Ons lesers vra
Hoe kon Adam gesondig het as hy volmaak was?
Dit was moontlik vir Adam om te sondig omdat God hom met wilsvryheid geskep het. Hierdie gawe bots glad nie met die feit dat Adam volmaak was nie. Om die waarheid te sê, net God is volmaak in die absolute sin (Deuteronomium 32:3, 4; Psalm 18:30; Markus 10:18). Volmaaktheid in enigiemand of enigiets anders is beperk. Byvoorbeeld, ’n mes is dalk volmaak om vleis mee te sny; maar sou jy dit gebruik om sop mee te eet? Iets is alleenlik volmaak in verhouding tot sy doel.
Met watter doel het God Adam dan geskep? God se doel was om deur middel van Adam ’n intelligente menseras voort te bring wat wilsvryheid besit. Dié wat hulle liefde vir God en sy weë wou ontwikkel, sou dit toon deur te kies om sy wette te gehoorsaam. Gehoorsaamheid is dus nie in die mens se verstand geprogrammeer nie, maar sou vrywillig uit sy hart voortspruit (Deuteronomium 10:12, 13; 30:19, 20). As Adam dus nie die vermoë gehad het om ongehoorsaamheid te kies nie, sou hy onvolkome—onvolmaak—gewees het. Hoe het Adam sy wilsvryheid gebruik? Die Bybelverslag toon dat Adam gekies het om sy vrou se weg van ongehoorsaamheid aan God se wet in verband met “die boom van die kennis van goed en kwaad” te volg.—Genesis 2:17; 3:1-6.
Het God Adam dan met ’n morele swakheid geskep sodat hy nie die vermoë gehad het om goeie besluite te neem of versoeking te weerstaan nie? Voordat Adam ongehoorsaam was, het Jehovah God al sy aardse skeppingswerke, insluitende die eerste mensepaar, ondersoek en gesien dat dit “baie goed” was (Genesis 1:31). Toe Adam gesondig het, was dit dus nie vir sy Skepper nodig om die een of ander ontwerpfout reg te stel nie, maar hy kon Adam tereg vir sy sonde verantwoordelik hou (Genesis 3:17-19). Adam het nie toegelaat dat liefde vir God en vir wat reg is, hom beweeg om God bo alles te gehoorsaam nie.
Dink ook daaraan dat Jesus, toe hy op die aarde was, ’n volmaakte man soos Adam was. Maar anders as ander nakomelinge van Adam, is Jesus deur middel van die heilige gees verwek en het hy dus geen swakheid ten opsigte van versoeking geërf nie (Lukas 1:30, 31; 2:21; 3:23, 38). Jesus het uit vrye wil lojaal aan sy Vader gebly ten spyte van die hewigste druk. Adam het sy eie wilsvryheid uitgeoefen, en daarom was hy persoonlik verantwoordelik vir sy ongehoorsaamheid aan Jehovah se gebod.
Maar waarom het Adam gekies om aan God ongehoorsaam te wees? Het hy gedink dat hy sy situasie op die een of ander manier sou verbeter? Nee, want die apostel Paulus het geskryf dat “Adam nie bedrieg [is] nie” (1 Timoteus 2:14). Maar Adam het besluit om toe te gee aan die wense van sy vrou, wat reeds gekies het om van die verbode vrug te eet. Sy begeerte om haar tevrede te stel, was groter as sy begeerte om aan sy Skepper gehoorsaam te wees. Toe Adam die verbode vrug aangebied is, kon hy seer sekerlik eers gepeins het oor die uitwerking wat ongehoorsaamheid op sy verhouding met God sou hê. Omdat Adam nie ’n innige, onverbreeklike liefde vir God gehad het nie, was dit vir hom moeilik om druk, insluitende druk van sy vrou, te weerstaan.
Adam het gesondig voordat hy kinders voortgebring het, en daarom is al sy nakomelinge onvolmaak gebore. Nietemin het ons, soos Adam, die gawe van wilsvryheid. Mag ons kies om met waardering te peins oor Jehovah se goedheid en ’n innige liefde opbou vir God, wat ons gehoorsaamheid en aanbidding verdien.—Psalm 63:6; Matteus 22:36, 37.