Wie weet wat die toekoms inhou?

‘Ek is God, wat van die begin af die uiteinde verkondig, en van ouds af die dinge wat nog nie gedoen is nie.’—Jesaja 46:9, 10.

IN HIERDIE onbestendige tye bestudeer politieke, finansiële en maatskaplike ontleders die geskiedenis sowel as moderne tendense in ’n poging om die toekoms te voorspel. Ander, wat desperaat is om te weet wat die toekoms vir hulle persoonlik inhou, wend hulle tot astrologie of spiritisme vir antwoorde. Sulke mense is dikwels teleurgesteld met die resultate. Is dit heeltemal onmoontlik om te weet wat met hierdie wêreld, ons gesin en ons as individue gaan gebeur? Kan enigiemand werklik vooruitsien wat die toekoms inhou?

In sy woorde aan die profeet Jesaja, wat hierbo aangehaal word, het die almagtige God, Jehovah, sy eie vermoë beskryf om die toekoms te voorspel. Deur middel van Jesaja het God voorspel dat die eertydse Israeliete uit Babiloniese gevangenskap vrygelaat sou word en sou terugkeer om Jerusalem en die tempel te herbou. Hoe akkuraat was hierdie profesie? Jesaja het ongeveer 200 jaar vooruit die naam van die toekomstige veroweraar van Babilon, Kores, korrek voorspel. Wat meer is, Jesaja het Kores se strategie akkuraat beskryf—dat hy die Eufraatrivier, wat die stad beskerm het, sou wegkeer. Hy het selfs vooruitgesien dat Kores die enorme tweevleueldeure in die stadsmuur weens nalatigheid oopgelaat sou vind, wat tot Kores se maklike oorwinning bygedra het.—Jesaja 44:24–45:7.

In teenstelling met God is dit vir die mens onmoontlik om in die toekoms in te kyk. “Moet jou nie op die dag van môre beroem nie”, het die wyse koning Salomo geskryf, “want jy weet nie wat ’n dag sal oplewer nie” (Spreuke 27:1). Daardie waarneming geld nog steeds. Geen mens kan eers sy eie toekoms vooruitsien nie. Wat maak God anders? Hy het ’n volmaakte begrip van alles wat hy geskep het, insluitende die aard en neiging van die mens. Wanneer hy kies om dit te doen, kan God vooruitsien presies hoe individue en hele nasies sal optree. Daarbenewens het hy die onbeperkte vermoë om die uiteinde van gebeure te beheer. Wanneer hy deur middel van sy profete voorspel dat iets sal gebeur, word hy die Een “wat die woord van sy kneg laat bewaarheid word, en wat die raad van sy boodskappers ten volle uitvoer” (Jesaja 44:26). Slegs Jehovah God kan hierdie stelling in alle eerlikheid maak.

Jesaja het meer as 700 jaar voor Jesus, die Messias, gelewe. Tog het Jesaja die koms van die Messias voorspel. Maar veral sedert die 18de eeu het kritici van die Bybel die egtheid van die boek Jesaja betwis. Hulle het beweer dat Jesaja se profesieë nie werklik die toekoms voorspel het nie, maar dat dit ná die gebeure geskryf is deur ’n latere skrywer wat bloot opgeteken het wat reeds gebeur het. Is dit waar? In 1947 is ’n afskrif van die boek Jesaja, tesame met ander antieke boekrolle, in ’n grot naby die Dooie See ontdek. Geleerdes het vasgestel dat hierdie afskrif meer as honderd jaar voor die geboorte van die voorspelde Messias, of Christus, gemaak is. Ja, die Bybel het die toekoms voorspel!

Jesaja en ander Bybelskrywers sou toekomstige gebeure nie bloot op grond van hulle eie insig kon voorspel het nie. Hulle het eerder “uit God gespreek namate hulle deur heilige gees meegevoer is” (2 Petrus 1:21). In die volgende artikels sal ons die aandag vestig op ’n paar besonderhede van Jesus se lewe wat deur Jesaja voorspel is. Dan sal ons gebeure bespreek wat Jesus en sy dissipels vir ons dag en daarna voorspel het.