah van die leërs het dit gespreek.” Volgens God se voorneme moet die aarde dus vir ewig as die mensdom se tuiste bly bestaan, anders sou God se beloftes leeg wees.—Psalm 119:90; Jesaja 55:11; 1 Johannes 2:17.

Derdens, God het die mens die verantwoordelikheid gegee om na die aarde om te sien. “Wat die hemel betref, aan Jehovah behoort die hemel, maar die aarde het hy aan die mensekinders gegee”, sê God se Woord (Psalm 115:16). Kan jy jou voorstel dat ’n liefdevolle vader ’n pragtige geskenk aan sy kind gee en dan omdraai en dit vernietig? Natuurlik nie! Net so sal Jehovah nooit so iets aan die aarde en die bewoners daarvan doen nie, want “God is liefde”.—1 Johannes 4:8.

Jesus Christus het hierdie versekering aangaande sy Vader se woorde gegee: “U woord is die waarheid” (Johannes 17:17). En God, wat nie kan lieg nie, belowe: “Die regverdiges sal die aarde besit, en hulle sal vir ewig daarop woon.”—Psalm 37:29; Titus 1:2.

[Foto-erkenning op bladsy 31]

Aardbol: Based on NASA photo