Ons lesers vra . . .

Het God ’n begin gehad?

▪ Die Bybel se antwoord is dat God nie ’n begin gehad het nie. God het nog altyd bestaan. Al is die konsep van God se ewigheid moeilik om te begryp, kan ons nie die idee verwerp bloot omdat ons dit nie ten volle kan verstaan nie.

Is dit redelik om te verwag dat ons al God se weë sal verstaan? Die apostel Paulus het gesê: “O die diepte van God se rykdom en wysheid en kennis! Hoe ondeurgrondelik is sy oordele en hoe onnaspeurlik sy weë!” (Romeine 11:33). Ons verstand kan nie die diepte van God se wysheid en kennis begryp nie, net soos ’n baba nie alles omtrent ’n ouer kan verstaan nie. Hierdie geïnspireerde woorde van Paulus, hoewel dit hoofsaaklik handel oor die eiesoortigheid van God se wysheid en barmhartigheid, gee te kenne dat daar aspekte van Jehovah God en sy weë is wat te diep is vir ons verstand om te deurgrond. Die konsep dat God nie ’n begin gehad het nie, is blykbaar een daarvan. Ons kan nogtans volle vertroue hê in wat die Bybel oor God leer. Jesus Christus het aangaande die heilige geskrifte gesê: “U woord is die waarheid.”—Johannes 17:17.

Moses het in gebed aan Jehovah gesê: “U het nog altyd bestaan, en u sal altyd bestaan” (Psalm 90:2, The Holy Bible, New Century Version). Volgens Moses se beskrywing strek God se bestaan in twee rigtings. Die een in die rigting van die toekoms. Jehovah is “die Een wat vir ewig en altyd lewe” (Openbaring 4:10). God se bestaan strek dus vorentoe, die ewige toekoms in. Die ander in die rigting van die verlede. Met ander woorde, God is nie geskep nie en het ook nie ontstaan nie. God se bestaan strek eerder oneindig in die verlede in.

Abstrakte idees is vir die meeste van ons moeilik om te verstaan. Tog werk ons soms met moeilike konsepte, soos positiewe en negatiewe getalle. ’n Mens kan tot in ewigheid aanhou tel, hetsy op of af. Kan ons nie hierdie voorbeeld op die lewensjare van ons Skepper toepas nie?

Dit is derhalwe gepas dat net God die unieke titel “Koning van die ewigheid” het (1 Timoteus 1:17). Dink net: Jesus Christus, die tallose engele in die hemel en die mensdom op die aarde het almal ’n begin gehad omdat hulle geskep is (Kolossense 1:15, 16). Dit is nie die geval met God nie. Om vol te hou dat God geskep moes gewees het, lei tot ’n sinlose sirkelredenasie oor wie dan die Skepper geskep het. Nee, net Jehovah bestaan “van ewigheid tot ewigheid” (Psalm 90:2, Nuwe Afrikaanse Bybelvertaling). Met ander woorde, Jehovah het “voor alle tyd” bestaan.—Judas 25, voetnoot in NW.

Hou egter in gedagte dat die konsep van God se ewige bestaan nie net ’n koue feit is nie. As ons Moses se gebed van naderby beskou, openbaar dit dat God se ewigheid ’n hartverblydende belofte dat ons vir ewig kan lewe, waarborg. In teenstelling met die vlietende aard van ons teenswoordige lewe word God beskryf as “’n ware woonplek [vir ons] van geslag tot geslag”. As ’n liefdevolle Vader was Jehovah, is hy en sal hy altyd daar wees om sy volk te ondersteun. Mag jy vertroosting put uit hierdie wonderlike waarheid!—Psalm 90:1.