Jesus—Die sleutel tot ’n sinvolle lewe

WAS Jesus se lewe werklik sinvol? Hy het klaarblyklik in ’n nederige huis grootgeword en het dwarsdeur sy lewe min materiële besittings gehad. Hy het in werklikheid “geen plek [gehad] om sy kop neer te lê nie” (Lukas 9:57, 58). Boonop is hy gehaat, belaster en uiteindelik deur sy vyande doodgemaak.

Jy dink miskien: ‘Dis nie die soort lewe wat ek as sinvol beskou nie!’ Jesus se lewe het egter veel meer as net dit behels. Kom ons ondersoek vier aspekte van sy lewe.

1. JESUS HET ’N DOEL IN DIE LEWE GEHAD—OM GOD SE WIL TE DOEN.

“My voedsel is om die wil te doen van hom wat my gestuur het.”—Johannes 4:34.

Jesus het deur sy woorde en dade getoon dat hy die wil van sy hemelse Vader, Jehovah,a wil uitvoer. Dit het Jesus groot vreugde verskaf om God se wil te doen. Hy het dit met voedsel vergelyk, soos die teks wat so pas aangehaal is, toon. Kyk onder watter omstandighede hy hierdie vergelyking getref het.

Jesus het hierdie woorde omstreeks twaalfuur die middag gespreek (Johannes 4:6). Hy het die hele oggend te voet deur die heuwelagtige Samaria gereis, en daarom was hy sekerlik honger. Trouens, sy dissipels het hom aangespoor: “Rabbi, eet” (Johannes 4:31). Jesus se antwoord het getoon dat dit hom werklik gevoed en versterk het om God se werk te doen. Klink dit nie soos iemand wie se lewe sinvol was nie?

2. JESUS HET SY VADER INNIG LIEFGEHAD.

‘Ek het die Vader lief.’—Johannes 14:31.

Jesus het ’n besonder hegte verhouding met sy Vader in die hemel gehad. Jesus se innige liefde vir God het hom beweeg om sy Vader te openbaar—Sy naam, voornemens en eienskappe. Deur sy woorde, dade en gesindhede het Jesus sy Vader volmaak weerspieël—in so ’n mate dat ons in Jesus ’n lewende beeld van sy Vader sien. Toe Filippus vir Jesus gevra het: “Toon ons die Vader”, het Jesus dus geantwoord: “Hy wat my gesien het, het ook die Vader gesien.”—Johannes 14:8, 9.

Jesus was so lief vir sy Vader dat hy bereid was om aan hom gehoorsaam te wees tot in die dood (Filippense 2:7, 8; 1 Johannes 5:3). Hierdie innige liefde vir God het Jesus se lewe sinvol gemaak.

3. JESUS WAS LIEF VIR MENSE.

“Niemand het groter liefde as dít nie, dat iemand van sy siel afstand doen ten behoewe van sy vriende.”—Johannes 15:13.

As onvolmaakte mense lyk ons toekomstige lewensvooruitsigte beslis nie goed nie. Die Bybel verduidelik: ‘Deur een mens [Adam] het die sonde in die wêreld ingekom en die dood deur die sonde, en só het die dood tot alle mense deurgedring omdat hulle almal gesondig het’ (Romeine 5:12). Ons kan nie sonder hulp die gevolg van sonde, naamlik die dood, vryspring nie.—Romeine 6:23.

Gelukkig het Jehovah uit liefde ’n oplossing voorsien vir die dilemma waarin die mensdom hulle bevind. Hy het toegelaat dat sy volmaakte en sondelose Seun, wat Jesus genoem is, ly en sterf om die losprys te voorsien wat nodig was om die mensdom uit slawerny aan sonde en die dood te bevry. Jesus, wat beweeg is deur liefde vir sy Vader en vir mense, het gewillig ingestem om dit te doen en het sy volmaakte menselewe ten behoewe van ons afgelê (Romeine 5:6-8). Hierdie onselfsugtige liefde het sy lewe sinvol gemaak.b

4. JESUS HET GEWEET DAT SY VADER HOM LIEFHET EN GOEDKEUR.

“Dit is my Seun, die geliefde, wat ek goedgekeur het.”—Matteus 3:17.

Jehovah het hierdie woorde uit die hemel gespreek toe Jesus gedoop is. Jehovah het dus openlik gesê dat hy sy Seun, Jesus, liefhet en goedkeur. Geen wonder nie dat Jesus met oortuiging kon sê: “Die Vader [het] my lief”! (Johannes 10:17). Die wete dat sy Vader hom liefhet en goedkeur, het Jesus in staat gestel om teenstand en kritiek moedig die hoof te bied. Hy het selfs kalm en in beheer van sy emosies gebly toe hy voor die dood te staan gekom het (Johannes 10:18). Die besef dat sy Vader hom liefhet en goedkeur, het Jesus se lewe ongetwyfeld sinvoller gemaak.

Ja, Jesus se lewe was sinvol. Dit is duidelik dat ons baie by hom kan leer oor hoe ons ’n waarlik sinvolle lewe kan lei. Die volgende artikel sal van die duidelike raad bespreek wat Jesus sy volgelinge gegee het oor hoe om te lewe.