God en haar vriendinne het haar liefgehad

NIEMAND weet vandag wat haar naam was nie. Sy is nou slegs bekend onder die naam van haar pa, Jefta. Kom ons gaan na die Bybel en leer oor hierdie twee. Ons sal sien dat Jefta se dogter geliefd was by God sowel as haar vriendinne.

Ons kan van Jefta en sy dogter lees in Rigters hoofstuk 11 in die Bybel. Omdat Jefta ’n getroue kneg van God was, het hy ongetwyfeld gereeld met sy dogter oor die Skrif gepraat.

Jefta het gelewe voordat God se volk, die Israeliete, vir ’n mensekoning gevra het om oor hulle te regeer. Jefta was ’n sterk man wat goed kon veg. Die Israeliete het hom dus gevra om hulle te lei teen die Ammoniete, ’n naburige nasie wat teen die Israeliete geveg het.

Jefta wou God se hulp hê om die Ammoniete te verslaan, en daarom het hy ’n belofte gemaak. Jefta het gesê dat hy, as Jehovah hom die oorwinning gee, vir Jehovah die eerste persoon sal gee wat uit sy huis kom wanneer hy terugkeer. Dié persoon sou vir die res van sy of haar lewe by God se tabernakel dien—die plek waar die volk God destyds aanbid het. Weet jy wie eerste uitgekom het?—a

Ja, Jefta se dogter! Jefta was baie hartseer. Hy het net een kind gehad. Maar hy het ’n belofte aan Jehovah gemaak en moes dit nakom. Sy dogter het dadelik gesê: “My vader, as u u mond teenoor Jehovah oopgemaak het, moet u met my doen volgens wat uit u mond uitgegaan het.” Toe het sy gevra dat sy twee maande lank alleen gelaat word sodat sy na die berge kan gaan om te treur. Waarom was sy hartseer? Omdat sy, deur haar pa se gelofte na te kom, die reg sou opgee om te trou en kinders te hê. Nietemin het sy nie haar eie begeertes as die belangrikste beskou nie. Sy wou haar pa gehoorsaam en aan Jehovah lojaal wees. Dink jy dat sy Jehovah en haar pa gelukkig gemaak het?—

Toe het Jefta sy dogter saam met haar vriendinne vir twee maande weggestuur. Nadat sy teruggekom het, het haar pa sy gelofte nagekom deur haar na God se tabernakel in Silo te stuur om vir die res van haar lewe daar te dien. Elke jaar het die jong vroue van Israel na Silo gegaan en Jefta se dogter aangemoedig.

Ken jy jongmense wat hulle ouers gehoorsaam en Jehovah liefhet?— Dit is goed om hierdie kinders beter te leer ken en met hulle vriende te maak. As jy Jefta se dogter navolg en gehoorsaam en lojaal is, sal jy goeie vriende hê. Jy sal jou ouers gelukkig maak, en Jehovah sal jou ook liefhê.