Ons lesers vra . . . 

Moet ek by ’n godsdiensgroep aansluit?

▪ Is jy lugtig om by ’n godsdiensgroep aan te sluit omdat jy geskok is oor die huigelary en onenigheid onder kerkgangers en selfs die geestelikes? Dan som ’n Franse gesegde dalk op hoe jy gevoel: “Wie naby die kerk is, is dikwels ver van God.”

Miskien het jy eerbied vir die Bybel en meen jy dat regerings en individue ’n persoon se reg moet respekteer om aan ’n godsdiensgroep te behoort. Maar jy wonder dalk: ‘Sê God werklik dat dié wat hom op aanneemlike wyse wil aanbid, aan ’n georganiseerde godsdiens moet behoort?’

Kortom, die antwoord is ja. Waarom kan ons so seker wees? En is sommer enige godsdiensorganisasie goed genoeg?

Kyk na Jesus se voorbeeld. Het hy aan ’n georganiseerde godsdiens behoort? Toe Jesus jonk was, het hy sy Joodse gesin en ander vergesel wat die gewoonte gehad het om na die tempel in Jerusalem te gaan om georganiseerde aanbidding te beoefen (Lukas 2:41-43). As volwassene het Jesus God saam met sy mede-Jode by die plaaslike sinagoge aanbid (Lukas 4:14-16). Toe hy met ’n vrou van ’n ander godsdiensagtergrond gepraat het, het Jesus gesê: “Ons aanbid wat ons ken” (Johannes 4:22). Hier het Jesus hom duidelik geïdentifiseer as ’n lid van die Joodse vorm van godsdiens.

Later het Jesus gesê dat God die Jode se verdorwe vorm van aanbidding sou verwerp omdat hulle hom as ’n nasie verwerp het (Matteus 23:33–24:2). Maar hy het aangedui dat dié wat God op aanneemlike wyse wil aanbid, aan ’n georganiseerde groep sal moet behoort. Hy het vir sy volgelinge gesê: “Hieraan sal almal weet dat julle my dissipels is, as julle liefde onder mekaar het” (Johannes 13:35). ’n Dissipel van Jesus wat nie met sy medegelowiges geassosieer het nie, kon nouliks liefde aan hulle betoon het. Trouens, Jesus het uitdruklik gesê dat daar net twee godsdiensweë is. Die een het hy as “breed en wyd” beskryf en gesê dat dit “na die vernietiging lei”. In teenstelling hiermee het hy gesê: “Nou is die poort en smal is die pad wat na die lewe lei, en dié wat dit vind, is min.”—Matteus 7:13, 14.

Dit is dus duidelik dat nie sommer net enige godsdiensweg goed genoeg is nie. Die Bybel waarsku dat ons nie moet aansluit by dié wat “die uiterlike skyn van godsdiens sal bewaar, maar wat die krag daarvan sal verwerp het” nie. God se Woord sê verder: “Vermy sulke mense” (2 Timoteus 3:5, The NET Bible). Daarenteen kan ons grootliks daarby baat vind om diegene wat op die pad is wat na die lewe lei, te identifiseer en met hulle te assosieer. Ons verkry nou aanmoediging en ondersteuning asook ’n helder hoop vir die toekoms.—Hebreërs 10:24, 25.

Hoe kan jy vasstel watter godsdiensgroep op daardie smal pad is? Ondersoek gerus die Bybelse antwoorde in hoofstuk 15 van die boek Wat leer die Bybel werklik?a Daardie materiaal sal jou help om ’n ingeligte keuse te maak oor watter godsdiensorganisasie jy by moet aansluit.

[Voetnoot]