Wat ons by Jesus leer

Hoe om Christus te volg

Wanneer mense geloof in Jesus gestel het, het hy dikwels gesê: “Word my volgeling” (Matteus 9:9; 19:21). Wat behels dit om Jesus se volgeling te wees, dit wil sê om ’n Christen te wees? Kyk na die antwoorde op drie belangrike vrae.

Hoe moet jy ander behandel?

▪ ’n Dissipel van Jesus moet die instruksies volg oor hoe om ander te behandel. Jesus het byvoorbeeld gesê: “Alles wat julle dan wil hê dat die mense aan julle moet doen, moet julle ook net so aan hulle doen.” Sê nou iemand gee jou aanstoot? Jesus het gesê: “Wees gou om sake te skik met die een wat jou . . . aankla.” Hy het ook vir sy volgelinge gesê: “As julle die mense hulle oortredings nie vergewe nie, sal julle Vader julle oortredings ook nie vergewe nie.”—Matteus 5:25; 6:15; 7:12.

Jesus het aan getroudes hierdie raad gegee: “Julle het gehoor dat daar gesê is: ‘Jy mag nie egbreuk pleeg nie.’ Maar ek sê vir julle dat elkeen wat aanhou om na ’n vrou te kyk om hartstog vir haar te hê, reeds in sy hart met haar egbreuk gepleeg het.” ’n Ware Christen laat toe dat Jesus se leringe ’n invloed het op sy verstand sowel as sy hart.—Matteus 5:27, 28.

Ware Christene offer hulle eie gerief op om ander te help. Jesus was selfopofferend. Jesus en sy apostels het byvoorbeeld gedurende ’n uitputtende predikingsreis nie eens vrye tyd gehad om te eet nie. Daarom het Jesus hulle per boot na ’n eensame plek geneem om te rus. Maar mense het gehoor waarheen hy op pad was en het vooruitgehardloop. Die Bybelverslag sê: “Toe hy uitklim, het hy ’n groot skare gesien, maar hy is ontroer deur innige jammerte vir hulle, want hulle was soos skape sonder ’n herder. En hy het hulle baie dinge begin leer” (Markus 6:30-34). Jy kan Jesus navolg deur te doen wat God van jou vra, al kom jy dalk voor probleme te staan.

Waarom moet jy die goeie nuus verkondig?

▪ Jesus het sy volgelinge geleer om die goeie nuus te verkondig. Hy het vir die apostels gesê: “Terwyl julle gaan, preek en sê: ‘Die koninkryk van die hemele het naby gekom’” (Matteus 10:7). Jesus se volgelinge dra ’n uiters kosbare boodskap. Jesus het gebid: “Dít beteken die ewige lewe, dat hulle kennis inneem van u, die enigste ware God.”—Johannes 17:3.

Jesus het ’n werk voorspel waaraan miljoene van sy volgelinge sou deelneem. Hy het gesê: “Hierdie goeie nuus van die koninkryk sal in die hele bewoonde aarde verkondig word as ’n getuienis vir al die nasies” (Matteus 24:14). As jy van God se Koninkryk geleer het en glo wat die Bybel sê, sal jy dit ongetwyfeld geniet om ander te vertel wat jy weet. Baie volgelinge van Jesus begin deur met hulle familielede oor God se Koninkryk te praat.—Johannes 1:40, 41.

Waarom moet jy gedoop word?

▪ Toe Jesus in die Jordaanrivier gedoop is, het hy klaarblyklik in gebed gesê: ‘Ek het gekom om u wil te doen, o God’ (Hebreërs 10:7). As dit jou begeerte is om God se wil te doen, moet jy ook gedoop word. Jesus het beveel: “Maak dissipels van mense van al die nasies, en doop hulle.”—Matteus 28:19.

Watter verantwoordelikhede en voordele word deur doop meegebring? Gedoopte volgelinge van Jesus dien God met hulle hele siel. Jesus het God se Wet aangehaal, wat sê: “Jy moet Jehovah jou God liefhê met jou hele hart en met jou hele siel” (Matteus 22:37). Hy het ook gesê: “As iemand agter my aan wil kom, laat hy homself verloën” (Matteus 16:24). Doop simboliseer ’n persoon se besluit om hom- of haarself te verloën en eerder aan God te behoort. Dié in hierdie spesiale verhouding kan God vra om hulle ’n skoon gewete te gee.—1 Petrus 3:21.

Vir meer inligting, sien hoofstuk 18 van hierdie boek, Wat leer die Bybel werklik? uitgegee deur Jehovah se Getuies.