Leer uit God se Woord
Is daar hoop vir die dooies?
Hierdie artikel opper vrae wat jy dalk al gevra het en toon waar jy die antwoorde in jou Bybel kan vind. Jehovah se Getuies sal graag hierdie antwoorde met jou bespreek.
1. Wat is die hoop vir die dooies?
Toe Jesus in Betanië naby Jerusalem aankom, was sy vriend Lasarus al vier dae dood. Jesus het saam met Marta en Maria, die susters van die oorledene, na die graf gegaan. Kort voor lank het ’n skare daar saamgedrom. Kan jy jou Marta en Maria se vreugde voorstel toe Jesus Lasarus opgewek het?—Lees Johannes 11:20-24, 38-44.
Marta het geglo dat die dooies sal opstaan. Getroue knegte van Jehovah weet al lank dat God die dooies in die toekoms sal opwek om weer op die aarde te lewe.—Lees Job 14:14, 15.
2. Wat is die toestand van die dooies?
Hoewel ’n lewenskrag, of “gees”, mense en diere aan die lewe hou, is ons nie geeste wat bloot in ’n vleeslike liggaam woon nie (Prediker 3:19; Genesis 7:21, 22). Ons is fisiese skepsele wat van stof gemaak is (Genesis 2:7; 3:19). Wanneer ons brein sterf, vergaan ons gedagtes. Dit is waarom Lasarus, nadat hy opgewek is, niks gesê het oor die tyd toe hy dood was nie, omdat die dooies van niks bewus is nie.—Lees Psalm 146:4; Prediker 9:5, 10.
Dit is duidelik dat die dooies nie kan ly nie. Die lering dat God mense folter nadat hulle gesterf het, is dus vals. Dit belaster God. Die idee om mense in vuur te folter, is vir hom afstootlik.—Lees Jeremia 7:31.
3. Kan ons met die dooies praat?
Die dooies kan nie praat nie (Psalm 115:17). Maar wanneer bose engele met mense praat, beweer hulle dalk valslik dat hulle die gees van ’n dooie persoon is (2 Petrus 2:4). Jehovah verbied ons om met die dooies te probeer praat.—Lees Deuteronomium 18:10, 11.
4. Wie sal weer lewe?
In die komende nuwe wêreld sal miljoene mense wat in die graf is, weer lewe. Selfs party wat slegte dinge beoefen het omdat hulle Jehovah nie geken het nie, sal opgewek word.—Lees Lukas 23:43; Handelinge 24:15.
Verresenes sal die waarheid omtrent God kan leer en geloof in Jesus kan beoefen deur hom te gehoorsaam (Openbaring 20:11-13). Diegene wat opgewek word en goeie dinge doen, sal vir ewig op die aarde kan lewe. Maar party verresenes sal aanhou om slegte dinge te doen. Hulle opstanding sal “’n opstanding van oordeel” wees.—Lees Johannes 5:28, 29.
5. Wat leer die opstanding ons van Jehovah?
Die opstanding is moontlik omdat God sy Seun gestuur het om sy lewe vir ons te gee. Dit is dus ’n blyk van Jehovah se liefde en onverdiende goedhartigheid.—Lees Johannes 3:16; Romeine 6:23.
Vir meer inligting, sien hoofstukke 6 en 7 van hierdie boek, Wat leer die Bybel werklik? uitgegee deur Jehovah se Getuies.
[Prent op bladsy 16]
Adam is uit stof geskep