Beskerm jou teen bose geeste

JAMES is in ’n afgeleë deel van die eiland Malaita, in die Salomonseilande, grootgemaak. Hy is van jongs af geleer om die geeste te eer. “Ek het dit nooit oorweeg om die geeste te vra om ander mense leed aan te doen nie”, sê hy, “maar ek het gedink dat ’n mens nie ’n gelukkige lewe kan hê as jy nie rarafono [tradisionele gebruike om hulp van die geeste af te smeek] beoefen om jou teen leed te beskerm nie.”

Soos mense in talle ander wêrelddele, glo die bewoners van die Salomonseilande dat geeste ’n mens óf kan help óf kan leed aandoen. Trouens, baie Melanesiërs beskou die sogenaamde welwillende geeste met geneentheid, nie met vrees nie.

Geloof in die bedrywighede van geeste word op ’n verskeidenheid maniere geopenbaar. Byvoorbeeld, toe James jonk was, het vroue in sy dorpie hulle kinders haastig in die huis ingeneem wanneer hulle die roep van die korokoro gehoor het. Waarom? Hulle het geglo dat die voël se roep beteken dat iemand weldra leed aangedoen sou word.

Party dorpenaars plaas ’n spesiale wit klip bokant die ingang van hulle huis. James het dit gedoen omdat hy geglo het dat die klip hom teen boosaardige geeste sal beskerm. En by die werk het James enige oorskiet van sy middagete in ’n sak gesit sodat hy dit later kon weggooi. Sy grootste bekommernis was dat ’n toordokter die oorskietkos sou vind en dit sou gebruik om hom te toor sodat hy siek sou word.

Hoewel hierdie spesifieke gebruike dalk nie algemeen is waar jy woon nie, het jy dalk al, soos James, gevoel dat jy tradisionele gebruike moet volg om jou teen bose geeste te beskerm. Jy glo moontlik dat jou welsyn daarvan afhang dat jy hierdie gebruike beoefen.

As jy die Bybel respekteer, wil jy ongetwyfeld weet wat dit in antwoord op die volgende vrae sê: (1) Watter leed kan bose geeste jou aandoen? (2) Kan die beoefening van sekere tradisionele gebruike jou onder die invloed van die demone laat kom? (3) Hoe kan jy ware beskerming teen bose geeste vind en gelukkig wees?

Hoe bose geeste mense leed aandoen

Die Bybel toon dat bose geeste onmoontlik die geeste van die dooies kan wees. “Die lewendes is daarvan bewus dat hulle sal sterf”, sê God se Woord, “maar wat die dooies betref, hulle is bewus van hoegenaamd niks” (Prediker 9:5). Bose geeste is in werklikheid opstandige engele wat hulle by Satan geskaar het en mense probeer mislei.—Openbaring 12:9.

Die Skrif sê uitdruklik dat ons beskerming teen bose geeste nodig het. Die apostel Paulus het aan die Christene in Efese geskryf: “Ons het ’n worstelstryd, nie teen bloed en vlees nie, maar teen . . . die bose geesmagte in die hemelse plekke.” Die apostel Petrus het gesê dat die heerser van al die bose geeste, Satan die Duiwel, soos ‘’n brullende leeu is wat daarop uit is om iemand te verslind’.—Efesiërs 6:12; 1 Petrus 5:8.

Satan doen mense leed aan hoofsaaklik deur hulle te mislei—hulle te bedrieg of te verlok om op te tree op ’n wyse wat God aanstoot gee. Die Bybel sê dat Satan aanhou “om hom in ’n engel van lig te verander” (2 Korintiërs 11:14). Hy gee voor dat hy ’n beskermgees is, terwyl hy eintlik bose oogmerke het. Satan verblind mense se verstande vir die waarheid oor hom en vir die waarheid oor God (2 Korintiërs 4:4). Waarom mislei hy mense?

Satan smag na aanbidding en wil hê dat mense hom, wetend of onwetend, hierdie aanbidding moet gee. Toe God se Seun, Jesus, op die aarde was, wou Satan hê dat hy “neerval en ’n daad van aanbidding teenoor [hom] verrig”. Jesus het gesê: “Gaan weg, Satan! Want daar staan geskrywe: ‘Jehovah jou God moet jy aanbid’” (Matteus 4:9, 10). Jesus het geweier om enigiets te doen wat te kenne sou gee dat hy hom in aanbidding aan Satan onderwerp.

Jehovah is die magtigste van alle geeste en sal nie toelaat dat diegene wat hom gehoorsaam, enige blywende leed aangedoen word nie (Psalm 83:18; Romeine 16:20). Maar as ons Jehovah God wil behaag, soos Jesus gedoen het, moet ons enige daad van onderworpenheid aan Satan of sy demone vermy. Om daarin te slaag, moet ons tradisionele gebruike identifiseer wat bose geesmagte eer gee wat aan aanbidding grens. Hoe kan jy dit doen?

Identifiseer gebruike wat God mishaag

Jehovah God het sy eertydse volk, die Israeliete, gewaarsku om nie party van die tradisionele gebruike van die nasies rondom hulle na te volg nie. Hy het gesê: “Daar mag niemand onder jou gevind word wat . . . van waarsêery gebruik maak, die toorkuns beoefen of voortekens soek of wat ’n towenaar is nie, of wat ’n towerspreuk oor ander uitspreek [nie].” Die Bybel sê van diegene wat hierdie gebruike gevolg het: “Elkeen wat hierdie dinge doen, is vir Jehovah verfoeilik.”—Deuteronomium 18:10-12.

Wanneer jy gebruike ondersoek wat algemeen is in jou omgewing, kan jy dus die volgende vrae oorweeg: Bevorder die gebruik geloof in voortekens? Skryf dit bonatuurlike beskermingskrag aan lewelose voorwerpe toe? Behels dit towery of beskerming daarteen? Sluit dit ’n daad van onderworpenheid in aan ’n gees buiten Jehovah of sy aangestelde verteenwoordiger, Jesus?—Romeine 14:11; Filippense 2:9, 10.

Dit is noodsaaklik dat jy alle gebruike verwerp wat sulke dinge bevorder. Waarom? Die apostel Paulus is geïnspireer om te skryf: “Julle kan nie deel hê aan ‘die tafel van Jehovah’ en die tafel van demone nie.” Hy het gewaarsku dat diegene wat God sowel as ander geeste probeer behaag, ‘Jehovah tot jaloesie sal opwek’ (1 Korintiërs 10:20-22). Jehovah God eis en verdien uitsluitlike toegewydheid.—Eksodus 20:4, 5.

Dink ook aan hierdie vraag: Bevorder die gebruik die gedagte dat ’n persoon nie verantwoordelik is vir sy of haar eie dade nie? Byvoorbeeld, egbreuk en voorhuwelikse seks word in baie gemeenskappe afgekeur en word in die Bybel veroordeel (1 Korintiërs 6:9, 10). Maar in party Pasifiese kulture kan sulke dinge aanvaarbaar wees as die meisie beweer dat sy met “’n groen blaar betower is”,a dit wil sê, sy beweer dat sy nie anders kon as om seks te hê nie omdat sy getoor is.

Die Bybel leer egter dat ons aanspreeklik is vir ons dade (Romeine 14:12; Galasiërs 6:7). Die eerste vrou, Eva, het byvoorbeeld gevoel dat Satan haar bedrieg het sodat sy ook aan God ongehoorsaam was en het gesê: “Die slang—hy het my bedrieg, en daarom het ek geëet.” Maar Jehovah het Eva aanspreeklik gehou vir haar dade (Genesis 3:13, 16, 19). Hy hou óns ook aanspreeklik vir ons gedrag.—Hebreërs 4:13.

Wat moet jy doen?

As jy God wil behaag en volgens Bybelbeginsels wil lewe, moet jy beslissend optree. Opregtes van hart wat in die eerste eeu in Efese gewoon het, het ’n goeie voorbeeld in dié verband gestel. Om weg te breek van die invloed van bose geeste, het hulle al hulle boeke oor spiritistiese gebruike bymekaargemaak en dit “voor almal verbrand”.—Handelinge 19:19.

Voordat hulle die boeke verbrand het, het hierdie mense “gekom en hulle gebruike openlik bely en bekend gemaak” (Handelinge 19:18). Paulus se lering oor die Christus het hulle hart geraak, en hulle is beweeg om hulle spiritistiese boeke te vernietig. Hulle het ook hulle gevoelens ten opsigte van hulle tradisionele gebruike verander.

Dit is sekerlik nie maklik om tradisionele gebruike die rug toe te keer nie. James, wat vroeër genoem is, het voor hierdie uitdaging te staan gekom. Hy het die Bybel saam met Jehovah se Getuies begin studeer en gehou van wat hy geleer het. Maar hy het voortgegaan om rarafono te beoefen. Toe hy sy gevoelens met betrekking tot hierdie gebruike ondersoek het, het hy gevind dat hy Jehovah se beloftes vir die toekoms glo, maar voel dat hy nog steeds tradisionele gebruike moet volg om hom teen leed te beskerm.

Wat het James gehelp om sy beskouing te verander? Hy sê: “Ek het tot Jehovah gebid om my te beskerm en my te help om op hom te vertrou. Ek het terselfdertyd my tradisionele gebruike laat vaar.” Het enigiets nadeligs met hom gebeur? “Nee”, sê James. “Al wat gebeur het, is dat ek geleer het om op Jehovah te vertrou. Ek het gesien wat ’n hegte vriend Jehovah kan wees.” Trouens, die afgelope sewe jaar dien James al as ’n voltydse bedienaar en help hy ander om uit te vind wat die Bybel leer.

Volg gerus James se voorbeeld. Ondersoek die gebruike wat mense in jou gemeenskap beoefen en gebruik jou “denkvermoë” om te bepaal of dit in ooreenstemming is met die “wil van God” (Romeine 12:1, 2). Lê dan die moed aan die dag om van bygelowige gebruike weg te breek. As jy dit doen, kan jy die vertroue hê dat Jehovah ‘jou sal inneem’ en sal beskerm (2 Korintiërs 6:16-18). Soos James sal jy ondervind hoe waar die Bybel se belofte is: “Die naam van Jehovah is ’n sterk toring. Die regverdige hardloop daarin en word beskerm.”—Spreuke 18:10.

[Voetnoot]

[Prent op bladsy 19]

“Korokoro”

[Erkenning]

Courtesy of Dr. Bakshi Jehangir

[Prent op bladsy 19]

’n Meisie tel oorskietkos op sodat dit nie gebruik kan word om mee te toor nie