Het jy geweet?

Watter soort werk sou Jesus as ’n timmerman gedoen het?

Jesus se pleegvader was ’n timmerman. Jesus het dieselfde ambag geleer. Toe hy op die ouderdom van “omtrent dertig” met sy bediening begin het, is hy nie net as “die timmerman se seun” beskou nie, maar ook as ’n timmerman in eie reg.—Lukas 3:23; Matteus 13:55; Markus 6:3.

In Jesus se tuisdorp sou daar ’n aanvraag gewees het na plaasgereedskap soos ploeë en jukke, wat hoofsaaklik van hout gemaak was. Ander produkte wat ’n timmerman gereeld sou gemaak het, was meubelstukke—tafels, stoele, bankies en kiste—asook items soos deure, vensters, houtslotte en balke. ’n Timmerman se werk het dus ook bouwerk behels.

Johannes die Doper het in ’n illustrasie melding gemaak van die byl, ’n stuk gereedskap wat Jesus en ander timmermanne waarskynlik gebruik het om bome mee af te kap. Daarna het hulle óf op die plek balke van die hout gemaak óf die hout na hulle werkswinkels geneem. Hierdie deel van die werk het ongetwyfeld baie fisiese krag vereis (Matteus 3:10). Jesaja meld ook ander gereedskap wat in sy dag deur timmermanne gebruik is: “Wat die houtsnyer betref, hy het die meetsnoer gespan; hy trek dit af met rooi kryt; hy bewerk dit met ’n houtskraper; en met ’n passer trek hy dit af” (Jesaja 44:13). Argeologiese vondste bevestig dat metaalsae, kliphamers en bronsspykers in Bybeltye gebruik is (Eksodus 21:6; Jesaja 10:15; Jeremia 10:4). Dit is redelik om aan te neem dat Jesus sulke gereedskap gebruik het.

Wie was “die bankiers” wat Jesus in een van sy illustrasies genoem het, en hoe het hulle te werk gegaan?

Jesus het vertel van ’n heer wat ’n onproduktiewe slaaf berispe het, deur te sê: “Jy [moes] my silwergeld by die bankiers gedeponeer het, en by my aankoms sou ek wat myne is, met rente ontvang het.”—Matteus 25:27.

Groot finansiële instansies soos ons hulle vandag ken, het nie in Jesus se tyd bestaan nie. Maar daar was al lank geldskieters wat rente betaal het op geld wat by hulle gedeponeer is en geld teen ’n hoër rentekoers uitgeleen het. Volgens The Anchor Bible Dictionary was rentedraende lenings teen die vierde eeu v.G.J. algemeen in Griekeland. En gedurende die tydperk van vrede wat deur die Romeine teweeggebring is, het jaarlikse rentekoerse vir krediet in die Romeinse Ryk gewissel tussen 4 en 6 persent.

Die Mosaïese Wet het verbied dat geld teen rente aan behoeftige Israeliete geleen word (Eksodus 22:25). Hierdie wet was blykbaar hoofsaaklik van toepassing op lenings aan die armes. Soos Jesus se illustrasie toon, was dit egter nie ongewoon om rente te ontvang op geld wat by geldskieters, of “bankiers”, gedeponeer is nie. Soos gewoonlik het Jesus dus iets gebruik waarmee sy toehoorders bekend was.