Jeremia het nie moed opgegee nie

RAAK jy ooit so mismoedig dat jy wil moed opgee?—a Baie voel so. Jong Jeremia het so gevoel. Maar hy het nie toegelaat dat wat ander gesê en gedoen het hom laat tou opgooi nie. Kom ons praat oor hoe Jeremia iemand spesiaals in God se oë was, maar hoe selfs hy wou moed opgee.

Voordat Jeremia gebore is, het die ware God, Jehovah, hom gekies om ’n profeet te wees wat die mense moes waarsku dat hulle God nie gelukkig maak nie. Weet jy wat Jeremia jare later vir Jehovah gesê het?— “Ek weet nie hoe ek moet praat nie, want ek is nog maar net ’n seun.”

Hoe dink jy het Jehovah vir Jeremia geantwoord?— Op ’n liefdevolle maar ferm manier het hy gesê: “Moenie sê: ‘Ek is nog maar net ’n seun’ nie. Maar na almal na wie toe ek jou sal stuur, moet jy gaan; en alles wat ek jou sal beveel, moet jy spreek. Moenie bang wees . . . nie.” Hoekom nie? “Ek is met jou om jou te verlos”, het Jehovah gesê.—Jeremia 1:4-8.

Maar soos ons vroeër gesien het, het Jeremia later mismoedig geraak. Dit is omdat hy bespot is omdat hy God dien. ‘Almal lag die hele dag vir my en bespot my’, het hy gesê. Daarom het hy besluit om moed op te gee. “Ek sal nie van [Jehovah] melding maak nie, en ek sal nie meer in sy naam spreek nie”, het hy gesê. Maar het hy regtig moed opgegee?

“In my hart”, het Jeremia gesê, “was [die woord van Jehovah] soos ’n brandende vuur, opgesluit in my gebeente; en ek het moeg geword om dit in te hou” (Jeremia 20:7-9). Al het Jeremia soms bang geword, het sy liefde vir Jehovah hom nie laat moed opgee nie. Kom ons kyk hoe Jeremia beskerm is omdat hy nie moed opgegee het nie.

Jehovah het vir Jeremia gesê om die mense te waarsku dat Jerusalem vernietig sou word as hulle nie ophou om slegte dinge te doen nie. Toe Jeremia hierdie waarskuwing gegee het, het die mense kwaad geword en gesê: “Hierdie man verdien die doodsvonnis.” Maar Jeremia het hulle gesmeek om ‘die stem van Jehovah te gehoorsaam’. Toe het hy gesê: ‘Julle moet weet dat julle ’n onskuldige man doodmaak as julle my doodmaak, want God het my gestuur om met julle te praat.’ Weet jy wat toe gebeur het?—

Die Bybel sê: “Die vorste en die hele volk [het] vir die priesters en vir die profete gesê: ‘Hierdie man verdien geen doodsvonnis nie, want in die naam van Jehovah ons God het hy met ons gespreek.’” Toe Jeremia nie toelaat dat vrees hom laat moed opgee nie, het Jehovah hom dus beskerm. Kom ons kyk nou na wat gebeur het met Uria, ’n ander profeet van Jehovah, wat heeltemal anders opgetree het.

‘Uria het bly profeteer teen Jerusalem met dieselfde woorde as Jeremia’, sê die Bybel. Maar weet jy wat Uria gedoen het toe koning Jojakim vir hom kwaad geword het?— Hy het bang geword, opgehou om God se wil te doen en na Egipte gevlug. Die koning het toe sy manne gestuur om hom te gaan soek en hom terug te bring. Weet jy wat die slegte koning gedoen het toe hulle Uria teruggebring het?— Hy het Uria met ’n swaard doodgemaak!—Jeremia 26:8-24.

Hoekom dink jy het Jehovah vir Jeremia beskerm maar nie vir Uria nie?— Jeremia was dalk bang, net soos Uria, maar Jeremia het nie opgehou om Jehovah te dien nie en hy het nie weggehardloop nie. Hy het nie moed opgegee nie. Watter les dink jy kan ons uit Jeremia se voorbeeld leer?— Dat dit soms moeilik is om te doen wat God sê, maar ons moet altyd op hom vertrou en hom gehoorsaam.