Kom nader aan God

“Die God van alle vertroosting”

2 Korintiërs 1:3, 4

BAIE dinge in die lewe—lyding, teleurstelling, eensaamheid—kan droefheid, selfs wanhoop, veroorsaak. Gedurende sulke tye wonder jy dalk: ‘Tot wie kan ek my wend vir hulp?’ Die woorde van die apostel Paulus in 2 Korintiërs 1:3, 4 wys op ’n onfeilbare bron van vertroosting—Jehovah God.

In vers 3 word God “die Vader van tere barmhartighede” genoem. Wat beteken dit? Die Griekse woord wat met “tere barmhartighede” vertaal word, kan die gedagte oordra van medelye met die lyding van ander.a Een Bybelnaslaanwerk sê dat hierdie woord weergegee kan word met “voel innig jammer” of “gee baie om”. God se “tere barmhartighede” beweeg hom om op te tree. Kennis van hierdie aspek van God se persoonlikheid maak dat ons nader aan hom wil kom, nie waar nie?

Paulus verwys ook na Jehovah as “die God van alle vertroosting”. Hier gebruik Paulus ’n woord wat blykbaar “die gedagte om ’n bekommerde of hartseer persoon te vertroos en die gedagte om daadwerklike hulp of aanmoediging te gee”, insluit. The Interpreter’s Bible verduidelik: “Ons vertroos iemand wat ly wanneer ons hom die moed gee om sy pyn te verduur.”

Jy vra miskien: ‘Hoe vertroos God ons en gee hy ons die moed om ons pyn te verdra?’ Hy doen dit hoofsaaklik deur sy Woord, die Bybel, en deur die gawe van gebed. Paulus sê vir ons dat God Sy Woord uit liefde vir ons gegee het sodat ons “deur die vertroosting van die Skrif hoop kan hê”. Daarbenewens kan ons deur middel van hartgrondige gebede “die vrede van God wat alle denke te bowe gaan”, ondervind.—Romeine 15:4; Filippense 4:7.

In watter mate vertroos Jehovah sy knegte? Paulus sê dat God “ons in al ons verdrukking vertroos” (2 Korintiërs 1:4). Ongeag watter druk, benoudheid of lyding ons ervaar, God kan ons die nodige moed en krag gee om staande te bly. Is dit nie gerusstellend nie?

Die vertroosting wat God gee, eindig nie by die een wat dit ontvang nie. Paulus sê verder dat God ons vertroos sodat “ons dié wat in enige soort verdrukking is, kan vertroos deur die vertroosting waarmee ons self deur God vertroos word”. Omdat ons in ons verdrukking vertroosting ontvang het, help dit ons om empatie met ander te hê en beweeg dit ons om ’n helpende hand te bied aan dié wat dit nodig het.

As “die God van alle vertroosting” laat Jehovah ons probleme of pyn nie noodwendig verdwyn nie. Maar ons kan hiervan seker wees: As ons ons tot hom wend vir vertroosting, kan hy ons versterk om enige hartseer of probleme wat die lewe bring, die hoof te bied. So ’n medelydende God verdien beslis ons aanbidding en lof.

[Voetnoot]