Ons lesers vra
Bestaan die Duiwel werklik?
Ja, die Bybel leer dat Satan die Duiwel inderdaad ’n werklike persoon is. Bybelkritici spot egter met so ’n uitbeelding van die Duiwel. Volgens hulle verteenwoordig Satan bloot die boosheid in mense.
Moet die verwarring oor Satan se ware identiteit ons verbaas? Glad nie. Ter toeligting: ’n Misdadiger vee dalk sy vingerafdrukke by ’n misdaadtoneel af sodat hy sy identiteit geheim kan hou en sodoende sy onwettige bedrywighede kan voortsit sonder om opgespoor te word. Satan is eweneens ’n kriminele meesterbrein wat daarmee tevrede is om agter die skerms te werk om sedelike verdorwenheid te bevorder. Jesus het Satan duidelik geïdentifiseer as die een wat verantwoordelik is vir die slegte toestand waarin die mensdom hom bevind. Jesus het Satan “die heerser van hierdie wêreld” genoem.—Johannes 12:31.
Waar het die Duiwel vandaan gekom? Hierdie opstandige engel, wat aanvanklik as ’n volmaakte geespersoon in die hemel geskep is, het homself die Duiwel gemaak toe hy behep geraak het met die begeerte dat mense hom pleks van God moet aanbid. In die Bybel lees ons van ’n gesprek hier op aarde tussen Satan en Jesus waarin die Duiwel sy selfsugtige ambisie geopenbaar het. Satan het Jesus probeer oorreed om ‘neer te val en ’n daad van aanbidding teenoor hom te verrig’.—Matteus 4:8, 9.
Satan het ook sy beweegredes geopenbaar in gesprekke met God, soos opgeteken in die boek Job. Hy sal alles in sy vermoë doen om mense te beïnvloed om God te verloën.—Job 1:13-19; 2:7, 8.
Dink hieraan: As Satan ’n gesprek met Jehovah God en met Jesus Christus gevoer het, hoe kan Satan dan bloot die boosheid in ander wees? Daar is hoegenaamd geen boosheid in God of sy Seun nie! Dit is dus duidelik dat Satan ’n werklike persoon is—’n bose geesskepsel wat geen respek vir Jehovah of vir Jesus het nie.
Die verdorwe toestand waarin die mensdom hom bevind, bewys dat die Duiwel ’n werklike persoon is. Die nasies van hierdie wêreld laat surplusvoedsel verrot terwyl hulle bevolkings doodgaan van die honger. Die nasies gaar wapens vir massavernietiging op waarmee hulle mekaar kan uitwis. Hulle besoedel die aarde. Tog besef die meeste mense nie wat die oorsaak van sulke haatlike, selfvernietigende gedrag is nie. Waarom nie?
Die Bybel toon dat Satan “die verstande van die ongelowiges verblind” (2 Korintiërs 4:4). Om die mensdom te manipuleer, maak Satan van ’n onsigbare organisasie gebruik. Hy is “die heerser van die demone” (Matteus 12:24). Net soos die leier van ’n misdaadsindikaat ’n groot onwettige organisasie kan bedryf sonder om sy identiteit aan al die betrokkenes te onthul, gebruik Satan sy verraderlike organisasie van bose engele om mensemassas te beheer wat grotendeels onbewus bly van sy rol of invloed.
Hoe dankbaar kan ons tog wees dat die Bybel die Duiwel ontmasker en sy organisasie aan die kaak stel! Dit stel ons in staat om stappe te doen om die Duiwel se invloed te weerstaan. Die Bybel vermaan ons: “Onderwerp julle . . . aan God; maar staan die Duiwel teë, en hy sal van julle af wegvlug.”—Jakobus 4:7.