Kom nader aan God

“Jou koninkryk sal beslis . . . bestendig wees”

2 Samuel 7:1-16

DEUR die geskiedenis heen is baie menseheersers al van hulle amp onthef. Party is uitgestem, terwyl ander met geweld verwyder is. Wat van Jesus Christus, die Koning van God se hemelse Koninkryk? Kan enigiets keer dat hy as God se aangestelde Koning heers? Die antwoord kan gevind word in Jehovah se woorde aan koning Dawid van eertydse Israel, soos opgeteken in 2 Samuel hoofstuk 7.

Aan die begin van die hoofstuk sien ons dat Dawid verleë is omdat hy, ’n blote mensekoning, in ’n pragtige paleis woon, terwyl die ark van God in ’n beskeie tent gehou word.a Dawid spreek sy begeerte uit om ’n waardige huis, of tempel, vir Jehovah te bou (vers 2). Maar Dawid sal nie die een wees wat die huis bou nie. Deur die profeet Natan sê Jehovah vir Dawid dat een van sy seuns die tempel sal bou.—Verse 4, 5, 12, 13.

Jehovah se hart word geraak deur Dawid se hartgrondige begeerte. Weens Dawid se toegewydheid en in ooreenstemming met profesieë sluit God met hom ’n verbond dat Hy iemand in Dawid se koninklike lyn sal verwek wat vir ewig sal heers. Natan dra God se plegtige belofte aan Dawid oor: “Jou huis en jou koninkryk sal beslis tot onbepaalde tyd voor jou bestendig wees; jou troon sal tot onbepaalde tyd stewig gevestig word” (vers 16). Wie is die permanente Erfgenaam van hierdie verbond—die Een wat vir ewig sal heers?—Psalm 89:20, 29, 34-36.

Jesus van Nasaret was ’n nakomeling van Dawid. Toe ’n engel Jesus se geboorte aangekondig het, het hy gesê: “Jehovah God sal hom die troon van sy vader Dawid gee, en hy sal vir ewig as koning oor die huis van Jakob heers, en daar sal geen einde aan sy koninkryk wees nie” (Lukas 1:32, 33). Die verbond met Dawid word derhalwe in Jesus Christus vervul. Hy heers dus, nie omdat hy deur mense verkies is nie, maar weens ’n plegtige belofte van God wat hom die reg gee om vir ewig te heers. Laat ons onthou dat God se beloftes altyd bewaarheid word.—Jesaja 55:10, 11.

Daar is twee waardevolle lesse wat ons uit 2 Samuel hoofstuk 7 kan leer. Eerstens, ons kan die vertroue hê dat niks en niemand kan verhinder dat Jesus Christus heers nie. Ons kan dus seker wees dat hy die verklaarde doel van sy heerskappy sal uitvoer, naamlik om God se wil ten volle op aarde te volbring, soos dit in die hemel volbring is.—Matteus 6:9, 10.

Tweedens, hierdie verslag leer ons ’n hartverblydende les oor Jehovah. Onthou dat Jehovah die bedoeling van Dawid se hart gesien en waardeer het. Dit is vertroostend om te weet dat Jehovah ons toegewydheid aan sy aanbidding waardeer. In sommige gevalle kan omstandighede buite ons beheer, soos verswakkende gesondheid of gevorderde jare, ons verhinder om alles te vermag wat ons hart begeer om in God se diens te doen. Indien wel, mag ons vertroosting put uit die feit dat Jehovah selfs die bedoelings sien van ’n hart wat ten volle toegewyd is aan sy aanbidding.

[Voetnoot]