Moet jongmense gedoop word?

“EK IS so bly dat my dogter nou ’n kneg van Jehovah is, en ek weet dat sy ook bly is”, het Carlos,a ’n Christenvader in die Filippyne, gesê. ’n Vader in Griekeland het geskryf: “Ek en my vrou is verheug dat ons drie kinders in hulle tienerjare as Jehovah se Getuies gedoop is. Hulle maak geestelike vooruitgang en is bly dat hulle Jehovah kan dien.”

Christenouers het rede om verheug te wees wanneer hulle kinders gedoop word, maar die vreugde gaan soms gepaard met ’n mate van besorgdheid. “Ek was baie bly en baie bekommerd”, het ’n moeder gesê. Waarom die gemengde gevoelens? “Ek het besef dat my seun nou ten volle aanspreeklik is teenoor Jehovah.”

Om Jehovah as een van sy gedoopte Getuies te dien, is ’n doelwit wat alle jongmense moet hê. Maar godvresende ouers wonder dalk: ‘Ek weet dat my kind goeie vordering gemaak het, maar is hy sterk genoeg om die druk om onsedelik te wees, te weerstaan en voor Jehovah rein te bly?’ Ander vra hulle miskien af: ‘Sal my kind, wanneer hy voor die aantrekkingskrag van materialisme te staan kom, aanhou om God met vreugde en ywer te dien?’ Watter Bybelse riglyne kan ouers dus help om vas te stel of hulle kinders gereed is om gedoop te word?

Dissipelskap—Die hoofvereiste

God se Woord spesifiseer nie ’n ouderdom waarop ’n mens gedoop mag word nie, maar beskryf eerder die geestelike toestand van dié wat vir hierdie stap kwalifiseer. Jesus het sy volgelinge beveel: “Maak dissipels van mense van al die nasies, en doop hulle” (Matt. 28:19). Doop is dus vir diegene wat reeds dissipels van Christus is.

Wat is ’n dissipel? Insight on the Scriptures verduidelik: “Die term word hoofsaaklik toegepas op almal wat Christus se leringe nie net glo nie, maar dit ook nougeset volg.” Is mense wat betreklik jonk is, in staat om ware dissipels van Christus te wees? ’n Suster wat al meer as 40 jaar as ’n sendeling in Latyns-Amerika dien, skryf oor haar en haar twee susters: “Ons was oud genoeg om te weet dat ons Jehovah wil dien en in die Paradys wil lewe. Ons toewyding het ons gehelp om sterk te wees wanneer ons voor die versoekings van die jeug te staan gekom het. Ons is nie spyt dat ons ons op ’n vroeë ouderdom aan God toegewy het nie.”

Hoe weet jy of jou kind ’n dissipel van Christus geword het? Die Bybel sê: “Deur sy handelinge laat ’n seun hom tog ken, of sy optrede suiwer en reg is” (Spr. 20:11). Kom ons kyk na ’n paar gewoontes wat toon dat ’n jongmens sy vooruitgang as ’n dissipel duidelik maak.—1 Tim. 4:15.

Bewys van dissipelskap

Is jou kind gehoorsaam aan jou? (Kol. 3:20). Verrig hy aangewese takies in en om die huis? Die Bybel sê oor die 12-jarige Jesus: “Hy het aan [sy ouers] onderdanig gebly” (Luk. 2:51). Natuurlik sal geen kind vandag sy ouers volmaak gehoorsaam nie. Maar ware Christene moet Jesus se ‘voetstappe noukeurig volg’. Jongmense wat in doop belangstel, moet dus bekend wees vir hulle gehoorsaamheid aan hulle ouers.—1 Pet. 2:21.

Oorweeg die volgende vrae: Hou jou kind aan om ‘eers die Koninkryk te soek’ in die bediening? (Matt. 6:33). Is hy gewillig om die goeie nuus aan ander te vertel, of het hy sterk aanmoediging nodig om in velddiens uit te gaan en by die deure te praat? Is hy bewus van sy verantwoordelikheid as ’n ongedoopte verkondiger? Het hy die begeerte om terug te gaan na belangstellendes wat hy in die gebied ontmoet? Vertel hy vir sy skoolmaats en onderwysers dat hy ’n Getuie van Jehovah is?

Is dit vir hom belangrik om gemeentelike vergaderinge by te woon? (Ps. 122:1). Geniet hy dit om by die Wagtoring-studie en die Gemeentelike Bybelstudie te antwoord? Neem hy geesdriftig aan die Teokratiese Bedieningskool deel?—Heb. 10:24, 25.

Probeer jou kind sedelik rein bly deur skadelike assosiasie by die skool en elders te vermy? (Spr. 13:20). Wat is sy voorkeure in verband met musiek, rolprente, televisieprogramme, videospeletjies en die gebruik van die Internet? Toon sy woorde en dade dat hy by Bybelstandaarde wil bly?

Hoe goed ken jou kind die Bybel? Kan hy wat hy gedurende julle aand vir Gesinsaanbidding leer, in sy eie woorde stel? Kan hy basiese Bybelwaarhede verduidelik? (Spr. 2:6-9). Stel hy daarin belang om die Bybel te lees en die publikasies van die “getroue en verstandige slaaf”-klas te bestudeer? (Matt. 24:45). Vra hy vrae oor Bybelleringe en -verse?

Hierdie vrae kan jou help om jou kind se geestelike vooruitgang te bepaal. Nadat jy hierdie vrae oorweeg het, kom jy dalk tot die gevolgtrekking dat hy op die een of ander gebied moet verbeter voordat hy gedoop word. Maar as sy lewensweg bewys van dissipelskap lewer en hy wel sy lewe aan God toegewy het, voel jy dalk dat jy hom kan toelaat om gedoop te word.

Jongmense kan Jehovah loof

Baie knegte van God het gedurende adolessensie of selfs vroeër getrouheid en lojaliteit aan die dag gelê. Dink aan Josef, Samuel, Josia en Jesus (Gen. 37:2; 39:1-3; 1 Sam. 1:24-28; 2:18-20; 2 Kron. 34:1-3; Luk. 2:42-49). En Filippus se vier dogters, wat geprofeteer het, moes van kleins af goeie opleiding ontvang het.—Hand. 21:8, 9.

’n Getuie in Griekeland het gesê: “Ek is gedoop toe ek 12 jaar oud was. Ek was nog nooit spyt oor my besluit nie. Sedertdien het 24 jaar verloop, waarvan ek 23 in die voltydse diens deurgebring het. My liefde vir Jehovah het my altyd gehelp om die uitdagings van die jeug die hoof te bied. Ek het nie op 12-jarige ouderdom die skriftuurlike kennis gehad wat ek nou het nie. Maar ek het geweet dat ek Jehovah liefhet en hom vir ewig wil dien. Ek is bly dat hy my gehelp het om in sy diens te volhard.”

Hetsy jonk of oud, iemand wat bewys van ware dissipelskap lewer, behoort gedoop te word. Die apostel Paulus het geskryf: “Met die hart beoefen ’n mens geloof tot regverdigheid, maar met die mond doen ’n mens openbare bekendmaking tot redding” (Rom. 10:10). Wanneer ’n jong dissipel van Christus die belangrike stap doen om gedoop te word, het hy sowel as sy ouers ’n mylpaal bereik. Mag niks jou of jou kinders die vreugde ontneem wat op julle wag nie.

[Voetnoot]

[Venster op bladsy 5]

Die gepaste beskouing van doop

Party ouers beskou hulle kinders se doop as ’n voordelige stap wat risiko’s inhou—byna soos om ’n bestuurslisensie te kry. Maar hou doop en heilige diens ooit ’n bedreiging in vir ’n persoon se toekomstige sukses? Nie volgens die Bybel nie. Spreuke 10:22 sê: “Die seën van Jehovah—dit maak ryk, en hy voeg daar geen pyn by nie.” En Paulus het aan die jong Timoteus geskryf: “Dit is ongetwyfeld ’n middel tot groot gewin, hierdie godvrugtige toegewydheid tesame met vergenoegdheid.”—1 Tim. 6:6.

Ja, dit is nie maklik om Jehovah te dien nie. Jeremia het met baie ontberinge te kampe gehad in sy werk as God se profeet. Tog het hy omtrent sy aanbidding van die ware God geskryf: “U woord word vir my die verheuging en die blydskap van my hart; want u naam is oor my uitgeroep, o Jehovah, God van die leërs” (Jer. 15:16). Jeremia het geweet dat God se diens die bron van sy vreugde is. Satan se wêreld is ’n bron van ontberinge. Ouers moet hulle kinders help om hierdie onderskeid te sien.—Jer. 1:19.

[Venster/Prent op bladsy 6]

Moet my kind doop uitstel?

Al voldoen kinders aan die vereistes om gedoop te word, besluit hulle ouers soms dat dit uitgestel moet word. Wat kan hulle redes wees?

Ek is bang dat my kind, as hy gedoop word, dalk later in ernstige sonde sal verval en uitgesit sal word. Is dit redelik om te glo dat ’n jong persoon wat doop uitstel, nie teenoor God aanspreeklik sal wees vir sy gedrag nie? Salomo het die volgende woorde tot jongmense gerig: “Weet dat die ware God jou op grond van [jou dade] sal oordeel” (Pred. 11:9). En sonder enige uitsondering wat ouderdom betref, het Paulus hierdie herinnering gegee: “Elkeen van ons [sal] vir homself aan God rekenskap gee.”—Rom. 14:12.

Gedoopte sowel as ongedoopte aanbidders is teenoor God aanspreeklik. Moenie vergeet dat Jehovah sy knegte beskerm deur ‘nie toe te laat dat hulle versoek word bo wat hulle kan verdra nie’ (1 Kor. 10:13). Solank hulle ‘nugter van verstand bly’ en versoeking weerstaan, kan hulle op God se ondersteuning staatmaak (1 Pet. 5:6-9). ’n Christenmoeder skryf: “Kinders wat gedoop is, het meer redes om van die slegte dinge van die wêreld weg te bly. My seun, wat op 15 gedoop is, meen dat doop ’n beskerming is. ‘Jy dink nie daaraan om iets te doen wat in stryd is met Jehovah se wet nie’, het hy gesê. Doop is ’n sterk beweegrede tot regverdigheid.”

As jy jou kinders deur jou woorde en jou voorbeeld opgelei het om Jehovah te gehoorsaam, kan jy seker wees dat hulle dit nog steeds ná hulle doop sal doen. Spreuke 20:7 sê: “Die regverdige wandel in sy onkreukbaarheid. Gelukkig is sy kinders ná hom.”

Ek sal graag wil sien dat my kind eers sekere doelwitte bereik. Jongmense moet leer om te werk sodat hulle uiteindelik selfstandig kan wees. Maar dit is gevaarlik om hulle aan te spoor om geleerdheid en finansiële sekuriteit na te jaag in plaas van om ware aanbidding eerste te stel. Aangaande ’n “saad”, of die woord van die Koninkryk, wat nie groei nie, het Jesus gesê: “Wat die een betref wat tussen die dorings gesaai is, dit is die een wat die woord hoor, maar die sorge van hierdie stelsel van dinge en die bedrieglike krag van rykdom verstik die woord, en hy word onvrugbaar” (Matt. 13:22). Planne vir ’n lewe wat geestelikheid ondergeskik maak aan wêreldse doelwitte, kan ’n jongmens se begeerte om God te dien, smoor.

Aangaande jongmense wat aan die vereistes voldoen om gedoop te word, maar wie se ouers nie saamstem nie, het ’n ervare ouer man gesê: “As ’n jongmens verhinder word om gedoop te word, kan dit sy geestelike vooruitgang belemmer en tot ontmoediging lei.” En ’n reisende opsiener het geskryf: “’n Jongmens kan geestelik onseker of minderwaardig begin voel. Hy kan hom tot die wêreld wend vir ’n gevoel van voldoening.”

[Prent]

Moet universiteit eerste kom?

[Prent op bladsy 3]

’n Jongmens kan bewys van dissipelskap lewer

[Prent op bladsy 3]

Voorbereiding vir vergaderinge en deelname daaraan

[Prent op bladsy 4]

Gehoorsaamheid aan ouers

[Prent op bladsy 4]

Deelname aan die bediening

[Prent op bladsy 4]

Persoonlike gebed