Het jy geweet?
Wat het werklik met die verbondsark gebeur?
Die Israeliete het die verbondsark met God se teenwoordigheid verbind (Eksodus 25:22). Dit was ’n heilige houtkis wat met goud oorgetrek is en waarin Moses die twee kliptafels van die Wet geplaas het. Terwyl die Israeliete in die wildernis was, is die Ark in die Allerheiligste deel van die tent van samekoms gehou (Eksodus 26:33). Die Ark is uiteindelik in die Allerheiligste in Salomo se tempel geplaas.—1 Konings 6:19.
Die Ark word die laaste keer in 2 Kronieke 35:3 genoem, toe koning Josia dit in 642 VHJ na die tempel teruggebring het. Die Ark is moontlik verwyder deur Josia se afvallige voorganger, Manasse, wat ’n beeld in die tempel gesit het. Of dalk is dit gedurende Josia se herstelwerk aan die tempel vir veilige bewaring verskuif (2 Kronieke 33:1, 2, 7; 34:1, 8-11). Wat daarna van die Ark geword het, is ’n raaisel, want dit word nie genoem onder die lys voorwerpe wat uit die tempel geneem is toe die Babiloniërs Jerusalem in 607 VHJ verower het nie.—2 Konings 25:13-17.
Die Skrif sê nie dat die Ark teruggebring is na die Allerheiligste van die tempel wat deur Serubbabel herbou is nie; ook lyk dit nie of ’n ander een ooit in die plek daarvan gemaak is nie.—Esra 1:7-11.
Wie was die verskillende manne in die Bybel wat die naam Jakobus gehad het?
Daar was altesaam vier, en ’n mens kan maklik deurmekaar raak.a Een was die vader van die apostel Judas (nie Iskariot nie), en niks verder is oor hom bekend nie.—Lukas 6:16; Handelinge 1:13.
Dan is daar ’n seun van Sebedeus. Hierdie Jakobus was die broer van Johannes, en albei was apostels van Jesus (Matteus 10:2). Sy moeder was moontlik Salome, die suster van Jesus se moeder. (Vergelyk Matteus 27:55, 56 met Markus 15:40, 41 en Johannes 19:25.) Indien wel, was Jakobus Jesus se eie neef. Hy was ’n visserman, en hy en sy broer was vennote van Petrus en Andreas.—Markus 1:16-19; Lukas 5:7-10.
Dan is daar Jakobus die seun van Alfeus, wat ook een van Jesus se apostels was (Markus 3:16-18). Hy word in Markus 15:40 as “Jakobus die Mindere” beskryf. Hy is moontlik “die Mindere” genoem omdat hy fisies kleiner of jonger was as Jakobus, die seun van Sebedeus.
Laastens was daar Josef en Maria se seun, die broer van Judas en die halfbroer van Jesus (Markus 6:3; Galasiërs 1:19). Gedurende Jesus se bediening was Jakobus nie een van sy dissipels nie (Matteus 12:46-50; Johannes 7:5). Maar voor Pinkster 33 HJ het Jakobus saam met sy moeder, sy broers en die apostels in ’n bovertrek in Jerusalem gebid (Handelinge 1:13, 14). Jakobus het later ’n vername lid van die gemeente in Jerusalem geword en het die Bybelboek geskryf wat sy naam dra.—Handelinge 12:17; Jakobus 1:1.
[Voetnoot]
a In Afrikaans is Jakob ’n verkorte vorm van Jakobus. Die uitdrukking “Abraham, Isak en Jakob” verskyn dikwels in die Bybel, en in Matteus 1:16 word Jakob “die vader . . . van Josef, die man van Maria,” genoem.