Ons lesers vra . . .

Wat is ’n Koninkryksaal?

▪ ’n Koninkryksaal is ’n huis van aanbidding wat deur Jehovah se Getuies vir hulle godsdiensoefeninge gebruik word. Daar is wêreldwyd tienduisende Koninkryksale. Elke week vergader meer as 105 000 gemeentes van Jehovah se Getuies in hierdie sale.

Elke Koninkryksaal het ’n ouditorium waar Bybelstudieprogramme en -lesings gehou word. In die meeste ouditoriums staan die onderrigters tydens vergaderinge op ’n verhoog. Daar is gewoonlik sitplek vir tussen 100 en 300 mense. Die Koninkryksaal het soms ook een of meer bykomende klaskamers, ’n kantoor en ’n klein biblioteek met Bybelpublikasies en naslaanwerke wat enige gemeentelid vir navorsing kan gebruik.

Jy sal egter nie in ’n Koninkryksaal enige van die godsdiensembleme en -voorwerpe vind wat gewoonlik met die kerke van die Christendom geassosieer word nie. Daar is geen altare, beelde of kruise nie. Waarom nie? Jehovah se Getuies glo dat die gebruik van sulke dinge strydig is met die Bybel se opdrag om te “vlug vir die afgodediens” (1 Korintiërs 10:14; Johannes 4:24). Baie kerke en tempels is swierig en oordadig versier. In teenstelling hiermee word Koninkryksale ontwerp om funksioneel en beskeie te wees. Die klem val op die Bybelonderrig wat in die gebou voorsien word eerder as op die gebou self.

Waarom word dit ’n Koninkryksaal genoem? Openbare vergaderinge by ’n Koninkryksaal fokus hoofsaaklik op die leringe van die Bybel en die kernboodskap daarvan, naamlik “die koninkryk van God”, wat die tema van Jesus se bediening was (Lukas 4:43). Die naam Koninkryksaal, wat in die 1930’s geskep is, beskryf dus gepas die doel van hierdie geboue—om ware aanbidding te bevorder en as die middelpunt van die verkondiging van die “goeie nuus van die koninkryk” te dien (Matteus 24:14). Koninkryksale word dus nie vir sosiale of kommersiële bedrywighede gebruik nie. Bou-, bedryfs- en instandhoudingskoste word geheel en al deur vrywillige bydraes gedek. Daar word nooit ’n kollektebord omgestuur nie. Daar is eerder op ’n vasgestelde plek ’n bussie vir enigeen wat graag ’n bydrae wil gee.

Koninkryksale dien dieselfde doel in alle wêrelddele, maar hulle word in ’n wye verskeidenheid groottes en style gebou. Die ontwerp verskil na gelang van die boumateriaal wat plaaslik beskikbaar is, die klimaat en die finansiële omstandighede van Jehovah se Getuies in die gebied. Sommige geboue word van stene, hout en klip gebou. Ander het oop kante, met bamboesmure en grasdakke.

Besoekers is altyd welkom om vergaderinge by enige Koninkryksaal by te woon (Hebreërs 10:25). Trouens, daar word elke week ’n openbare vergadering gehou, wat op ’n Bybeltema gebaseer is wat vir lede van die gemeente sowel as besoekers leersaam is. Besoek gerus die Koninkryksaal in jou omgewing.